1. Tae-i ǃaroma da Jehovab daoǁgausa ǂhâhâ? Aiǁgau-e mā re.

 MÛNANAI re ǃgārob ǃnâ du gā hâsa. ǁNāpa ī ge kaise a ǁkhōǁkhōsa. ǃGārob xamanin, ǃgāxa hain tsî xoxoron tsîn ge ǀnîsi hâ. ǀNîsi î ge ǃhūb tsîna ǀguin xa ǀoa hâ. Kaise du ge nî ǃgâiaǂgao khoe-e du ga sadu ǀkha ūhâ o, hîna nē ǃkhaiba ǃamkuse a ǂan-e. Tsî ǁkhōǁkhōsasib mâpa hâs tsîna. Tsî ra hui du-e î du ǁnā ǁkhōǁkhōsasiba xū ǂgōsen. Nē ǃhūbaib ge ǁnā ǃgārob khami ī. ǂGui xūn ge hâ sida ǀhōsagusis Jehovab ǀkha da ūhâsa ǁkhōǁkhōsa mâsigu ǃnâ a mâi ǁkhāna. Xawe da ge ǃgâi daoǁgau-aoba ūhâ—Jehovaba. ǁÎb ge ǁkhōǁkhōsa mâsiga xu ra ūbē da. Tsî ī da ra ǃkhaisa ǃoa ra daoǁgauda ǁnās ge ǀamo ûiba, ǀasa ǃhūbaib ǃnâ.

2. Jehovaba mati ra daoǁgauda?

² Jehovaba mati ra daoǁgau da? ǂGuroseb ge ǁîb Mîs ǃnâ-ū ra daoǁgau da. Xaweb ge khoen tsîna ra sîsenū în daoǁgauda. Aiǁgauseb ge “ǂgomǂgomsa tsî ǁnâuǃāxa ǃgāb” tsîna ra sîsenū î da gāgāsi ǂûna māhe, hui da ra ga î da gā-ai mîǁguiga dī. (Mat. 24:45) Jehovab tsîn ge ǁkhāsiga ūhâ aoga ra sîsenū î da daoǁgauhe. Aiǁgause, ǃnarimâra mâǂam-aogu tsî ǀhaohâb ǃûi-aogu tsîn ge ra ǂkhâǃnâ da. Tsî hui da ra daoǁgaus tsîna ra māda î da nē ǃgom ǁaegu ǃnâ ûi. Kaise da ge Jehovaba ra ǃgôaǃgâ nē ǃgom ǁaegu ǃnâb, ǀams nî hās aiǃâ nēti ǃgâise ra daoǁgau dasa. Nēs ge ra hui da, î da Jehovab ǀhōsan ase hâ ǀgara tsî nēsi ǃgâiaǂgao ûib ǃnâ ǀamosib kōse.

3. Tae-e da nē ǁkhāǁkhāǃâs ǃnâ nî ǃhoaǃgao?

³ ǀNî ǁaegu ai i ge ǃgomba da ǁkhā daoǁgausa saosa, ǃgōsase ǀoasa kurusa ūhâ tama khoena xū i ga hā o. Tae-i ǃaroma? Māhe ra daoǁgaus xa da ge ǀnîsi ǃgâibahe tama. Tamas ka io da ge tsâ ǁkhā, daoǁgaus gā-ai tama hâsa tsî da ge a ǂâi ǁkhā nē daoǁgaus Jehovaba xu hā tamasa. Nēti ī ǁaegu ai  da ge ǂgomǃgâsiba ǂhâ hâ Jehovab ǀguib ǁîb khoena ra daoǁgausa tsî i ǁîb daoǁgausa saosa ǂgui ǀkhaega ra hauba dasa. Sida ǂgomǃgâsiba omkhâis ǃaroma da ge nē ǁkhāǁkhāǃâs ǃnâ nî ǃhoaǃgao, (1) matib ge Jehovaba ǁîb khoena Elobmîs ǁaeb ǃnâ daoǁgaus, (2) matib nētsē ra daoǁgau dasa tsî (3) mati da ǃgâiba ra ǀamasa ǁîb daoǁgausa da ga sao o.

