1. Σικαβέν εκχέ παραδειγμάσαρ σόσκε πρέπει τι ακολουθίνας ι Ιεχωβάς σαρ αμαρό Οδηγός.

 ΑΝΕΝ τουμαρέ γκοντιάτε ότι χασάρντιλεν σε εκ δάσος. Ισινέν σε κίνδυνος επειδή οτθέ υπαρχίντιβενα άγρια ζώα, έντομα σο μπορεί τι πφερέν-τουμέν εκ νασφαλιπέ, φυτά σο τθερένα δηλητήριος ντα μπαρέ μπαρά. Σίγουρα κα αβένας μπουτ ήρεμοι άμα κα τθερένας τουμέντζαρ εκχέ τζενές σο τζανέλα ο επικίνδυνα τθανά οντουλέ δασόστε ντα κα οδηγίνελας-τουμέν ντουρ οντουλέ τθανένταρ! Ανταβά ντουνιάς ισί σαρ οντουβά δάσος. Ισί πφερντό κινδύνους σο κα μπορίνενας τι κερέν ζιάνι κι φιλία σο τθεράσα ι Ιεχωβάσαρ. Αλλά τθεράσα Εκχές σο οδηγίνελα-αμέν τέλεια, ι Ιεχωβάς. Βοβ οδηγίνελα-αμέν ντουρ κατά κίνδυνοι ντα γκερέλα-αμέν κο νεβό ντουνιάς, σο οτθέ κα τθεράς αιώνια ζωή.

2. Σαρ οδηγίνελα-αμέν ο Ιεχωβά;

² Σαρ οδηγίνελα-αμέν ο Ιεχωβά; Πο μπουτ κερέλα-λες ανταβά αντράλ πι Λαφίσταρ, κατά Αγία Γραφή. Όμως, χρησιμοποιήνελα τζενέν-ντα. Για παράδειγμας, χρησιμοποιήνελα “ι πιστέ ντα γκοντιαβέρ δουλός” για τι ντελ πνευματικός χαμπέ, σο βοηθίνελα-αμέν τι λας γκοντιαβέρ αποφάσεις. (Ματθ. 24:45) Ο Ιεχωβά χρησιμοποιήνελα γιαβερέ-ντα μουρσέν σο τθερένα ικανότητες για τι οδηγίνεν-αμέν. Για παράδειγμας, ο επίσκοποι περιοχής ντα ο πρεσβύτεροι ντένα ζορ ντα σικλιαριπέ σο μπορίνενα τι βοηθίνεν-αμέν τι ντας-λεν πέρα δύσκολε βακιτίντε. Ισινάμ πφερντέ εκτίμηση ι Ιεχωβάσκε σο οδηγίνελα-αμέν αζόμ λατσσές ανταλέ δύσκολε ντιβεσέντε πριν τι αβέλ ο τέλος! Ανταλά οδηγίες βοηθίνενα-αμέν τι συνεχίνας τι τθεράς ι ευλογία ι Ιεχωβάσκι ντα τι ατσσάς κο ντρομ σο οδηγίνελα κι ζωή.

3. Σο κα ντικχάς ανταλέ μαθημάστε;

³ Όμως, μερικές φορές, μπέκιμ τι αβέλ αμένγκε δύσκολος τι ακολουθίνας ο οδηγίες ι Ιεχωβάσκε, ειδικά κάνα βακερένα-λεν ατελείς τζενέ. Σόσκε; Η συμβουλή μπέκιμ τι τζάλα κόντρα οντουλέντζαρ σο μπεϊντίνασα αμέν ή οντουλέντζαρ σο να μπεϊντίνασα. Ή μπέκιμ νιωθίνασα ότι ο οδηγίες σο λάσα νανέ γκοντιαβέρ ντα  αντικάς νικαβάσα ο συμπέρασμας ότι η συμβουλή νανέ κατά Ιεχωβά. Ασακέ περιπτωσιέντε, πρέπει τι αβάς σίγουροι ότι ο Ιεχωβά ισί οντουβά σο οδηγίνελα πι λαός ντα ότι, άμα ακολουθίνασα λέσκε οδηγίες, ευλογίντιβασα. Για τι βοηθίνελ-αμέν τι μπαριαράς αμαρί σιγουριά, ανταβά μάθημας κα εξηγίνελ (1) σαρ οδηγίνελας ο Ιεχωβά πι λαός κο πουρανέ μπρεσά, (2) σαρ οδηγίνελα-αμέν αντιβές ντα (3) σαρ βοηθίντιβασα άμα ακολουθίνασα συνέχεια λέσκε οδηγίες.

