1. Dahme kahrehda kitail anahne sapwellimen Siohwa kaweid? Menlau kihda ehu karasaras.

 MEDEWEHLA me ke salongala nanwel ehu. Met pahn keper pwehki ke kakete sehse ahlo oh kirisdi de ke pil kakete pwupwudi nan pwoar loal ehu. Ke pahn uhdahn kalahnganki me mie emen me pahn kaweid uhk oh ese mwahu wasao. Emen me ese wasa me mie keper oh seweseiuk pwehn dehr lelohng keper! Sampah wet duwehte nanwelo. Mie soangen keper tohto me kak kauwehla atail nanpwungmwahu rehn Siohwa. Ahpw mie atail Sounkaweid unsek men—Siohwa. E kin ketin kahluwai kitail sang keper oh kahluwalahng mour soutuk nan sampah kapwo.

2. Ia duwen Siohwa eh kin ketin kaweid kitail?

² Ia duwen Siohwa kin ketin kaweid kitail? Keieu sang sapwellime Mahsen Paipel. Ahpw, e pil kin ketin doadoahngki aramas akan en kaweid kitail. Karasepe, e kin ketin doadoahngki “ladu lelepek oh loalokong” pwehn kihda padahk mehlel me rasehng mwenge me pahn sewese kitail wiahda pilipil mwahu. (Mad. 24:45) Siohwa pil kin ketin doadoahngki ohl koahiek teikan pwehn kaweid kitail. Karasepe, sounapwalih me kin seiloak kan oh elder kan nan mwomwohdiso kin kihda kangoang oh kaweid me kak sewese kitail dadaurete erein ahnsou apwal kan. Ia uwen atail kalahnganki atail kak likih kaweid pwukat erein ahnsou apwal pwukat mwohn imwio leledo! Met sewese kitail en wiahte kompoakepahn Siohwa pwe kitail en kak perenki mour ahnsou wet oh pil kohkohlahte.

3. Dahme kitail pahn koasoiapene nan iren onop wet?

³ Ahpw, ekei pak e kakete apwal ong kitail en idawehn sapwellimen Siohwa kaweid, ni mehlel ma e kohsang aramas soh unsek men. Dahme kahrehda? Pwehki kaweid me re kihdao kakete kaidehn dahme kitail men rong. De ele kitail medewe me kaweid me re kihda sohte mwahu oh e sohte kohsang rehn  Siohwa. Nan soangen ahnsou pwukat, kitail kin keieu anahne likih me Siohwa me kin ketin kaukaweid sapwellime aramas akan oh met kin ahnsou koaros mwahu ong kitail. Pwehn kakehlaka atail likilik, iren onop wet pahn koasoia (1) ia duwen Siohwa eh kin ketin kaweid sapwellime aramas akan nan Paipel, (2) ia duwen eh kin ketin kaukaweid kitail rahnwet, oh (3) ia duwen atail kin paiekihda ni atail doulahte idawehn sapwellime kaweid.

IA DUWEN SIOHWA EH KIN KETIN KAWEID MEHN ISRAEL KO

4-5. Ia duwen Siohwa eh ketin kasalehda me e kin doadoahngki Moses pwehn kaweid mehn Israel ko? (Menlau kilang kilel.)

⁴ Siohwa ketin idihada Moses pwehn kahluwa mehn Israel ko sang Isip. Oh e ketikihong mehn Israel ko mehn kadehde sansal me e kin ketin doadoahngki Moses pwehn kaweid irail. Karasepe, e ketikihda uhren depwek ehu nin rahn oh uhren kisiniei ehu nipwong. (Eks. 13:21) Moses idawehn uhr ko, me kahluwahlahng ih oh mehn Israel ko ni Sehd Weitahtao. Ahpw aramas ko masepwehkada oh medewe me re tengala nanpwungen sehdo oh sounpei en Isip ko. Irail medewe me Moses sapwungala ni eh kahluwairaillahng Sehd Weitahtao. Ahpw Moses sohte sapwung. Siohwa ketin doadoahngki Moses kahluwahlahng aramas ko wasao. (Eks. 14:2) Koht eri ketin doareirailla ni ahl kapwuriamwei ehu.—Eks. 14:​26-28.

⁵ Eri mwurin sounpar 40, Moses doulahte likih uhren depweko pwehn kahluwahlahng sapwellimen Koht aramas akan nan sapwtehno. a Erein ahnsou ehu, Siohwa ketikihdi uhro pohn imwen Moses impwalo, wasa me mehn Israel koaros kak kilang. (Eks. 33:​7, 9, 10) Sang ni uhro Siohwa ketin mahseniong Moses, me uhd padahkihong aramas ako dahme Siohwa ketin mahsanihong. (Mel. 99:7) Mehn Israel ko kak kilang ni sansal me Siohwa kin ketin doadoahngki Moses pwehn kaweid irail.

