1. Akin et kailangan tayoy panangigiya nen Jehova? Mangiter na ilustrasyon.

 IMADYIN mo pa ya abalang kad katakelan. Dakel ditay masesebeg ya ayayep, insekto ya panlapuan na sakit, makasamal iran tanaman, tan wala met iray bangin. Pero no walay kaibam ya kabisado to may lugar, agka masyadon mapaga ta amta to no panon ya naiwasan iratan ya peligro. Sayan mundo et singa satan ya katakelan. Dakdakel so peligro ya nayarin maneral ed espiritualidad tayo. Pero maong labat ta kaiba tayoy Jehova. Igigiya to tayo pian makaiwas tayod sarayan peligro tan makasabi tayod destinasyon tayo—say bilay ya andi-anggaan diad balon mundo.

2. Panon itayon igigiya nen Jehova?

² Panon itayon igigiya nen Jehova? Say manunan uusaren to et say Salita to, say Biblia. Pero wala met iray totoon uusaren to ya mangigiya ed sikatayo. Singa bilang, uusaren toy “matoor tan makabat ya aripen” pian mangitarya na espiritual ya naakan ya ontulong ed sikatayon mandesisyon na duga. (Mat. 24:45) Uusaren to met so arum ni ran kualipikadon lalaki ya mangigiya ed sikatayo. Singa bilang, papasesegen itayo na saray manangasikaso na sirkito tan saray elder ed kongregasyon. Tan iikdan da tayoy instruksion pian amta tayoy gawaen tayo diad mairap iran situasyon. Misatsalamat tayod si Aman Jehova ta igigiya to tayo diad sayan kaunoran iran agew. Anggano mair-irap tan mapeligro iyan panaon, tutulongan itayo nen Jehova pian makapanmatoor tayo ed sikato tan tuloytuloy tayon makapanakar ed dalan paarap ed bilay.

3. Antoy pantongtongan tayo ed sayan artikulo?

³ No maminsan balet, ompan nairapan tayon unoren so instruksion nen Jehova, lalo la no impasabi itan na kapara tayon too ya agmet perpekto. Ompan say ibaga ran instruksion et duma ed labay tayon nagawa o singa aliwan praktikal kanian ompan isipen tayo ya ag-itan nanlapud si Jehova. Diad ontan iran situasyon, antoy makatulong pian onunor tayo nin siansia? Dapat mabiskeg  so tiwala tayo ya si Jehova ya mismo so mangidadaulo ed saray lingkor to tan bendisyonan to tayo no onunor tayo. Pian ombiskeg so tiwala tayo, walay taloran pantongtongan tayo ed sayan artikulo: (1) no panon ya inggiya nen Jehova iray lingkor to diad panaon na Biblia, (2) no panon to tayon igigiya natan, tan (3) no anto ray bendisyon no tuloytuloy tayon tumboken so panangigiya to.

NO PANON YA INGGIYA NEN JEHOVA SO BANSAN ISRAEL

4-5. Panon ya impanengneng nen Jehova ed saray Israelita ya si Moises so pinili ton mangigiya ed sikara? (Nengnengen so litrato.)

⁴ Si Moises so pinili nen Jehova ya mangidaulo ed saray Israelita papaway ed Ehipto. Panon ton impanengneng ed saray Israelita ya si Moises so pinili to ya mangigiya ed sikara? No agew et walay nanengneng dan singa lusek ya lurem, tan no labi et walay nanengneng dan singa lusek ya apoy. (Exo. 13:21) Tinumbok nen Moises itan ya lusek ya anggad akasabi iray Israelita diad Ambalangan Dayat. Pero nen anengneng da ya nitan lay armada na Ehipto ya onuusil ed sikara, ataktakot ira. Singa anggapo lay natakasan da lapud dayat so walad arapan da. Tetetelen day Moises akin et diman to ra inyakar. Pero diad tua, ginagala nen Jehova ya diman so laen da. (Exo. 14:2) Inligtas to ra diman diad makapabilib ya paraan!​—Exo. 14:26-28.

⁵ Diad loob na 40 ya taon ya indaulo nen Moises iray Israelita paarap ed Insipan ya Dalin, tuloytuloy ton tinumbok imay singa lusek ya lurem. a Wala may panaon ya impuesto nen Jehova itan ya lurem diad petek na tolda nen Moises, tan sankanengneng itan na amin ya Israelita. (Exo. 33:7, 9, 10) Akitongtong si Jehova ed si Moises panamegley na satan ya lurem, insan ipasabi nen Moises ed saray Israelita so mensahe To. (Sal. 99:7) On, sankanengneng na saray Israelita so ebidensya ya si Moises so uusaren nen Jehova ya mangigiya ed sikara.

