1. Pesa mbandu ya ke monisa sambu na nki beto fwete landa lutwadisu ya Yehowa.

 YINDULA nde nge kele na kati ya mfinda mosi mpi nge me vila. Mfinda yango kele kibeni kigonsa sambu yo kele ti bambisi ya makasi, bansende, banti yina ke vandaka poison, mpi tu-baniama yina ke tatikaka mpi ke pesaka maladi. Diaka, yo kele ti matadi. Kansi nge ta vanda na kiese kana nge kele ti muntu mosi yina ke zaba mfinda yango mbote mpi yina ke twadisa nge sambu na kutanina nge na bigonsa yina. Nsi-ntoto yai kele bonso mfinda yina. Yo me fuluka ti bigonsa yina lenda bebisa kinduku na beto ti Yehowa. Kansi beto kele ti muntu mosi ya mbote yina ke twadisa beto, Yehowa. Yandi ke sadisa beto na kutina bigonsa yina mpi na kukwenda kisika yina beto ke kwenda, disongidila kubaka luzingu ya mvula na mvula na nsi-ntoto ya mpa.

2. Inki mutindu Yehowa ke twadisaka beto?

² Inki mutindu Yehowa ke twadisaka beto? Ntete-ntete, na nsadisa ya Biblia, Ndinga na yandi. Kansi yandi ke sadilaka mpi bantu sambu na kutwadisa beto. Mu mbandu, yandi ke sadilaka “mpika ya kwikama mpi ya mayele” yina ke pesaka beto madia ya kimpeve ya ke sadisaka beto na kubaka balukanu ya mbote. (Mat. 24:45) Yehowa ke sadilaka mpi bantu ya nkaka ya me fwana sambu na kutwadisa beto. Mu mbandu, bankengi ya nziunga mpi bankuluntu na mabundu ke pesaka beto kikesa mpi ke pesaka beto formasio yina ke sadisaka beto na kukanga ntima na bantangu ya mpasi. Beto ke pesaka Yehowa mersi mingi mutindu yandi ke twadisaka beto na bantangu yai ya nsuka ya kele mpasi mingi kibeni. Yo ke sadisaka beto na kulanda kuvanda banduku ya Yehowa mpi na kulanda kutambula na nzila ya luzingu.

3. Disolo yai ta tubila nki?

³ Ata mpidina, bantangu ya nkaka yo lenda vanda mpasi sambu beto landa lutwadisu ya Yehowa, mingi-mingi kana yandi me sadila  bantu ya kukonda kukuka sambu na kupesa beto yo. Sambu na nki? Mbala ya nkaka, kima yina bo ke songa beto na kusala kele ve yina beto ke zola kusala. To beto lenda yindula nde lutwadisu yina bo ke pesa beto kele ya kukonda mayele mpi yo me katuka ve na Yehowa. Na bantangu ya mutindu yina, beto ke vandaka ti mfunu ya kundima kibeni nde Yehowa muntu ke twadisaka bansadi na yandi mpi nde kulanda lutwadisu na yandi ke natilaka beto mambote ntangu yonso. Disolo yai ta tubila bima tatu yina ta sadisa beto na kukuma kutudila Yehowa ntima mingi (1) nki mutindu Yehowa vandaka kutwadisa bansadi na yandi na ntangu ya ntama, (2) nki mutindu yandi ke twadisaka beto bubu yai mpi (3) nki mambote beto ke bakaka kana beto ke yambula ve kulanda lutwadisu na yandi.

INKI MUTINDU YEHOWA VANDAKA KUTWADISA BANTU YA IZRAELE?

4-5. Inki mutindu Yehowa monisaka nde yandi vandaka kusadila Moize sambu na kutwadisa bantu ya Izraele? (Tala kifwanisu ya lutiti ya zulu.)

⁴ Yehowa ponaka Moize sambu na kubasisa bantu ya Izraele na Ezipte. Diaka, yandi pesaka bantu ya Izraele bidimbu yina vandaka kumonisa nde yandi muntu vandaka kusadila Moize sambu na kutwadisa bo. Mu mbandu, yandi vandaka kutula dikunzi ya dituti sambu na kutwadisa bo na ntangu mpi dikunzi ya tiya sambu na kutwadisa bo na mpimpa. (Kub. 13:21) Moize vandaka kulanda dikunzi yina mpi yo nataka yandi ti bantu ya Izraele na Nzadi-Mungwa ya Mbwaki. Kansi basoda ya Ezipte vandaka kulanda bo mpi bantu waka boma mingi sambu bo yindulaka nde bo ta fwa bo. Bo yindulaka nde Moize salaka kifu mutindu yandi nataka bo na Nzadi-Mungwa ya Mbwaki. Kansi yo vandaka ve kifu. Yehowa muntu sadilaka Moize sambu na kunata bantu ya Izraele kuna. (Kub. 14:2) Na nima, yandi gulusaka bo na mutindu mosi ya kuyituka.​—Kub. 14:26-28.