JEHOVAB GE ISRAELǁAESA DAOǁGAU ǀGAUS

4-5. Jehovaba mati ge ǁgau Mosebab gere sîsenūsa Israelǁaesa daoǁgaus ǃnâ? (Tsoatsoas ai hâ ai-īsiba kō re.)

⁴ Jehovab ge Moseba ge ǁgaumâi, îb Israelǁaesa Egipteba xu ǂgaeǂgui. Tsîb ge Israelǁaesa mûhe ǁkhā ǁgauǁgauna ge mā, ǁÎb Moseb ǃnâ-ū ǁîna ra daoǁgausa. Aiǁgauseb ge ǃâus ǀkha tsēa gere daoǁgau tsî ǀaes ǀkha ǃui-a. (Eks. 13:21) Moseb ge nē ǃâusa ge sao, ǁîb tsî Israelǁaes tsîna ge ǀapa hurib tawa a sī-ūsa. Xawe gu ge Egipte ǁîga, Israelǁaesa ge sauru. Tsîs ge Israelǁaesa kaise gere ǃao, Egipteǁîn xan nî ǃkham-e din gere ǂâi amaga. ǁÎn ge gere ǂâi Moseb ge ǂhanu tama hâ isa, ǁînab ge ǀapa hurib tawa sī ū o. Nēsa dīs ge ge ǂhanu-i. Jehovab ge Moseba ge sîsenū îb ǁaesa ǁnāǀî daoǁgau. (Eks. 14:2) Elob ge ǁnās ǃnâ-ū ǁaesa buruburuxa ǀgaub ǃnâ oresa ge mā.—Eks. 14:​26-28

⁵ Moseb ge 40 kuriga ǁnās khaoǃgâ, aiǃgû tsî ǃâus ai ge ǂgomaiǂnûi îb ǃgaro ǃhūb ǃnâ daoǁgauhe. a Jehovab ge ǁaeroba nē ǃâusa Moseb tents ǂam-ai ge mâi is hoa Israelǁaesa nēsa mû ǁkhā. (Eks. 33:​7, 9, 10) ǁNā ǃâus ǃnâ-ūb ge Jehovaba Moseb ǀkha ǃhoa tsî daoǁgaude gere mā Jehovab ge tae-e a mîsa. (Psa. 99:7) Israelǁaes ge ǃgāsase ge mû ǁkhā i, Jehovab ge Moseba gere sîsenūsa îb ǁîna daoǁgau.

6. Israelǁaesa mati gere tanisen Jehovab daoǁgaus ǃoagu? (Numeri 14:​2, 10, 11)

⁶ Tsûtsûsasen ge ǃnāsa Israelǁîna Jehovab ge Moseba gere sîsenūs ǁgauǁgaude ge ǃharaxu. (Khomai re Numeri 14:​2, 10, 11 sa.) ǃNās hoasan ge ǁîna ge ūǃoa ǂgao tama hâ i, Jehovab ge Moseba gere sîsenūsa îb ǁîna daoǁgau. ǁNās xa ǃaromahe hâseb ge Jehovaba ge mā-am tama hâ i în mîmâisa ǃhūb ǃnâ ǂgâ.—Num. 14:30.

7. ǁNān Jehovab daoǁgausa ge saon aiǁgaude mā re. (Numeri 14:24) (Ai-īsib tsîna mû re.)

⁷ ǀNîn Israelǁaes din ge ge hâ i, Jehovab daoǁgausa gere saona. Aiǁgauseb ge Jehovaba ge xoa kai: “Xawe ti ǃgāb Kaleb ge ǀkharati ǂâi tsî ǂgomǂgomsa.” (Khomai re Numeri 14:24 sa.) Elob ge Kaleba ǀkhae tsî ge mā-am bi îb ǁhûi mâpab ra hâ ǂgaosa mîmâisa ǃhūb ǃnâ. (Jos. 14:​12-14) Israelǁaes hîna ge mā-amhena în mîmâisa ǃhūb ǃnâ ǂgân ge ǃgâi aiǁgausa ge ǁgau, Jehovab di daoǁgausa saos ǃnâ. Josuab ge Moseb khaoǃgâ a ǁgaumâihe o îb Israelǁaesa ǂgaeǂgui, on ge ǁîna ǁîba “kai ǃgôasiba ge mā” ǁîb ge ûi hâ i kurigu hoaga. (Jos. 4:14) ǁNās xa ǃaromahe hâseb ge Jehovaba ǁîna ge ǀkhae tsî ǁîna mîmâisa ǃhūb ǃnâ ge ûi kai.—Jos. 21:​43, 44.

