1. Wetin mek wi nid Jiova fɔ gayd wi? Gi wan ɛgzampul.

 IMAJIN se yu de insay bush ɛn yu nɔ no usay fɔ go. I nɔ sef fɔ de na di bush bikɔs wayl animal dɛn, plant ɛn insɛkt dɛn we gɛt pɔyzin de de, ɛn sɔntɛm yu go ivin fɔdɔm insay ol. Yu go rili gladi if yu gɛt pɔsin we de dayrɛkt yu we rili sabi di ples, we no usay di denja de, ɛn we go ebul ɛp yu fɔ avɔyd am! Dis wɔl tan lɛk da bush de. I gɛt bɔku bad tin dɛn we go ambɔg wi padi biznɛs wit Jiova. Bɔt wi gɛt pafɛkt Pɔsin we de gayd wi, we na Jiova. I de gayd wi fɔ mek wi nɔ go usay denja de, ɛn i de dayrɛkt wi fɔ waka na di rod we go mek wi gɛt layf we go de sote go insay di nyu wɔl.

2. Aw Jiova de gayd wi?

² Aw Jiova de gayd wi? Di men tin we i de yuz fɔ gayd wi na in Wɔd, di Baybul. Bɔt, i de yuz mɔtalman dɛn bak fɔ gayd wi. Fɔ ɛgzampul, i de yuz “di slev we fetful ɛn gɛt sɛns” fɔ gi wi spirichwal it we go ɛp wi fɔ disayd fɔ du di rayt tin dɛn. (Mat. 24:45) Jiova de yuz ɔda man dɛn bak fɔ gayd wi. Fɔ ɛgzampul, sakit ovasia dɛn ɛn ɛlda dɛn na di kɔngrigeshɔn de gi wi ɛnkɔrejmɛnt ɛn dayrɛkshɔn dɛn we de ɛp wi di tɛm dɛn we tin nɔ rili izi. Wi rili gladi fɔ dis fayn we aw Jiova de kɔntinyu fɔ gayd wi insay dis las dez we tin rili tranga! Dis de ɛp wi fɔ kɔntinyu fɔ bi Jiova in padi so dat wi go ebul fɔ ɛnjɔy layf naw ɛn sote go.

3. Wetin wi go tɔk bɔt insay dis atikul?

³ Bɔt sɔntɛnde, i nɔ kin izi fɔ fala di dayrɛkshɔn we Jiova de gi wi, mɔ we i de yuz man dɛn we nɔ pafɛkt fɔ dayrɛkt wi. Wetin mek? Sɔntɛm wi nɔ go lɛk wetin dɛn tɛl wi. Ɔ sɔntɛm wi go fil se wetin dɛn tɛl wi nɔ mek sɛns, ɛn di advays nɔ kɔmɔt frɔm Jiova. We dat apin, wi rili nid fɔ gɛt  kɔnfidɛns se na Jiova de dayrɛkt in pipul dɛn, ɛn wi go gɛt blɛsin dɛn we wi fala di we aw i de dayrɛkt wi. Fɔ ɛp wi fɔ gɛt kɔnfidɛns mɔ ɛn mɔ, dis atikul go tɔk bɔt (1) aw Jiova bin de gayd in pipul dɛn insay di tɛm we dɛn bin de rayt di Baybul, (2) aw i de gayd wi tide, ɛn (3) aw wi de bɛnifit we wi kɔntinyu fɔ fala di we aw i de gayd wi.

AW JIOVA BIN DE GAYD DI IZRƐLAYT DƐN?

4-5. Aw Jiova bin sho se na in bin de yuz Mozis fɔ gayd di Izrɛlayt dɛn? (Luk di pikchɔ na di frɔnt pej.)

⁴ Jiova bin pik Mozis fɔ pul di Izrɛlayt dɛn kɔmɔt na Ijipt. Ɛn I bin gi di Izrɛlayt dɛn klia pruf fɔ sho se na In bin de yuz Mozis fɔ gayd dɛn. Fɔ ɛgzampul, I bin de yuz klawd we tan lɛk pila fɔ lid dɛn santɛm, ɛn na nɛt I bin de yuz faya we tan lɛk pila fɔ mek dɛn si usay dɛn de go. (Ɛks. 13:21) Mozis bin de fala di pila, we bin dayrɛkt in ɛn di Izrɛlayt dɛn fɔ go na di Rɛd Si. Bɔt di Ijipshian dɛn bin de rɔnafta di Izrɛlayt dɛn. So di Izrɛlayt dɛn bin rili fred bikɔs dɛn tink se di Ijipshian dɛn go kil dɛn. Dɛn bin tink se na mistek Mozis bin mek we i kɛr dɛn go na di Rɛd Si. Bɔt nɔto bin mistek. Na Jiova bin yuz Mozis fɔ dayrɛkt in pipul dɛn fɔ go na di Rɛd Si. (Ɛks. 14:2) So Gɔd bin sev dɛn di kayn we we dɛn bin rili sɔprayz.​—Ɛks. 14:26-28.