6. Ia duwen mehn Israel ko ar mwekidki sapwellimen Siohwa kaweid? (Nempe 14:​2, 10, 11)

⁶ E kansensuwed me pali laud en mehn Israel ko soikala mehn kadehde sansal me Siohwa kin ketin doadoahngki Moses nin duwen wiliepe. (Wadek Nempe 14:​2, 10, 11.) Irail kin pwurupwurehng pohnsehsehla pwukoa me Moses ahneki. Pwehki met, Siohwa sohte ketin mweidohng irail en iang pedolong nan Sapwen Inowo.—Nemp. 14:30.

7. Menlau kihda karasaras en irail kan me idawehn sapwellimen Siohwa kaweid. (Nempe 14:24) (Pil kilang kilel.)

⁷ Ahpw, ekei mehn Israel ko idawehn sapwellimen Siohwa kaweid. Karasepe, Siohwa ketin mahsanih: “Kalep . . . kin loalopwoatohng ie.” (Wadek Nempe 14:24.) Koht ketin katingih Kalep oh pil mweidohng en pilada wasa me e men mi ie nan Sapwen Inowo. (Sos. 14:​12-14) Mehn Israel kan me mweimwei en pedolong nan Sapwen Inowo pil wiahda mehn kahlemeng mwahu en idawehn sapwellimen Siohwa kaweid. Ni ahnsou me Sosua wiliandi Moses pwehn kahluwa mehn Israel ko, irail “waunekihla sang ni ahnsowo kohla lel eh mehla.” (Sos. 4:14) Pwehki met, Siohwa ketin kapaiairailda oh ketikihong irail sahpwo me e ketin inoukihda.—Sos. 21:​43, 44.

8. Menlau kawehwehda ia duwen Siohwa eh ketin kaweid sapwellime aramas akan erein ahnsoun nanmwarki kan. (Pil kilang kilel.)

⁸ Sounpar kei mwuhr, Siohwa ketin idihada sounkopwung kan pwehn kaweid sapwellime aramas akan. Mwurin mwo, erein ahnsou en nanmwarki kan, Siohwa ketin idihada soukohp kan pwehn kaweid sapwellime aramas  akan. Nanmwarki lelepek kan idawehn ahn soukohp ko kaweid. Karasepe, Nanmwarki Depit pwungki ale kaweid sang soukohp Nadan. (2 Sam. 12:​7, 13; 1 Kron. 17:​3, 4) Nanmwarki Seosopat likih ahn soukohp Sahasiel kaweid oh kangoange mehn Suda ko en “pwoson dahme sapwellime soukohp kan patohwanohng.” (2 Kron. 20:​14, 15, 20) Ni ahnsou me Nanmwarki Esekaia kin pwunodada, e kin peki sawas rehn soukohp Aiseia. (Ais. 37:​1-6) Ehuehu ahnsou me nanmwarki ko kin idawehn sapwellimen Siohwa kaweid, e kin ketin kapaia oh pere sapwellime aramas akan. (2 Kron. 20:​29, 30; 32:22) E pahn uhdahn sansal ong koaros me Siohwa kin ketin doadoahngki sapwellime soukohp kan pwehn kaweid sapwellime aramas akan. Ahpw pali laud en nanmwarki ko oh mehn Israel ko sohte rong sapwellimen Siohwa soukohp kan.—Ser. 35:​12-15.

IA DUWEN SIOHWA EH KETIN KAWEID TEPIN KRISTIAN KO

9. Ihs me Siohwa ketin doadoahngki pwehn kaweid tepin Kristian ko? (Pil kilang kilel.)

⁹ Nan Pendekos pahr 33, Siohwa ketin wiahda mwomwohdisohn Kristian. Ia duwen eh ketin kaweid tepin Kristian ko ni ahnsowo? E ketin idihada Sises nin duwen tapwin mwomwohdiso. (Ep. 5:23) E sohte mahseniong emenemen tohnpadahk ko pwehn padahkihong irail dahme ren wia. E ketin doadoahngki wahnpoaron oh elder kan nan Serusalem pwehn tiengla mwowe. (Wiewia 15:​1, 2) Patehng met, elder kan idihdda pwehn kaweid mwomwohdiso kan.—1 Des. 5:12; Taitus 1:5.

10. (a) Ia duwen pali laud en tepin Kristian ko ar mwekidki kaweid me re alehdi? (Wiewia 15:​30, 31) (b) Dahme kahrehda ekei nan Paipel soikala irail kan me Siohwa ketin doadoahngki pwehn kaweid irail? (Menlau kilang koakono “ Dahme Kahrehda Ekei Soikala Mehn Kadehde Sansal.”)