8. Gao-aogu di ǁaeb ǃnâb ge Jehovaba ǁîb khoena gere doaǁgau ǀgauba ǁguiǃā re. (Ai-īsib tsîna mû re.)

⁸ Kuriga ǃkharu tsîb ge Jehovaba ǂhanuǂhanu-aoga ge ǁgaumâi î gu ǁîb khoena daoǁgau. ǁNās khaoǃgâb ge Jehovaba nē gao-aogu di ǁaeb ǃnâ kēbo-aoga ge ǁgaumâi, î gu ǁîb khoena daoǁgau. ǂGomǂgomsa gao-aogu ge kēbo-aogu gere mā daoǁgausa gere sao. Aiǁgauseb ge Gao-aob  Davida ǃgamǃgamsenxase ǁnamasa ge ūǃoa kēbo-aob Natana xu. (2Sam. 12:​7, 13; 1Kro. 17:​3, 4) Gao-aob Jehosafati ge kēbo-aob Jehasieli ai gere ǂgomaiǂnûi daoǁgaus ǃaroma tsî khoena ge ǂkhâǃnâ, în Elob “kēbo-aob go mîba” nî xūn ǃnâ ǂgom. (2Kro. 20:​14, 15, 20) ǂÂiǂhânsen îb gere ob ge gao-aob Hiskiaba kēbo-aob Jesajaba ǃoa gere kō daoǁgauhes ǃaroma. (Jes. 37:​1-6) Gao-aogu ge Jehovab di daoǁgausa sao tsî ǃnās hoasa gere ǀkhaehe. ǁNās ǃnâ-ūs ge ǁaes tsîna gere ǁkhaubahe. (2Kro. 20:​29, 30; 32:22) Hoa khoen ge ǃgāsase ga ǁnâuǃā hâ Jehovab ge ǁîna kēbo-aogu ǃnâ-ū gere daoǁgausa. Xawe gu ge gao-aogu tsî Israelǁaes tsîna Jehovab kēbo-aoga ge ǃgâ tama hâ i.—Jer. 35:​12-15.

JEHOVAB GE ǂGUROKHAM ǁAEB XRISTEǁÎNA A DAOǁGAU ǀGAUB

9. Jehovaba ham-e gere sîsenū ǂgurokham ǁaeb Xristeǁîna daoǁgaus ǃaroma? (Ai-īsib tsîna mû re.)

⁹ Pentecost 33 kuri î ge ǀasa ǀhaohâba ge ǂnubikhâihe. Jehovaba ǁnā ǀhaohâba mati gere daoǁgau? ǁÎb ge Jesuba ǀhaohâb di danab ase ge ǁgaumâi. (Efe. 5:23) Xaweb ge Jesuba mâ ǁkhāǁkhāsabe-i hoa-i ǀkha ge ǃhoa tama hâ i, ǁîga daoǁgaus ǃaroma. ǁÎb ge Jerusalems ǃnâ hâ apostelgu tsî ǀhaohâb ǃûi-aogu tsîna gere sîsenū. (ǃNǃkh. 15:​1, 2) ǀHaohâb ǃûi-aogu tsîn ge ge ǁgaumâihe î gu ǀhaohâga daoǁgau.—1Tes. 5:12; Tit. 1:5.

10. (a) ǂGurokham ǁaeb Xristeǁîna mati daoǁgausa ge ūǃoa? (ǃNaeǃkhaidi 15:​30, 31) (b) Tae-i ǃaroman ge ǀnîna Elobmîs ǁaeb ǃnâ Jehovab ǁgaumâi hâ khoegu daoǁgaude ūǃoa ǂgao tama hâ i? (“ Tae-i ǃaroman ge ǀnîna ǃgāsa daoǁgaude ūǃoa tama hâ i?” ti hâ boksisa khomai re.)