6. Kasin nampasakop iray Israelita ed panangigiya nen Jehova? Ipaliwawa. (Numeros 14:2, 10, 11)

⁶ Makapaermen balet ta nambulag-bulagan so maslak ya Israelita anta malinlinew so ebidensya ya si Moises so pinili nen Jehova ya mangigiya ed sikara. Anggapoy respeto dad sikato. (Basaen so Numeros 14:2, 10, 11.) Paulit-ulit iran nanrebelde tan agda italtalek si Moises. Antoy nansumpalan na sarayan rebelden Israelita? Ag-ira akaloob ed Insipan ya Dalin.​—Num. 14:30.

7. Diad saray Israelita, siopa ray nampasakop ed panangigiya nen Jehova? (Numeros 14:24) (Nengnengen met so litrato.)

⁷ Pero, wala met iray matoor ya Israelita ya nampasakop ed panangigiya nen Jehova. Singa bilang, oniay naimano nen Aman Jehova ed si Caleb: “[Sikatoy] nantultuloy a tinmumbok ed siak diad interon puso to.” (Basaen so Numeros 14:24.) Benendisyonan na Dios si Caleb tan pinagbigyan to ingen so kerew to nen nampili na dalin diad Canaan. (Jos. 14:12-14) Maong met ya alimbawa so sinmublay ya henerasyon na saray Israelita lapud tinumbok day panangigiya nen Jehova. Nen si Josue la so tinuro nen Jehova ya mangigiya ed sikara, “nirespeto ran maong diad amin ya agew na bilay to.” (Jos. 4:14) Kanian benendisyonan ira nen Jehova. Tinulongan to ra pian nasakop da imay dalin ya insipan to.​—Jos. 21:43, 44.

8. Panon ya inggiya nen Jehova iray lingkor to nen panaon na saray arari? (Nengnengen met so litrato.)

⁸ Diad inlabas na saray taon, wala ray ukom ya inusar nen Jehova pian igiya iray lingkor to. Nen wala lay arari ya manuuley ed Israel, inusar nen Jehova iray propeta ya mangigiya ed saray Israelita. Saray arari ya matoor ed si Jehova et  dinmengel ed simbawa na saray propeta. Singa bilang, mapaabeban inawat nen Arin David so panangipetek nen propetan Natan. (2 Sam. 12:7, 13; 1 Awa. 17:3, 4) Inunor nen Arin Jehosafat iray instruksion nen propetan Jahaziel tan pinaseseg to met iray sakop to ya manmatalek irad saray propeta na Dios. (2 Awa. 20:14, 15, 20) Nen agla amta nen Arin Hezekias so gawaen to, kinmerew na tulong ed si propetan Isaias. (Isa. 37:1-6) Basta maunor so ari ed panangigiya nen Jehova, mareen so bilay na saray sakop to ta walad sikaray pabor na Dios. (2 Awa. 20:29, 30; 32:22) Mapatpatnag ya uusaren nen Jehova iray propeta ya mangigiya ed sikara. Makapaermen balet ta maslak ya arari tan Israelita et benger. Agda dinengel iray propeta nen Jehova.​—Jer. 35:12-15.

NO PANON YA INGGIYA NEN JEHOVA IRAY INMUUNAN KRISTIANO

9. Siopa ray inusar nen Jehova ya mangigiya ed saray inmuunan Kristiano? (Nengnengen met so litrato.)

⁹ Nen Pentecostes 33 C.E., binuo nen Jehova so Kristianon kongregasyon. Panon ton inggiya iray inmuunan Kristiano? Si Jesus ya mismo so pinili to bilang ulo na kongregasyon. (Efe. 5:23) Pero siempre, agdirektan akitongtong si Jesus ed kada Kristiano pian ibaga no antoy gawaen da. Inusar to iray apostol tan mamatatken ed Jerusalem ya mangidaulo ed sikara. (Gawa 15:1, 2) Tan diad kada kongregasyon et wala ray lalaki ya tinuron manlingkor bilang mamatatken.​—1 Tes. 5:12; Tito 1:5.

10. (a) Kasin inawat na saray inmuunan Kristiano so panangigiya nen Jehova? Ipaliwawa. (Gawa 15:30, 31) (b) Diad panaon na Biblia, akin et wala ray agnanrespeto ed saray manangidaulo ya inusar nen Jehova? (Nengnengen so kahon ya “ Akin et Wala ray Agnampasakop ed Saray Manangidaulo ya Pinili nen Jehova?”)