ΣΑΡ ΟΔΗΓΙΝΕΛΑΣ Ο ΙΕΧΩΒΑ Ο ΤΘΕΜ ΙΣΡΑΗΛ

4, 5. Σαρ σικαντάς ο Ιεχωβά ότι χρησιμοποιήνελας ι Μωυσής για τι οδηγίνελ ι Ισραηλιτέν; (Ντικχέν ι φωτογραφία κι ανγκλαϊνί σελίδα)

⁴ Ο Ιεχωβά διοριντάς ι Μωυσής τι νικαβέλ ι Ισραηλιτέν κατά Αίγυπτος. Ντινάς κο Ισραηλίτες ξεκάθαρες αποδείξεις ότι οδηγίνελας-λεν αντράλ κατά Μωυσής. Για παράδειγμας, τσσουντάς λένγκε εκ σύννεφος ντισάρα ντα ο φως εκχέ γιακάκο αρατί. (Έξοδ. 13:21) Ο Μωυσής ακολουθιντάς ο σύννεφος ντα ι γιακ, σο οδηγίνελας λες ντα ι Ισραηλιτέν κι Ερυθρά Θάλασσα. Ο Ισραηλίτες νταρασάλε μπουτ κάνα αμντισάλε ότι ναστί τζάνας πουθενά επειδή ανγκλά-πουμέντε τθερένας ι ντεριάβ ντα παλά-πουμέντε ο στρατός ι Αιγυπτιόνγκο. Νικαντέ ο συμπέρασμας ότι ο Μωυσής κερντάας λάθος κάνα αντάς-λεν κι Ερυθρά Θάλασσα. Αλλά να ισινέ λάθος. Ο Ιεχωβά οδηγιντάς επίτηδες οτθέ πι λαός αντράλ κατά Μωυσής. (Έξοδ. 14:2) Σοράν, ελευθερωντάς-λεν ι πο εντυπωσιακέ τροπόσαρ.​—Έξοδ. 14:26-28.

⁵ Για 40 μπρεσά σοράν ανταλέ πραγμάσταρ, ο Μωυσής συνεχίνελας τι βασίντιβελ κο σύννεφος για τι οδηγίνελ ι Ντεβλέσκε λαός αντρέ κι έρημος. a Για κάποιο βακίτι, ο Ιεχωβά τσσουντάς ο σύννεφος οπράλ κατά τσαντίρι ι Μωυσίσκο, σο σαρέ ο Ισραηλίτες μπορίνενας τι ντικχέν-λες. (Έξοδ. 33:7, 9, 10) Κατά σύννεφος, ο Ιεχωβά κερέλας λάφι κο Μωυσής, ντα σοράν ο Μωυσής βακερέλας κο λαός ο οδηγίες ι Ντεβλέσκε. (Ψαλμ. 99:7) Ο Ισραηλίτες τθερένας αζόμ μπουτ αποδείξεις σο σικαβένας ότι ο Ιεχωβά χρησιμοποιήνελας ι Μωυσής για τι οδηγίνελ-λεν.

6. Καγιά ισινέ η αντίδραση ι Ισραηλιτένγκι κο οδηγίες κι Ιεχωβάσκε; (Αριθμοί 14:2, 10, 11)

⁶ Δυστυχώς, ο πο μπουτ Ισραηλίτες να ντινέ ιτς σημασία κο ξεκάθαρες αποδείξεις ότι ο Ιεχωβά χρησιμοποιήνελας ι Μωυσής για τι κερέλ λάφι Πι λαόστε. (Διαβάνεν Αριθμοί 14:2, 10, 11) Μπουτ φαρ, να μανγκλέ τι αγαβέν καβά ισινέ ο διορισμός ι Μωυσίσκο. Οτθάρ, ο Ιεχωβά να μουκχλάς οντιά γενιά ι Ισραηλιτένγκι τι τσσουβέλ-πες κο Υποσχεμέ Τθεμ.​—Αριθ. 14:30.

