1. Momekesiu er a uchul me ngungil a doltirakl er a Jehovah el omekrael.

 KAM imagine er kau el mla remiid er a chelsel a oreomel. Tia kengaol e le ngngar ngii a tebelik el charm, mekekerei el charm lolab a rakt, me a poison el dellomel. Ngdirrek el sebechem el ruebet er a metetoech. Ke locha kmal mo oba omereng el saul el kirel a chad lomekrael el medengelii a rael me a blil a telemall e oliub er kemiu er ngii. Tia el beluulechad a di ua tia el oreomel el dosaod er ngii. Ngmui er a kengaol el tekoi el sebechel tomellid er a klereng. Ngdi ngngar ngii a ungil lomekrael, el Jehovah. Ngomekrael er kid el mo cheroid a kengaol el basio e ngoikid el mora klengar el diak a ulebengelel er a beches el blekeradel.

2. Ngmekera lomekrael er kid a Jehovah?

² Ngmekera Jehovah lomekrael? Sel kot el ngaruchei el rolel a lomekrael a oeak a Tekingel el Biblia. Engdi ngdirrek lousbech er a rechad el lomekrael er kid. El ua tiang, ngousbech er a “blak a rengul e mellomes a rengul el mesiou” lomeskid a kall er a klereng el ngii a ngosukid el mo ungil el melilt. (Mt. 24:45) A Jehovah dirrek el lousbech er a relmuut el bebil el lomekrael er kid. El ua tiang, ngousbech er a re circuit overseer me a remechuodel el omeskid omelisiich me a omellach el ngii a ngosukid el loutekangel a meringel el taem. Kede mera el oba omereng el saul er chelecha el uriul sils el kirel aika el ulekrael el kmal sebeched el lultuil! Ngngosukid me kede melemolem el loba kengei er a Jehovah e melemolem el merael er a rael el mora klengar.

3. Ngera kede mo mesaod er tia el suobel?

³ Me nguaisei engdi nglocha mo meringel er kid oltirakl a ulekrael er a Jehovah, tokubets sel lemei loeak a rediak el mecherrungel el chad. E ngerang? Nglocha mo diak el soad a ulekrael el lomeskid. Me a lechub e kede mo omdasu el kmo a ulekrael a diak lolechotel a llomeserreng me ngdiak el ngar er a  Jehovah el mei. Ngar choua ikakid el taem e ngkirel mo ulterekokl a rengud el kmo a Jehovah omekrael er a rechedal, me a doltirakl er a ulekrael er ngii e ngmo uchul a klungioled. Me kede mo mesaod er a (1) rolel e a Jehovah ulemekrael er a rechedal er a taem er a Biblia, (2) rolel e ngomekrael er kid er chelechang, me a (3) rolel e ngmo klungioled sel deblechoel el oltirakl a ulekrael er ngii. Aika ngosukid el mo ulterekokl a rengud el kmo ngomekrael er kid.

ROLEL E A JEHOVAH ULEMEKRAEL ER A RENGED ER A ISRAEL

4-5. Ngmilekera Jehovah e ochotii el kmo nguluusbech er a Moses lomekrael er a rechad er a Israel? (Momes er a siasing er a medal tia el babier.)

⁴ A Jehovah tiltkii a Moses el mo omekrael er a rechad er a Israel el tuobed er a Ekipten. E milsterir a rechad er a Israel a moues lolechotel a kmo ngulemekrael er tir el loeak a Moses. El ua tiang, ngmilsterir a chelsakl el eabed sel lemellomes me a chelsakl el ngau sel leklebesei. (Exo. 13:21) A Moses uleltirakl aikang, el ngii a milekrolii ngii me a rechad er a Israel el mora Bekerkard el Daob. Me a rechad a kmal mlo ouedikel a rengrir er a dakt e le te milecheseches er a delongelel a daob me a urrurt er a resoldau er a Ekipten. Te mlo omdasu el kmo a Moses a milecheuid er a lengititerir el mei. Engdi ngkmal dimlak el cheleuid. A Jehovah uluusbech er a Moses lomekrael er a rechedal el mei er tiang. (Exo. 14:2) Ngulsebelterir loeak a mengasireng el rolel.—Exo. 14:​26-28.

⁵ Ngmle okeua el rak er uriul er tiang el Moses a millemolem el ultuil er a chelsakl el eabed el omekrael er a rechedal a Dios er a ked. a Ngmla er ngii a taem el Jehovah milechere chelsakl el eabed er bebul a tento er a Moses me a rechad er a Israel el rokui ulemes er ngii. (Exo. 33:​7, 9, 10) A Jehovah mlara eabed e mengedecheduch er a Moses e a Moses uluuchais a tekingel el mora rechad. (Psa. 99:7) Me a rechad er a Israel a mle sebechir el bleketakl el mesa el kmo a Jehovah uluusbech er a Moses el lomekrael er tir.

