1. Hana wa moguna khöda wanuturu lala moroi khö Yehowa? Beʼe duma-duma.

 KHALAIGÖ na elungu ndraʼugö ba gatua. Oya sibai deʼala ba zi fasuimö, simane urifö samuʼi, di solohe fökhö, sinanö solangu hegöi tanö sokara-kara. Hizaʼi, tola örasoi waʼahono dödö börö me so samösa zanuturu lala sonekhe si fao khömö. Iʼila hezo manö gametahö so deʼala, ba iforege enaʼö lö teʼala ndraʼugö. Simane daʼö zalua ba gulidanö iadaʼa. Oya sibai deʼala si tola mamaʼala famatida. Hizaʼi, so Zanuturu Lala soʼahonoa khöda, yaʼia daʼö Yehowa. Itolo enaʼö lö göna ita teʼala ba ibeʼe khöda wanuturu lala enaʼö tarugi gohitö dödöda, faʼauri si lö aetu ba gulidanö si bohou.

2. Hewisa wameʼe Yehowa khöda fanuturu lala?

² Hewisa wameʼe Yehowa khöda fanuturu lala? Si oföna, iʼogunaʼö Daromalinia, Sura Niʼamoniʼö. Hizaʼi, iʼogunaʼö göi niha gulidanö Yehowa tobali salahinia. Duma-dumania, iʼogunaʼö ”zawuyu si lö faröi ba satua-tua” ba wohenaigö ö wamati sanolo yaʼita ba wangai angetula si sökhi. (Mat. 24:45) Iʼogunaʼö göi Yehowa ndra matua tanö böʼö si tola muʼodaligö, simane ira satua samasui hegöi satua sokubaloi. Labeʼe wanuturu lala ba famarou dödö enaʼö abölö ita ba ginötö alua khöda gabula dödö. Tatu taʼandrö sibai saohagölö börö me ibeʼe Yehowa wanuturu lala soguna khöda ba ngaluo safuria sabua fanaögö andre. Daʼö zanolo yaʼita enaʼö lö tebulö ahatö ita khö Yehowa ba lö taholeʼö ita moroi ba lala saekhu ba waʼauri.

3. Hadia nitutunöda ba artikel daʼa?

³ Hewaʼae simanö, itaria abua khöda woloʼö fanuturu lala moroi khö Yehowa, mendrua manö na samaʼema yaʼia niha gulidanö si lö moʼahonoa. Te lö omasi ita wanuturu lala andrö  mazui lö tefaudu daʼö moloʼö yaʼita. Lua-luania, tawaʼö wa tenga moroi khö Yehowa wanuturu lala andrö. Ba ginötö simane daʼö, moguna faduhu dödöda wa Yehowa zameʼe fanuturu lala ba nono mbanuania ba hasambalö tatema howu-howu na taʼoʼö daʼö. Ba wangaʼaroʼö faʼafaduhu dödöda, tatutunö dania ba artikel daʼa (1) hewisa wameʼe Yehowa fanuturu lala ba nono mbanuania ba götö Zura Niʼamoniʼö, (2) hewisa wameʼenia fanuturu lala khöda iadaʼa, ba (3) hadia mbuania na lö tebulö taʼoʼö wanuturu lala nibeʼenia.

NIFALUA YEHOWA BA WAMEʼE FANUTURU LALA BA NDRAONO GIZARAʼELI

4-5. Hewisa wangoromaʼö Yehowa wa iʼogunaʼö Moze ba wameʼe fanuturu lala ba ndraono Gizaraʼeli? (Faigi gambara.)