¹⁰ ǁNā ǁaeb Xristeǁîna mati nē daoǁgaude ge ūǃoa? ǃNāsan ge kaise gere ǃgâiaǂgao nē daoǁgaude ūǃoasa tsîn ge māsenxase ge sao. Mîhe ras ǃoagun ge ǁîna “ǀgaiǀgaiǃnâs xa ge ǃgâiaǂgao.” (Khomai re ǃNaeǃkhaidi 15:​30, 31 sa.) Jehovaba mati ǁîb khoena nētsē ra daoǁgau?

JEHOVAB NĒTSĒ RA DAOǁGAUDA ǀGAUB

11. Aiǁgaude mā re ǁgaura de matib ge Jehovaba nē ǁaeb ǃnâ ǂgomǂgomsa-aoga a daoǁgau ǀgausa.

¹¹ Jehovab ge aiǃgû tsî ǁîb khoena ra daoǁgau. Nēsab ge Elobmîs tsî ǁîb ǀGôab  ǀhaohâb danab ǃnâ-ūs tsîna ra dī. ǁGauǁgauna da a mû ǁkhā, Elob nētsēs tsîna khoega ra sîsenūsa daoǁgaude mās ǃaroma? Îo. Aiǁgause, tae-i ge 1870 a īsa ǃgaoǃgâ re. Charles Taze Russeli tsî ǁîb ǀhōsagu tsîn ge ge ǁnâuǃā mati iob 1914 a ǂhâǂhâsa kurisa Elob gaosib ǃgao. (Dan. 4:​25, 26) Nēsa ǁnâuǃās ǃaroma gu ge Elobmîs kēbode ge ôaǃnâ tsî ǂgomǃgâsiba ge ūhâ i nē kēbos nî dīǀoaǀoahesa. Jehovaba nē Elobmîs ôaǃnâsa gere daoǁgau? Îo, ǁîb ge ti ge dī. Elob Gaosib ge 1914 a ǂgaeǂgui tsoatsoasa da ge nētsē ra ī xūn ǃnâ ra mû. ǂGuro ǃhūbaib torob ge ge tsoatsoa tsî i ge ǁnāpaxū ǂkhīǀaegu, ǃhūǂgubigu tsî ǂûn ǃnūbusigu tsîna ge hâ tsoatsoa. (Luk. 21:​10, 11) Jehovab ge amase ǁnā ǂgomǂgomsa aoga gere sîsenū ǁîb khoena huis ǃaroma.

12-13. ǂGomǂgomsa tsî gā-ai ǃgāba tae-e ǀgamǁî torob khaoǃgâ ge dī?

¹² Tae-i ge ǀgamǁî torob ǃnâ a īsa ǃgaoǃgâ re. ǀApeǂhumis ǃnâ ǃereamsa ūhâ ǃgâsagu dana beros tawa ra hâ gu ge ǂHaiǂhais 17:8 sa ge ôaǃnâ. Nē ôaǃnâs ge ge hui î gu ǁnâuǃā ǀgamǁî torob khaoǃgâs Armagedonsa hā tidesa. ǁNās ǀkha gu ge ge ǂan i torob khaoǃgân Jehovab ǃoaba-aona ǂkhîb ǁaeba nî ūhâsa în aoǁnâ. Khoesi mûǂuiba xu i ge ǂhanuse mûsen tama hâ i xawe gu ge nē ǃgâsaga Gilead skola ge tsoatsoa. În sîsabena ǁkhāǁkhāhe matin nî aoǁnâ tsî nau khoena nî ǁkhāǁkhāsa ǃhūbaib ǂhawase. Sîsaben ge torob ǁaeb ǃnâs tsîna gere sîǂuihe. ǂGomǂgomsa tsî gā-ai ǃgāb ge ǀō-aisa skoli tsîna ge tsoatsoa, Theocratic Ministry School b ti a ǂansaba. Nē skoli ge ǀhaohâb ǃnâ hân hoana ǁîn aoǁnâ sîsenni ǀkha gere hui. Tsî nē ǀgaub ǃnân ge Elob khoena gere ǁkhāǁkhāhe, în ǃgâi aoǁnâ-ao tsî ǁgauǃnâ-ao kai hānî aoǁnâ sîsenni ǃaroma.