⁵ Kiteso ya bamvula 40 yina landaka na nima, Moize vandaka kulanda dikunzi ya dituti yina, sambu na kutwadisa bansadi ya Nzambi na ntoto ya zelo na zelo. a Bantangu ya nkaka, Yehowa vandaka kutula dikunzi yina na zulu ya tenta ya Moize, kisika yina bantu yonso ya Izraele lendaka kumona yo. (Kub. 33:7, 9, 10) Na dikunzi yina, Yehowa vandaka kusolula ti Moize mpi Moize vandaka kusonga bantu ya Izraele mambu yina Yehowa vandaka kusonga yandi. (Nk. 99:7) Bantu ya Izraele vandaka kumona na pwelele yonso nde Yehowa vandaka kusadila Moize sambu na kutwadisa bo.

6. Keti bantu ya Izraele ndimaka lutwadisu ya Yehowa? (Kutanga 14:2, 10, 11)

⁶ Diambu ya mawa kele nde bantu mingi ya Izraele, vandaka ve kundima bidimbu ya pwelele yina vandaka kumonisa nde Yehowa muntu vandaka kusadila Moize sambu na kutubila bo. (Tanga Kutanga 14:2, 10, 11.) Mbala mingi, bo vandaka kundima mpi ve nde Yehowa muntu vandaka kusadila Moize sambu na kutwadisa bo. Yo yina, Yehowa buyaka nde bantu yina ya Izraele ta kota ve na Ntoto ya Lusilu.​—Kut. 14:30.

7. Pesa bambandu ya bantu yina landaka lutwadisu ya Yehowa. (Kutanga 14:24) (Tala mpi kifwanisu ya ke wakana ti paragrafe yai.)

⁷ Kansi, bantu ya nkaka ya Izraele landaka lutwadisu ya Yehowa. Mu mbandu, Yehowa tubaka nde “Kalebi . . . landaka kusadila mono na ntima ya mvimba.” (Tanga Kutanga 14:24.) Yandi sakumunaka Kalebi mpi yandi pesaka yandi nswa ya kupona konso kisika yina yandi zolaka kuzinga na ntoto ya Kanana. (Yoz. 14:12-14) Bantu ya nkaka ya Izraele yina kotaka na ntoto ya lusilu, kele mpi bambandu ya mbote na yina me tala kulanda lutwadisu ya Yehowa. Ntangu Yehowa ponaka Yozue sambu na kuyinga Moize, bantu yina ya Izraele “vandaka kuzitisa yandi mingi na luzingu na yandi ya mvimba.” (Yoz. 4:14) Yo yina, Yehowa sakumunaka bo mpi yandi nataka bo na ntoto yina yandi silaka nde yandi ta pesa bo.​—Yoz. 21:43, 44.

8. Tubila mutindu Yehowa vandaka kutwadisa bantu na yandi na ntangu ya bantotila. (Tala mpi kifwanisu ya ke wakana ti paragrafe yai.)

 ⁸ Bamvula mingi na nima, Yehowa tulaka bazuzi sambu na kutwadisa bantu na yandi. Na nima, na ntangu ya bantotila, Yehowa tulaka baprofete sambu na kutwadisa bantu na yandi. Bantotila yina vandaka kusadila Yehowa na mutindu ya mbote, vandaka kulanda bandongisila ya Baprofete. Mu mbandu, ntotila Davidi ndimaka na kudikulumusa yonso mambu yina profete Natani tubaka sambu na kuvutula yandi na nzila. (2 Sam. 12:7, 13; 1 Bans. 17:3, 4) Ntotila Yehoshafati landaka lutwadisu yina profete Yahaziele pesaka mpi yandi songaka bantu ya Yuda na ‘kukwikila na baprofete ya Nzambi.’ (2 Bans. 20:14, 15, 20) Ntangu ntotila Ezekiasi kutanaka ti diambu mosi ya mpasi, yandi lombaka profete Yezaya lusadisu. (Yez. 37:1-6) Konso ntangu yina bantotila vandaka kulanda lutwadisu ya Yehowa, yandi vandaka kusakumuna bo mpi kutanina bantu na yandi. (2 Bans. 20:29, 30; 32:22) Bantu yonso lendaka kumona na pwelele yonso nde Yehowa vandaka kusadila baprofete sambu na kutwadisa bantu na yandi. Kansi bantotila mingi mpi bantu mingi ya Izraele vandaka kuwila ve baprofete.​—Yer. 35:12-15.