⁴ Moze nifili Yehowa ba wameʼe fanuturu lala ba ndraono Gizaraʼeli me mofanö ira moroi ba Miserai. Ibeʼe göi dandra wa sindruhu-ndruhu iʼogunaʼö Moze ba wameʼe khöra fanuturu lala. Duma-dumania, ibeʼe khöra döla lawuo ba zi maʼökhö ba töla galitö ba zi bongi. (2 Mo. 13:21) Iʼoʼö Moze döla andrö irege ofeta ira ba Nasi Soyo. Ataʼu sibai ndraono Gizaraʼeli börö me lawalinga no tefaʼuʼu ira ba gotalua Nasi Soyo hegöi saradadu Miserai solohi yaʼira. Lawaʼö tödöra wa no ifalua zala Moze. Sindruhunia sa, Yehowa zolohe ono mbanuania ba daʼö. (2 Mo. 14:2) Ba daʼö, ifalua dandra sahöli-höli dödö Yehowa ba wangorifi yaʼira.—2 Mo. 14:26-28.

⁵ Sagötö zi 40 fakhe aefa daʼö, te lö tebulö iʼodaligö döla lawuo andrö Moze ba wondröniaʼö ono mbanua Lowalangi ba danö si mate. a No irai ahono manö döla lawuo ba dete nose Moze, ba fefu ndraono Gizaraʼeli laʼila daʼö. (2 Mo. 33:7, 9, 10) Moroi ba döla lawuo andrö fahuhuo Yehowa khö Moze. Ifaʼema wanuturu lala moroi khö Yehowa ba ndraono Gizaraʼeli. (Si. 99:7) Oya sibai dandra sangoromaʼö wa Moze niʼogunaʼö Yehowa ba wondröniaʼö ono mbanuania.

6. Hewisa wanemaʼö ndraono Gizaraʼeli fanuturu lala moroi khö Yehowa? (4 Moze 14:2, 10, 11)

⁶ Alimagö sibai börö me ato ndraono Gizaraʼeli sangosiwawöi tandra sangoromaʼö wa Moze nifili Yehowa tobali salahinia. (Baso 4 Moze 14:2, 10, 11.) No hauga kali latimbagö Moze ba wondröniaʼö yaʼira. Lua-luania, iraono Gizaraʼeli sauri me luo daʼö lö latehegö khöra weʼamöi ba Danö Amabuʼula.—4 Mo. 14:30.

7. Haniha manö zoloʼö fanuturu lala moroi khö Yehowa? (4 Moze 14:24) (Faigi göi gambara.)

⁷ Hizaʼi, so ösa ndraono Gizaraʼeli somasi moloʼö fanuturu lala moroi khö Yehowa. Duma-dumania imane Yehowa, ”Kalebi . . . iʼoʼö wehedegu soroi ba dödönia.” (Baso 4 Moze 14:24.) Itema howu-howu Kalebi, ba itehegö khönia Yehowa ba wamili tanö somasi ia ba Ganaʼana. (Yos. 14:12-14) Ngaʼötö ndraono Gizaraʼeli aefa daʼö, tobali göi ira duma-duma ba woloʼö fanuturu lala moroi khö Yehowa. Me mufataro Yosua tobali sondröniaʼö yaʼira si tobali fangali Moze, ”lafosumange ia sandrohu faʼaurinia”. (Yos. 4:14) Buania, ifahowuʼö ira Yehowa ba iʼohe ira ba danö si no ifabuʼu.—Yos. 21:43, 44.

8. Tutunö hewisa wondröniaʼö Yehowa ono mbanuania ba götö ndra razo-razo. (Faigi göi gambara.)

⁸ Ngafulu fakhe aefa daʼö, ifataro ndra sanguhuku khönia Yehowa ba wameʼe fanuturu lala ba nono mbanuania. Aefa daʼö, ba götö ndra razo-razo, ifataro ndra samaʼeleʼö. Ira razo si lö faröi andre laʼoʼö mene-mene moroi khö ndra samaʼeleʼö. Duma-dumania,  si fao fangide-ngideʼö itemaʼö Razo Dawido mene-mene moroi khö Natano samaʼeleʼö. (2 Sa. 12:7, 13; 1 Ng. 17:3, 4) Iʼoʼö Razo Yozafati wanuturu lala moroi khö Yehazieli samaʼeleʼö ba ifarou niha Yehuda enaʼö ’mamati ira khö ndra samaʼeleʼö [Lowalangi]’. (2 Ng. 20:14, 15, 20) Iʼandrö Razo Hizikia wanolo moroi khö Yesaya samaʼeleʼö me alua gabula dödö. (Yes. 37:1-6) Ero laʼoʼö wanuturu lala moroi khö Yehowa, ifahowuʼö ndra razo andrö ba ilumöʼö nono mbanuara Yehowa. (2 Ng. 20:29, 30; 32:22) Sindruhunia, fefu niha tola laʼila wa iʼogunaʼö ndra samaʼeleʼö khönia Yehowa ba wameʼe fanuturu lala ba nono mbanuania. Hizaʼi, ato sibai razo hegöi iraono Gizaraʼeli sanimbagö samaʼeleʼö khö Yehowa.—Yer. 35:12-15.

