1. ¿Tleka melak noneki matechyekana Jehová? Xkijto se neskayotl.

 XKONNEMILI ika yotipoliuj kampa melak kojyo. Ompa nemij yolkamej tlen tekuaj, nemij yolkatsitsintin niman onokej seki xiujtin tlen uelis mitsmiktiskej tla tikinkitskia. Noijki onokej temej tlen ika uelis timantikisas. ¿Xmelak ika tikuelitaskia mouan manemi yakaj akin kuajli tlaixmatstok niman mamitsijli kanon noneki tias? Yejuin tlaltikpaktli yeskia ken kampa kojyoj niman tlatemojtikan. Ipan tlaltikpaktli panoua miyek tlen xkuajli niman tlen uelis kijtlakos totlaneltokil. San ika, nemi yakaj akin techyekana: Jehová. Yejua techpaleuiya para maka itlaj matechijtlako niman ijkon uelis tikseliskej nemilistli tlen xkeman tlamis ipan yenkuik tlaltikpaktli.

2. ¿Kenon techyekana Jehová?

² Jehová kitekitiltia Biblia niman kintekitiltia tokniuan tlakamej para techyekanas, ken “tekitketl” yolmelauak niman tlamachilise. Yejuin “tekitketl” kuajli techmachtia niman ijkon matiktlapejpenikan tlen kuajli (Mat. 24:45). Jehová noijki kintekitiltia tlayekankej ipan circuito niman tlayekankej ipan tlanechikojli para matechyolchikauakan niman matechpaleuikan ijkuak itlaj tikixnamikiskej. Melak tiktlasojkamachiliaj Jehová ika ipan yejuin itlamiyan tonaltin yejua techyekana pampa yejon techpaleuiya kuajli iuan matouikakan. Noijki techpaleuiya matiyolpakikan aman niman techpaleuis matiyolpakikan ika tlayekapan.

3. ¿Tlenon tikitaskej ipan yejuin tlamachtijli?

³ Ijkuak Jehová kintekitiltia tokniuan tlakamej para techyekanas, kanaj xmás tikuelitaj tikchiuaskej tlen techijliaj. ¿Tleka? Pampa kanaj xtikuelkakij tlen techijliaj noso kanaj tiknemiliaj ika tlen techijliaj xualeua itech Jehová pampa xmás kuajli  noso xmás kinamiki tlen technauatiaj. Ijkuak ijkon titlanemiliskej, ijkuakon más noneki matikneltokakan ika Jehová kiyekantok ikalpan niman ika melak kuajli tla tikchiuaj tlen techijliaj. Ipan yejuin tlamachtijli tikitaskej tlen techpaleuis más matikneltokakan ika Jehová kiyekantika ikalpan. Tikitaskej 1) kenon yeuejkaui Jehová okiyekan ikalpan, 2) kenon kiyekantika ikalpan ipan yejuin tonaltin niman 3) kenon techpaleuiya tla tokauiliaj matechyekana.

KENON JEHOVÁ OKIYEKAN KALPAN ISRAEL

4, 5. ¿Kenon Jehová okimititi israelitas ika okitekitlali Moisés para kinyekanas? (Xkita tlaixkopinajli tlen nesi ixpan yejuin revista).

⁴ Jehová okitekitlali Moisés para makinyekana israelitas, niman Jehová okichiuj seki tlemach para kimititis israelitas ika yokitlapejpenijka Moisés. Ijkuak okinkixti Egipto, Jehová okitlali se moxtli ika tonajli niman se “tlimilinajli” ika yeuajli para kinyekanas (Éx. 13:21). Moisés okinuikak israelitas mar Rojo pampa moxtli niman “tlimilinajli” ompa okiyekankej. Ijkuak israelitas oajsikej mar niman ijkuak egipcios ikominajsitoyaj, melak onomojtijkej, okinemilijkej ika Moisés onopopolojka. San ika, Jehová yejua akin okiyekan Moisés para ompa makinuika (Éx. 14:2). Niman sakin Jehová okichiuj se milagro para kinmakixtis (Éx. 14:​26-28).

⁵ Jehová okitekitilti moxtli niman “tlimilinajli” 40 xiuitl niman ijkon Moisés makimati kanon ika kinuikas ikalpan ipan tlaluaktli. a Kemantika Jehová kitlaliaya on moxtli noso on “tlimilinajli” kampa nokajkaltiaya Moisés niman ijkon nochimej makitakan (Éx. 33:​7, 9, 10). Jehová kinotsaya Moisés ipan yejon moxtli niman sakin Moisés kimijliaya israelitas tlen Jehová yokijlijka (Sal. 99:7). Kuakon, israelitas kuajli kitayaj ika Jehová kitekitiltijtoya Moisés para kinyekanas.

