1. Соске ваљани аменге е Јеховаскоро водство? Вакер пример.

 ЗАМИСЛИН туке кај нашавдиљан ки јекх шума. Котар хем те иране тут иси несави опасност — дива животне, опасна инсектија, отровна растенија, а о друмо нане рамно хем пхердо баренцар. Сигурно ка ове бут благодарно ако узи туте иси јекх искусно водачи кова со џанела адала опасностија хем џанела сар те избегинел лен. Акава свето тано сар адаја шума. Ки лесте иси бут опасностија кола со шај те руминен амаро духовно састипе. Ама амен иси амен совршено водачи — о Јехова. Ов поможинела амен те избегина о опасностија хем те реса џи ки амари цел — о вечно живото ко нево свето.

2. Сар водинела амен о Јехова?

² Сар водинела амен о Јехова? Прво преку пло лафи и Библија. Исто аѓаар, ов користинела манушен. На пример, ов користинела е „верно хем мудро робо“ те шај те дел амен духовно храна која со поможинела амен те ана мудра одлуке (Мат. 24:45). Исто аѓаар, о Јехова користинела јавере да пхрален те шај те дел амен водство. На пример, о покраинска надгледникија хем о старешине таро собрание охрабринена амен хем дена амен упатствија кола со шај те поможинен амен те издржина ко акала пхаре времија. Амен сием бут благодарна е Јеховаске со дела амен добором шукар водство ко акала пхаре времија англедер те авел о крајо. Адава поможинела аменге те ачхова паше е Јеховаја хем те ачхова ко друмо е животоскоро.

3. Со ка дикха ки акаја статија?

³ Сепак, понекогаш шај те овел аменге пхаро те џа пало е Јеховаскоро водство, посебно кеда користинела несовршена манушен те водинен амен. Соске? Шај нане те свиџинел пе аменге адава со ка вакерен аменге. Или шај те мислина кај о упатствија со добинаја лен нане логична хем шај те ава  ко заклучок кај на авена таро Јехова. Ко асавке ситуацие, бут тано важно те овел амен доверба кај о Јехова тано адава со водинела пле народо хем ако џаја пало е Јеховаскоро водство адава ка овел башо амаро шукарипе. Те шај те бајрара амари доверба, ки акаја статија ка дикха 1) сар о Јехова водинѓа пле народо ко библиско време, 2) сар водинела амен авдиве хем 3) сар користинела аменге адава со џаја пало лескоро водство.

САР О ЈЕХОВА ВОДИНЃА Е ИЗРАЕЛЦОН

4-5. Сар сикавѓа о Јехова кај користинела е Мојсее те шај те водинел е Израелцон? (Дикх и слика тари насловно страна.)

⁴ О Јехова биринѓа е Мојсее те икалел е Израелцон таро Египет. Освен адава, сине лен јасно доказ кај о Јехова водинела лен преку о Мојсеј. На пример, мукхља стубо таро облако дивеске хем стубо тари јаг раќате (2. Мој. 13:21). О Мојсеј џала сине пало адава стубо хем аѓаар ов хем о Израелција ресле џи ко Црвено море. Кеда аракхлиле машкар о море хем и египетско војска со џала сине пали ленде, е Израелцон астарѓа лен паника. Ола мислинѓе кај о Мојсеј грешинѓа со анѓа лен џи ко Црвено море. Ама адава на сине грешка. О Јехова намерно преку о Мојсеј анѓа пле народо адатхе (2. Мој. 14:2). Пало адава о Јехова спасинѓа пле народо ко јекх посебно начин (2. Мој. 14:26-28).

⁵ Ко адала 40 берш џикоте сине ки пустина, е Мојсее сине ле доверба кај о Јехова користинела о стубо таро облако те шај те водинел пле народо. a Несаво време о Јехова чхивѓа о стубо упро шатори е Мојсеескоро коте со шај сине о Израелција те дикхен ле (2. Мој. 33:7, 9, 10). О Јехова керела сине лафи е Мојсееа таро стубо, а пало адава о Мојсеј вакерела сине е народоске о упатствија со добинела лен сине таро Јехова (Пс. 99:7). Е Израелцон сине лен јасно доказ кај о Јехова водинела лен преку о Мојсеј.

