1. Shimunenu chakutalilahu chinakumwekesha muloña waweni wutwatela kumwitejela Yehova kwikala Nlomboli yetu.

 FWIKIJENU mudi mwisaña munajimbelimu. Mudi muwubanji muloña wawanyama amwisaña azuwa, tububu tunateli kuyiletela yikatu, tupela nimabuku akunama. Mukutiya kuwaha nankashi neyi mwikala namuntu wakuyilombola weluka chiwahi odu iluña nawa wukuyikwasha kutondolwela wubanji wudimu! Akanu kaayi kadi neyi idi isaña. Munenzali wubanji wunateli kuluwañesha wubwambu wetu naYehova. Ilaña tukweti Nlomboli wamuwahi, Yehova. Watufumishaña kuniwu wubanji nakututwala kutunakuya, dikwila nawu kuwumi wahaya nyaaka mukaayi kakaha.

2. Yehova watulombolaña ñahi?

² Yehova watulombolaña ñahi? Kakavulu, watulombolaña kuhitila Mwizu dindi dasonekewa, Bayibolu. Hela chochu, wazatishaña cheñi antu hakutulombola. Chakutalilahu, wazatishaña “nduñu wamaana nikashinshi” kutuloñeshela yakuda yakuspiritu yatukwashaña kufuukula chiwahi. (Mat. 24:45) Yehova wazatishaña cheñi amayala amakwawu ashikahu hakutulombola. Chakutalilahu, ankoñi añinza niakulumpi muyipompelu atukoleshaña nikutuleja yuma yinateli kutukwasha kuumika kukala kutunakumona. Twasakililaña nankashi hawunlomboli wawuwahi wutwatambwilaña munanu mafuku akukuminina akala! Chumichi chaleteshaña atutiyeña kuwaha kudi Yehova nikutukwasha kutwalekahu kwenda munjila yaya kuwumi.

3. Yumanyi yitukuhanjeka muchinu chibaaba?

³ Hela chochu, mpinji jikwawu chinateli kutukalila kwovwahila wunlomboli waYehova, sweje-e neyi wunakufumina kudi antu abula kuwanina. Muloñadi? Hadaha hitukukeña munatulejiwuku. Indi kwiji tunateli kutoñojoka netu wunlomboli wutunatambwili wawuwahi wanyi nikukunkulula netu iku kufumba kunateli kunafumi kudi Yehova wanyi. Hampinji jamuchidiwu, twatela  kukuhwelela chikupu netu Yehova diyi wunakulombola antu jindi, nawa netu kwovwahila wunlomboli windi mwafumaña yuma yayiwahi. Hakwila tukuhweleleña chikupu chumichi, achinu chibaaba chikuhosha (1) Yehova chalombweleñayi antu jindi kunyima, (2) chinakutulombolayi makonu, nawa (3) yuma yayiwahi yafumañamu neyi tutwalekahu kwovwahila wunlomboli windi.

YEHOVA CHALOMBWELEÑAYI MUZA WAISARELA

4-5. Yehova wamwekesheli ñahi nindi wadiña nakuzatisha Mosi hakuyilombola aIsarela? (Talenu mwevulu wudi hakava.)

⁴ Yehova watondeli Mosi kulonda alomboli aIsarela kufuma muEjipitu. Nawa Nzambi wayilejeli aIsarela wunsahu wamwekesheleña hatooka nawu wadiña nakuyilombola kuhitila mudi Mosi. Chakutalilahu, Nzambi wayilombweleña nachishimi cheevu namwaana nawa nawufuku nachishimi chakesi. (Kwid. 13:21) Mosi wadiña nakulondela chishimi, nawa chamushikijili yena niaIsarela kuKaluñalwiji Kachinana. Antu atiyili woma nankashi chatachikiliwu kutoñojoka nawu kwosi kwatela kuyawu muloña kukabadi kamu kwadiña kaluñalwiji, kukabadi kakwawu amashidika awaEjipitu ayikumpishileña. Akunkulwili nawu Mosi waluwañesheli hakuyileta kuKaluñalwiji Kachinana. Ilaña waluwañesheli wanyi. Kudi chuma chaletesheli Yehova amuzatishi Mosi kutwala antu Jindi kunidi iluña. (Kwid. 14:2) Kuhiñahu, Nzambi wayipulwishili munjila yakuhayamisha chikupu.—Kwid. 14:​26-28.

