1. Jehovapa ayudata chasquina importante cashcata ricuchingapaca ¿shuj ejemplomanda parlapai?

 CAIPI pensaripashunchi: Shuj shuj sacha animalcuna y venenoso plantacuna tiaj jatun sachapi chingapashcanguiman. Chai jatun sachamanda llujshi ushachun, pipash maita rinata ricuchishpa pushajpica ¿nachu cushilla sintiripanguiman? Cai mundopi causaica chai jatun sachashnami can. Cai peligroso, nali mundopi causashcamandami, Jehovamanda caruyana peligropipash capanchi. Pero ama shina pasachunga Jehovapa ayudatami charipanchi. Paimi imapash peligroso cosascunamanda caruyachun y paraíso alpagupi para siempre causai ushachun ayudanga.

2. Jehová Diosca ¿imashinata ñucanchitaca ayudan?

² Jehová Diosca ñucanchicunataca Bibliahuanmi ayudan. Jehová Diosca ñucanchicuna espiritualmente ali cachun y ali decisiongunata japi ushachunga, ‘aliguta cazushpa, aliguta pensarishpa sirvij esclavohuanmi’ ayudajun (Mat. 24:45). Ashtahuanbash Jehová Diosca superintendente huauquicunahuan, congregacionmanda ancianocunahuanmi, ñucanchicuna imapash llaquicunata charijpica, animashpa y consejocunata cushpa ñaupaman catichunmi ayudan. Cai shinlli punllacunapi causajushpapash Jehovapa ayudata charishcamandaca ninandami agradicipanchi. Jehovapa ayudata charishcamandami paihuan ali amigo caita ushapanchi. Shinallata para siempre causana oportunidadtapashmi charipanchi.

3. Cai temapica ¿imatata yachajupashun?

³ Jehová Diosca imperfecto gentecunata utilizashpami ñucanchicunamanga instrucciongunata cun. Chaimandami huaquinbica chai instrucciongunata cazunaca difícil caita ushan. Porque huaquinbica  ñucanchi munashcashna instrucciongunaca na cangachu. Chaimandami chai instruccionguna o consejocunaca ñucanchitaca na ayudangachu. Jehová Diospa instrucciongunaca na cangachu nishpami pensapanchiman. Shina pasajpica, Jehová Dios paipa organizacionda ñaupaman pushajushcatami confiana capanchi. Y pai cushca instrucciongunata cazungapapashmi esforzarina capanchi. Jehovapa organización cushca instrucciongunapi ashtahuan confiangapaca, cai quimsa yuyaicunata yachajunami ayudanga: 1) punda tiempopi Jehová Dios imashina paipa sirvijcunata ñaupaman pushashcata, 2) cunan punllacunapi paita sirvijcunata imashina ñaupaman pushajushcata, 3) Jehovapa instrucciongunata cazushpa ima beneficiocunata chari ushashcatapashmi yachajupashun.

JEHOVÁ DIOSCA ¿IMASHINATA ISRAELITACUNATA ÑAUPAMAN PUSHARCA?

4, 5. Jehová Diosca ¿imashinata Moisesta utilizajushca ricuchirca? (Callari paginapa dibujota ricupangui).

⁴ Jehová Diosca Moisesmanmi israelitacunata Egiptomanda llujchina responsabilidadta curca. Shinallata israelitacunamanga paicunata ayudachun Moisesta utilizajushcatami ricuchirca. Israelitacunamanga punlla cashpa o tuta cashpapashmi shuj pilarshna fuyuhuanmi paicuna maita rinata ricuchijurca (Éx. 13:21). Moisesca chai pilarshna fuyuta catimandami israelitacunandi mar rojo nishca pushtuman chayarca. Israelitacuna mar rojoman chayashpaca, egipcio soldadocuna huashata shamunajujta ricushpa, maiman rinata na atinashpami ninanda manllarinajurca. Israelitacunaca, ñucanchitaca caiman yanga yangami Moisesca apamushca ninajurcami. Pero Jehová Diosmi Moisestaca israelitacunata chai pushtuman pushachun ayudarca (Éx. 14:2). Chai jipaca Jehová Diosca israelitacunataca shuj milagrota rurashpami salvarca (Éx. 14:​26-28).

⁵ Moisés runagu israelitacunandi desiertopi cashpaca, israelitacunata ayudai ushangapaca, 40 huatacunatami Jehová churashca pilarshna fuyuta catishpa causajurca.  a Huaquinbica chai pilarshna fuyutaca, Moisés causajushca carpa jahuapi churan carca. Chaitami israelitacunaca ricun carca (Éx. 33:​7, 9, 10). Chai pilarshna fuyumandami Jehová Diosca, israelitacunata imashina ñaupaman pushana cashcata yachachunmi Moisesmanga instrucciongunata cun carca (Sal. 99:7). Shinaca chaita ricushpami israelitacunaca paicunata ayudangapaj Moisesta utilizajushcata seguro caita usharca.

