1. Mukonda dyahi twabhindamena Jihova phala kutwendesa? Ta kifika.

 XINGANEKA kwila eye wajimbidila mu muxitu, mwala ilwezu yavulu, kala jinyoka, ibamba i numata, mixi yezala ni minya, ni mavu ezala ni matadi. Maji eye weji sanguluka kyavulu se kumoneka muthu wejiya kyambote o muxitu phala kukwendesa. O muthu yu wejiya se kwebhi kwala o ilwezu, yu wala polondo phala ku kukwatekesa. O mundu mutwala wadifu ni muxitu yu. Wezala ni ilwezu itena kuzanga benge-benge o ukamba wetu ni Jihova. Maji etu twala ni mwendexi wayuka—Jihova. Mwene utukwatekesa kulenga o ilwezu ni kutwambata kate bhu mbambe yetu—ya kutambula o mwenyu wa kalelaku ku mundu wa ubhe.

2. Kyebhi Jihova kyene mutwendesa?

² Kyebhi Jihova kyene mutwendesa? Kya dyanga mwene utwendesa bhukaxi ka Mak’a me, o Bibidya. Maji mwene utwendesa we bhukaxi ka jiselevende je mu ixi. Mu kifika, bhukaxi ka “kimbadi kya fiyele kya dimuka,” Jihova utubhana kudya mu nzumbi kutukwatekesa kubhanga o ima ni unjimu. (Mat. 24:45) Jihova utwendesa we bhukaxi ka mayala amukwa akulu mu nzumbi. Mu kifika, tufunga twa ilunga ni tufunga mu ilunga, ene mutuswinisa ni kutubhana itendelesu itukwatekesa kudibhana ni ibhidi. Tusakidila kyavulu mu kwijiya kwila twala ni Jihova phala kutwendesa kyambote mu izuwa yiyi yabhonzo yasukidilaku ya mundu yu! Kiki kitukwatekesa kusuluka mu kukala tu makamba a Jihova ni kukolokota mu njila ya mwenyu wa kalelaku.

3. Ihi itwanda dilonga mu milongi yiyi?

³ Maji sayi ithangana, kitena kutubhonza kukayela o itendelesu ya Jihova, benge-benge se atubhana-nayu ku mayala akwa ituxi we kala etu. Mukonda dyahi? Mukonda etu nange kitwawabhela o itendelesu yatubhana. Mba-phe, nange tudivwa kwila o itendelesu yatubhana ki ya unjimu, ni kwila kiyatundu we kwa Jihova. Mu  ithangana kala yiyi, twabhingi kudyelela kwila Jihova mwene wa mukwendesa o mundu we, ni kwila o kukayela o itendelesu ye kutubhekela ngo mbote. Phala kutukwatekesa kukolesa o kidyelelu kyetu, mu milongi yiyi twanda dilonga (1) kyebhi Jihova kyendesa o mundu we m’ukulu, (2) kyebhi kyamukwendesa o mundu we lelu, ni (3) mbote yebhi itukatula kyoso ki tukayela jinga o itendelesu ye.

KYEBHI JIHOVA KYENDESA O KIFUXI KYA IZALAYELE

4-5. Kyebhi Jihova kyalondekesa kwila wexile mukwendesa akwa Izalayele bhukaxi ka Mozé? (Tala ofoto yakapa.)

⁴ Jihova wa solele Mozé phala kwendesa o kifuxi kya Izalayele n’atunde ku ixi ya Ijitu. Jihova wabhana ijimbwete kwa akwa Izalayele phala ku akwatekesa kumona kwila Mwene wexile mwa endesa bhukaxi ka Mozé. Mu kifika, Mwene wa abhana philadi ya dituta mu mwanya, ni philadi ya túbhya mu usuku. (Mak. 13:21) Mozé wakayela o philadi. Yene ya mwendesa mwene ni kifuxi kya Izalayele kate ku Kalunga ka Kusuka. Maji bhenyobho, o akwa Ijitu akayela ku dima dya akwa Izalayele. Kyenyiki, akwa Izalayele exile ni woma wavulu mukonda afikile kwila eji ku a jibha ku akwa Ijitu. Ene abanzele kwila Mozé wa lwezele mu ku ambata ku Kalunga ka Kasuka. Maji mwene kalwezele, kana. Mukonda Jihova mwene wa tendelesele Mozé phala kuya bhu kididi kyenyokyo. (Mak. 14:2) Nzambi wa abhulula mu ukexilu wa katunda ka ufikile.—Mak. 14:​26-28.