6. ¿Tlenon okichiujkej miyekej israelitas? (Números 14:​2, 10, 11).

⁶ Jehová kuajli okimititi israelitas ika yokitlapejpenijka Moisés para yejua makinyekana, san ika, miyekej israelitas xkuelitayaj makinyekana Moisés (xpoua Números 14:​2, 10, 11). Ika yejon, Jehová xokinkauili makalakikan ipan Tlajli tlen yokimijlika kinmakas (Núm. 14:30).

7. ¿Akinomej okinokauilijkej makinyekana Jehová? (Números 14:24; noijki xkita tlaixkopinajli).

⁷ Onenkej sekimej israelitas akin kema okinokauilijkej makinyekana Jehová, ken Caleb. Jehová ijkin okijto: “Caleb, […] kipiya oksekneka iyojlo niman yejua onechtlakamat” (xpoua Números 14:24). Jehová okiteochiuj Caleb niman hasta okikauili makitlapejpeni kanon kinekiya chantis ne Canaán (Jos. 14:​12-14). Israelitas akin okalajkej ipan Tlajli tlen okimijlikej kinmakaskej noijki okinokauilijkej makinyekana Jehová. Yejuamej nochipa okitlakaitakej Josué pampa Jehová yejua okitlapejpeni para makinyekana israelitas sakin ika omik Moisés (Jos. 4:14). Ika yejon, Jehová okinteochiuj niman okinkauili machantikan ipan Tlajli tlen yokimijlika kinmakas (Jos. 21:​43, 44).

8. ¿Kenon yeuejkaui Jehová okiyekan ikalpan? (Noijki xkita tlaixkopinajli).

⁸ Sakin Jehová okintekitlali jueces niman ijkon makiyekanakan ikalpan. Niman ijkuak nemiyaj tekiuajkej ipan kalpan Israel, Jehová okintekitilti teotlajtokej niman ijkon kiyekanas ikalpan. San sekimej matikinteneuakan. Ijkuak tekiuaj David onopopolo, teotlajtoketl Natán okimelajkatlali (2 Sam. 12:​7, 13; 1 Crón. 17:​3, 4). Ijkuak tekiuajtitoya  Jehosafat, yejua okichiuj tlen okijli teotlajtoketl Jahaziel niman okimijli akin chantiyaj Judá matlaneltokakan intech iteotlajtokauan toTajtsin (2 Crón. 20:​14, 15, 20). Niman tekiuaj Ezequías okitlajtlanili teotlajtoketl Isaías makipaleui (Is. 37:​1-6). Ijkuak tekiuajkej kinokauiliayaj makinyekana Jehová, Jehová kinteochiuaya niman kitlajpiaya ikalpan (2 Crón. 20:​29, 30; 32:22). Kuajli nesiya ika Jehová kiyekantoya ikalpan intechkopa teotlajtokej. San ika, miyekej tekiuajkej niman sekimej israelitas xkintlakamatiyaj teotlajtokej (Jer. 35:​12-15).

KENON JEHOVÁ OKINYEKAN TOKNIUAN IPAN KACHTOPA SIGLO

9. ¿Kenon Jehová okinyekan tokniuan ipan kachtopa siglo? (Noijki xkita tlaixkopinajli).

⁹ Ipan kachtopa siglo, Jehová okitlali kachtopa tlanechikojli, niman okiyekan itechkopa Jesús (Efes. 5:23). San ika, Jesús xtlajtouaya imiuan nochimej tokniuan para kimijlis tlenon kichiuaskej, yejua noijki kintekitiltiaya apóstoles niman tokniuan tlayekankej akin chantiyaj Jerusalén para kiyekanas tekitl tlen nochiujtoya (Hech. 15:​1, 2). Noijki, okintlali tlayekankej ipan nochi tlanechikoltin niman ijkon makinyekanakan tokniuan (1 Tes. 5:12; Tito 1:5).

10. a) ¿Tlenon kichiuayaj tokniuan ipan kachtopa siglo ijkuak itlaj kimijliayaj? (Hechos 15:​30, 31). b) ¿Tleka yeuejkaui miyekej xokintlakamatkej akin Jehová okintlapejpeni para makiyekanakan ikalpan? (Xkita recuadro “ Tleka sekimej xkinekij makinyekanakan tlakamej akin Jehová yokintlapejpeni”).

¹⁰ Miyekej tokniuan ipan kachtopa siglo ika inyojlo kintlakamatiyaj tokniuan akin kinyekanayaj. Biblia kijtoua ika “sanoyej opakkej ipampa on yoltlalilistli yejuan okiselijkej” (xpoua Hechos 15:​30, 31). Niman aman, ¿kenon Jehová kiyekantika ikalpan?