6. Сар реагиринѓе о Израелција ко водство е Јеховаскоро? (4. Мојсеева 14:2, 10, 11).

⁶ Жално тано адава со повише Израелција отфрлинѓе о јасно доказ кај о Јехова користинела е Мојсее сар пло претставнико. (Читин 4. Мојсеева 14:2, 10, 11.) Ола цело време одбинена сине те прифатинен и улога е Мојсеескири. Адалеске, о Јехова на мукхља е Израелцон те кхувен ки Ветими пхув.

7. Вакер примерија башо несаве со геле пало е Јеховаскоро водство? (4. Мојсеева 14:24; дикх хем и слика.)

⁷ Сепак, несаве Израелција џана сине пало водство е Јеховаскоро. На пример, о Јехова вакерѓа: „О Халев... шунѓа ман ко са“. (Читин 4. Мојсеева 14:24.) О Девел благословинѓа е Халеве, па чак мукхља ле те биринел кај ка живинел ки Ветими пхув (Ис. Нав. 14:12-14). Окола да Израелција коленге со сине дозволимо те кхувен ки Ветими пхув, денѓе шукар пример адалеа со геле пало е Јеховаскоро водство. Кеда о Исус Навин сине биримо сар водачи е Израелцонгоро ко е Мојсеескоро тхан, ола хор поштујнѓе ле џи ко крајо таро пумаро живото (Ис. Нав. 4:14). Адалеске о Јехова благословинѓа лен хем денѓа лен и пхув со ветинѓа ленге (Ис. Нав. 21:43, 44).

8. Објаснин сар о Јехова водинѓа пле народо ко време е царенгоро. (Дикх хем и слика.)

⁸ Бершенцар пало адава, о Јехова чхивѓа судие те шај те водинен лескере народо. Покасно, кеда владинѓе царија, о Јехова чхивѓа пророкија те водинен лескере народо. О верна царија шунена сине о советија е пророконгере. На пример, о цари о Давид  понизно прифатинѓа о укор таро пророко о Натан (2. Сам. 12:7, 13; 1. Лет. 17:3, 4). Е царе е Јосафате сине ле доверба ко водство е пророкоскоро о Јазиел хем охрабринѓа е Јудејцон е лафенцар: „Верујнен ко [е Девлескере] пророкија“ (2. Лет. 20:14, 15, 20). Кеда сине ки пхари ситуација о цари о Езекија родинѓа помош таро пророко о Исаија (Иса. 37:1-6). Секогаш кеда о царија џана сине пало водство е Јеховаскоро, ов благословинела лен сине а о народо сине заштитимо (2. Лет. 20:29, 30; 32:22). Сариненге ваљани сине те овел јасно кај о Јехова користинела е пророкон те шај те водинел пле народо. Ама повише царија хем побаро дело таро народо отфрлинѓе е Јеховаскере пророкон (Ерем. 35:12-15).

САР О ЈЕХОВА ВОДИНЃА Е ПРВА ХРИСТИЈАНЕН

9. Кас користинѓа о Јехова те шај те водинел е христијанен ко прво веко? (Дикх хем и слика.)

⁹ Ко прво веко тари а.е., о Јехова керѓа о христијанско собрание. Сар водинѓа е христијанен ко адава време? Ов чхивѓа е Исусе сар поглавари ко собрание (Еф. 5:23). Ама, о Исус на вакерѓа лично секоле ученикоске со те керел. Ов користинѓа е апостолен хем е старешинен ко Ерусалим те шај те предводинен (Апо. 15:1, 2). Исто аѓаар, сине чхивде хем старешине те водинен о собранија (1. Сол. 5:12; Тит 1:5).

10. а) Сар реагиринѓе о прва христијања таро прво веко ко водство со добинѓе ле? (Апостолија 15:30, 31). б) Соске несаве таро пурано време на прифатинѓе околен кас со о Јехова користинѓа те водинел лен? (Дикх и рамка „ Соске несаве отфрлинѓе о јасна доказија“.)