⁵ Mu 40 a mivu, Mozé wasuluka mu kukayela o philadi ya dituta phala kwendesa o mundu wa Nzambi mu kikangalakata. a Sayi kithangana, Jihova wabhangesa kwila o philadi ya dituta imana ku thandu dya balaka ya Mozé. Bhenyobho o kifuxi kyoso kya Izalayele a tenene ku imona. (Mak. 33:​7, 9, 10) Jihova wexile muzwela ni Mozé tunde bhu philadi ya dituta, mwene yu wexile mutangela o mundu o ima yoso yexile muzwela Jihova. (Jisá. 99:7) Kwexile ima yavulu yejibhangesa akwa Izalayele kuxikina kwila Jihova wexile mwa endesa bhukaxi ka Mozé.

6. Yalungu ni ukexilu wexile mwa endesa kwa Jihova, ihi yabhange akwa Izalayele? (Dyalwilu 14:​2, 10, 11)

⁶ Maji tuluwala mu kwijiya kwila avulu ku kifuxi kya Izalayele kaxikinine kwila Jihova wexile muzwela-nawu bhukaxi ka Mozé. (Tanga Dyalwilu 14:​2, 10, 11.) Muveji javulu ene kaxikina kwila Jihova wexile mwa endesa bhukaxi ka Mozé. Mukonda dya kiki, Jihova kehela kwila ene a bokona mu Ixi ya Akanene.—Dya. 14:30.

7. Bhana phangu ya athu akayela o itendelesu ya Jihova. (Dyalwilu 14:24) (Tala we ofoto )

⁷ Maji, amoxi ku kifuxi kya Izalayele axikina o ukexilu wa Jihova wa kwa endesa. Mu kifika, Jihova wambe: “Kalebe . . . wa ngi kayela sê ngó kufula.” (Tanga Dyalwilu 14:24.) Nzambi wa besowala Kalebe, kate wa mwehela kusola o kididi kwa mesenene kutunga mu Ixi ya Akanene. (Josu. 14:​12-14) O akwa Izalayele a ehele kubokona mu Ixi ya Akanene, a bhana we phangu yambote ya kukayela o itendelesu ya Jihova. Kyoso Jozuwé kya bhingana Mozé kala mwendexi wa akwa Izalayele, ene “akexile mu muxila kyavulu ku mwenyu wê woso.” (Josu. 4:14) Mukonda dya kiki, Jihova wa abesowala, yu wa abhixidisa mu ixi ya akanene o ku abhana.—Josu. 21:​43, 44.

8. Jimbulula kyebhi Jihova kyendesa o mundu we mu izuwa ya jisobha. (Tala we ofoto )

⁸ Mivu ku pholo, Jihova wasolo afundixi phala kwendesa o mundu we. Ku pholo dya kwenda, mu izuwa ya jisobha, Jihova wasolo jipolofeta phala kwendesa o mundu we. O jisobha ja fiyele, exile mu kayela o itendelesu ya jipolofeta.  Mu kifika, Sobha Davidi, ni kulenduka kwoso waxikina kyoso kyamubazela kwa polofeta Natane. (2 Sam. 12:​7, 13; 1 Mal. 17:​3, 4) Sobha Jozafate wakayela o itendelesu ya mubhana polofeta Jehaziyele, anga waswinisa o mundu wa Judá ‘kuxikina ku jipolofeta ja Nzambi.’ (2 Mal. 20:​14, 15, 20) Kyoso kya dibhana ni maka a bhonzo, Sobha Ezekiya wabhingi kikwatekesu kwa polofeta Izaya. (Iza. 37:​1-6) Kyoso o jisobha kyexile mukayela o itendelesu ya Jihova, mwene wexile mu a besowala ni kulanga o kifuxi kyoso. (2 Mal. 20:​29, 30; 32:22) Athu oso atokalele kumona kwila Jihova wexile mu kwendesa o mundu we bhukaxi ka jipolofeta. Maji ne kiki, jisobha javulu ni athu avulu mu Izalayele, kaxikina ku jipolofeta ja Jihova.—Jel. 35:​12-15.

