1. Молан мыланна Иегован виктарымыже кӱлеш? Примерым кондыза.

 ШОНАЛТЫЗА, пуйто те чодыраште йомында. Чыла вере лӱдыкшӧ: ир янлык-влак, ояр шукш-влак да келге корем-влак. Тендан воктенда опытан еҥ лиеш ыле гын, кудыжо тиде верым сайын пала, те тудым чот тауштеда ыле. Вет тудо пала, кузе эҥгекыш логалаш огыл. Тиде тӱня тыгай чодыра семын. Тыште шуко лӱдыкшӧ, кудышт мемнан духовный тазалыкналан эҥгекым конден кертыт. Но мемнан Иегова уло. Тудо мемнам арала да цельышкына — у тӱнясе курымашлык илышыш — наҥгая.

2. Кузе Иегова мемнам вӱда?

² Кузе Иегова мемнам вӱда? Эн тӱҥжӧ — шке Мутшо, Библий, гоч. Тыгак тудо еҥ-влакым, мутлан, «ӱшанле да ушан тарзым» кучылтеш. Тиде тарзе духовный кочкышым пуа, кудыжлан кӧра ме уш-акылан решений-влакым луктын кертына (Матф. 24:45). А эше Иегова мемнам виктара вес уста пӧръеҥ-влак гоч. Мутлан, тудо районым эскерыше але верысе кугурак иза-влакым кучылтеш. Нуно мемнам кумылаҥдат да каҥашым пуат, кузе тӱрлӧ нелылыкым сеҥаш лиеш. Тиде тӱнян пытартыш кечылаште тыгай виктарымашлан Иеговалан кугу тау. Тиде виктарымаш мыланна Иегова дене лишыл йолташ лияш да илышыш наҥгайыше корнышто кодаш полша.

3. Мом ме тиде статьяште лончылен лектына?

³ Туге гынат южгунам мыланна Иегован виктарымыже почеш ышташ куштылго огыл лийын кертеш. Поснак, кунам мыланна языкан еҥ-влак мом ышташ ойлат. Молан? Молан манаш гын, нуно тыгайым ойлен кертыт, мо мыланна огеш келше. Але мыланна чучын кертеш, пуйто нунын ой-каҥашышт уш-акылан огытыл. Сандене ме шонен кертына: ойлымышт  Иегова деч огыл. Тыгай годым мыланна пеҥгыдын ӱшанаш кӱлеш: чыла тиде кӱштымашым лач Иегова пуа да нуно мыланна пайдам гына кондат. Иеговалан ӱшанымашнам пеҥгыдемдашлан ме ончен лектына: 1) кузе Юмо ожно шке калыкшым вӱден, 2) кузе тудо таче мемнам вӱда да 3) Иегован виктарымыже почеш ыштымаш мыланна могай пайдам конда.

КУЗЕ ИЕГОВА ИЗРАИЛЬ КАЛЫКШЫМ ВӰДЕН

4, 5. Иегова шке калыкшым Моисей гоч виктара манын, кузе ончыктен? (Тыгак журнал комышто сӱретым ончыза.)

⁴ Иегова Моисейлан Израиль калыкшым Египет гыч вӱден лукташ кӱштен. Иегова Моисей гоч вуйлата манын, шинчалан коймо доказательствым пуэн. Мутлан, кечывалым нуно пылан меҥгым ужыныт, а йӱдым — тулан меҥгым (Исх. 13:21). Моисей тиде меҥге почеш каен, кудыжо тудым да израильтян-влакым Йошкар теҥыз деке конден. Но израильтян-влак чот лӱдыныт, вет нуно шоненыт, пуйто вапшыш логалыныт: ончылнышт теҥыз лийын, а шеҥгелнышт — нуным поктышо египетысе армий. Израильтян-влак шоненыт, пуйто Моисей нуным Йошкар теҥыз деке вӱден кондымыж дене йоҥылыш лийын. Но нимогай йоҥылыш лийын огыл. Иегован кумылжо почеш Моисей калыкым лач тушко вӱден кондышаш ыле (Исх. 14:2). А вара Юмо израильтян-влакым ӧрыктарышын утарен (Исх. 14:26—28).

⁵ Моисей пеҥгыдын ӱшанен: 40 ий мучко Иегова шке калыкшым тиде пылан меҥгым кучылтын виктарен a. Ик жап тиде меҥге Моисейын шатёржо ӱмбалне шоген, да чыла израильтян тудым ужын кертын (Исх. 33:7, 9, 10). Иегова тиде меҥге гыч Моисей дене мутланен, а весыже Иегован кӱштымашыжым калыклан ойлен (Пс. 98:7). Израильтян-влак раш ужыныт: Иегова нуным Моисей гоч виктара.