⁵ Fɔti ia afta da tɛm de, Mozis bin kɔntinyu fɔ fala di klawd we tan lɛk pila fɔ dayrɛkt Gɔd in pipul dɛn na di wildanɛs. a Wan tɛm, Jiova bin put di pila pantap Mozis in tɛnt, usay ɔl di Izrɛlayt dɛn go ebul fɔ si am. (Ɛks. 33:7, 9, 10) Na frɔm di pila Jiova bin de tɔk to Mozis, dɔn Mozis bin de tɛl di pipul dɛn wetin Jiova se. (Sam 99:7) Di Izrɛlayt dɛn bin gɛt klia pruf fɔ se na Jiova bin de yuz Mozis fɔ gayd dɛn.

6. Wetin di Izrɛlayt dɛn bin du we Jiova bin de gayd dɛn? (Nɔmbaz 14:2, 10, 11)

⁶ I sɔri fɔ no se bɔku pan di Izrɛlayt dɛn nɔ bin gri fɔ si Mozis as di pɔsin we Jiova de yuz fɔ tɔk fɔ Am, pan ɔl we dɛn bin gɛt klia pruf. (Rid Nɔmbaz 14:2, 10, 11.) Bɔku tɛm, dɛn nɔ bin de gri se na Jiova de yuz Mozis fɔ gayd dɛn. Bikɔs ɔf dat, Jiova nɔ bin alaw dɛn Izrɛlayt dɛn de fɔ go na di Prɔmis Land.​—Nɔm. 14:30.

7. Gi ɛgzampul dɛn bɔt pipul dɛn we bin fala di we aw Jiova bin de gayd dɛn. (Nɔmbaz 14:24) (Luk bak di pikchɔ.)

⁷ Bɔt, sɔm Izrɛlayt dɛn bin fala di we aw Jiova bin de gayd dɛn. Fɔ ɛgzampul, Jiova tɔk se: “Kelɛb . . . de sav mi wit ɔl in at.” (Rid Nɔmbaz 14:24.) Gɔd bin blɛs Kelɛb, ɛn i bin ivin alaw am fɔ pik usay i want fɔ de na Kenan. (Jɔs. 14:12-14) Di Izrɛlayt dɛn bak we Jiova bin alaw fɔ go na di Prɔmis Land bin sɛt fayn ɛgzampul we i kam to fɔ fala di we aw Jiova de gayd dɛn. We Jɔshwa bigin fɔ lid di Izrɛlayt dɛn afta Mozis day, di Izrɛlayt dɛn “bin gɛt dip rɛspɛkt fɔ am te i day.” (Jɔs. 4:14) Bikɔs ɔf dat, Jiova bin blɛs dɛn bay we i gi dɛn di land we i bin dɔn prɔmis dɛn.​—Jɔs. 21:43, 44.

8. Tɔk bɔt aw Jiova bin de gayd in pipul dɛn di tɛm dɛn we kiŋ dɛn bin de rul na Izrɛl. (Luk bak di pikchɔ.)

⁸ Leta, Jiova bin pik jɔj dɛn fɔ gayd in pipul dɛn. Afta dat, insay di tɛm we kiŋ dɛn bin de rul na Izrɛl, Jiova bin pik prɔfɛt dɛn fɔ gayd in pipul dɛn. Di kiŋ dɛn we bin fetful bin fala di advays we  di prɔfɛt dɛn bin de gi dɛn. Fɔ ɛgzampul, Kiŋ Devid bin put insɛf dɔŋ ɛn gri fɔ tek di kɔrɛkshɔn we prɔfɛt Netan bin gi am. (2 Sam. 12:7, 13; 1 Kro. 17:3, 4) Kiŋ Jɛoshafat bin abop pan prɔfɛt Jeaziɛl fɔ gayd am, ɛn i bin ɛnkɔrej di pipul dɛn na Juda fɔ “biliv [Gɔd] in prɔfɛt dɛn.” (2 Kro. 20:14, 15, 20) We Kiŋ Ɛzikaya in at bin pwɛl, i bin aks prɔfɛt Ayzaya fɔ ɛp am. (Ayz. 37:1-6) Ɛnitɛm di kiŋ dɛn fala di we aw Jiova de dayrɛkt dɛn, i bin de blɛs dɛn, ɛn i bin de protɛkt di neshɔn. (2 Kro. 20:29, 30; 32:22) Ɔlman fɔ dɔn si se na Jiova de yuz in prɔfɛt dɛn fɔ gayd in pipul dɛn. Bɔt bɔku pan di kiŋ dɛn ɛn di Izrɛlayt dɛn nɔ bin de lisin to Jiova in prɔfɛt dɛn.​—Jɛr. 35:12-15