¹⁰ Maslak ed saray inmuunan Kristiano et nampasakop ed panangidaulo na saray lalakin tinuro nen Jehova, tan inunor da iray naawat dan instruksion. Diad tua, “aliketan ira ed panamaseseg” na saray manangidaulo. (Basaen so Gawa 15:30, 31.) Diad panaon tayo balet ey, panon itayon igigiya nen Aman Jehova?

NO PANON ITAYON IGIGIYA NEN JEHOVA NATAN

11. Mangiter na alimbawa no panon ya tuloytuloy ya igigiya nen Jehova iray lingkor to diad modernon panaon.

¹¹ Tuloytuloy ya idadaulo nen Jehova iray lingkor to natan. Igigiya to ra panamegley na Salita to tan say Anak to, say ulo na kongregasyon. Diad panaon tayo, kasin walay ebidensya  ya tuloytuloy nin manguusar si Jehova na saray totoo ya mangirepresenta ed sikato? On wala. Singa bilang, imanoen iray agawa manlapu la nen 1870’s. Kalkalnan atalosan nen Charles Taze Russell tan saray kakaiba to ya importantin taon so 1914, ta diad satan ya taon et nasumpal iray propesiya tungkol ed Panarian na Dios. (Dan. 4:25, 26) Atalosan da itan lapud inaral dan maong iray propesiya ed Biblia, tan mabiskeg so tiwala ra ya ontua iratan. Mapatpatnag ya inggiya nen Jehova so impan-research da. Nen 1914, dakel so agawa ya patunay ya ginmapo lan manuley so Panarian na Dios. Agawa so World War I. Insan kayari to et kinmayat iray makaalis ya sakit, tan wala ray agawan yegyeg tan eras diad nanduruman pasen ed interon mundo. (Luc. 21:10, 11) Mapatpatnag ya inusar nen Jehova iraman ya mapaabeban lalaki pian igiya iray lingkor to.

12-13. Legan na World War II, antoy ginawa na saray brother ya mangidadaulo pian onlawak ni so kimey a panagpulong?

¹² Imanoen met iray agawa legan na World War II. Inaral na saray brother ed world headquarters so Apocalipsis 17:8 tan atalosan da ya say World War II et agmansumpal ed Armagedon. Imbes, kayari na guerra et onsublay so panaon na kareenan, kanian pagkakataon itan pian onlawak ni so kimey ya panagpulong. Katon anggano singa aliwan praktikal, binuo da so Watchtower Bible College (School) of Gilead. Atan so eskuelaan ya mangipasal ed saray misionero ya manpulong tan manbangat ed nanduruman bansa. Diad tua, anggano kasagsagan na guerra, wala la ray misionero ya imbaki ed nanduruman pasen. Inggapo met so Course in Theocratic Ministry. b Inyuksoy itan na matoor ya aripen pian amin ed kongregasyon et naipasal ya manpulong tan manbangat. Akatulong iratan ya uksoyan pian naiparaan iray lingkor na Dios parad impasyan panagpulong diad ontutumbok iran taon.

¹³ No pawilen tayo irayan agawgawa, malinlinew so ebidensya ya talagan igigiya nen Jehova iray lingkor to legan na satan ya mair-irap ya panaon. Kayari na World War II, niwalay deen ed dakel ya bansa. Kanian walay kalayaan na saray Tasi nen Jehova ya manpulong. Dakel so akaamta ed katuaan tan linmawak so kimey tayo.

14. Akin et makapantiwala tayo ed saray instruksion ya iiter na organisasyon nen Jehova tan ed instruksion na saray elder? (Apocalipsis 2:1) (Nengnengen met so litrato.)

 ¹⁴ Diad panaon tayo, saray membro na Mananguley ya Ulop et tuloytuloy ya manpapaigiya ed si Kristo. Labay dan aligen so panagnonot nen Aman Jehova tan Jesus, kanian atan so manunan ikokonsidera da antis iran mangiter na instruksion. Saratan ya instruksion et ipapadalan da ed saray manangasikaso na sirkito tan saray elder ed kongregasyon. c Saray alanaan ya elder et walad “kawanan a lima” nen Kristo, tan onaplika iya ed amin ya elder ed kongregasyon. (Basaen so Apocalipsis 2:1.) Pero siempre, nalilingo met iray elder ta aliwa ran perpekto. Anggan saray lalakin inusar nen Jehova nensaman et alingo met ira—singa si Moises, Josue, tan saray apostol. (Num. 20:12; Jos. 9:14, 15; Roma 3:23) Pero tandaan tayo ya si Jesu-Kristo ya mismo so mangigigiya ed matoor ya aripen tan ed saray elder. Tuloytuloy to ran igiya ed “amin ya agew anggad kaunoran a parte na sistema na mundo.” (Mat. 28:20) Mantiwala tayo sirin ed saray lalakin uusaren to ya mangidaulo ed sikatayo.