¹³ Kō oa da ga, o da ge ǃamkuse mû ǁkhā Jehovab ge ǁîb khoena nē ǃgom ǁaegu ǃnâ gere daoǁgausa. Jehovab khoen ge ǀgamǁî torob khaoǃgâ ǂkhîb tsî ǃnorasasib tsîna nēsi ǂgui ǃhūgu ǃnâ aoǁnâ sîsenni ǃnâ ra hōǃâ. ǂGui khoen ge nēs ǃnâ-ū Jehovaba ge ǂan tsî ǁîb di khoen ge noxoba ǃhūbaib ǂhawase aoǁnâs ǀkha ra aiǃgû.

14. Tae-i ǃaroma da Jehovab ǀapeǂhumis tsî ǀhaohâb ǃûi-aoga xu ra hā daoǁgaude ǂgomǃgâ ǁkhā? (ǂHaiǂhais 2:1) (Ai-īsib tsîna mû re.)

 ¹⁴ Nētsēs tsînab ge ǂgomǂgomsa tsî gā-ai ǃgāba Xristub di daoǁgausa ǃoa ra kō. ǁÎgu ge ra ǂhâba, î-i ǃgâsan ra māhe daoǁgaude Elob di ǂâi ǀgauba ǁîna ǁgau. ǁÎgu ge ǃnarimâra mûǂam-aogu tsî ǀhaohâb ǃûi-aogu tsîna ra sîsenū ǀhaohâba daoǁgaude māsa. c ǂKhauhesa ǃgâsagu ge Xristub “amǀkhāb ǃommi” hui-ao. (Khomai re ǂHaiǂhais 2:1 sa.) Tsî hâ as ge nē ǃûi-aogu ge ǀoasa kurusa ūhâ tama tsî ra dīsā. Moseb, Josuab tsî apostelgu tsîn ge ǁkhā ǀgaub ǃnâ ǁîgu tsîna gere dīsa. (Num. 20:12; Jos. 9:​14, 15; Rom. 3:23) Xawe da ge ǃgāsase ra mû, matib Jesuba ǂgomǂgomsa ǃgāb tsî ǁgaumâihe hâ ǀhaohâb ǃûi-aogu tsîna aiǃgû tsî ra huisa. ǁÎb ge nēsa “ǃhūbaib di ǀunis kose” nî dī ǀgara. (Mat. 28:20) ǁNā-amaga da ge ǁgaumâihe hâ aogu ǃnâ-ū da ra māhe daoǁgaude kaise ra ǂgomǃgâ.

JEHOVAB DAOǁGAUSA SAOSA XU DA GE ǃGÂIBA RA HŌ

15-16. Tae-e da Jehovab daoǁgausa ge ǃgâ khoen aiǁgausa xu ra ǁkhāǁkhāsen?

¹⁵ Jehovab di daoǁgausa da ga sao ǀgara, o da ge nētsēs tsîna ǀkhaega ra hōǃâ. Sao rase Andib tsî Robins aiǁgausa ǃgaoǃgâ re, ǁîra ge ǀgui ǃgupu ûiba ūhâsa ge ǁkhāǁkhāsen. (Mat. 6:22) Nēs ge ge īǁkhā kai îra ǀapeǂhumis om sîsengu ǃnâ ǃâ-e ūhâ. Robins ge ra mî: “Sim ge kaise a ǂkhariro oms ǃnâ gere hâ, ǂû-em nî sâi ǃnâ ǃkhais tsîn ge ge ǀkhai i. Tita ge fotona ǃkhōs xa kaise ge ǃgâibahe i xawe ta ge ti kamerasa ge ǁamaxū. Kaise ta ge ge ā. Abrahammi taras Saras khami ta ge ge mîǁgui aisǀkhāba ǃoa kōsa.” (Heb. 11:15) Nē khoe-aogu ra tae-e ge ǁkhāǁkhāsen? Robins ge ra mî: “Kaisem ge ra ǃgâiaǂgao ǂanam a xui-ao Jehovabam ǁkhān an hoana ra mā o. Om sîsengu ǃnâ ǁhaos ge ra hui mî, mûnan-aisa matib ûiba nî īsa ǀasa ǃhūbaib ǃnâ.” Andib ge nēsa ǃkhō-am tsî ra mî: “Kaisem ge ra ǃgâiaǂgao sîm ǁaeb tsî ǁkhāsib tsînam Jehovab ǃoabas ǃnâ ra sîsenū amaga.”