6. Israelitacunaca ¿imatata na reconocirca? (Números 14:​2, 10, 11).

⁶ Shinapash casi tucui israelitacunami Jehová, paicunata ayudangapaj Moisesta utilizajushcataca na reconocirca (Números 14:​2, 10, 11​ta liipangui). Israelitacuna, Moisesta cutin cutin na cazungapaj munashcamandami, Jehová Diosca pai carasha nishca alpaman israelitacuna yaicuchunga na saquirca (Núm. 14:30).

7. Jehovapa instrucciongunataca ¿picunata cazurca? (Números 14:24; dibujota ricupangui).

⁷ Huaquin israelitacunaca Jehovapa instrucciongunata cazushcatami ricuchirca. Por ejemplo, Jehová Diosca ‘ñucata servij Calebca paipaj shungupi shuj ali espirituta charishpa ñucata catingapaj’ munashcatami ricuchin nircami (Números 14:24​ta liipangui). Shina cazushcamandami Jehová Diosca bendiciarca. Shinallata Canaán llactamanda maijan ladopi causangapaj munashcata agllachunbashmi saquirca (Jos. 14:​12-14). Caleb runagushnallatami israelitacunapa cati miraicunaca Jehovapa instrucciongunata cazungapaj dispuesto carca. Jehová Diosca, Moisespa randimi Josué runaguta israelitacunata ñaupaman pushana responsabilidadta curca. Y israelitacunapa miraicunaca Josué runagutaca ‘paicunapa tucui causaipimi’ respetashpa cazurca (Jos. 4:14). Shina cazushcamandami, Jehová Diosca paicunata bendiciashpa pai carasha  nishca alpaguman israelitacuna yaicuchun saquirca (Jos. 21:​43, 44).

8. Reycunapa tiempocunapica, Jehová Diosca israelitacunataca ¿imashinata ñaupaman pusharca? (Dibujota ricupangui).

⁸ Ashtaca huatacuna jipaca, Jehová Diosca israelitacunata ñaupaman pushachunga juezcunatami churarca. Tiempohuanga reycunami mandai callarirca. Chai tiempopi israelitacunata ayudachunga, profetacunatapashmi churarca. Jehová Diosta cazuj reycunaca profetacunapa cushca consejocunataca ali alimi uyan carca. Por ejemplo, rey Davidca profeta Natán corregijpica aligumanmi chasquirca (2 Sam 12:​7, 13; 1 Crón. 17:​3, 4). Rey Jehosafatca profeta Jahazielta cazushpami Judá llactapi causaj israelitacunataca Jehovapa profetacunapi confiachunmi animarca (2 Crón. 20:​14, 15, 20). Shinallata llaquicunata charishpaca rey Ezequiasca profeta Isaiaspa ayudatami mañarca (Is. 37:​1-6). Reycuna Jehovapa mandashcacunata cazujpica, Jehová Diosca paicunata bendiciashpami mandanajushca llactatapash cuidan carca (2 Crón. 20:​29, 30; 32:22). Cai tucui ayudacunaca israelitacunata ñaupaman pushangapaj profetacunata Jehová utilizajushcatami ricuchin. Shinapash tauca reycuna y israelitacunapash Jehovapa profetacunataca na cazurcachu (Jer. 35:​12-15).

PRIMERO CRISTIANOCUNATACA JEHOVÁ DIOSCA ¿IMASHINATA AYUDARCA?

9. Apostolcunapa punllacunapi cristianocunataca, Jehová Diosca ¿imashinata ayudarca? (Dibujota ricupangui).

⁹ Apostolcunapa punllacunapimi Jehová Diosca cristianocunapa congregacionguna tiachunmi ayudarca. Chai tiempopi cristianocunataca Jehová Diosca ¿imashinata ayudarca? Jesustami congregaciongunapa umashna ñaupaman pushashpa ayudachun churarca (Efes. 5:23). Shinapash Jesuspachaca cada uno imatapacha rurana cashcataca na nijurcachu. Chaipa randica, congregacionda ñaupaman pushangapaca apostolcunata, Jerusalenba ancianocunatami utilizarca (Hech. 15:​1, 2). Ashtahuanbash, cada congregacionbi huauquipanicunata ayudachunga ancianocunatami churarca (1 Tes. 5:12; Tito 1:5).

10. a) Apostolcunapa punllacunapi cristianocunaca ¿imashinata Jehovapa instrucciongunataca chasquirca? (Hechos 15:​30, 31). b) Huaquingunaca ¿imamandata Jehová churashca jaricunataca na chasquirca? ( Huaquingunaca ¿imatata na reconocin? nishca recuadrota ricupangui).