KYEBHI JIHOVA KYENDESA O JIKIDISTÁ JA DYANGA

9. Jihova wendesa o Jikidistá ja dyanga bhukaxi ka nanyi? (Tala we ofoto )

⁹ Kyoso kyafununa Jezú, Jihova wasokejeka o kilunga kya Jikidistá. Kyebhi mwene kyendesa o Jikidistá mu kithangana kyenyokyo? Mwene wasolo Jezú kala mutwameni wa kilunga. (Efe. 5:23) Maji Jezú kakexile muzwela ku muthu ni muthu, mu kumutangela ihi ya tokalele o kubhanga. Mwene wasolo o jipoxolo ni tufunga mu Jeluzaleme phala akele kupholo mu kwendesa o Jikidistá. (Ika. 15:​1, 2) Mu ilunga we exile musola-mu tufunga phala ku yendesa.—1 Te. 5:12; Tit. 1:5.

10. (a) Kyebhi kyexile mudivwa o Jikidistá ja dyanga yalungu ni itendelesu yexile mu abhana? (Ikalakalu 15:​30, 31) (b) Mukonda dyahi amoxi m’ukulu kaxikina o athu a asolele kwa Jihova phala kwendesa o mundu we? (Tala o kaxa “ Mukonda Dyahi Amoxi Adituna o Kidi Kya Kwila Jihova wa Mukwendesa o Mundu we Bhukaxi ka Athu mu Ixi.”)

¹⁰ O kwila o Jikidistá mu izuwa ya jipoxolo axikina kwa endesa mu ukexilu yu? Avulu a sangulukile mu kukayela o itendelesu yexile mu tambula. Mu kidi, ene “asanguluka ni kiswinisu” kya a bhanene. (Tanga Ikalakalu 15:​30, 31.) Kyebhi Jihova kyene mukwendesa o mundu we mu izuwa yetu?

KYEBHI JIHOVA KYA MUTWENDESA LELU

11. Bhana phangu ilondekesa kyebhi Jihova kyene mu kwendesa o athu ala ku pholo mu kilunga kye mu kithangana kyetu.

¹¹ Jihova wamusuluka mu kwendesa o mundu we lelu. Mwene wamubhanga kiki bhukaxi ka Bibidya ni ka Mon’e Jezú, o mutwameni wa kilunga. O kwila twene mumona we kwila Jihova wamusuluka  mu kwendesa o mundu we bhukaxi ka athu mu ixi? Kyene mwene. Mu kifika, xinganeka mu ima yabhiti kyoso kyabhiti o muvu wa 1870. Phange Charles Taze Russell ni makamba me, a mateka kutendela kwila ku muvu wa 1914, kweji bhita ima ya katunda yalungu ni Utuminu wa Nzambi. (Dan. 4:​25, 26) Ene a tendela o maka enya, mukonda a tokwesa mu Bibidya, ya adyelele kwila eji mona o kikumbidilu kya ikanenu. O kwila Jihova wexile mwa endesa mu kikalakalu kya kutokwesa o Bibidya? Se phata wakexile. O ima yabhiti ku mundu ku muvu wa 1914 ya londekesa ni kidi kyoso kwila o Utuminu wa Nzambi wa matekene o kutumina. O Ita ya dyanga yabhiti ku mundu woso yamateka, kwa kayela o mauhaxi, itungutu ya ixi, ni nzala. (Luk. 21:​10, 11) Mu kidi, Jihova wexile mukwatekesa o adilongi a Bibidya phala kwendesa o mundu we.

12-13. Ihi yabhange o jiphange exile kupholo, phala kubhanga kyambote o kikalakalu kya kuboka, mu kithangana kya Ita ya Kayadi yabhiti ku mundu woso?