AW JIOVA BIN DE GAYD DI FƆSTƐM KRISTIAN DƐN?

9. Udat dɛn Jiova bin de yuz fɔ gayd di fɔstɛm Kristian dɛn? (Luk bak di pikchɔ.)

⁹ Afta Jizɔs bin gɛt layf bak, Jiova bin mek di Kristian kɔngrigeshɔn. Aw Jiova bin de gayd dɛn fɔstɛm Kristian dɛn de? I bin pik Jizɔs fɔ de oba di kɔngrigeshɔn. (Ɛfi. 5:23) Bɔt nɔto Jizɔs insɛf sɛf bin de tɔk to in disaypul dɛn wan bay wan fɔ tɛl dɛn wetin fɔ du. I bin yuz di apɔsul ɛn ɛlda dɛn na Jerusɛlɛm fɔ de bifo. (Akt 15:1, 2) Dɔn bak, dɛn bin de pik ɛlda dɛn fɔ dayrɛkt di kɔngrigeshɔn dɛn.​—1 Tɛs. 5:12; Tay. 1:5.

10. (a) Wetin bɔku pan di fɔstɛm Kristian dɛn bin du we dɛn bin de dayrɛkt dɛn? (Akt 15:30, 31) (b) Wetin mek sɔm pipul dɛn we bin de insay Baybul tɛm nɔ bin de lisin to di wan dɛn we Jiova bin de yuz fɔ gayd dɛn? (Luk di bɔks we gɛt di taytul “ Wetin Mek Sɔm Pipul dɛn De Dinay di Klia Pruf we Dɛn De Si?”)

¹⁰ Wetin di fɔstɛm Kristian dɛn bin du? Bɔku pan dɛn bin gladi fɔ fala di dayrɛkshɔn dɛn we dɛn bin de gi dɛn. Infakt, “dɛn gladi fɔ di ɛnkɔrej we dɛn ɛnkɔrej dɛn.” (Rid Akt 15:​30, 31.) Bɔt aw Jiova dɔn de gayd in pipul dɛn insay wi yon tɛm?

AW JIOVA DE GAYD WI TIDE?

11. Gi wan ɛgzampul we de sho aw Jiova de gayd di wan dɛn we de bifo insay wi yon tɛm.

¹¹ Jiova de kɔntinyu fɔ gayd in pipul dɛn tide. I dɔn de du dat bay we i de yuz  in Wɔd di Baybul ɛn in Bɔypikin, we de oba di kɔngrigeshɔn. Fɔ se wi de si klia pruf we de sho se Gɔd de yuz mɔtalman dɛn bak insay wi yon tɛm? Yɛs. Fɔ ɛgzampul, tink bɔt wetin bin apin afta di ia 1870. Chals Tez Rɔsɛl ɛn in kɔmpin dɛn bin bigin fɔ ɔndastand se 1914 go bi impɔtant ia fɔ Gɔd in Kiŋdɔm. (Dan. 4:25, 26) Dɛn bin ebul fɔ no dis bikɔs dɛn bin du risach na di Baybul, ɛn dɛn bin biliv se dɛn go ebul fɔ si we di prɔfɛsi dɛn we de na di Baybul de kam tru. Fɔ se na Jiova bin de dayrɛkt di risach we dɛn bin de du na di Baybul? Yɛs. Di tin dɛn we bin apin na di wɔl insay 1914 pruv se Gɔd in Kiŋdɔm dɔn bigin fɔ rul. Wɔl Wɔ I bin bigin, ɛn afta dat, sik dɛn we de prɛd ɛn atkwek dɛn bigin fɔ apin, ɛn tin fɔ it bin shɔtin. (Lyuk 21:10, 11) Fɔ tru, Jiova bin de yuz dɛn man dɛn de we bin ɔnɛs fɔ ɛp in pipul dɛn.

12-13. Wetin di brɔda dɛn we bin de bifo bin du insay Wɔl Wɔ II fɔ mek di prichin ɛn tichin wok go bifo?