7. Βακερέν παραδείγματα τζενένγκε σο ακολουθιντέ ο οδηγίες ι Ιεχωβάσκε. (Αριθμοί 14:24) (Ντικχέν ι φωτογραφία-ντα)

⁷ Όμως, κάποιοι Ισραηλίτες ακολουθιντέ ο οδηγίες ι Ιεχωβάσκε. Για παράδειγμας, ο Ιεχωβά βακερντάς: «Ο Χάλεβ . . . αβέλας παλά-μάντε σαρέ πι γκίσαρ». (Διαβάνεν Αριθμοί 14:24) Ο Ντεβέλ ευλογιντάς τον Χάλεβ, ντα μάλιστα μουκχλάς-λες τι τραμπίνελ κατέ μανγκέλας τι μπεσέλ κο Υποσχεμέ Τθεμ. (Ιησ. Ναυή 14:12-14) Επίσης, ο τσσαβέ ι Ισραηλιτένγκε, σο ισινέ η γιαβέρ γενιά, μουκχλέ λατσσό παράδειγμας επειδή ακολουθιντέ ο οδηγίες ι Ιεχωβάσκε. Κάνα ο Ιησούς του Ναυή γκιλό κι θέση κι Μωυσίσκι σαρ διορισμέ αρχηγός ι Ισραηλιτένγκο, «σαρέ ο ντιβεσά λέσκε ζωγιάκε βον σεβάνενας-λες μπουτ». (Ιησ. Ναυή 4:14) Οτθάρ, ο Ιεχωβά ευλογιντάς-λεν ντα ντινάς-λεν ο Υποσχεμέ Τθεμ αντικάς σαρ βακερντάας ότι κα κερέλ.​—Ιησ. Ναυή 21:43, 44.

8. Εξηγίνεν σαρ οδηγίνελας ο Ιεχωβά πι λαός κο μπρεσά σο υπαρχίντιβενας βασιλιάδες. (Ντικχέν ι φωτογραφία-ντα)

⁸ Μπουτ μπρεσά πο σοράν, ο Ιεχωβά τσσουντάς κριτέν για τι οδηγίνεν λέσκε λαός. Σοράν, κο μπρεσά σο υπαρχίντιβενας βασιλιάδες,  ο Ιεχωβά διορίνελας προφητέν για τι οδηγίνεν λέσκε λαός. Ο πιστοί βασιλιάδες ντένας προσοχή κο συμβουλές κι προφητένγκε. Για παράδειγμας, ο βασιλιάς Δαβίδ δεχτιντάς ταπεινά διόρθωση κατά προφήτης Νάθαν. (2 Σαμ. 12:7, 13· 1 Χρον. 17:3, 4) Ο βασιλιάς Ιωσαφάτ ακολουθιντάς ο οδηγίες σο ντινάς-λες ο προφήτης Ιααζιήλ ντα βακερντάς κο Ιουδαίοι τι “σικαβέν πίστη κο προφήτες [κι Ντεβλέσκε]”. (2 Χρον. 20:14, 15, 20) Κάνα ο βασιλιάς Εζεκίας νακχλάς εκ μπουτ μπαρί δυσκολία, μανγκλάς κατά προφήτης Ησαΐας βοήθεια. (Ησ. 37:1-6) Κάθε φαρ σο ο βασιλιάδες ακολουθίνενας ο οδηγίες ι Ιεχωβάσκε, βοβ ευλογίνελας-λεν ντα αρακχαβέλας πι λαός. (2 Χρον. 20:29, 30· 32:22) Έπρεπε τι αβέλ ξεκάθαρος σαριλέντε ότι ο Ιεχωβά χρησιμοποιήνελας πι προφητέν για τι οδηγίνελ πι λαός. Όμως, ο πο μπουτ βασιλιάδες ντα ο πο μπουτ Ισραηλίτες να ασουνένας ι Ιεχωβάσκε προφητέν.​—Ιερ. 35:12-15.