MUTINDU YEHOWA VANDAKA KUTWADISA BAKRISTU YA MVU-NKAMA YA NTETE

9. Banani Yehowa vandaka kusadila sambu na kutwadisa Bakristu na mvu-nkama ya ntete? (Tala mpi kifwanisu ya ke wakana ti paragrafe yai.)

⁹ Yehowa salaka dibundu ya Bukristu na mvu-nkama ya ntete ya Ntangu na Beto. Inki mutindu yandi vandaka kutwadisa Bakristu yina ya ntete? Yandi tulaka Yezu mfumu ya dibundu. (Baef. 5:23) Kansi, Yezu vandaka kusonga ve konso longoki mambu yina yandi fwete sala. Yandi vandaka kusadila bantumwa mpi bankuluntu na Yeruzalemi sambu na kutwadisa dibundu. (Bis. 15:1, 2) Diaka, bo vandaka kutula bankuluntu sambu na kutwadisa mabundu.​—1 Bate. 5:12; Tito 1:5.

10. (a) Keti Bakristu mingi ya mvu-nkama ya ntete vandaka kundima lutwadisu yina bo vandaka kupesa bo? (Bisalu 15:30, 31) (b) Sambu na nki na ntangu ya ntama, bantu ya nkaka vandaka kundima ve bantu yina Yehowa vandaka kusadila sambu na kutwadisa bo? (Tala lupangu “ Sambu na Nki Bantu ya Nkaka Ke Ndimaka Ve nde Yehowa Ke Sadilaka Bantu Sambu na Kutwadisa Bansadi na Yandi?”)

¹⁰ Keti Bakristu yango vandaka kundima lutwadisu yina? Mingi vandaka kundima lutwadisu yango na kiese yonso. Nkutu, “bo waka kiese sambu na bangogo yina vandaka kupesa kikesa” yina bo vandaka kusonga bo. (Tanga Bisalu 15:30, 31.) Ebuna,  nki mutindu Yehowa ke twadisaka bansadi na yandi na ntangu na beto?

INKI MUTINDU YEHOWA KE TWADISAKA BETO BUBU YAI?

11. Pesa mbandu mosi ya ke monisa mutindu Yehowa twadisaka bansadi na yandi na bilumbu ya me luta.

¹¹ Yehowa ke landa kutwadisa bansadi na yandi bubu yai. Yandi ke sadilaka Ndinga na yandi mpi Mwana na yandi yina kele mfumu ya dibundu. Keti kele ti bidimbu ya pwelele yina ke monisa nde Nzambi ke landa kusadila bantu sambu na kutwadisa beto mpi bubu yai? Ee. Mu mbandu, beto tadila mambu yina salamaka na bamvu 1800. Mpangi Charles Taze Russell ti banduku na yandi yantikaka kubakisa nde mvula 1914 ta vanda mvula mosi ya mfunu sambu na Kimfumu ya Nzambi. (Dan. 4:25, 26) Sambu na kubakisa yo, bo salaka bansosa na Biblia mpi bo ndimaka kibeni nde baprofesi na yo ta lungana. Keti Yehowa vandaka kutwadisa bansosa yina bo vandaka kusala na Biblia? Ee. Mambu yina salamaka na 1914 monisaka kibeni nde Kimfumu ya Nzambi me yantika kuyala. Na mvula yina, bitumba ya ntete ya ntoto ya mvimba yantikaka mpi na nima bipupa, kunikana ya ntoto mpi nzala landaka. (Luka 21:10, 11) Yehowa vandaka kusadila Bakristu yina ya ntima-masonga sambu na kusadisa bansadi na yandi.

12-13. Inki bampangi yina vandaka ti mikumba na organizasio ya Yehowa salaka na Bitumba ya Zole ya Ntoto ya Mvimba sambu na kumwanga nsangu ya mbote?