6. Te milekerang a rechad er a Israel er a ulekrael er a Jehovah? (Ulecherangel 14:​2, 10, 11)

⁶ Ngklengiterreng e le oumesingd er a rechad er a Israel a dimlak lekengei er a bleketakl lochotel a kmo a Jehovah uluusbech er a Moses el melekingel. (Monguiu er a Ulecherangel 14:​2, 10, 11.) Te mlo betok el lochotii el kmo te diak el lekengei er a deruchellel a Moses. Sei a uchul me a Jehovah dimlak lebecherei tia el telecheroll me lsiseb er a Beluu er a Nglat.—Ule. 14:30.

7. Mouchais el kirir a rebebil el luleltirakl a ulekrael er a Jehovah. (Ulecherangel 14:24) (Dirrek el momes er a siasing.)

⁷ Me nguaisei engdi te mla er ngii a rebebil el chad er a Israel el uleltirakl a ulekrael er a Jehovah. El ua tiang, Jehovah dilu el kmo: “Kaleb a . . . di mle blak a rengul er ngak.” (Monguiu er a Ulecherangel 14:24.) Me a Dios ulemekngeltengat er ngii e milsang a soal el chutem er a Kanaan. (Jos. 14:​12-14) A ongingil el telecheroll er a rechad er a Israel a dirrek el kiltmeklii a ungil kerebai e le te uleltirakl a ulekrael er a Jehovah. A Josua er a le btechir a Moses el mo omekrael er a rechad er a Israel e “te milengull er ngii er a klemengetel a klengar er ngii.” (Jos. 4:14) Me a Jehovah ulemekngeltengat er tir e ngiltiterir el mora beluu el letilbir el mo er tir.—Jos. 21:​43, 44.

8. Mosaod er a rolel e a Jehovah ulemekrael er a rechedal er a taem er a reking. (Dirrek el momes er a siasing.)

⁸ Betok el rak er uriul e a Jehovah tiltketerir a remengeteklel a beluu el mo omekrael er a  rechedal. A uriul, er a taem er a reking e ngtiltketerir a reprofet el mo omekrael er a rechedal. El ua tiang, King David a mle ngariou a rengul el kongei a omesmechokl er a profet el Nathan. (2 Sa. 12:​7, 13; 1 Kr. 17:​3, 4) King Jehosafat a kmal mle ultuil er a ulekrael er a profet Jahasiel e millisiich er a rechad er a Juda el “moumerang a lolekoi a re profet er [a Dios].” (2 Kr. 20:​14, 15, 20) King Hesekia er a lebo el chellungel er a klou el berraod e ngmlora profet Isaia. (Isa. 37:​1-6) Bek el taem el reking oltirakl a ulekrael er a Jehovah e te mlukngeltengat me a renged a mle selebechakl. (2 Kr. 20:​29, 30; 32:22) Ngmle kirel bleketakl er osengir a rokui el chad el kmo a Jehovah uluusbech er a reprofet er ngii el omekrael er a rechedal. Me nguaisei, engdi oumesingd er a reking me a rechad ultngeklterir a reprofet er a Jehovah.—Jer. 35:​12-15.

ROLEL E A JEHOVAH ULEMEKRAEL ER A REKOT EL KRISITANO

9. Ngtecha luluusbech er ngii a Jehovah el mo omekrael er a rekot el Kristiano? (Dirrek el momes er a siasing.)

⁹ Sera Pentekost 33 C.E. e a Jehovah kiltmeklii a ongdibel er a Rekristiano. Ngmilekera omekrael er tirka el kot el Kristiano? Ngtiltkii a Jesus el mo bdelul a ongdibel. (Efe. 5:​23, BT) Me nguaisei a Jesus a dimlak lomekrael er a derta el disaiplo. Nguluusbech er a rechapostol me a remechuodel el mlara Jerusalem el omekrael. (Rel. 15:​1, 2) A remechuodel a dirrek el lullutk er tir el mo omekrael er a ongdibel.—1 Th. 5:​12, NW; Tit. 1:​5, NW.

10. (a) Te milekera rekot el Kristiano er a ulekrael el lengilai? (Rellir 15:​30, 31) (b) Ngera uchul me a rebebil er a taem er a Biblia ultngeklterir tirke el luluusbech er tir a Jehovah el omekrael? (Momes er a baks el “ Uchul me a Rebebil Otngakl a Bleketakl el Locholt.”)