⁵ Hadi yaaka 40 yalondelelihu, Mosi watwalekelihu kushindamena hachishimi cheevu hakulombola antu jaNzambi muchinkalampata. a Hayina mpinji, Yehova washili chishimi hewulu detenti daMosi, kulonda aIsarela ejima achimoneña. (Kwid. 33:​7, 9-10) Yehova wahosheleña naMosi kuzatisha chishimi, kuhiñahu Mosi walejeleña antu nshimbi jinamulejiwu kudi Nzambi. (Mas. 99:7) AIsarela adiña nawunsahu wawuvulu wamwekesheleña nawu Yehova wazatishileña Mosi hakuyilombola.

6. AIsarela elili ñahi nawunlomboli waYehova? (Kuchinda 14:​2, 10, 11)

⁶ Chawushona, aIsarela amavulu akaanineña wunsahu wamwekesheleña hatooka nawu Yehova wadiña nakumuzatisha Mosi kumwimenaku. (Tañenu Kuchinda 14:​2, 10, 11.) Kakavulu, akaanineña kwiteja nawu Yehova wadiña nakumuzatisha Mosi hakuyilombola. Chafuminimu, adina ikiñu dawaIsarela hiyaditejeli kwiñila Mwituña daChikaninuku.—Kuch. 14:30.

7. Shimunenu yakutalilahu yawantu ovwahilili wunlomboli waYehova. (Kuchinda 14:24) (Talenu cheñi mwevulu.)

⁷ Hela chochu, aIsarela amakwawu ovwahilileña wunlomboli waYehova. Chakutalilahu, Yehova wahosheli nindi: “Kalebu. . . watwalekelihu kunlondela namuchima wejima.” (Tañenu Kuchinda 14:24.) Nzambi wamukiswilili Kalebu, nawa wamwinkeli mpata yakeñesheliyi nankashi muKenani. (Yosh. 14:​12-14) Ikiñu dalondelelihu dawaIsarela nidena dovwahilileña wunlomboli waYehova. Yoshuwa chamutondeliwu nakumusinsa Mosi kulonda ekali nlomboli wawaIsarela, “amulemesheleña chikupu mumafuku akuhanda kwindi kwejima.” (Yosh. 4:14) Chafuminimu, Yehova wayikiswilili kuhitila mukuyileta mwituña dakaniniyi.—Yosh. 21:​43, 44.

8. Lumbululenu Yehova chalombweleñayi antu jindi mumpinji yawanyanta. (Talenu cheñi mwevulu.)

⁸ Chimwahitili yaaka, Yehova watondeli ansompeshi kulonda alomboleña antu jindi. Kuhiñahu, mumpinji yawanyanta, Yehova watondeli atuprofwetu kulonda alomboleña antu jindi. Anyanta ashinshika ovwahilileña kufumba kwawatuprofwetu. Chakutalilahu, Mwanta Davidi wovwahili nakudizoza chamufumbiliwu kudi  kaprofwetu Natani. (2 Sam. 12:​7, 13; 1 Kushi. 17:​3, 4) Mwanta Yehoshafwati washindameneni hawunlomboli wakaprofwetu Yahaziyeli nawa walejeli antu amuYuda nindi ‘akuhweleli atuprofwetu aNzambi.’ (2 Kushi. 20:​14, 15, 20) Hampinji yamweniyi kukala, Mwanta Hezekiya walombeli wukwashu kudi kaprofwetu Isaya. (Isa. 37:​1-6) Mpinji yejima yovwahilileñawu anyanta wunlomboli waYehova, adiña nakuyikiswila nawa muza awukiñileña. (2 Kushi. 20:​29, 30; 32:22) Antu ejima atela amweni nawu Yehova wazatishileña atuprofwetu twindi hakulombola antu jindi. Hela chochu, anyanta amavulu kushilahu niantu ayikaanineña atuprofwetu aYehova.—Yere. 35:​12-15.