¹⁰ Apostolcunapa punllacunapi cristianocunaca ¿imashinata Jehovapa instrucciogunataca chasquirca? Paicunaca casi tucuicunami chai instrucciongunataca aliguman cazurca. Shinallata chai instrucciongunata “liijta uyashpaca ninanda  cushijunajurca” (Hechos 15:​30, 31​ta liipangui). Cunan punllacunapipash Jehová Diosca paita sirvijcunataca ¿imashinata ñaupaman pushajun?

CUNANBICA ¿IMASHINATA JEHOVÁ DIOSCA PAIPA SIRVIJCUNATACA ÑAUPAMAN PUSHAJUN?

11. Jehová Diosca paipa organizacionda ñaupaman pushangapaj cunanbi imata rurashcata intindichipai.

¹¹ Cunan punllacunapipashmi Jehová Diosca paipa sirvijcunataca Bibliahuan y Jesushuan ñaupaman pushashpa ayudajun. Jehová Diosca paipa voluntadta pactachingapaca paipa sirvijcunatami utilizajupashca. Por ejemplo, 1870 huatapica huauqui Charles Russell y paita ayudaj huauquicunapash 1914 huata ninan importante cashcatami cuenta japirca (Dan. 4:​25, 26). Cai huauquicunaca Bibliapa profeciacunata ali ali yachajuimandami 1914 huatapi Jehovapa Gobierno mandai callarinata yachaj chayarca. Y chaita yachachunga Jehová Diosmi ayudajurca. Huata 1914​pimi primera guerra mundial tiarca. Shinallata millai unguicuna, terremotocuna y yarjai tiempopashmi tiarca (Luc. 21:​10, 11).Chai pasashcacunami Jehovapa Gobierno 1914​pi mandai callarishcata ricuchirca. Jehová Diosca cashna jaricunata utilizashpami Jehovapa tucui sirvijcunata ñaupaman pushajushca.

12, 13. Segunda Guerra Mundialpi Jehovata sirvijcunata yachachishpa catingapaj y predicashpa catichunga, Jehovapa organizacionga ¿imata rurarca?

¹² Segunda guerra mundialpi ima pasashcata ricupashun. Central mundialta ñaupaman pushaj huauquicunaca Apocalipsis 17:8​ta ali estudiashpami, Segunda Guerra Mundial jipagulla Armagedón punlla na chayamuna cashcata intindirca. Shinallata tranquilo tiempo chayamuna cashcatapashmi intindirca. Chai tiempopimi ashtahuan gentecunaman villachita ushana carca. Chaimandami Jehovapa organizacionga Colegio Superior Bíblico de la Watchtower de Galaad, b nishcata callarichirca. Chai horascunapica chai decisionga na ashta alishnallami ricurirca. Chai escuelaca shuj shuj pushtucunapi villachingapaj, yachachingapaj richun misionerocunata ali yachachingapami carca. Shinallata guerra tiaj tiempocunapipashmi huaquin huauquipanicunataca shuj shuj llactacunaman villachichun cacharca. Ashtahuanbash aliguta cazushpa aliguta pensarishpa sirvij esclavoca huauquipanicunata gentecunaman ashtahuan aliguta yachachi ushachunmi Curso en el Ministerio  Teocrático c nishcatami callarichirca. Cai escuelacunaca Jehovata tucui sirvijcuna ashtahuan villachishpa ñaupaman catichunmi ayudarca.

¹³ Jehová Diosca shinlli punllacunapipashmi paipa sirvijcunataca ñaupaman pushashpa ayudarca. Porque Segunda Guerra Mundial tucurishca jipamandaca Jehovata tucui sirvijcunaca ashtaca pushtucunapimi libre predicashpa catita ushashca. Chaimandami ashtaca gentecunaca Jehovata rijsishpa paita sirvi ushashca. Y cunanbica mundo enteropimi predicanajupanchi.

14. Jehovapa organización cushca instrucciongunapi y ancianocunapica ¿imamandata confiaita ushapanchi? (Apocalipsis 2:1; fotota ricupangui).

¹⁴ Cunan punllacunapi Cuerpo Gobernante huauquicunaca Jesuspa ayudatami mascapan. Cai huauquicunaca, huauquipanicunaman Jehová y Jesús munashcashna instrucciongunata cungapami ninanda esforzarin. Cuerpo Gobernantemanda huauquicunaca superintendentecunata, ancianocunata utilizashpami congregaciongunamanga instrucciongunata cun. d Ungido anciano huauquicuna y shuj ancianocunapashmi Cristopa ‘ali lado maquipimi’ can (Apocalipsis 2:1​ta liipangui). Cai huauquicunaca imperfectocuna caimandami, Moisés, Josué y caishuj apostolcunashnallata imagupipash pandaripanga (Núm. 20:12; Jos. 9:​14, 15; Rom. 3:23). Ashtahuanbash Jesusca aliguta cazushpa aliguta pensarishpa sirvij esclavota y ancianocunatapash “tucui punllacuna” ayudajunataca seguromi capanchi (Mat. 28:20). Shinaca Jehová, cai huauquicunata utilizashpa paipa sirvijcunata ayudajushcata yachaimandami Jehovapi ashtahuan confiapanchi.