¹⁰ Me te milekera rekot el Kristiano? A ruumesingd er tir a kmal mle dmeu a rengrir loltirakl a ulekrael el lengilai. “Ng mlo dmeu a rengrir er a ikal tekoi el millisiich a rengrir.” (Monguiu er a Rellir 15:​30, 31.) Engdi ngkuk mekera Jehovah lomekrael er a rechedal er chelecha el taem er kid?

ROLEL E A JEHOVAH OMEKRAEL ER KID ER CHELECHA EL TAEM

11. Mosaod er a ta er a tekoi el ngii ochotii el kmo a Jehovah ulemekrael er a rechad er chelecha el taem er kid.

¹¹ A Jehovah melemolem lomekrael er a rechedal er chelecha el taem. Ngomekrael er tir  loeak a Tekingel me a Ngelekel el bdelul a ongdibel. Kid, ngsebeched el mes olechotel a kmo a Jehovah melemolem el lousbech er a rechad el omekrael er chelecha el taem? Nguaisei. Molatk a bebil el tekoi el dilubech er a ulebongel er aike el rak er a 1800. A Charles Taze Russell me a rubengkel a mlo mtebengii el kmo a rak er a 1914 a mo klou ultutelel el rak el kirel a Rengedel a Dios. (Dan. 4:​25, 26) Te mlo medengelii tiang lousbech a ulaoch er a Biblia. Me a Jehovah, ngulemekrael a research er tir er a Biblia? Ngkmal uaisei. A blekeradel el dilubech er a beluulechad er a 1914 a mileketeklii el kmo a Rengedel a Dios a mla omuchel el mengedereder. Ngmlo er ngii a kot el mekemad er a beluulechad me a meringel el rakt, desiu, me a bosech er a kall. (Lk. 21:​10, 11) A Jehovah mera el luluusbech er tirka el bliochel a rengrir el Kristiano lolengeseu er a rechedal.

12-13. Ngera mileketmokl er a taem er a Ongeru el Mekemad el mo menglou er a ureor el omerk e olisechakl?

¹² Dirrek el molatk a dilubech er a ongeru el mekemad er a beluulechad. A rudam el omekrael el ngar er a world headquarters er uriul er a losuub er a Ocholt 17:​8, e te mlo mtebengii el kmo a mekemad a diak bo lokrolid el mora Armakedon e ngbai mo er ngii a taem er a budech er a uriul er a mekemad el mo meskid a techall el mo menglou er a ureor er a berkel a klumech. Me alta ngkora dimlak lungil luldasu er tiakid el taem engdi cheldebechelel a Jehovah a kiltmeklii a Watchtower Bible College (School) of Gilead el train er a remo missionari el mo omerk e olisechakl a beluu el meliuekl er a beluulechad. Te dirrek el uldurokl er a remissionari er a temel a mekemad. Me a lmuut kung a blak a rengul el mesiou a kiltmeklii a ileakl el skuul b el train er a rokui el chedal ongdibel el mo meduch el omerk e olisechakl. Ngoeak aikakid el rolel e te mle prepare er a rechedal a Dios el kirel a ureor el merael el mei.

¹³ Sel dolatk aika el tekoi el dilubech e kede bleketakl el mesang el kmo a Jehovah ulemekrael er a rechedal er a chelsel a kmal meringel el taem. Uriul er a Ongeru el Mekemad e a rechedal a Jehovah er a betok el beluu a mlo mimokl el meruul er a berkel a klumech. Tia el ureor a meloseb.

14. Ngera uchul me ngsebeched loumerang a ulekrael er a cheldebechelel a Jehovah me a remechuodel? (Ocholt 2:1) (Dirrek el momes er a siasing.)

¹⁴ A rechedal a Governing Body er chelecha el taem a melemolem losiik a ulekrael er a Kristus. Ngsorir a ulekrael el lomesterir a rudam a losisiu er a uldasu el ngar er a eanged. Te ousbech er a re circuit overseer me a remechuodel el lomsa ongdibel aika el ulekrael. c Rengellitel el mechuodel a ngar er a “kadekmel a chimal” a Kristus. (Monguiu er a Ocholt 2:1.) Nguaisei, a remechuodel a diak lemecherrungel me te mo remuul a cheleuid. A Moses me a Josua me a dirrek el rechapostol me te riruul a cheleuid. (Ule. 20:12; Jos. 9:​14, 15; Rom 3:23) Me nguaisei engdi Jesus a kerekikl lomekrael er a blak a rengul mesiou me a remechuodel, e mo melemolem el meruul el uaisei el “mo lmuut er a ulebongel er a beluulchad.” (Mt. 28:20) Me kid el rokui a ngar ngii a ungil luchul me kede oumerang a ulekrael el lomeskid lokiu tirke el mla metutk el mo omekrael.