6. Израильтян-влак Иегован виктарымыже нерген мом шоненыт? (Числа 14:2, 10, 11).

⁶ Чаманаш логалеш, израильтян-влак гыч шукышт, Моисей Иегован представительже улеш манын, раш доказательствым шотыш налын огытыл. (Числа 14:2, 10, 11 лудын лекса.) Тидлан кӧра Юмо саде тукымлан Сӧрымӧ мландыш пураш пуэн огыл (Чис. 14:30).

7. Кӧ Иегован виктарымыже почеш илен? (Числа 14:24). (Тыгак сӱретым ончыза.)

⁷ Но израильтян-влак коклаште лийыныт тыгай-влакат, кӧ Иегован виктарымыже почеш илен. Мутлан, Юмо каласен: «Халев... мыйым уло шӱм дене колыштын». (Числа 14:24 лудын лекса.) Иегова тудым суапландарен да эсогыл тудлан шкаланже Ханааныште мландым ойырен налаш йӧным пуэн (Иис. Н. 14:12—14). Израильтян-влакын вес тукымжат сай примерым ончыктен. Нуно Иегован мутшым колыштыныт. Кунам Иегова Иисус Навиным вуйлатышылан шогалтен, «нуно тудым ӱмыр мучкыжо Моисейым гаяк келгын пагаленыт» (Иис. Н. 4:14). Сандене Иегова израильтян-влакым суапландарен да Сӧрымӧ мландым пуэн (Иис. Н. 21:43, 44).

8. Умылтарыза, кузе Иегова шке калыкшым кугыжа-влакын жапыштышт виктарен. (Тыгак сӱретым ончыза.)

⁸ Вараракшым, шке калыкшым виктарашлан Иегова судей-влакым шогалтен. А вара, кугыжа-влакын жапыштышт, Юмо пророк-влак гоч кӱштымаш-влакым пуэден. Юмылан ӱшанле кугыжа-влак пророк-влакым колыштыныт. Мутлан, Давид кугыжа ӱҥышӧ лийын да Нафан пророкын ойлымыжым эре колыштын (2 Сам. 12:7, 13; 1 Лет. 17:3, 4). Иосафат кугыжа Яхазиил пророкын  кӱштымыжлан ӱшанен да Иудейыште илыше-влакым Юмын пророкшо-влаклан ӱшанаш кумылаҥден (2 Лет. 20:14, 15, 20). Кугу нелылык дене тӱкнымеке, Езекия кугыжа Исайя пророк деч полышым йодын (Ис. 37:1—6). Кунам кугыжа-влак Иегован мутшым колыштыныт да кӱштымыжӧ почеш ыштеныт, тудо нуным суапландарен да шке калыкшым арален (2 Лет. 20:29, 30; 32:22). Иегова шке калыкшым пророк-влак гоч вуйлата манын, чылашт умылышаш ыльыч. Туге гынат кугыжа-влак гыч да израильтян-влак гыч шукышт Иегован пророкшо-влакым колыштын огытыл (Иер. 35:12—15).

КУЗЕ ИЕГОВА ИКЫМШЕ КУРЫМЫСО ХРИСТИАН-ВЛАКЫМ ВӰДЕН

9. Кузе Иегова икымше курымышто христиан-влакым виктарен? (Тыгак сӱретым ончыза.)

⁹ Мемнан эран икымше курымышто Иегова христиан погынымашым чумырен. Кузе Иегова тудым виктарен? Тудо погынымашын вуйжылан Иисусым шогалтен (Еф. 5:23). Но Иисус кажне тунемшылан ойлен огыл, мом тудлан ышташ кӱлеш. Тудо погынымашым Иерусалимысе апостол ден кугурак иза-влак гоч виктарен (Ап. паш. 15:1, 2). Тыгак чыла погынымаш-влакыште кугурак иза-влак шогалтыме лийыныт (1 Фес. 5:12; Тит. 1:5).

10. а) Апостол ден кугурак иза-влакын лукмо решенийышт-влаклан икымше курымысо христиан-влакын могай реакцийышт лийын? (Апост. пашашт 15:30, 31). б) Молан библий жапыште южышт Иегован представительже-влакым колыштын огытыл? (Тыгак « Молан южышт раш доказательстве дене келшен огытыл» рамкым ончыза.)

¹⁰ Икымше курымысо христиан-влак апостол ден кугурак иза-влакым колыштыныт мо? Шукышт уло кумылын кӱштымашыштым шуктеныт. Мутлан, Иерусалимысе иза-влакын решенийыштым лудмекышт, тунемше-влак куаненыт. (Апост. пашашт 15:30, 31 лудын лекса.) А кузе Иегова мемнан кечылаште калыкшым виктара?