¹⁰ Ia duwen tepin Kristian ko ar mwekidki met? Pali laud en irail perenki idawehn kaweid kan me re alehdi. Ni mehlel, “irail ahpw perenkihda kowahlap mehn kangoango” me re alehdi. (Wadek Wiewia 15:​30, 31.) Ahpw, ia duwen Siohwa eh kin ketin kaukaweid sapwellime aramas akan nan atail ahnsou?

IA DUWEN SIOHWA EH KIN KETIN KAWEID KITAIL RAHNWET

11. Menlau kihda ehu karasepe me kasalehda ia duwen Siohwa eh kin ketin kaweid irail kan me kin tiengla mwowe nan atail ahnsou.

¹¹ Siohwa kin ketin pousehlahte kaweid sapwellime aramas akan rahnwet. E kin ketin wia  met sang ni sapwellime Mahsen oh sapwellime Ohlo, me wia tapwin mwomwohdiso. Ia duwe, mie mehn kadehde me Koht kin ketin pousehlahte doadoahngki aramas akan nan atail ahnsou? Ei. Karasepe, medewehla dahme wiawi mwurin pahr 1870. Charles Taze Russell oh ienge ko tepida wehwehkihda me pahr 1914 pahn wia pahr kesempwal ehu ong kokoudahn Wehin Koht. (Dan. 4:​25, 26) Re esehda met pwehki irail kasawih kokohp en Paipel kan. Siohwa ketin kapaia arail wia roporopo? Ei uhdahn. Dahme wiawi nan 1914 kadehdehda me Wehin Koht tepidahr kakaun. Mahwen Keieu en Sampah tepida, oh mwuhr soumwahu lusulus, rerrer en sahpw, oh lehk lapalap. (Luk 21:​10, 11) Ei mehlel, Siohwa ketin doadoahngki ohl lelepek pwukat pwehn sewese sapwellime aramas akan.

12-13. Dahme brother koahiek kan wia erein Mahwen Keriau en Sampah pwehn kalaudehla doadoahk en kalohk?

¹² Pil medewehla dahme wiawi erein Mahsen Keriau en Sampah. Mwurin arail onopki Kaudiahl 17:​8, brother koahiek kan nan atail poasen kaun wehwehkihda me mahweno sohte pahn imwikihla Armakedon, ahpw e pahn imwikihla ahnsou meleilei ehu pwe Sounkadehdehn Siohwa kan en kak kalohk ong aramas tohtohie. Eri mendahki ahnsowo sohte pahn mwomwen wia ahnsou mwahu ehu, brother koahiek kan tapiada Sukuhl en Kilead pwehn kaiahne misineri kan en kalohk oh padahk nan sahpw koaros. Irail pil kadarpeseng misineri kan erein mahweno. Patehng met, ladu lelepeko wiahda Sukuhl ong Kalohk b pwehn kaiahne koaros nan mwomwohdiso pwehn wiahla sounkalohk oh sounpadahk mwahu kei. Ni ahl pwukat, sapwellimen Koht aramas akan pahn onopadahng doadoahk en kalohk me pahn anahnehte wiawi.

¹³ Rahnwet, kitail kak uhdahn kilang me Siohwa kin ketin kaukaweid sapwellime aramas akan erein ahnsou apwalo. Mwurin Mahwen Keriau en Sampah, sapwellimen Siohwa aramas akan kin kalohk ni saledek nan sahpw tohto. Ni mehlel, doadoahko uhdahn pweida.

14. Dahme kahrehda kitail kak likih kaweid me kohsang sapwellimen Siohwa pwihn oh elder kan me idihdda? (Kaudiahl 2:1) (Pil kilang kilel.)

 ¹⁴ Rahnwet Pwihn me Kin Apwalih Mwomwohdiso nan Sampah Pwon kin pousehlahte rapahki kaweid sang Krais. Irail men kaweid kan me re kihong brother kan en kasalehda sapwellimen Siohwa oh Sises madamadau ong soahng kan. Oh irail kin doadoahngki sounapwalih me kin seiloak oh elder kan pwehn kihong mwomwohdiso kan kaweid. c Elder keidi kan kin mi ‘nin limen Krais palimaun.’ (Wadek Kaudiahl 2:1.) Ei mehlel, elder pwukat sohte unsek oh kin wiahda sapwung. Moses oh Sosua kin wiahda sapwung ekei pak, duwehte wahnpoaron ko. (Nemp. 20:12; Sos. 9:​14, 15; Rom 3:23) Ahpw kitail kak kilang ni sansal me Krais kin ketin kanahieng ni eh kin kaweid ladu lelepeko oh elder kan me idihdda, oh e pahn pousehlahte wia met “rahn koaros lao lel ni kaimwiseklahn koasoandi en mwehio.” (Mad. 28:20) Eri mie kahrepe mwahu en likih kaweid kan me e ketikihda sang ni eh ketin doadoahngki irail kan me idihdda pwehn tiengla mwowe.