¹⁰ Сар реагиринѓе о прва христијања ко водство со добинѓе ле? Побаро дело лендар спремно применинѓе о упатствија со добинѓе лен. Уствари, ола радујнѓе пе со шај сине те овен охрабриме. (Читин Апостолија 15:30, 31.) Ама, сар о Јехова водинела пле народо ко амаро време?

САР О ЈЕХОВА ВОДИНЕЛА АМЕН АВДИВЕ

11. Вакер пример кова со сикавела сар о Јехова водинѓа е Истражувачен е Библијакере?

¹¹ О Јехова понадари да водинела пле народо авдиве. Ов керела адава преку пло Лафи хем преку пло Чхаво кова сој тано поглавари ко собрание. Шај ли те дикха о доказија кај о Јехова авдиве да користинела манушен те шај те водинел амен? Оја. На  пример, размислин башо адава со случинѓа пе ко крајо таро 19-то веко. О Чарлс Расел хем лескере соработникија почминѓе те хаљовен кај о 1914 берш, ка овел важно берш башо е Девлескоро Царство (Дан. 4:25, 26). Ола халиле акава аѓаар со истражинѓе о библиска пророштвија. Дали о Јехова водинѓа лен џикоте истражинѓе и Библија? Сигурно. О буќа со случинѓе пе ко свето ко 1914 берш, сине доказ кај е Девлескоро Царство почминѓа те владинел. Почминѓа и Прво светско војна, сине заразна насвалипа, земјотресија хем бокхалипе (Лука 21:10, 11). О Јехова чаче користинѓа акале искрено Истражувачен е Библијакере те шај те поможинел пле народо.

12-13. Со керѓе о одговорна пхраља ки Дујто светско војна те шај те проповединел пе ки побари мера?

¹² Размислин хем башо адава со случинѓа пе ки Дујто светско војна. Откеда проучинѓе о Откровение 17:8, о одговорна пхраља таро главно седиште халиле кај и војна нане те ингарел џи ко Армагедон, него кај пало адава ка овел релативно мир колесте со е Јеховаскере сведокија ка шај те проповединен панда ки побари мера. Адалеске, иако на изглединела сине логично ко адава време, е Јеховаскири организација почминѓа те икерел и Библиско школа Гилеад те шај те овен обучиме мисионерија кола со ка проповединен хем ка сикавен ко цело свето. Сине бичхалде мисионерија чак џикоте трајнела сине и војна. Освен адава, о верно робо организиринѓа курси баши Теократско служба b те шај те поможинел са е објавителенге ко собрание пошукар те проповединен хем те сикавен. Са акава поможинѓа е Девлескере народо те овел спремно баши проповедничко активност со ваљани сине те керел пе.

¹³ Авдиве шај јасно те дикха кај о Јехова водинѓа пле народо ко адава пхаро периоди. Тари Дујто светско војна са џи акана, е Јеховаскере слуге слободно проповединена ко бут пхувја. Уствари, адалеске шај сине те дознајнен башо Јехова бут мануша.

14. Соске шај те овел амен доверба ко водство со добинаја ле тари е Јеховаскири организација хем таро старешине? (Откровение 2:1; дикх хем и слика.)

 ¹⁴ Авдиве, о членија таро Водечко тело понадари да родена водство таро Христос. Ола мангена о упатствија со дена е пхраленге хем е пхењенге те овен ко склад адалеа сар о Јехова хем о Исус дикхена ко буќа. Ола исто аѓаар дена водство е собраниенге преку о покраинска надгледникија хем о старешине. c О старешине сој помазаникија, а ки побари смисла хем са о јавера старешине, тане ко е Христосескоро „десно вас“. (Читин Откровение 2:1.) Нормално, са о старешине тане несовршена хем керена грешке. О Мојсеј хем о Исус Навин понекогаш керѓе грешке, а исто хем о апостолија да (4. Мој. 20:12; Ис. Нав. 9:14, 15; Рим. 3:23). Сепак, о Христос шукар водинела е пхрален таро верно робо хем е старешинен хем понадари да ка керел адава „ко са о диве џи ко крајо акале светоскоро“ (Мат. 28:20). Адалеске, иси амен шукар причине те овел амен доверба ко водство со о Исус дела амен преку адала сој чхивде те предводинен.