¹² Tink bak bɔt wetin bin apin insay Wɔl Wɔ II. Di brɔda dɛn we bin de bifo na wɔl ɛdkwata bin stɔdi Rɛvɛleshɔn 17:8. Frɔm dɛn stɔdi, dɛn bin ɔndastand se Wɔl Wɔ II nɔ go mek Amagɛdɔn bigin. So dɛn bin no se pis go de afta di wɔ, ɛn Jiova Witnɛs dɛn go ebul fɔ prich to bɔku bɔku pipul dɛn ɔlsay na di wɔl. So di brɔda dɛn we bin de bifo bin stat di Giliad Skul fɔ tren mishɔnari dɛn fɔ prich ɛn tich ɔlsay na di wɔl, pan ɔl we i bin tan lɛk se dat nɔ mek sɛns. Ivin insay di tɛm fɔ di wɔ, dɛn bin de sɛn mishɔnari dɛn na ɔda kɔntri dɛn. Dɔn bak, di fetful slev bin bigin wan spɛshal skul b fɔ tren ɔl di pɔblisha dɛn na di kɔngrigeshɔn fɔ sabi prich ɛn tich gud gud wan. Dɛn skul dɛn ya bin ɛp Gɔd in pipul dɛn fɔ rɛdi fɔ di prichin wok we dɛn go gɛt fɔ du.

¹³ We wi tink bɔt ɔl wetin bin apin, wi si klia wan se na Jiova bin de gayd in pipul dɛn insay da tɛm de we tin nɔ bin rili izi. Frɔm Wɔl Wɔ II, Jiova in pipul dɛn dɔn gɛt fridɔm fɔ du di prichin wok na bɔku kɔntri dɛn. Infakt, di prichin wok dɔn rili go bifo.

14. Wetin mek wi fɔ abop pan di we aw Jiova in ɔganayzeshɔn ɛn di ɛlda dɛn de dayrɛkt wi? (Rɛvɛleshɔn 2:1) (Luk bak di pikchɔ.)

 ¹⁴ Tide, di Gɔvnin Bɔdi mɛmba dɛn de kɔntinyu fɔ abop pan Krays fɔ mek i gayd dɛn. Dɛn want fɔ mek di dayrɛkshɔn dɛn we dɛn de gi di brɔda ɛn sista dɛn gri wit wetin Jiova want. Ɛn dɛn de yuz di sakit ovasia ɛn ɛlda dɛn fɔ dayrɛkt di kɔngrigeshɔn dɛn. c Anɔyntɛd ɛlda dɛn de na Krays in “raytan.” (Rid Rɛvɛleshɔn 2:1.) As wi ɔl no, dɛn ɛlda dɛn ya nɔ pafɛkt ɛn dɛn kin mek mistek dɛn. Tɛm dɛn bin de we Mozis ɛn Jɔshwa bin de mek mistek dɛn, ɛn di apɔsul dɛnsɛf bin de mek mistek. (Nɔm. 20:12; Jɔsh. 9:14, 15; Rom. 3:23) Bɔt stil, Krays de tek tɛm fɔ gayd di slev we fetful ɛn di ɛlda dɛn, ɛn na dat i go kɔntinyu fɔ du “ɔltɛm te di tɛm want fɔ dɔn.” (Mat. 28:20) So wi gɛt gud rizin fɔ abop pan di wan dɛn we i dɔn pik fɔ de bifo fɔ dayrɛkt wi.

WI DE BƐNIFIT WE WI KƆNTINYU FƆ FALA DI WE AW JIOVA DE GAYD WI

15-16. Wetin yu lan frɔm di wan dɛn we de fala di we aw Jiova de gayd wi?