¹² Beto tadila mpi mambu yina salamaka na Bitumba ya Zole ya Ntoto ya Mvimba. Bampangi yina vandaka ti mikumba na babiro ya ke twadisaka kisalu na ntoto ya mvimba, longukaka Kusonga 17:8. Bo bakisaka nde bitumba yina ta nata ve na bitumba ya Armagedoni kansi na nima na yo, nsungi mosi ya ngemba ta kota mpi yo ta sala nde Bambangi ya Yehowa kulonga bantu mingi nsangu ya mbote. Bampangi yina vandaka ti mikumba na organizasio ya Yehowa kangulaka nzo-nkanda ya Gileadi sambu na kupesa formasio na bamisionere yina ta longa nsangu ya mbote na ntoto ya mvimba, ata yo monanaka bonso nde yo vandaka ve ngindu ya mbote na ntangu yina. Bo tindaka bamisionere na bansi ya nkaka ata na ntangu ya bitumba. Diaka, mpika ya kwikama kangulaka na mabundu yonso nzo-nkanda mosi yina bo bingaka Cours pour le ministère théocratique. b Yo vandaka sambu na kusadisa bampangi yonso na kukuma kulonga mbote nsangu ya mbote. Mambu yina yonso sadisaka bansadi ya Nzambi sambu na kuyilama sambu na kisalu ya nene yina vandaka kuvingila bo.

 ¹³ Bubu yai, beto ke bakisaka na pwelele yonso nde Yehowa muntu vandaka kutwadisa bansadi na yandi na ntangu yina ya mpasi. Banda na Bitumba ya Zole ya Ntoto ya Mvimba, Bambangi ya Yehowa ke longaka nsangu ya mbote na bansi mingi. Ya kieleka, bo ke longaka nsangu ya mbote na ntoto ya mvimba mpi yo me salaka nde bantu mingi kuzaba Yehowa.

14. Sambu na nki beto fwete tula ntima na lutwadisu yina organizasio ya Yehowa mpi bankuluntu ke pesa beto? (Kusonga 2:1) (Tala mpi kifwanisu ya ke wakana ti paragrafe yai.)

¹⁴ Bubu yai, bampangi yina ke salaka na Nto-Kimvuka ke sosaka lutwadisu ya Kristu. Bo ke zolaka nde mambu yina bo ke songa bampangi na kusala kuwakana ti bangindu ya Yehowa mpi ya Kristu. Diaka, bankengi ya nziunga mpi bankuluntu ke pesaka lutwadisu na mabundu. c Bakristu yina bo me tulaka mafuta ya kele bankuluntu mpi bankuluntu yonso ya nkaka kele “na diboko . . . ya kitata” ya Kristu. (Tanga Kusonga 2:1.) Ya kieleka, bankuluntu yango kele bantu ya kukonda kukuka mpi bo ke salaka bifu. Moize, Yozue mpi bantumwa salaka mpi bifu bantangu ya nkaka. (Kut. 20:12; Yoz. 9:14, 15; Bar. 3:23) Diaka, yo ke monana pwelele nde Kristu ke twadisa mbote-mbote mpika ya kwikama ti bankuluntu, mpi yandi ta landa kusala yo “bilumbu yonso tii na nsukilu ya ngidika ya bima.” (Mat. 28:20) Yo yina, beto kele ti bikuma ya mbote ya kutula ntima na lutwadisu yina yandi ke pesa beto na nzila ya bampangi yina.

BETO KE BAKAKA MAMBOTE NTANGU BETO KE YAMBULAKA VE KULANDA LUTWADISU YA YEHOWA

15-16. Bambandu ya bampangi yina landaka lutwadisu ya Yehowa ke longa beto nki?