КУЗЕ ИЕГОВА МЕМНАМ ТАЧЕ ВӰДА

11. 19-ше курымын мучаштыже да 20-шо курымын тӱҥалтыштыже Иегова шке ӱмбак виктарымаш пашам налше-влакым кузе вӱден? Примерым кондыза.

¹¹ Иегова шке калыкшым мемнан кечылаштат вӱда. Тидым тудо шке Мутшо да Эргыж гоч ышта, кудыжым тудо погынымашын вуйжылан шогалтен. Юмо шке калыкшым кызытсе жапыште тыгак еҥ-влак гоч  вӱда манын, доказательстве-влак улыт мо? Улыт. Айста ончалына, мо 19-ше курымын мучаштыже лийын. Чарлз Тейз Расселл да тудын йолташыже-влак умылаш тӱҥалыныт: Юмын Кугыжанышын историйыштыже 1914 ий ойыртемалтше лиеш (Дан. 4:25, 26). Молан нуно тыгай иктешлымашым ыштеныт? Молан манаш гын, нуно Библийым шымленыт да библийысе ончылгоч каласымаш-влакын шукталтмыштым ужыт манын ӱшаненыт. Иегова нунылан библийысе чыным умылаш полшен мо? Мутат уке, полшен. 1914 ийыште лийше событий-влак Юмын Кугыжанышын вуйлаташ тӱҥалмыжым пеҥгыдемденыт. Икымше тӱнямбалысе сар тӱҥалын, а тудын деч вара тӱрлӧ эпидемий, мланде чытырналтмаш-влак да шужымаш лиедаш тӱҥалыныт (Лук. 21:10, 11). Тыгела, Иегова шке калыкшылан полшаш манын, нине ӱҥышӧ Библийым шымлыше-влакым кучылтын.

12, 13. Тӱня мучко таныклымаш да туныктымаш паша кайыже манын, Кокымшо тӱнямбалысе сар годым мо ыштыме лийын?

¹² Тыгак айста шарналтена, мо Кокымшо тӱнямбалысе сар годым лийын. Почмаш 17:8 гыч ончылгоч каласымашым шымлымеке, тӱҥ виктем гыч иза-влак умыленыт: тиде сар деч вара Армагеддон огыл, а таныклашлан пеш сай жап лиеш. Сандене, таныклымашлан тиде сай жап огыл манын чучын гынат, Иегован организацийже Орол башньын Галаад манме библейский колледжым b почын. Тиде колледж уло тӱня мучко таныклашлан миссионер-влакым ямдылен. Миссионер-влакым сар годымат таныклашлан тӱрлӧ верыш колтеныт. Тыгак ӱшанле тарзе Теократический служымаш курсым c организоватлен. Тиде курслан кӧра погынымаш-влакыште чыла уверзе эше сайрак таныклыше да туныктышо лийын кертын. Чыла тиде Юмын калыкшым шушаш пашалан ямдылен.

¹³ Эртыше жап нерген шонен, ме раш ужына: Иегова шке калыкшым ту йӧсӧ жап годымат вӱден. Кокымшо тӱнямбалысе сар деч вара Иегован Таныкше-влак шуко элыште чарак деч посна таныклен кертыныт. Тидлан кӧра шуко еҥ Иеговам пален налын да кызыт Юмын Кугыжаныш нерген увер уло тӱня мучко йоҥга.

14. Молан ме Иегован организацийжын да кугурак иза-влакын кӱштымашыштлан ӱшанен кертына? (Почмаш 2:1). (Тыгак сӱретым ончыза.)

 ¹⁴ Тачат Вуйлатыше совет гыч иза-влак Христосым колыштыт. Нуно иза-ака-влаклан ончыктынешт: нунын инструкцийышт Иегова ден Иисусын шонымышт почеш негызлыме улыт. Погынымаш-влаклан кӱштымашым пуэдашлан Вуйлатыше совет районым эскерыше да верысе кугурак иза-влакым кучылтеш d. Шӱрымӧ кугурак иза-влак Христосын «пурла кидыштыже» улыт. (Почмаш 2:1 лудын лекса.) Мутат уке, нине иза-влак языкан улыт да южгунам йоҥылышым ыштат. Моисей ден Иисус Навинат апостол-влак гаяк йоҥылышым ыштеныт (Чис. 20:12; Иис. Н. 9:14, 15; Рим. 3:23). Туге гынат Христос ӱшанле тарзым да кугурак иза-влакым виктара да тудо тидым «тӱня пытымешке... кече еда» ышташ тӱҥалеш (Матф. 28:20). Сандене ме чыла кӱштымашлан ӱшанен кертына, кудыштым Христос лӱмын шогалтыме иза-влак гоч пуа.