¹² Xinganeka we mu ima yabhiti mu kithangana kya Ita ya Kayadi yabhiti ku mundu woso. O jiphange exile kupholo ku mbonge yetu, a dilongo o divulu dya Dijingunwinu 17:8. Mu kudilonga kwa, atendela kwila o Ita ya Kayadi kiyeji kwambata ku Alumajedone. Maji kweji kala kithangana kya paze, kyeji kwatekesa o mundu wa Jihova kuboka o njimbu yambote ku athu avulu. Sumbala kyedile kala kikima kya unjimu mu kithangana kyenyokyo, o jiphange exile ku pholo a mateka o xikola ya Ngiliyade phala kulonga jiphange n’aye muboka ni kulonga athu mu ngongo yoso. O akunji a jixi jengi exile mu atumikisa ne mwene mu ithangana ya ita. Ku pholo dya kwenda, o kimbadi kya fiyele kya sokejeka o xikola a ixanene Curso de Ministério Teocrático b phala kukwatekesa o aboki oso mu ilunga kukituka alongexi ambote. Mu kubhanga kiki, o mundu wa Nzambi exile mu a pelepalala phala o kikalakalu kya kuboka kyabhingile hanji o kubhanga.

¹³ Lelu, tutena kumona ni kidi kyoso kwila, Jihova wexile mu kwendesa o mundu we mu kithangana kyenyokyo kyabhonzele. Tunde kyabhiti o Ita ya Kayadi, o mundu wa Jihova mu jixi javulu, ala ni ufolo phala kuboka. Mu kidi, avulu ene mu kwijiya Jihova, ni kwila o jiselevende je a muboka mu ixi yoso.

14. Mukonda dyahi tutena kudyelela mu itendelesu itubhana o kilunga kya Jihova ni ya tufunga? (Dijingunwinu 2:1) (Tala we ofoto )

 ¹⁴ Lelu, o jiphange atokala ku Kibuka Kya Utuminu, ene musuluka mu kukayela o itendelesu ya Kidistu. Ene a mesena kwila o itendelesu ya abhana ku jiphange, ilunga ni vondadi ya Jihova. Ene a bhana itendelesu ku ilunga bhukaxi ka tufunga twa ilunga ni tufunga. c O tufunga twala “bhu lukwaku lwa kadilu” lwa Kidistu. (Tanga Dijingunwinu 2:1.) Kidi kwila, o tufunga twoso akwa ituxi ni kwila, ene mulweza. Mozé, Jozuwé ni jipoxolo, sayi ithangana alwezele we. (Dya. 20:12; Josu. 9:​14, 15; Lom. 3:23) Maji ne kiki, tutena kumona ni kidi kyoso kwila Jezú wa mukwendesa o kimbadi kya fiyele ni tufunga, ni kwila wanda suluka mu kubhanga kiki “izuwa yoso, katé ku dizubhilu dya mundu.” (Mat. 28:20) Kyenyiki, tutena kudyelela mu itendelesu ya mutubhana Kidistu bhukaxi ka jiphange jiji a asolo phala kukala ku pholo.

TU KATULA MBOTE KYOSO KI TUSULUKA MU KUKAYELA O ITENDELESU YA JIHOVA

15-16. Ihi iwadilongo ku phangu ya jiphange a kayela o itendelesu ya Jihova?

¹⁵ Kyoso ki tusuluka mu kukayela o itendelesu ya Jihova, tu katula mbote ne mwene kindala. Mu kifika, phange Andy ni muhatu we Robyn a kayela o kitendelesu kya kimbadi kya fiyele kyalungu ni kusosolola o ima ku mwenyu wa. (Jih. 13:5) Mu kubhanga kiki, ene atena kukwatekesa mu ikalakalu ya kutunga ya kilunga kya Jihova. Phange Robyn wambe: “Sayi ithangana twexile mukala mu jinzo jofele, sayi bhabha kijexile ne ngo ni kididi phala kulambela-mu. Eme we nga sumbisa jifalamenda javulu ji ngexile mukalakala naju phala kuxabula jifoto, sumbala ngawabhelele kyavulu o kikalakalu kiki. O kusumbisa o imbamba yiyi kwa ngibhangesa kudila. Maji kala kyabhange o muhatu wa Mbalahamu, Sala, eme nga mesenene kudikwatenena kana mu ima ingaxisa kudima, maji mu ima yala ku pholo.” (Jih. 11:15) Mbote yebhi ya katula o dikaza didi? Phange Robyn wambe: “Etu twa sanguluka kyavulu mukonda twejiya kwila twa mubhana kwa Jihova yoso itwala-nayu. Kyoso mwadi wami n’eme ki tubhanga o kikalakalu ki tubhana Jihova, ki tubhangesa kuxinganeka kyebhi kyanda kala o mwenyu ku mundu wa ubhe.” Mwadi we Andy, wambe: “Etu twa sanguluka mukonda twa mubhana o kithangana kyetu kyoso ni nguzu yetu mu kikalakalu kya Jihova.”