¹⁶ Mâ ǀgaub ǃnâs tsîna da ǃgâiba ra hō Jehovab daoǁgausa saos ǃnâ-ū? Mersias aiǁgausa ǃgaoǃgâ re, skolas ge toa os ge  aimâba-aose ǃoabas di ǀapes xa ge ǂâi tsoatsoa. (Mat. 6:33; Rom. 12:11) ǁÎs ge ra mî: “Tita ge haka kuriga matare tamase ǀgapi ǁkhāǁkhāsensa dīs ǃēsa ge māhe. Xawe ta ge tita gagasi mîǁguiga dīs ai ti ǂâisa ge ǂnûi. ǁNās ǀkhas ta ge texnise skola ǃoa ge ī, î ta xū-e sī ǁkhāǁkhāsen marisise nî ǂkhâǃnâte-e aoǁnâ sîsenni ǃnâ. Nēb ge dī ta ge mîǁguigu hoagu ǃnâ kaise ge ǂhâǂhâsa i. Nēsi aimâba-aose sîsens xa ta ge kaise a ǁkhoaxabahe. Ti sîsenni tsîn ge ra īǁkhā kai î ta Betels tawa hui tsî ǀnî hâ ǀgaub ǃnâs tsîna Jehovaba ǃoaba.”

17. Mâ ǀkhaegu tsîna hâ Jehovab daoǁgaude da ga sao ai ǀgara o? (Jesajab 48:​17, 18)

¹⁷ ǀNî ǁaega da ge ǁkhauba da ra ǀapemāde ǀapeǂhumisa xu ra hō. Aiǁgause da ge ra hui-e, î da tā mari-e ǀnam tsî xūn hîna Jehovab ǁgaraga a khôa kai da ǁkhān ǃnâ ǃâ. ǁNā mâsigu ǃnâs tsîna da ge ra mû, mati da ǃgâiba ra hōsa Jehovab daoǁgausa da ga sao o. ǃAnu ǃgâiǂâis tsî ǂhâbasa tama ǂâiǂhânsende xus tsîna da ge ra ǁkhaubahe. (1Tim. 6:​9, 10) Jehovab tsîna da ge ǂgaob hoab ǀkha ǃoaba ǁkhā tsî ǁnās ǂam-ai i ge kai ǃgâiaǂgaob tsî ǂkhîb tsîna nî mā da xū-e a ǀkhai.—Khomai re Jesajab 48:​17, 18 sa.

18. Tae-i ǃaroma da ra mîǁgui Jehovab daoǁgausa saosa?

¹⁸ Jehovab ge aiǃgû tsî khoega nî sîsenū daoǁgaude mâǃkharusa, kai ǁgâiǀkhāb tsî 1000 kurigu ǂgaeǂguis ǁaeb ǃnâs tsîna. (Psa. 45:16) ǁNā daoǁgaude da ge nî sao ǀnî hâ xū-e da ga dī ǂgao xawe. Jehovab nēsi ra mā daoǁgaude da ga sao, os ge ǁnāsa dīsa hānîǁaeb ǃnâ nî supu. ǁNā-amaga hā re î da aiǃgû tsî Jehovab ra mā daoǁgaude sao ǁgaumâihe hâ aogu ǃnâ-ū. (Jes. 32:​1, 2; Heb. 13:17) ǀGaisa ǂgomǃgâsib ǀkha da ge sida daoǁgau-aob Jehovaba a sao ǁkhā. ǁÎb sida ǀhōsagusis ǁîb ǀkha da ūhâsa a ǁgaiǁgai ǁkhā xūna xu ra ǁkhauba da tsî ǀamo ûiba ǃoa ra daoǁgauda amaga.