KENON AMAN TECHYEKANA JEHOVÁ

11. ¿Kenon tikmatij ika Jehová techyekantika intechkopa tokniuan tlakamej? Xkijto se neskayotl.

¹¹ Jehová techyekana itechkopa Biblia niman itechkopa iKoneuj. ¿Niman ok kintekitiltia tokniuan tlakamej para techyekanas? Kema. Matontlanemilikan itech tlen okichiujkej Charles Russell niman akin iuan nomachtiayaj. Ijkuak yopanoka xiuitl 1870, yejuamej okasikamatkej ika iTekiuajyo toTajtsin itlaj kichiuaskia ipan 1914 (Dan. 4:​25, 26). ¿Niman kenon okimatkej yejon? Pampa onomachtijkej teotlajtoltin  tlen uajnestiayaj ipan Biblia niman pampa Jehová okinpaleui makimasikamatikan. Ipan 1914, opeuj Kachtopa Guerra ipan nochi tlaltikpaktli, ooniak miyek kokolistin, tlalolinalistin niman apistli. Yejon okiteititi ika iTekiuajyo toTajtsin yopeujka tekiuajti (Luc. 21:​10, 11). Kuajli tikitaj ika Jehová kintekitiltijtoya yejuin tlakamej niman ijkon kipaleuis ikalpan.

12, 13. ¿Tlenon okichiujkej tokniuan ijkuak panotoya ika Okpa Guerra ipan nochi tlaltikpaktli niman ijkon más manotenojnotsa?

¹² Matikitakan tlen opanok ijkuak panotoya ika Okpa Guerra ipan nochi tlaltikpaktli. Tokniuan akin tlayekantoyaj kampa noyekanaj nochi sucursales, onomachtijkej Apocalipsis 17:8 niman okasikamatkej ika ijkuak tlamiskia ika Okpa Guerra ipan nochi tlaltikpaktli, xnimantsin yejkoskia Armagedón, yej oniaskia se tiempo ijkuak oniaskia yolseuilistli. Yejon kinpaleuiskia tokniuan más matenojnotsakan, ika yejon, ikalpan Jehová okinemili kipeualtis se tlamachtijli tlen okitokayotijkej Colegio Superior Bíblico de la Watchtower de Galaad. b Ipan yejuin tlamachtijli kinmachtiskiaj tokniuan misioneros niman ijkon oksekan matenojnotsatij niman matemachtitij. Niman maski panotoya guerra, okintitlankej tokniuan misioneros ipan okseki países. Noijki, “tekitketl” yolmelauak kinekiya kinpaleuis nochimej akin tenojnotsayaj para más kuajli matemachtikan, ika yejon, okipeualti se tlamachtijli tlen okitokayoti Curso en el Ministerio Teocrático. c Nochi yejuin melak tepaleuiskia para más kuajli manotenojnotsa nochiuiyan.

¹³ Kuajli tikitaj ika Jehová okiyekan ikalpan ijkuak panotoya guerra. Niman ijkuak otlan ika Okpa Guerra ipan nochi tlaltikpaktli, miyekan okinkauilijkej tokniuan matenojnotsakan. Aman, nochiuiyan notenojnotsa niman melak miyekej yokixmatkej Jehová.

14. ¿Tleka uelis titlaneltokaskej itech tlen techijlia ikalpan Jehová niman tlen techijliaj tlayekankej? (Apocalipsis 2:1; noijki xkita tlaixkopinajli).

¹⁴ Aman Grupo akin Tlayekana kinokauilia makiyekana Cristo. Ijkuak yejuin tokniuan itlaj techijliaj, yejuamej kachtopa kitaj tla  yejon tlen kinekij Jehová niman Jesús. Sakin, kintekitiltiaj tokniuan tlayekankej ipan circuito niman tlayekankej ipan tlanechikoltin para techijliskej tlen noneki nochiuas. d San ika, kemantika yejuin tokniuan nopopolouaj ijkon ken onopopolojkej Moisés, Josué niman apóstoles pampa tlajtlakolejkej (Núm. 20:12; Jos. 9:​14, 15; Rom. 3:23). San ika, Biblia kijtoua ika Cristo kinpiya ipan “iyekma” nochimej tokniuan akin techyekanaj (xpoua Apocalipsis 2:1). Ika yejon, kuajli matikmatstokan ika Jesús kiyekana “tekitketl” yolmelauak niman kinyekana nochimej tokniuan tlayekankej, niman nochipa ijkon kichiuas hasta ijkuak tlapopoliuis (Mat. 28:20). Kuakon, nochipa matitlaneltokakan itech yejuin tokniuan pampa kuajli tikmatstokej ika Jehová niman Jesús kinyekantokej.