KITAIL KIN PAIEKIHDA NI ATAIL POUSEHLAHTE IDAWEHN SAPWELLIMEN SIOHWA KAWEID

15-16. Dahme ke sukuhlkihsang dahme wiawihong irail kan me kin idawehn sapwellimen Siohwa kaweid?

¹⁵ Ni atail kin doulahte idawehn sapwellimen Siohwa kaweid, kitail pil kin paiekihda ahnsou wet. Karasepe, Andy oh Robyn doadoahngki kaweid en ahneki mour me sohte kedirepwki soahng teikan. (Ipru 13:5) Pwehki met, ira kak sewese kauwada Wasahn Kaudok kan oh ihmw teikan en Sounkadehdehn Siohwa kan. Robyn koasoia: “Ekei pak se kin mi nan kisin ihmw oh pil sohte wasa me se kak kuk. Oh I anahne netikihla soahng tohto me I kin doadoahngki pwehn wiahda kilel, mehkot me I perenki wia. I sengiseng ni ahnsou me I netikihla. Ahpw duwehte ahn Eipraam pwoudo, Sara, I koasoanehdi en dehr nsensuwedki dahme I netikihla ahpw ien perenki dahme I kak wiahiong Siohwa ahnsou wet.” (Ipru 11:15) Ia duwen Andy oh Robyn paiekihda met? Robyn koasoia: “Se uhdahn peren pwehki se ese me se kin kihkihong Siohwa soahng koaros me se ahneki. Ni ahnsou me ngehi oh ei pwoudo kin wia doadoahk me Siohwa ketikihong kiht, se kin esehda ia pahn mwomwen mour nan sampah kapwo.” Andy pil koasoia: “Se peren pwehki se kin kihong aht ahnsou oh kehl ong sapwellimen Siohwa doadoahk.”

¹⁶ Ia duwen atail pil kin paiekihda ni atail doulahte idawehn sapwellimen Siohwa kaweid? Karasepe, mwurin eh kesepwil sang high  school, Marcia uhdahn men idawehn kaweid me e alehdi pwehn wia pioneer. (Mad. 6:33; Rom 12:11) E koasoia: “I alehdi luhk en iang sukuhl laud erein sounpar pahieu. Ahpw I men wiahiong Siohwa uwen ei kak koaros. Eri I pilada ien sukuhlki soahng ehu me kak sewese ie koadoahkihada mwohni me itar pwe ien kak pioneer, oh I sohte ale luhko. Met ehu pilipil mwahu me I wiahda. Met I wia pioneer men me peren, oh pwehki I kak pilada ia uwen laud me I kak doadoahk, I kak iang sawas nan Pedel oh wia soahng kaselel tohto ong Siohwa.”

17. Ia ekei kamwahu kan ni atail kin doulahte idawehn sapwellimen Siohwa kaweid? (Aiseia 48:​17, 18)

¹⁷ Ekei pak, kitail kin alehdi kaweid me kin pere kitail sang noahroke kepwe oh wiewia kan me kak kahrehiong kitail en kauwehla sapwellimen Koht kosonned. Nan soahng pwukat, kitail pahn paiekihda atail idawehn kaweid me Siohwa ketikihda. Kitail kin kolokol nsenmwakelekel oh soikala kahpwal tohto. (1 Tim. 6:​9, 10) Pwehki met, kitail pahn kak papah Siohwa sang ni mohngiongitail unsek. Sohte mehkot likin met me kak kihong kitail nsenamwahu oh popohl.—Wadek Aiseia 48:​17, 18.

18. Dahme kahrehda ke koasoanehdi teng en doulahte idawehn sapwellimen Siohwa kaweid?

¹⁸ Kitail kak kamehlele me Siohwa pahn ketin pousehlahte doadoahngki aramas akan pwehn kihda kaweid erein kahn kamakam kowahlapo oh lao lel ni Kaundahn Pahr Kido. (Mel. 45:16) Ia duwe, kitail pahn pousehlahte idawehn kaweido pil ni ahnsou me kitail men wia ehu soahng tohrohr? E pahn mengei ong kitail en wia met ma kitail doulahte idawehn sapwellimen Siohwa kaweid ahnsou wet. Eri, kitail en ahnsou koaros idawehn sapwellimen Siohwa kaweid, pil iangahki kaweid me kohsang irail ohl kan me idihdda pwehn apwalih kitail. (Ais. 32:​1, 2; Ipru 13:17) Kitail kak idawehn atail Sounkaweido Siohwa, oh uhdahn likih pwehki e pahn ketin pere kitail sang mehkot me kak kauwehla atail nanpwungmwahu reh oh kahluwaikitaillahng mour soutuk nan sampah kapwo.