LALA WAMEʼE YEHOWA FANUTURU LALA BA NIHA KERISO ME ABAD SIFÖFÖNA

9. Haniha niʼogunaʼö Yehowa ba wondröniaʼö niha Keriso me abad siföföna? (Faigi göi gambara.)

⁹ Me abad siföföna M, ifasindro Yehowa mbanua niha Keriso. Hewisa wameʼenia fanuturu lala ba niha Keriso me luo daʼö? Ifataro Yesu tobali högö mbanua niha Keriso. (Ef. 5:23) Hizaʼi, lö fahuhuo Yesu khö ndra nifahaʼönia maʼafefu. Iʼogunaʼö ndra sinenge hegöi ira satua sokubaloi ba Yeruzalema ba wameʼe khöra fanuturu lala. (Hal. 15:1, 2) Baero daʼö, so ndra satua sokubaloi si no mufataro ba wondröniaʼö ira talifusö ba mbanua niha Keriso.—1 Te. 5:12; Tit. 1:5.

10. (a) Hadia nifalua niha Keriso sato me abad siföföna ba wanuturu lala nitemara? (Hal. 15:30, 31) (b) Hana wa so ösa niha ba götö ndraono Gizaraʼeli sanimbagö niha sosalahini Yehowa? (Faigi kotak ” Hana Wa So Ösa Niha Sangosiwawöi Tandra si Tebai Mubiniʼö?”)

¹⁰ Hewisa göi niha Keriso me abad siföföna? Ato moroi ba gotaluara zomasi moloʼö fanuturu lala nitemara. ”Omuso dödöra ba teʼaroʼö wamatira” ba wanuturu lala andrö. (Baso Halöwö Zinenge 15:30, 31.) Tobali, hewisa wameʼe Yehowa fanuturu lala ba nono mbanuania iadaʼa?

LALA YEHOWA BA WAMEʼE FANUTURU LALA KHÖDA IADAʼA

11. Beʼe duma-duma sangoromaʼö wa iʼogunaʼö Yehowa niha sondröniaʼö yaʼita iadaʼa.

¹¹ Irugi iadaʼa, lö tebulö ibeʼe wanuturu lala Yehowa ba nono mbanuania. Iʼogunaʼö Daromalinia hegöi Ononia, högö mbanua niha  Keriso. Iʼogunaʼö göi nasa niha si tobali salahinia. Hadia dandrania? Nehegö waʼatedou salua ba gangohorita ndröfi 1800-an. Ibörögö aboto ba dödö Charles Taze Russell hegöi ira awönia wa döfi 1914 no döfi si tohude börö me moʼamakhaita ia ba Wamatörö Lowalangi. (Dan. 4:25, 26) Tola lahalö rahu-rahu simane daʼö börö me lafahaʼö ira ba wamaʼeleʼö Zura Niʼamoniʼö ba faduhu dödöra wa hasambalö alua wamaʼeleʼö andrö. Hadia ibeʼe khöra wanuturu lala Yehowa ba wangai angetula? Tatu manö. Ngawalö zalua me döfi 1914, daʼö zamaduhuʼö wa no tohare Wamatörö Lowalangi. Alua Wasuwöta Gulidanö I, fökhö waba, duru danö hegöi faʼambö soguna. (Luk. 21:10, 11) Ba daʼa oroma wa iʼogunaʼö Yehowa niha Keriso sadölö tödö andrö ba wanolo ono mbanuania enaʼö laʼila zindruhu.