ΣΑΡ ΟΔΗΓΙΝΕΛΑΣ Ο ΙΕΧΩΒΑ Ι ΠΡΩΤΕ ΧΡΙΣΤΙΑΝΟΝ

9. Κας χρησιμοποιήνελας ο Ιεχωβά για τι οδηγίνελ ι Χριστιανόν κο πρώτος αιώνας; (Ντικχέν ι φωτογραφία-ντα)

⁹ Κο πρώτος αιώνας Κ.Χ., ο Ιεχωβά κερντάς ι Χριστιανική κχανγκιρί. Σαρ οδηγίνελας ο Ιεχωβά οντουλέ πρώτε Χριστιανόν; Διοριντάς ι Ιησούς τι αβέλ ο σορό ι κχανγκιριάκο. (Εφεσ. 5:23) Αλλά ο Ιησούς να οδηγίνελας ξεχωριστά ι κάθε μαθητής. Χρησιμοποιήνελας ι αποστολόν ντα ι πρεσβυτερόν κι Ιερουσαλήμ για τι κερέν κουμάντος κι Χριστιανική κχανγκιρί. (Πράξ. 15:1, 2) Επίσης, διοριντάς πρεσβυτερόν για τι οδηγίνεν ο κχανγκιριά.​—1 Θεσ. 5:12· Τίτο 1:5.

10. (α) Καγιά ισινέ η αντίδραση ι πο μπουτ Χριστιανόνγκι κο οδηγίες σο λιντέ; (Πράξεις 15:30, 31) (β) Σόσκε μερικοί να δεχτιντέ οντουλέν σο ο Ιεχωβά τσσουντάς για τι οδηγίνελ-λεν; (Ντικχέν ο πλαίσιος « Σόσκε Κάποιοι να Ντικχλέ ο Ξεκάθαρες Αποδείξεις»)

¹⁰ Καγιά ισινέ η αντίδραση ι Χριστιανόνγκι κο πρώτος αιώνας; Ο πο μπουτ ακολουθιντέ χαράσαρ ο οδηγίες σο λιντέ. Μάλιστα, «χαιρισάλε κατά ενθάρρυνση» σο ντιντιλί-λεν. (Διαβάνεν Πράξεις 15:30, 31) Όμως, σαρ οδηγίνελα ο Ιεχωβά πι λαός αμαρέ ντιβεσέντε;

ΣΑΡ ΟΔΗΓΙΝΕΛΑ Ο ΙΕΧΩΒΑ ΑΜΕΝ ΑΝΤΙΒΕΣ

11. Σικαβέν εκχέ παραδειγμάσαρ σαρ οδηγίνελα αμαρέ ντιβεσέντε ο Ιεχωβά οντουλέν σο κερένα κουμάντος κι κχανγκιρί.

¹¹ Ο Ιεχωβά συνεχίνελα τι οδηγίνελ πι λαός αντιβές. Κερέλα-λες ανταβά αντράλ πι Λαφίσταρ  ντα αντράλ πι Τσσαβέσταρ, σο ισί ο σορό ι κχανγκιριάκο. Ντικχάσα αποδείξεις ότι ο Ντεβέλ συνεχίνελα τι χρησιμοποιήνελ τζενέν-ντα αμαρέ ντιβεσέντε; Βα. Σκεφτίνεν, για παράδειγμας, μερικά πράγματα σο αβιλέ-πες σοράν κατά 1870. Ο Κάρολος Τέηζ Ρώσσελ ντα λέσκε συνεργάτες αρχισάλε τι αγαβέν ότι ο μπρες 1914 κα αβέλας μπουτ σημαντικός για τη Βασιλεία ι Ντεβλέσκι. (Δαν. 4:25, 26) Ερεσλέ κο συμπέρασμας ανταβά κατά προφητείες ι Γραφιάκε. Οδηγίνελας ο Ιεχωβά ι έρευνα σο κερένας κι Γραφή; Σίγουρα. Κο 1914, ο πράγματα σο αβένας-πες σαρό κο ντουνιάς σικαντέ ότι η Βασιλεία ι Ντεβλέσκι αρχισάλιας τι κυβερνίνελ. Αρχισάλο ο Πρώτος Παγκόσμιος Πόλεμος, ντα κι συνέχεια αβιλέ-πες μπαρέ νασφαλίματα, σεισμοί ντα μποκχ. (Λουκ. 21:10, 11) Ο Ιεχωβά μπαγιά χρησιμοποιήνελας οντουλέ μουρσέν σο τθερένας λατσσό γκι για τι βοηθίνελ πι λαός.