PARAD PANKAABIGAN TAYO LANLAMANG NO TUMBOKEN TAYOY PANANGIGIYA NEN JEHOVA

15-16. Antoy naaralan mo ed eksperiensya na saray agagi ya tinumbok day panangigiya nen Jehova?

¹⁵ No tuloytuloy tayon tumboken so panangigiya nen Jehova, natan ni labat et bendisyonan to tayo la. Singa bilang, imanoen so eksperiensya na sanasawa ya si Brother Andy tan Sister Robyn. Impapuso da imay simbawa ya pansiansiaen ya simpli so bilay. (Nengnengen so “nakapokus” ed study note na Mateo 6:22 diad nwtsty-TG.) Bilang resulta, akapan-volunteer ira ed saray construction project tayo. Oniay imbaga nen Sister Robyn: “Asali mi so nanayam ed melmelag ya accommodation tan no maminsan et anggapoy napanlutoan. Tan anggano hilig koy photography, inlakok so arum ya camera’k tan lens ko pian tuloytuloy kamin makapan-volunteer. Manakis ak nen inlakok iratan. Pero singa si Sara ya asawa nen Abraham, desidido ak ya agla lingawen so apalabas pian makapampokus ak ed arapen.” (Heb. 11:15) Antoy  nalilikna na sayan sanasawa ed satan ya desisyon da? Oniay imbaga nen Sister Robyn: “Malikeliket kami ta amta mi ya iiter mid si Aman Jehova so amin ya walad sikami. Diad kada asainmin mi, say pakalikna mi et singa kami la mankikimey ed balon mundo.” Onia met so imbaga nen Brother Andy: “Malikeliket kami ta uusaren mi parad Panarian so amin ya panaon tan biskeg mi.”

¹⁶ Imanoen met so alimbawa nen Marcia. Ka-graduate tod high school, impapuso to so advice ya i-goal toy manlingkor ya full-time. (Mat. 6:33; Roma 12:11) Kuan to: “Walay naawat kon apat taon ya scholarship diad sakey ya university. Pero desidido ak ya manpayunir, kanian mas pinilik so manaral na skill diad technical training school pian walay pansuportak ed pampayunir ko. Agko pagbabawian iman ya desisyon ko. Malikeliket ak ed pampapayunir ko natan. Tan lapud part-time labat so trabahok, makakapanlingkor ak bilang commuter volunteer diad Bethel tan panliliketan koy arum ni ran asainmin.”

17. Anto ni ray arum ya bendisyon no tuloytuloy tayon unoren so panangigiya nen Jehova? (Isaias 48:17, 18)

¹⁷ Mabetbet itayon bibilinen na organisasyon ta agda tayo labay ya napahamak. Singa bilang, wawarningan da tayo tungkol ed materyalismo tan ed saray kagagawa ya mangipeligro ed espiritualidad tayo. Parad pankaabigan tayo lanlamang iratan ya simbawa. No unoren tayo iratan, malinis so konsiensia tayo tan naiwasan tayoy dakel ya problema. (1 Tim. 6:9, 10) Lapud satan, niyuna tayod bilay tayo so panaglingkor ed si Jehova. Kanian nalikna tayoy tuan liket tan deen.​—Basaen so Isaias 48:17, 18.

18. Akin et desidido ka ya tuloytuloy ya unoren so panangigiya nen Jehova?

¹⁸ Seguradon mangusar nin siansiay Jehova na saray totoo ya mangigiya ed sikatayo diad baleg a kairapan ya anggad Sanlibon Taon ya Uley nen Kristo. (Sal. 45:16) Kasin unoren moy instruksion da anggano duma itan ed panlabayan mo? No natan ni labat et maunor ka la, agka la nairapan diad arapen. Komon ta lanang tayon unoren so panangigiya nen Jehova, kaiba la ray instruksion ya ipapadalan to ed saray brother ya pinili ton mangasikaso ed sikatayo. (Isa. 32:1, 2; Heb. 13:17) No mapasakop tayo, makapantiwala tayo ya kaiba tayon lanang si Jehova, tulongan to tayon makaiwas ed saray mameligro ed espiritualidad tayo, tan tuloytuloy to tayon igiya anggad naawat tayoy bilay ya andi-anggaan diad balon mundo.