YEHOVA CHALOMBWELEÑAYI AKAKRISTU AKUSAMBILA

9. Anyi azatishileñayi Yehova hakulombola akaKristu mumafuku awapostolu? (Talenu cheñi mwevulu.)

⁹ Mumafuku awapostolu, Yehova watuñili chipompelu chawakaKristu. Wayilombweleña ñahi ana akaKristu akusambila? Watondeli Yesu kwikala mutu wachipompelu. (Efwe. 5:23) Ilaña Yesu halombweleña kambanji-hikambanji yomwenindiku. Wazatishileña apostolu niakulumpi adiña muYerusalema kulonda alomboleña. (Yilw. 15:​1, 2) Cheñi, akulumpi ayitondeleña kulonda alomboleña yipompelu.—1 Tes. 5:12; Tit. 1:5.

10. (a) AkaKristu amumafuku awapostolu elileña ñahi nawunlomboli watambwilileñawu? (Yilwilu 15:​30, 31) (b) Muloñadi antu amakwawu kunyima chakaanineñawu kwovwahila antu amwimeneneñaku Yehova? (Talenu chikasha chinakwila nawu “ Chaleteshaña Antu Amakwawu Akaaneña Wunsahu Walala.”)

¹⁰ Indi akaKristu adiñaku mumafuku awapostolu ovwahilili ñahi wunlomboli? Amavulu ovwahilileña nshimbi jatambwilileñawu. Kafwampi, “azañaleli nankashi nanochu chayikolesheliwu.” (Tañenu Yilwilu 15:​30, 31.) Hanu dinu, Yehova walombolaña ñahi antu jindi munanu mafuku?

YEHOVA CHATULOMBOLAÑAYI MAKONU

11. Shimunenu chakutalilahu chinakumwekesha Yehova chalombolañayi ana anakulombola munanu mafuku.

¹¹ Yehova natwalekihu kulombola antu jindi makonu. Wayilombolaña kuhitila mukuzatisha Izu dindi niMwanindi, mutu wachipompelu. Kudihu wunsahu wunakumwekesha nawu Nzambi natwalekihu cheñi kuzatisha antu kulonda amwimeneñaku? Wudi kwoku. Chakutalilahu, talenu chuma chamwekeni hanyima yachaaka cha 1870. Charles Taze Russell nialunda nindi  atachikili kutiyishisha nawu chaaka cha 1914 chakekala chaaka chalema nankashi chakatachika Wanta waNzambi. (Dan. 4:​25, 26) Hakwila akunkululi muniyi njila, ashindameneni hawuprofwetu wamuBayibolu. Komana Yehova wadiña nakuyilombola hampinji yasandujoleleñawu muBayibolu? Eña. Yuma yamwekeni mukaayi mu 1914 yamwekesheli hatooka nawu Wanta waNzambi watachikili kuyuula. Njita Yakaayi Yatachi yatachikili, halondeleli yipupu, nyitentanshi nikukeha kwayakuda. (Luka 21:​10, 11) Chakadi nikujina, Yehova wazatishileña ana amayala akaKristu ashinshika hakukwasha antu jindi.

12-13. Ntanjikilwinyi yiyashiliku hakwila mudimu wakushimwina nikudizisha wuyileñaku hambidi mumpinji yaNjita Yakaayi Yamuchiyedi?