12, 13. Σο κερντέ ο υπεύθυνα πφραλά κο Δεύτερος Παγκόσμιος Πόλεμος για τι κερντιόλ πο μπουτ έργος;

¹² Σκεφτίνεν επίσης σο αβιλό-πες κο Δεύτερος Παγκόσμιος Πόλεμος. Αφού κερντέ έρευνα οπράλ κο εδάφιος Αποκάλυψη 17:8, ο υπεύθυνα πφραλά κο παγκόσμια κεντρικά γραφεία αγαντέ ότι ο τζένγκι να κα οδηγίνελας κο Αρμαγεδδώνας, αλλά εκχέ βακιτίστε σο κα υπαρχίντιβελας ειρήνη. Ανταγιά ειρήνη κα ντέλας ι ευκαιρία τι κερντιόλ πο μπουτ έργος. Οτθάρ, η οργάνωση ι Ιεχωβάσκι κερντάς ι Σχολή Γαλαάδ της Σκοπιάς, για τι λεν εκπαίδευση ο ιεραπόστολοι τι βακερέν ντα τι σικλιαρέν ο λατσσέ αμπέρια τθεμέντε σαρί κι πφουβ, παρόλο σο ανταβά να ντικχίντιβελας λογικός οντουβά βακίτι. Ο ιεραπόστολοι μπουτσσάντιβενας τι κερέν έργος ατζέ-ντα καζόμ αβέλας-πες ο τζένγκι. Επίσης, ο πιστός δούλος κερντάς ι Σειρά Μαθημάτων εν τη Θεοκρατική Διακονία b για τι λεν σαρέ εκπαίδευση κι κχανγκιρί για τι αβέν πο λατσσέ κο έργος ντα κο σικλιαριπέ. Ανταλέ τροπόντζαρ, ο λαός ι Ντεβλέσκο ετοιμάνελας-πες για το έργος σο τθερέλας ανγκλά-πέστε.

¹³ Καζόμ ντικχάσα οντουλά σο αβιλέ-πες κο παρελθόν, αγαβάσα ξεκάθαρα ότι ο Ιεχωβά οδηγίνελας πι λαός οντουβά δύσκολος βακίτι. Κατά Δεύτερος Παγκόσμιος Πόλεμος ντα σοράν, ο λαός ι Ιεχωβάσκο κερέλα έργος ελεύθερα μπουτέ τθεμέντε. Μάλιστα, μπουτ τζενέ γνωριντέ ι Ιεχωβάς, ντα λέσκε υπηρέτες κερένα έργος σαρί κι πφουβ.

14. Σόσκε μπορίνασα τι ντας μπέσα κο οδηγίες σο αβένα κατά οργάνωση ι Ιεχωβάσκι ντα κατά πρεσβύτεροι; (Αποκάλυψη 2:1) (Ντικχέν ι φωτογραφία-ντα)