МОЛАН ИЕГОВАН КАҤАШ ДЕН КӰШТЫМАШЫЖЕ-ВЛАКЫМ КОЛЫШТАШ ПАЙДАЛЕ

15, 16. Иегован каҥашыжым илышыш пуртышо-влакын случайышт тендам мо́лан туныктат?

¹⁵ Кунам ме Иегован каҥашыже-влакым илышыш пуртена, ме уже кызытак пайдам ужына. Мутлан, Э́ндрю ден Ро́уз ӱшанле да ушан тарзын каҥашыже почеш простан илаш тӱҥалыныт. («Тунемме Библийыште» Матфейын 6:22 почеламутлан комментарийым ончыза.) Тидлан кӧра нуно теократический чоҥымаш проектлаште тыршен кертыныт. Роуз ойла: «Южгунам ме чот изи пӧлемлаште иленна, кушто кочкаш шолташ вержат лийын огыл. Мый фотографий-влакым ышташ йӧратем, но мыланем шуко фотокамер ден объектив-влакым ужален колташ логалын. Нуным ужалмем годым мый шортынам. Но Авраамын Сарра ватыж гай лийнем ыле. Сандене мый шеҥгек огыл, а ончыко ончаш тыршенам» (Евр. 11:15). Тиде ешлан лукмо решенийышт-влак могай пайдам конденыт? Роуз ойла: «Мо мемнан уло, ме чылажымат Иеговалан пуэна. Тиде мыланна куаным конда. Тудын заданийжым шуктен, ме пуйто ик шинча дене у тӱняшке ончалынна». Эндрю иза ватыжын мутшо дене келша да ойла: «Ме пиалан улына, вет чыла жап ден вийнам Иеговалан пуэна».

 ¹⁶ Иегован каҥашыже-влакым илышыш пуртымаш могай эше пайдам конда? Марси́я служымаште шукырак ышташ каҥашым колын. Школым пытарымыж деч вара тудо пионер семын чот служитлынеже ыле (Матф. 6:33; Рим. 12:11). Тудо ойла: «Мыланем университетыште оксам тӱлыде тунемаш темленыт. Но мый Иеговалан эн сайжым пуынем ыле, сандене курсым эрташ шонен пыштенам. Ындыжым мыйын тыгай паша уло, кудыжлан кӧра мый шуко жап служитлен кертам. Тиде илышыштем эн сай решений-влак гыч иктыже лийын. Кызыт мый эрелык пионер улам, а паша графикем Вефильыште полшаш да Иеговалан шуко моло пашам ышташ мыланем йӧным пуа».

17. Иеговам колыштмаш могай эше пайдам конда? (Исайя 48:17, 18).

¹⁷ Жапын-жапын ме тыгай каҥаш-влакым налына, кудышт мемнам арален кертыт. Мутлан, Иегован организацийже мемнам шижтара материализм деч да тыгай паша-влак деч, кудыштлан кӧра ме Иегован законжым пудыртен кертына. Юмым колыштына гын, мемнан ару совестьна лиеш да ме кӱлдымӧ стресс деч кораҥына (1 Тим. 6:9, 10). Тунам ме Иеговалан уло шӱм дене служитлен кертына, а тиде мыланна кугу куаным, тыныслыкым да пиалым конда. (Исайя 48:17, 18 лудын лекса.)

18. Молан те эре Иегован каҥаш ден кӱштымашыже-влак почеш ышташ кумылаҥдыме улыда?

¹⁸ Мутат уке, Иегова шке калыкшылан кугу орлык годымат, Христосын тӱжем ий вуйлатымыж годымат еҥ-влак гоч кӱштымаш-влакым умбакыжат пуэдаш тӱҥалеш (Пс. 44:17). Кӱштымашыже-влакым колышташ тӱҥалына мо, эсогыл тунамат, кунам тидым ышташ кумылна огеш лий? Уже кызытак Иеговам колыштына гын, ончыкыжым тудым колышташ мыланна куштылгырак лиеш. Айста эре Иегован каҥаш ден кӱштымашыже-влак почеш ышташ тӱҥалына, ты шотыштак, кудыжым тудо лӱмын шогалтыме иза-влак гоч пуа (Ис. 32:1, 2; Евр. 13:17). Мемнам вӱдышӧ Иеговалан ме тӱрыснек ӱшанен кертына. Тудо мыланна чылаж дечат, мо тудын дене кыл кучымашнам пудыртен кертеш, кораҥаш полша да у тӱнясе курымашлык илышыш наҥгая.