¹² Talenu cheñi chuma chamwekeni mumpinji yaNjita Yakaayi Yamuchiyedi. Hanyima yakusandujola hansona yaChimwekeshu 17:​8, amanakwetu alombweleña hakasanji keneni mukaayi atiyishishili nawu iyi njita hiyatwalileña kuAmagedoniku, ilaña kumpinji yikwakekala kuwunda kwakaletesha mudimu wakushimwina kuyilaku hambidi. Hela chakwila chumichi chamwekeni neyi chikuzatika wanyi hayina mpinji, kuloñesha kwaYehova kwashiliku shikola yateneneñawu nawu Watchtower Bible College of Gilead kulonda adizisheña amishonali chakushimwina nikudizisha mumatuña mwahita iseki dejima. Amishonali ayitemesheleña kuya nakuzatila kwacheñi nimumpinji yanjita. Kubombelahu, nduñu washinshika washiliku shikola yadimena b muyipompelu yejima kulonda adizisheña antu ejima kwikala akakushimwina niantañishi ashikahu. Kwila mwenimu kwakwashileña antu jaNzambi kudiloñeshela chadimu namudimu wadiña hambidi.

¹³ Makonu, tukweti wunsahu wunakumwekesha hatooka nawu Yehova wadiña nakulombola antu jindi muyina mpinji yakala. Kufuma tuhu hampinji yaNjita Yakaayi Yamuchiyedi, antu jaYehova mumatuña amavulu anakushimwina mukuwunda nimukukasunuka. Mwamweni, iwu mudimu wunakutaanda chikupu.

14. Muloñadi wutwatela kukuhwelela nshimbi jitwatambwilaña mukuloñesha kwaYehova nikudi akulumpi atondewa? (Chimwekeshu 2:1) (Talenu cheñi mwevulu.)

 ¹⁴ Makonu amamembala aMwizanvu Dalombolaña anatwalekihu kushindamena hawunlomboli waKristu. Akeñaña nshimbi jenkañawu amanakwawu mukaayi kejima jimwekesheña Yehova niYesu chamonañawu yuma. Kuhiñahu, ankoñi añinza niakulumpi ahanaña iji nshimbi kuyipompelu. c Akulumpi awayishewa adi “muchikasa . . . chachidiilu” chaKristu. (Tañenu Chimwekeshu 2:1.) Hela chochu, awa akulumpi awanina wanyi nawa aluwañeshaña. AMosi naYoshuwa aluwañesheleña mpinji jikwawu, neyi chelileñawu apostolu. (Kuch. 20:12; Yosh. 9:​14, 15; Rom. 3:23) Hela chochu, Kristu nakumulombola chiwahi nduñu washinshika niakulumpi atondewa, nawa wukutwalekahu kuyilombola “mafuku ejima kushika nikukukuma kwanshakaminu yamakonu.” (Mat. 28:20) Dichi tukweti wunsahu wawuvulu wukutukwasha kukuhwelela muwunlomboli watwinkañayi kuhitila mudi amayala atondewa anakulombola.

MWAFUMAÑA YUMA YAYIWAHI NEYI TUTWALEKAHU KWOVWAHILA WUNLOMBOLI WAYEHOVA

15-16. Yumanyi yimunadizili kuyuma yamwekeneni ana ovwahilili wunlomboli waYehova?