 ¹⁴ Αντιβές, ο πφραλά σο ισί κο Κυβερνών Σώμας συνεχίνενα τι στηρίντιβεν κο Χριστός για τι οδηγίνελ-λεν. Καζόμ ντένα οδηγίες κο πφραλά, μανγκένα ανταλά οδηγίες τι συμφωνίνεν ι τροπόσαρ σο ντικχέλα ο Ιεχωβά ντα ο Ιησούς ο πράγματα. Ντα ο Κυβερνών Σώμας χρησιμοποιήνελα ι επισκοπόν ντα ι πρεσβυτερόν για τι ντελ οδηγίες κο κχανγκιριά. c Ο χρισμέ πρεσβύτεροι, ντα σαρέ ο γιαβερά πρεσβύτεροι κο κχανγκιριά, ισί κο “δεξίς βας” κι Χριστόσκο. (Διαβάνεν Αποκάλυψη 2:1) Ισί μπαγιά όμως ότι ανταλά πρεσβύτεροι ισί ατελείς ντα κερένα λάθη. Ο Μωυσής ντα ο Ιησούς του Ναυή κερντέ λάθη μερικές φορές, σαρ ο απόστολοι-ντα. (Αριθ. 20:12· Ιησ. Ναυή 9:14, 15· Ρωμ. 3:23) Αλλά ο Χριστός οδηγίνελα προσεκτικά ι πιστέ ντα γκοντιαβέρ δουλός ντα ι πρεσβυτερόν, ντα κα συνεχίνελ τι κερέλ-λες ανταβά «σαρέ ο ντιβεσά μέχρι κο τέλος ανταλέ ντουνιάσκο». (Ματθ. 28:20) Άρα, τθεράσα μπουτ λόγους τι ντας μπέσα κο οδηγίες σο ντέλα-αμέν αντράλ οντουλένταρ σο ισί διορισμέ τι οδηγίνεν-αμέν.

ΒΟΗΘΙΝΤΙΒΑΣΑ ΑΜΑ ΑΚΟΛΟΥΘΙΝΑΣΑ ΣΥΝΕΧΕΙΑ Ο ΟΔΗΓΙΕΣ Ι ΙΕΧΩΒΑΣΚΕ

15, 16. Σο σικλιόνα οντουλένταρ σο ακολουθιντέ ο οδηγίες ι Ιεχωβάσκε;

¹⁵ Άμα ακολουθίνασα συνέχεια ο οδηγίες ι Ιεχωβάσκε, ευλογίντιβασα ατζέ-ντα ακανά. Για παράδειγμας, ο Άντι ντα η Ρόμπιν ντινέ προσοχή κι συμβουλή κατά πιστός δούλος τι ατσσικιαρέν πουμαρί ζωή απλή. Αντικάς, μπορισάλε τι βοηθίνεν τι κερντιόν Αίθουσες Βασιλείας ντα γιαβερά κτίρια ι Ιεχωβάσκε Μαρτυρένγκε. Η Ρόμπιν βακερέλα: «Μπάζιμα τζουβντιάας μπουτ χουρντέ τθανέντε σο να τθερένας ούτε κουζίνα. Επίσης, υπαρχίντιβελα εκ χόμπι σο μπεϊντίναβα-λες μπουτ, ι φωτογραφία. Αλλά χρειαζίντιλο τι μπικινάβ μπουτ κατά πράγματα σο χρησιμοποιήναβας για τι νικαβάβ φωτογραφίες. Ανταβά κερντάς-μαν τι ροβάβ. Αλλά σαρ η ρομνί του Αβραάμ, η Σάρρα, ισινόμας αποφασισμέ τι ντικχάβ ανγκλάλ, όχι παλάλ». (Εβρ. 11:15) Σαρ βοηθίντιλε ο Άντι ντα η Ρόμπιν; Η Ρόμπιν βακερέλα: «Ισινάμ πφερντέ αντρ’ αμέντε σόσκε τζανάσα ότι ντάσα κο Ιεχωβά σαρέ οντουλά σο τθεράσα. Κάνα ασχολίντιβασα ι Ντεβλέσκε πραγματέντζαρ, λάσα εκ χουρντί γεύση σαρ κα αβέλ αμαρί ζωή κο νεβό ντουνιάς». Ο Άντι συμφωνίνελα, ντα βακερέλα: «Τθεράσα ο προνόμιος τι ντας σαρό αμαρό νεαυτός για το έργος ι Βασιλειάκο».