12-13. Hadia manö gamakhoita nibeʼe sagötö Wasuwöta Gulidanö II enaʼö tedou halöwö fanuriaigö?

¹² Nehegö hadia göi zalua sagötö Wasuwöta Gulidanö II. Ira talifusöda si so noro dödö ba gödo sebua, laʼalui geluaha ayati ba Wamaʼeleʼö 17:8, ba laʼila wa fasuwöta salua me luo daʼö, tenga saekhu ba wasuwöta Hamagedo. Hizaʼi, na no aefa wasuwöta, so dania ginötö waʼahono dödö, ba tola manö daʼö ginötö ba nono mbanua Lowalangi ba wondrouʼö halöwö fanuriaigö. Tobali, hewaʼae hulö ambö tefaudu ginötönia, organisasi Yehowa ifasindro Perguruan Tinggi (Sekolah) Alkitab Gilead Menara Pengawal. Ohitö dödöra yaʼia daʼö ba wamomaha ira utusan injil enaʼö tola manuriaigö ba mamahaʼö ira ba mbanua böʼö ba zi sagörö ulidanö. Ibörögö mufatenge ndra utusan injil ba soi böʼö misa hewaʼae alua wasuwöta. Baero daʼö, lafalua göi Kursus Pelayanan Teokratis b ira sawuyu si lö faröi ba wamomaha niha ba mbanua niha Keriso enaʼö itugu sökhi lalara wanuriaigö hegöi famahaʼö. Daʼa fefu zamaʼanö ono mbanua Lowalangi ba wanuriaigö ba nahia sabölö ato moguna sanuriaigö.

¹³ Tola taʼila wa lö tebulö ibeʼe wanuturu lala Yehowa ba nono mbanuania sagötö mbaŵa si basaki andrö. Iʼotarai Wasuwöta Gulidanö II, lö taha-taha nono mbanua Yehowa weʼamöi manuriaigö ba soi böʼö misa, ba sökhi sibai mbua nitemara.

14. Hana wa tola tafaduhusi tödö wanuturu lala moroi ba organisasi Yehowa hegöi ira satua sokubaloi si no mufataro? (Famaʼeleʼö 2:1) (Faigi göi gambara.)

 ¹⁴ Iadaʼa, ira Boto Solohe lö tebulö laʼalui wanuturu lala moroi khö Keriso. Omasi ira enaʼö fanuturu lala nibeʼera tefaudu daʼö ba lala wangera-ngera Lowalangi hegöi Keriso. c Ira satua sokubaloi si no tebayoini hegöi si löʼö, so ira ba ’gambölö’ Keriso. (Baso Wamaʼeleʼö 2:1.) Tatu manö lö moʼahonoa ndra satua sokubaloi andre ba itaria lafalua zala, hulö simane Moze, Yosua, hegöi ira sinenge ba götö föna. (4 Mo. 20:12; Yos. 9:14, 15; Rom. 3:23) Hizaʼi, taʼila wa sindruhu-ndruhu Keriso zameʼe fanuturu lala khö ndra sawuyu si lö faröi hegöi ira satua sokubaloi si no mufataro, ba lö tebulö ifalua daʼö ”irugi gamozua götö daʼa”. (Mat. 28:20) Börö daʼö, aro waʼafaduhu dödöda ba wanuturu lala nibeʼe Keriso ba niha nifataronia tobali sondröniaʼö.

BUA NITEMADA NA LÖ TEBULÖ TAʼOʼÖ WANUTURU LALA NIBEʼE YEHOWA

15-16. Hadia wamahaʼö nihalöda moroi ba waö-waö niha soloʼö fanuturu lala moroi khö Yehowa?