¹⁶ Mu ukexilu webhi dingi tu katula mbote kyoso ki tusuluka mu kukayela o itendelesu ya Jihova? Mu kifika, kyoso kyazubha kudilonga o  xikola ya kaxi, phange Marcia wa mesenene kyavulu kukayela o kitendelesu kya mubhanene, kya kukala muboki wa thembu yoso. (Mat. 6:33; Lom. 12:11) Mwene wambe: “Eme a ngibhanene o ujitu wa kudilonga mivu iwana mu xikola ya katunda sé kufuta kima. Maji nga mesenene kusuwa jimbambe mu nzumbi. Kyenyiki, muveji dya kuxikina kubhanga o xikola ya katunda, ngasolo kudilonga ufunu weji kungikawatekesa kukalakala ni kunganyala kitadi kyasoko phala kudidikila mu sidivisu ya thembu yoso. Ngabhange kyambote mu kusola o ima mu ukexilu yu. Kindala nga sanguluka mu kukala muboki wa thembu yoso. Ku mbandu yamukwa, kuma ngala dingi ni kithangana, ngene mutena kukwatekesa mu ikalakalu ku Betele ni kubhanga ima yamukwa yakatunda mu sidivisu ya Jihova.”

17. Mbote yebhi dingi itukatula kyoso ki tusuluka mu kukayela o itendelesu ya Jihova? (Izaya 48:​17, 18)

¹⁷ Sayi ithangana, o kilunga kya Jihova kyene mutubhana itendelesu yene mutulanga. Mu kifika, ene mutudimuna ku kilwezu kya kuzola o kitadi ni kya kubhanga ima yeji tubhangesa kubhukumukina o itumu ya Jihova. Kyoso ki tukayela o itendelesu ya Jihova mu maka ya, tukatula mbote yavulu. Tukala ni kitongolwelu kya zele, anga tulenga kudita mu ibhidi yavulu. (1 Ti. 6:​9, 10) Mu kubhanga kiki, tutena kubheza Jihova ni muxima woso. Kiki ki tubhekela kusanguluka ni kutululuka.—Tanga Izaya 48:​17, 18.

18. Mukonda dyahi eye wamesena kusuluka mu kukayela o itendelesu ya Jihova?

¹⁸ Se phata kwila Jihova wanda suluka mu kwendesa o mundu we bhukaxi ka athu mu ixi, mu kithangana kya hadi ya dikota ni mu kithangana kya Utuminu wa Midi ya Mivu wa Jezú. (Jisá. 45:16) O kwila twanda suluka mu kukayela o itendelesu yiyi, ne mwene se ku muxima wetu twamesena kubhanga o ima mu ukexilu wengi? Kikyanda tubhonza kubhanga kiki, se tukala kya ni kifwa kya kukayela o itendelesu ya Jihova kindala. Mu kiki, twanda suluka jinga mu kukayela o itendelesu itubhana Jihova bhukaxi ka Bibidya ni ka jiphange jasolo mwene phala kutulanga. (Iza. 32:​1, 2; Jih. 13:17) Tutena kudyelela ni muxima woso kwa Mwendexi wetu, Jihova, mukonda mwene utwendesa mu njila ikolesa o ukamba wetu ni mwene, anga wanda twambata kate ku mwenyu wa kalelaku.