КЕДА ЏАЈА ПАЛО Е ЈЕХОВАСКОРО ВОДСТВО АДАВА ТАНО АМАРЕ ШУКАРИПАСКЕ

15-16. Со сикљовеа таро искуствија околенгере со геле пало водство е Јеховаскоро?

¹⁵ Адава со џаја пало е Јеховаскоро водство, анела аменге благословија панда авдиве. На пример, о Анди хем и Роуз d прифатинѓе о поттик те поедноставинен пумаро живото (Мат. 6:22). Адалеске шај сине те поможинен ко градибе теократска објектија. И Роуз вакерела: „Понекогаш сине амен бут тикно тхан живибаске, коте со чак на сине кујна. Исто аѓаар, мора сине те бикинав баро дело тари опрема со користинава ла сине сликибаске — хоби кова со бут мангава ле сине. Рунѓум башо адава. Ама о пример е Саракоро, и ромни е Авраамескири, поможинѓа манге те овав одлучно те дикхав англал, а на палал“ (Евр. 11:15). Саве благословија сине акале брачно паре адалеске со анѓе асавке одлуке? И Роуз вакерела: „Бут керела амен радосно адава со џанаја кај даја е Јеховаске са со иси амен. Џикоте кераја о задаче со добинаја лен тари е Девлескири организација, иси амен јекх тикни претстава саво ка овел о живото ко нево свето“. О Анди сложинела пе лаја хем вакерела: „Бут сием среќна адалеске со амаро време хем сила целосно користинаја башо е Девлескоро Царство“.

 ¹⁶ Ко саво јавер начин користинела аменге адава со џаја пало е Јеховаскоро водство? Откеда завршинѓа средно школа, и Марсија спремно прифатинѓа о поттик те почминел е полновремено службаја (Мат. 6:33; Рим. 12:11). Ој вакерела: „Нудинѓе манге штар берш стипендија башо факултети. Ама ме мангљум те керав повише башо Јехова. Адалеске, наместо те прифатинав и понуда, биринѓум те сикљовав занати кова со ка поможинел манге те овав пионери. Адаја сине јекх таро мле најшукар одлуке со анѓум. Акана сиум радосно со служинава сар општо пионери, а адалеске со иси ман флексибилно работно време шај те поможинав ко Бетел хем те керав панда бут јавера буќа башо Јехова“.

17. Кола јавера благословија иси амен кеда џаја пало е Јеховаскоро водство? (Исаија 48:17, 18).

¹⁷ Понекогаш тари амари организација добинаја советија кола со заштитинена амен. На пример, добинаја советија башо материјализам хем башо јавера буќа кола со шај те чхивен амен те пхага е Јеховаскере законија. Ако џаја пало водство е Јеховаскоро ко акала да буќа, адава ка овел башо амаро шукарипе. Ка овел амен чисто совест хем ка избегина бут проблемија (1. Тим. 6:9, 10). Адава ка поможинел амен те служина е Јеховаске цело вилеа, нане ништо јавер со шај те анел аменге побари радост, мир хем задоволство. (Читин Исаија 48:17, 18.)

18. Соске сиан одлучно понадари да те џа пало е Јеховаскоро водство?

¹⁸ Шај те ова сигурна кај о Јехова понадари да ка користинел манушен те шај те водинел амен ки бари неволја хем џикоте трајнена о милја берша коте со ка владинел о Исус (Пс. 45:16). Дали понадари да ка џа пало адава водство чак ако несаве буќа нане туке логична? Адава бут ка зависинел таро адава сар авдиве реагиринаја ко водство со дела амен о Јехова. Адалеске секогаш те џа пало е Јеховаскоро водство, коте сој вклучимо о водство таро мануша колен со о Јехова чхивѓа лен те грижинен пе аменге (Иса. 32:1, 2; Евр. 13:17). Џикоте кераја адава, те овел амен целосно доверба ко амаро водачи о Јехова, кова со поможинела амен те избегина са адава со шај те руминел амаро амалипе леа хем кова со ингарела амен ки амари цел — о вечно живото ко нево свето.