¹⁵ We wi kɔntinyu fɔ fala di we aw Jiova de gayd wi, wi go ivin gɛt blɛsin dɛn naw. Fɔ ɛgzampul, Andi ɛn Roz bin fala di advays we di fetful slev gi fɔ liv simpul layf. (Luk di stɔdi not fɔ Matyu 6:22.) Dat bin mek dɛn bin ebul fɔ ɛp fɔ bil Kiŋdɔm Ɔl dɛn ɛn ɔda bildin projɛkt dɛn we di ɔganayzeshɔn de du. Roz tɔk se: “Wi dɔn de na ples dɛn we rili smɔl, ɛn bɔku tɛm dɛn ples dɛn de nɔ kin gɛt kichin. Ɛn a bin gɛt fɔ sɛl bɔku pan di tin dɛn we a bin de yuz fɔ tek pikchɔ, ɛn dat na sɔntin we a bin lɛk fɔ du. A kray we a bin sɛl dɛn. Bɔt jɔs lɛk Ebraam in wɛf, Sera, a bin dɔn mek-ɔp mi maynd nɔ fɔ pwɛlat bikɔs ɔf di tin dɛn we a dɔn sakrifays, bɔt a fɔ gladi bikɔs ɔf wetin a go ebul du naw fɔ Jiova.” (Ibru. 11:15) Aw Andi ɛn Roz bin bɛnifit bikɔs ɔf wetin dɛn disayd fɔ du? Roz tɔk se: “Wi gɛt satisfay maynd we wi no se wi de gi Jiova ɔl wetin wi gɛt. We wi de du di wok we Jiova dɔn gi wi fɔ du, i de ɛp wi fɔ no smɔl bɔt aw layf go tan lɛk na di nyu wɔl.” Andi bin gri wit dat. I tɔk se: “Wi gɛt satisfay maynd bikɔs wi gi wisɛf fɔ sɔpɔt di Kiŋdɔm wok.”

 ¹⁶ Us ɔda we wi go bɛnifit we wi kɔntinyu fɔ fala di we aw Jiova de dayrɛkt wi? Fɔ ɛgzampul, afta Masia dɔn sɛkɔndari skul, i bin rili want fɔ fala di advays fɔ payɔnia. (Mat. 6:33; Rom. 12:11) I tɔk se: “Dɛn bin gi mi skɔlaship fɔ go kɔlɛj fɔ 4 ia. Bɔt a bin want fɔ du mɔ fɔ Jiova. So a bin disayd fɔ lan sɔntin we go sɔpɔt mi fɔ du mi prichin wok. Dat na wan pan di bɛst tin dɛn we a dɔn ɛva disayd fɔ du. Naw a de ɛnjɔy fɔ rɛgyula payɔnia, ɛn bikɔs a ebul disayd ɔmɔs tɛm a go yuz fɔ wok, a de wok na Bɛtɛl as kɔmyuta, ɛn a de du bɔku ɔda wɔndaful tin dɛn fɔ Jiova.”

17. Us ɔda blɛsin dɛn wi go gɛt we wi kɔntinyu fɔ fala di we aw Jiova de gayd wi? (Ayzaya 48:17, 18)

¹⁷ Sɔntɛnde, wi kin gɛt advays frɔm di ɔganayzeshɔn we de protɛkt wi. Fɔ ɛgzampul, dɛn kin wɔn wi fɔ mek wi nɔ lɛk mɔni ɛn fɔ mek wi nɔ du tin dɛn we go mek wi pwɛl Jiova in lɔ dɛn. Jiova de blɛs wi we wi fala dɛn advays dɛn de. Wi go kɔntinyu fɔ gɛt klin kɔnshɛns ɛn avɔyd bɔku prɔblɛm dɛn. (1 Tim. 6:9, 10) Dat go mek wi ebul fɔ sav Jiova wit ɔl wi at. Natin nɔ de we go gi wi di kayn gladi-at ɛn pis we wi de gɛt we wi de sav Jiova.​—Rid Ayzaya 48:17, 18.

18. Wetin mek yu dɔn mek-ɔp yu maynd fɔ kɔntinyu fɔ fala di we aw Jiova de dayrɛkt wi?

¹⁸ Wan dawt nɔ de se Jiova go kɔntinyu fɔ yuz mɔtalman dɛn fɔ gayd wi insay di tɛm fɔ da big big trɔbul ɛn te insay di Wan Tawzin Ia we Krays Go De Rul. (Sam 45:16) Fɔ se wi go kɔntinyu fɔ fala da we de aw Jiova de dayrɛkt wi pan ɔl we wi go want fɔ du tin wi yon we? I go izi fɔ mek wi du dat if wi de fala di we aw Jiova de gayd wi naw. So, lɛ wi fala di we aw Jiova de dayrɛkt wi ɔltɛm, ivin we i de yuz di man dɛn we i dɔn pik fɔ kia fɔ wi. (Ayz. 32:1, 2; Ibru. 13:17) Ɛn as wi de du dat, wi go gɛt gud rizin fɔ abop pan di Pɔsin we de gayd wi, we na Jiova. I de gayd wi fɔ mek wi nɔ du ɛnitin we go pwɛl wi padi biznɛs wit am, ɛn i de gayd wi fɔ mek wi waka na di rod we go mek wi gɛt layf we go de sote go insay di nyu wɔl.