¹⁵ Neyi tutwalekahu kwovwahila wunlomboli waYehova, twadiluñishaña yuma yayiwahi chayinu mpinji. Chakutalilahu, aAndy nawaRobyn azatishili mazu akukolesha ahosha hakupeleshaku chihandilu. (Mat. 6:22) Chafuminimu, ekalili nakukooleka kwakuzataku mumudimu wakutuña wamukuloñesha. Muhela Robyn wahosheli nindi: “Twashakamaña mutumatala twanyanya, kakavulu mwekalaña nikapeka kakutelekela wanyi. Nawa nalandishili yozelu yinazatishileña hakukwata nyevulu, chuma chinakeñeli kwila nankashi. Nadilili hinayilandishileña. Ilaña neyi chelili ñoda Abarahama, Sara, nashili maana hayuma yakumbidi, bayi yakunyimaku.” (Heb. 11:15) Yumanyi yayiwahi yafuminimu muyuma yafuukwiliwu awa adisumbula? Muhela Robyn wahosheli nindi: “Twatiyaña kuwaha kwiluka netu tunakumwinka Yehova yuma yejima yitukweti. Neyi tunakuzata mudimu wamukuloñesha, twelukaña chakekala yuma mwituña dadiha.” Manakwetu Andy abombelelihu nindi: “Tudi namuzañalu muloña twazatishaña mpinji yetu niñovu kukalakala mudimu waWanta.”

¹⁶ Yumanyi yikwawu yayiwahi yafumañamu neyi tutwalekahu kwovwahila wunlomboli waYehova? Chamanishiliyi shikola yasekondali, muhela Marcia wazatishili mazu akukolesha ahosha hakufwila kuzataku mumudimu waYehova. (Mat. 6:33; Rom. 12:11) Wahosheli nindi: “Anyinkeli kukooleka kwakutaña hayunivesiti chawaana hadi yaaka yiwana. Ilaña nakeñeleña kuzataku nyidimu yamukuloñesha  kwaYehova. Dichi chatela niyi kuyunivesiti, natondelihu kuya nakudiza mudimu wanyanya wakankwashaña kwikala namali inakazatishaña mumudimu wawupayiniya. Nafuukwili chiwahi nankashi. Ichi inakudiluñisha mudimu wawupayiniya wampinji yejima, nawa mudimu wakumujimba wunazataña wanshilañaku mpinji yakuya nakuzatila haBeteli mafuku antesha mumulungu nikuzataku nyidimu yikwawu yadimena.”

17. Yumanyi yikwawu yayiwahi yafumañamu neyi tutwalekahu kwovwahila wunlomboli waYehova? (Isaya 48:​17, 18)

¹⁷ Mpinji jikwawu, twatambwilaña kufumba kwatukiñaña kuyuma yidi neyi kusweja kukeña maheta niyuma yikwawu yinateli kutwisha mukweseka kwakufumpa nshimbi jaNzambi. Nihampinji yidi neyi iyi, mwafumaña yuma yayiwahi neyi twovwahila wunlomboli waYehova. Twekalaña nachinleji chamuchima chitooka nikutondolwela kumona kukala kwakuvulu. (1 Tim. 6:​9, 10) Chafumañamu, twadifukulaña kudi Yehova namuchima wejima, chuma chatuletelaña muzañalu waweni, kuwunda nikuzañalala nayuma yitukweti.—Tañenu Isaya 48:​17, 18.

18. Muloñadi chimunakufwila kutwalekelahu kwovwahila wunlomboli waYehova?

¹⁸ Chakadi nikujina, Yehova wakatwalekahu kuzatisha antu amwimenañaku kuhana nshimbi mumpinji yalukadi lwasweja, ndo-o nimuChiyuulu chaYaaka Ikombakaji. (Mas. 45:16) Komana twakatwalekahu kwovwahila iji nshimbi hela chakwila kwila chumichi kwakakeñekaña etu kubula kwilahu yuma yimu yitwakeña? Chakatupelela kwila mwenimu neyi twovwahilaña wunlomboli waYehova chayinu mpinji. Dichi, mpinji yejima twovwahileña wunlomboli waYehova, kushilahu niwunlomboli wawamayala atondawu nawu atuhembeña. (Isa. 32:​1, 2; Heb. 13:17) Nawa chitukwilaña mwenimu, tukwikala nawunsahu wejima wukutukwashaña kumukuhwelela Nlomboli yetu, Yehova, watulombolaña kufuma kuwubanji wakuspiritu nakututwala kutunakuya, dikwila nawu kuwumi wahaya nyaaka mukaayi kakaha.