¹⁵ Na lö tebulö taʼoʼö wanuturu lala moroi khö Yehowa, tola tatema mbuania. Duma-dumania, so sambua fongambatö sotöi Andy hegöi Robyn soloʼö mene-mene ba woʼöna-önaiʼö faʼaurira. (Faigi keterangan tambahan ba Mataiʼo 6:22, nwtsty-IN.) Börö daʼö, tobali ira relawan ba ngawalö halöwö fangotomosi ba organisasi. Imane Robyn, ”Toröiga ba nomo side-ide, sasesenia lö hadöi naha nawu. Oya göi fakake fotografi si so khögu nifamawagu, hewaʼae hobigu daʼö. Mege-ege ndraʼo me ufamawa daʼö. Hizaʼi, simane Sara foʼomo Gaberahamo, uʼosambuaʼö dödögu ba wamaigi salua ba zi so miföna, tenga si no uröi.” (Heb. 11:15) Hadia howu-howu nitemara? Imane Robyn, ”Ohahau sibai dödöma börö me mabeʼe khö Yehowa fefu zi so khöma. Me mafalua halöwö ba organisasi, marasoi hewisa waʼasökhi waʼaurida dania ba gulidanö si bohou.” Irasoi göi zimane daʼö Andy. Imane, ”Omuso sibai dödöma me tola mabeʼe fefu hadia ia ba wotuhini Famatörö Lowalangi.”

¹⁶ Hadia nasa mbuania na lö tebulö taʼoʼö wanuturu lala moroi khö Yehowa? Nehegö duma-duma Marcia. Me no tama ia SMA, omasi sibai ia woloʼö mene-mene ba wangai halöwö safönu inötö khö Yehowa. (Mat. 6:33; Rom. 12:11) Imane, ”Göna ndraʼo beasiswa sagötö  zi öfa fakhe ba zi sambua universitas. Hizaʼi, omasido göi ugohi gohitö dödögu ba wamati. Börö daʼö, uhalö gangetula ba wamahaʼö yaʼo ba nekhe-nekhe danga si tola motuhini ohitö dödögu. Daʼö sambua gangetula fondrege zi sökhi nihalögu. Iadaʼa, omuso sibai dödögu mangai halöwö tobali perintis biasa. Baero daʼö, tola göi utatugöi samösa ginötögu wohalöwö irege tobalido komuter ba Mbetieli hegöi ba wamalua halöwö si tohude tanö böʼö.”

17. Hadia nasa mbua nitemada na taʼoʼö wanuturu lala moroi khö Yehowa? (Yesaya 48:17, 18)

¹⁷ Itaria, fanuturu lala nibeʼe Yehowa yaʼia daʼö mene-mene solumöʼö yaʼita. Duma-dumania, muʼamenesi ita enaʼö lö taʼomasiʼö gefe mazui ngawalö zi tola mondrönisi tödöda ba wanawö oroisa Lowalangi. Hadia mbuania khöda na taʼoʼö daʼö? Tola taʼokhögö dödö side-ide si lö sinegu ba lö göna ita abula dödö. (1 Ti. 6:9, 10) Buania, tola tafosumange Yehowa soroi ba dödö irege tarasoi waʼahono dödö hegöi faʼomuso dödö.—Baso Yesaya 48:17, 18.

18. Hana wa tebai taböhöli woloʼö fanuturu lala moroi khö Yehowa?

¹⁸ Sagötö wamakao sabölö-bölö ofeta Wamatörö si Saribu Fakhe, lö tebulö iʼogunaʼö Yehowa niha gulidanö tobali salahinia ba wondröniaʼö ono mbanuania. (Si. 45:16) Hadia lö taböhöli woloʼö fanuturu lala nitemada, hewaʼae na lö omasi ita wanuturu lala andrö? Abölö aoha khöda wamalua daʼö na iʼotarai iadaʼa taʼoʼö wanuturu lala moroi khö Yehowa. Tobali, yalötaböhöli woloʼö fanuturu lala moroi khö Yehowa, farahu ba daʼö nifaʼemania khö ndra talifusöda ira matua si no mufataro ba wondrorogö yaʼita. (Yes. 32:1, 2; Heb. 13:17) So dane-dane saro waʼafaduhu dödöda khö Zondröniaʼö yaʼita sotöi Yehowa, si lö tebulö manolo yaʼita enaʼö lö teʼala wamatida ba tola takhamö gohitö dödöda: faʼauri si lö aetu ba gulidanö si bohou!