KENON TECHPALEUIYA TLA TOKAUILIAJ MATECHYEKANA JEHOVÁ

15, 16. ¿Tlenon tiuelij itech tokniuan akin okinokauilijkej makinyekana Jehová?

¹⁵ Melak techpaleuiya ijkuak tokauiliaj matechyekana Jehová. Matitlajtokan itech tokniuj Andy niman isiuauj, Rosy. e Yejuamej okichiujkej tlen Biblia kijtoua: onenkej sa ika achijtsin (uelis tikitas Hebreos 13:5). Pampa ijkon okichiujkej, ouel otlapaleuijkej ipan construcción. Tokniuj Rosy kijtoua: “Tokauanij kampa melak tlapitsko, niman kemantika nion xonka kampa uelis titlakualchiuaskej. Niman nejua melak nikuelita nikinkixtis fotos, san ika, ononek nikinnemakas nocámaras niman okseki tlen nikpiaya. Maski onichokak ijkuak onikinnemakak, nejua niknektoya nikchiuas ijkon ken Sara, isiuauj Abrahán, niman xsan nikilnamiktos tlen onijkauj” (Heb. 11:15). Niman, ¿yolpakij pampa ijkon okichiujkej? Rosy kijtoua: “Melak tiyolpakij pampa tikmakatokej Jehová nochi tlen tikpiyaj. Ijkuak tikchiuaj se tekitl para Jehová, techpaleuiya matiknemilikan kenon tinemiskej ipan yenkuik tlaltikpaktli pampa ijkuakon nochipa tiktekichiuiliskej Jehová”. Niman tokniuj Andy kijtoua: “Melak tiyolpakij pampa chikauak titlapaleuiyaj ipan ikalpan Jehová”.

¹⁶ Matikitakan tlenon noijki uelis panos tla tokauiliaj matechyekana Jehová. Matitlajtokan itech tokniuj Marcia. Ijkuak otlan nomachtia ipan escuela, yejua onochiuj precursora  (Mat. 6:33; Rom. 12:11). Yejua kijtoua: “Se universidad onechijli ika ueliskia ompa ninomachtis naui xiuitl niman xtlaj niktlaxtlauaskia. San ika, nejua niknekiya más niktekichiuilis Jehová, ika yejon, onikalak ipan se escuela kampa nechmachtiskiaj se tekitl tlen nechkauiliskia maniktlani tomin niman maninochiua precursora. Melak niyolpaki pampa ijkon onikchiuj. Aman nejua niprecursora, niman notekiyo xmás nechkuilia tiempo, ika yejon, ueli nitlapaleuiya Betel seki tonaltin niman ueli nikchiua okseki tekitl ipan ikalpan Jehová”.

17. ¿Kenon noijki techpaleuiya ijkuak tokauiliaj matechyekana Jehová? (Isaías 48:​17, 18).

¹⁷ Miyekpa, ikalpan Jehová techijlia tlenon uelis tikchiuaskej niman ijkon nochipa tiktlakamatiskej Jehová niman xtiktlasojtlaskej tomintsin. Ijkuak tejuamej tikchiuaj tlen techijlia, melak techpaleuiya pampa ijkon tikpiyaj totlamachilis chipauak niman xtikinpiyaj tlaueltin (1 Tim. 6:​9, 10). Niman yejon techpaleuiya más kuajli matiktekichiuilikan Jehová, niman san yejon melak techyolpaktia niman techyolseuiya (xpoua Isaías 48:​17, 18).

18. ¿Tleka tikneki nochipa mamitsyekana Jehová?

¹⁸ Jehová ok kintekitiltijtos tokniuan niman ijkon kiyekanas ikalpan ijkuak panos ueyi tlajyouilistli niman ijkuak Jesús tekiuajtis Mil Xiuitl (Sal. 45:16). Niman ijkuak ijkon panos, ¿tiknektoskej tiktlakamatiskej Jehová maski kanaj tikuelitaskiaj itlaj okse tikchiuaskej? Tla desde aman tiktlakamatij, ika tlayekapan noijki tiknektoskej tiktlakamatiskej. Kuakon, nochipa matokauilikan matechyekana Jehová, yejon noijki kijtosneki ika noneki tikintlakamatiskej tokniuan akin Jehová yokintlapejpeni para matechtlajpiyakan (Is. 32:​1, 2; Heb. 13:17). Kuajli tikmatstokej ika uelis titlaneltokaskej itech Jehová, akin techyekana. Yejua techpaleuiya maka topan manochiua tlen xkuajli niman noijki techpaleuiya matajsikan ipan yenkuik tlaltikpaktli, kampa uelis nochipa tinemiskej.