JEHOVATA CAZUSHPACA ÑUCANCHILLATAMI BENEFICIARIPASHUN

15, 16. Jehovapa ayudata chasquijcunamandaca ¿imatata yachajupanchi?

¹⁵ Jehovapa instrucciongunata cazushpaca ninanda beneficiaripashun. Por ejemplo, Andy huauquigu y paipa huarmigu Robynga minishtirishca cosasgucunahuanlla causanatami yachajurca. Minishtirishcahuanlla causanami, construccionbi voluntario shina sirvi ushachun ayudarca. Paniguca ninmi: “Ashtaca viajecunatami uchilla cuartogucunapi causarcanchi. Huaquinbicarin maipi yanuna pushtugutapash na charircanchichu. Ñucaca fotota llujchinataca ninandami gushtapani. Pero camaracunata jatunami tucurcani. Camarata jatushpaca ninanda llaquirishpami huacarcani. Shinapash Sara huarmigushnami punda charishca cosascunata na yarishpami ñaupaman catingapaj esforzarircani” (Heb. 11:15). Chai decisionda agllashcamandaca cai cusahuarmigucunaca ¿imashinata sintirin?  Paniguca: “Jehovata sirvingapaj tucui usharishcaguta ruranajushcamandami cushillapacha sintiripanchi. Asignaciongunata pactachishpaca paraíso alpagupi causai imashina canata pensarichun ayudahuan”. Shinallata Andy huauquiguca ninmi: “Jehovapa gobiernota apoyangapaj ninanda esforzarinaca imahuanbash na igualanllu”.

¹⁶ Jehovapa instrucciongunata cazushpaca ¿imashinata ashtahuan beneficiaripanchi? Cunanga Marcia paniguca imata rurashcata ricupashun. Panigutaca colegiota tucuchishpa precursora shina sirvijuchunmi consejashcarca. Paniguca chai consejota cazunatami decidirca (Mat. 6:33; Rom. 12:11). Paniguca ninmi: “Shuj universidadpi chuscu huatacunata gratis estudiana oportunidadtami charircani. Pero ñucaca espiritual metacunata pactachingapami munarcani. Chaimandami universidadta estudianapa randica, minishtirishca cosasgucunatalla charishpa precursora shina sirvi ushangapaca escuela técnica nishcapi estudianatami decidircani. Shina decidishcamandami precursora regular shina sirvijupani. Shinallata asha tiempogutalla trabajajuimandami Betelpi voluntaria shina sirvita ushapashcani. Ashtahuanbash shuj privilegiocunatapash charipashcani”.

17. Jehová Diospa instrucciongunata cazushpaca ¿imashinata ashtahuan beneficiaripashun? (Isaías 48:​17, 18).

¹⁷ Jehovapa organización cushca consejocunaca charijyana munaita y Jehovata na cazuna yuyaicunata ama charichunbashmi ayudan. Jehovapa instrucciongunata cazushpaca ñucanchillatami beneficiaripashun. Shinallata ñucanchi concienciapipash tranquilo sintirishpami, ima problemacunamandapash jarcarita ushapashun (1 Tim. 6:​9, 10). Shina rurashpallami Jehovata tranquilo, cushilla sirvishpa catita ushapashun (Isaías 48:​17, 18​ta liipangui).

18. Jehovapa instrucciongunataca ¿imamandata cazungapaj munapangui?

¹⁸ Ninan manllanai llaqui tiempocunapi y Jesús ña mil huatacunata mandajui tiempopi, Jehová Diosca paipa sirvijcunata ayudangapaca, paita sirvij jaricunata utilizashpami catinga (Sal. 45:16). Chai tiempocunapica ñucanchi munaicunata saquishpa Jehovapa organizacionbi cushca instrucciongunata cazungapaj ¿dispuestochu capashun? Cunanbillata cazushpaca shamuj punllacunapi cazunaca ashtahuan facilmi canga. Shinaca Jehová cushca instrucciongunata cazunajushcata ricuchingapaca pai churashca jaricunapa instrucciongunatami cazuna capanchi (Is. 32:1; 2, TNM-S; Heb. 13:17). Jehovapa instrucciongunaca paimanda ama caruyachun y paraíso alpagupi para siempre causai ushachunmi ayudan. Chaimandami pai cushca instrucciongunapica tucui shungu confiaita ushapanchi.