¹⁵ Kana beto ke yambula ve kulanda lutwadisu ya Yehowa, beto ke bakaka mambote banda bubu yai. Mu mbandu, mpangi Andy ti nkento na yandi Robyn landaka lutwadisu ya mpika ya kwikama ya kuvanda ti luzingu ya kukonda mindondo. (Mat. 6:22) Yo yina, bo kumaka bavolontere sambu na kutunga Banzo ya Kimfumu mpi bisika na beto ya nkaka ya lusambu. Mpangi-nkento Robyn ke tuba nde: “Bantangu ya nkaka beto vandaka kuzinga na bisika mosi ya fioti, yina vandaka nkutu ve ti kisika ya kulamba. Mpi yo lombaka nde mono teka bima mingi yina mono vandaka kusadila sambu na kukanga bafoto, ata mono vandaka kusepela mingi kukanga bafoto. Mono dilaka ntangu mono tekaka yo. Kansi bonso Sara, nkento ya Abrahami, mono bakaka lukanu ya kutala kaka na ntwala kansi ve na nima.” (Baeb. 11:15) Inki mambote bo bakaka? Mpangi Robyn ke tuba nde: “Beto ke vandaka na kiese ya mingi sambu beto ke zaba nde beto ke salaka yonso yina beto lenda sala na kisalu ya Yehowa.  Ntangu beto ke salaka kisalu ya Yehowa, beto ke bakisaka mwa fioti mutindu luzingu ta vanda na nsi-ntoto ya mpa.” Mpangi Andy ke ndima mpi mambu yina, yandi ke tuba nde: “Beto ke vandaka na kiese ya mingi sambu beto ke sadilaka ngolo na beto yonso mpi ntangu na beto yonso sambu na mambote ya Kimfumu.”

¹⁶ Inki kele mutindu ya nkaka ya beto ke bakaka mambote kana beto ke yambula ve kulanda lutwadisu ya Yehowa? Na nima ya kumanisa nzo-nkanda, mpangi-nkento Marcia zolaka kibeni kulanda ndongisila ya kusala kisalu ya ntangu yonso. (Mat. 6:33; Bar. 12:11) Yandi ke tuba nde: “Bo pesaka mono dibaku ya kulonguka bamvula iya na iniversite kukonda kufuta ata kima. Kansi, mono zolaka kulungisa balukanu na mono ya kimpeve. Yo yina, na kisika ya kundima kukota na iniversite, mono bakaka lukanu ya kubaka formasio mosi sambu na kulonguka kisalu mosi yina zolaka kusadisa mono na kuzwa mwa mbongo yina ta sadisa mono na kisalu ya kimupasudi-nzila. Yo kele na kati ya balukanu ya kuluta mbote yina mono me bakaka. Bubu yai, mono ke sepelaka mingi ti kisalu na mono ya kimupasudi-nzila. Diaka, manaka na mono ya kisalu ke pesaka mono nswa ya kupesa maboko na Betele mpi mono ke salaka mambu mingi ya nkaka ya mbote sambu na Yehowa.”

17. Inki mambote ya nkaka beto ke bakaka kana beto ke yambula ve kulanda lutwadisu ya Yehowa? (Yezaya 48:17, 18)

¹⁷ Bantangu ya nkaka, organizasio ya Yehowa ke pesaka beto bandongisila yina ke taninaka beto. Mu mbandu, yo ke kebisaka beto na kuzola ve mbongo to na kusala ve mambu yina lenda pusa beto na kufwa minsiku ya Nzambi. Na mambu yina mpi, beto ke bakaka mambote kana beto ke landa lutwadisu ya Yehowa. Beto ke vandaka ti kansansa ya bunkete mpi beto ke kuditaninaka na mambu mingi ya mbi. (1 Tim. 6:9, 10) Yo ke salaka nde beto landa kusadila Yehowa na ntima na beto ya mvimba mpi yo ke pesaka beto kiese mpi ngemba ya mingi.​—Tanga Yezaya 48:17, 18.

18. Sambu na nki nge fwete yambula ve kulanda lutwadisu ya Yehowa?

¹⁸ Ntembe kele ve nde Yehowa ta landa kusadila bantu sambu na kutwadisa bansadi na yandi na mpasi ya nene mpi na Luyalu ya Bamvula Funda. (Nk. 45:16) Beto ta yambula ve kulanda lutwadisu na yandi ata ntangu yo ke lomba nde beto sala mambu ya nkaka yina beto ke sepela ve kusala. Yo ta vandila beto pete na kusala yo kana beto ke landa lutwadisu ya Yehowa banda bubu yai. Yo yina beto landa ntangu yonso lutwadisu ya Yehowa, yo vanda yina yandi ke pesa beto na nzila ya bantu yina yandi me tulaka sambu na kukeba beto. (Yez. 32:1, 2; Baeb. 13:17) Kana beto ke sala mpidina, beto kele ti kikuma ya mbote ya kutula ntima na Yehowa Ntwadisi na beto, sambu yandi ke tanina beto na bigonsa yina lenda bebisa kimpeve na beto mpi yandi ke twadisa beto sambu na kubaka luzingu ya mvula na mvula na nsi-ntoto ya mpa.