 ¹⁶ Σαρ γιαβέρσοϊ βοηθίντιβασα άμα ακολουθίνασα συνέχεια ο οδηγίες ι Ιεχωβάσκε; Αφού μπιτισκιαρντάς ο λύκειος, η Μαρσία λιντάς σοβαρά ι συμβουλή τι κερέλ σκαπανικός. (Ματθ. 6:33· Ρωμ. 12:11) Βόι βακερέλα: «Ντινέ-μαν ι ευκαιρία τι σπουδάναβ σταρ μπρες κο πανεπιστήμιος χωρίς τι ποκινάβ, αλλά με μανγκάβας τι κεράβ πο μπουτ πράγματα ι Ιεχωβάσκε. Οτθάρ, τραμπιντόμ τι τζαβ τι σικλιάβ εκ τέχνη για τι τθεράβ εκ επάγγελμας σο κα νικαβάβας ο απαραίτητα για τι κεράβ σκαπανικός. Ισινέ εκ κατά πο λατσσέ αποφάσεις σο λιντόμ ποτές. Ακανά απολαμβάναβα ο τακτικός σκαπανικός, ντα μι μπουτί μουκχέλα-μαν τι υπηρετίναβ σαρ εξωτερική βοηθός κο Μπέθελ ντα τι απολαμβάναβ γιαβερά-ντα ειδικά προνόμια».

17. Καλά γιαβερά ευλογίες τθεράσα άμα ακολουθίνασα συνέχεια ο οδηγίες ι Ιεχωβάσκε; (Ησαΐας 48:17, 18)

¹⁷ Μερικές φορές, η οργάνωση ντέλα-αμέν συμβουλές σο αρακχαβένα-αμέν. Για παράδειγμας, προειδοποιήνελα-αμέν μα τι τθεράς αγάπη ι λοβένγκε ντα μα τι κεράς πράγματα σο κα τσσίντενας-αμέν μα τι ντας καν κο νόμοι κι Ντεβλέσκε. Ανταλέ περιπτωσιάτε-ντα, ευλογίντιβασα κάνα ακολουθίνασα ο οδηγίες σο ντέλα-αμέν ο Ιεχωβά. Ατσσικιαράσα πάκι συνείδηση ντα γλιτώνασα μπουτ προβλήματα. (1 Τιμ. 6:9, 10) Αντικάς, μπορίνασα τι κεράς αντράλ αμαρέ γκίσταρ πο μπουτ πράγματα ι Ιεχωβάσκε. Να υπαρχίντιβελα καέκ πράγμας σο μπορίνελα τι ανέλ αμένγκε πο μπαρί χαρά ντα ειρήνη.​—Διαβάνεν Ησαΐας 48:17, 18.

18. Σόσκε ισινέν αποφασισμέ τι ακολουθίνεν συνέχεια ο οδηγίες ι Ιεχωβάσκε;

¹⁸ Σίγουρα, ο Ιεχωβά κα συνεχίνελ τι χρησιμοποιήνελ τζενέν για τι ντελ-αμέν οδηγίες εμ κι μπαρί στεναχώρια εμ κι Βασιλεία σο κα ατσσικιαρέλ χίλια μπρεσά. (Ψαλμ. 45:16) Κα συνεχίνας τι ακολουθίνας ανταλά οδηγίες ατζέ-ντα άμα πρέπει τι μουκχάς κι νάκρη ο πράγματα σο μπεϊντίνασα; Κα αβέλ πο εύκολος τι κεράς-λες ανταβά άμα ακολουθίνασα ι Ιεχωβάσκε οδηγίες ακανά. Άρα, τι ακολουθίνας πάντα ο οδηγίες ι Ιεχωβάσκε, σαρ ισί ο οδηγίες-ντα σο αβένα κατά μουρσά σο ισί διορισμέ τι αρακχαβέν-αμέν. (Ησ. 32:1, 2· Εβρ. 13:17) Καζόμ κεράσα-λες ανταβά, τθεράσα κάθε λόγος τι ντας μπέσα κο Ιεχωβά, σο οδηγίνελα-αμέν ντουρ κατά πνευματικοί κίνδυνοι ντα γκερέλα-αμέν κο νεβό ντουνιάς, σο οτθέ κα τθεράς αιώνια ζωή.