NGMO KLUNGIOLED SEL DEBLECHOEL EL LOLTIRAKL A ULEKRAEL ER A JEHOVAH

15-16. Ngera ke mla suub er a experience er tirke el oltirakl a ulekrael er a Jehovah?

¹⁵ Sel deblechoel el oltirakl a ulekrael er a Jehovah e ngmo uchul a klungioled, mo lmuut er chelechang. El ua tiang, a Andy me a Robyn uleltirakl er a advice el lomekbeot a klengar er kid. (Heb. 13:5) Tia uchul me ngmle sebechir el volunteer el lolengeseu a ureor el kirel a Renged el omekedechor. A Robyn a kmo: “Aki mla kiei a kmal mekekerei el basio el oumesingd er ngii a dimlak a umengel. E mle kirek lolterau a betok er aike el klekedellek el kirel omelai el siasing, alta ngkmal soak a tekoi er omelai el siasing. Ak kmal lilangel er a kuterau. Engdi di ua Sara el bechil a Abraham, ak rirellii er a renguk el mo omes el beduluchei el diak el beduluriul.” (Heb. 11:15) Ngera te ngilai tirka el obekel er a experience er tir? A Robyn a kmo: “Ngkmal ungil a rengmam sel ki modengei el kmo aki omsa Jehovah rokui el tekoi er kemam. E sel ki moureor el omekedechor e aki mesang a mo klengar er a beches el blekeradel.” A Andy me ngkongei a tekingel e kmo: “Ngkmal dmeu a rengmam sel ki modengei el kmo aki mengoit a rokui el temam me a klisicham el kirel a Renged.”

¹⁶ Ngmekera dirrek el mo uchul a klungioled sel deblechoel el loltirakl a ulekrael er a Jehovah?  A Marcia er a letobed er a high school e ngkmal mle soal loltirakl er omelisiich el lengiluu el mo pioneer. (Mt. 6:33; Rom 12:11) Ngkmo: “Te mle offer er ngak a eua el rak el scholarship er a daingak. Engdi ngmle soak el oltirakl a turrekong er ngak er a klereng. Me ak bai ngileltii el mora skuul el mo mesuub er a ileakl el duch el sebechel ngosukak el metik er a ureor el mo support er ngak er a omesiungek. Ngta er aike el kot lungil omelilt el bla krellii. Chelechang e ngdmeu a renguk el pioneer me a temek er a ureor a uchul me ngsebechek el olengeseu a ureor er a Bethel e melai a lmuut el bebil er a ileakl el techall.”

17. Ngera lmuut el bebil er a klungiaol el dengai sel deblechoel el oltirakl a ulekrael er a Jehovah? (Isaia 48:​17, 18)

¹⁷ A lebebil e kede mo ngmai omesmechokl el ngii omekerreu er kid el ua lak bo lebetik er a rengud er a udoud me a meruul a tekoi el ngii a mekrolid el mo melemall a llechul a Dios. Ngmo uchul a klungioled sel doltirakl aika el ulekrael er a Jehovah. Ngmo melemolem el klikiid ukltked me kid a mochib er a betok el diak a ultutelel el stress. (1 Ti. 6:​9, 10) Seikid e ngsebeched el loba rengud el rokir el mengull er a Jehovah, el ngii a meskid a dmolech el deurreng me a budech.—Monguiu er a Isaia 48:​17, 18.

18. Ngera uchul me ke mla rullii er a rengum el mo melemolem el oltirakl a ulekrael er a Jehovah?

¹⁸ A Jehovah a mo melemolem lousbech er a rechad el omeskid a ulekrael er a temel a kloul ringel me a Ta el Telael el Rak er Omerreder. (Psa. 45:16) Me kede mo melemolem loltirakl a ulekrael alta ngdiak losisiu er a tekoi el dullatk er ngii? Tia di mo ultuil er a rolel a doltirakl a ulekrael el lomeskid a Jehovah er chelechang. Me a leuaisei e bo deblechoel el oltirakl a ulekrael er a Jehovah luldimukl er aike el lomeskid a rechad el mla metutk el mo omekerreu er kid. (Isa. 32:​1, 2; Heb. 13:​17, NW) Ngkmal sebeched loumerang er a omekrael er kid el Jehovah, el ngii omekrael er kid el mo cheroid er a tellemall e ngoikid el mora klengar el diak a ulebengelel er a beches el blekeradel.