1. Mû mbeni tapande ti fa ndani so a yeke nzoni e sara ye alingbi na fango lege ti Jéhovah.

 IMAGINÉ so mo girisa na yâ ti gbako. Mo peut ti wara kpale ndali ti so anyama apeut ti te mo, akete kete nyama so ayeke mû kobela na zo apeut ti kpo mo, akugbe so poison ayeke dä apeut ti sara sioni na mo nga mo peut ti tï na yâ ti dû. Bê ti mo ayeke dë tongana mbeni zo so ahinga ndo ni nzoni, so ahinga nga ndo so kpale ayeke dä na so apeut ti gue na mo yongoro na ni la ayeke fa lege na mo. Dunia so ayeke tongana gbako so. A si singo na aye so apeut ti buba songo ti e na Jéhovah. Me Jéhovah so ayeke fa lege na e ayeke mbilimbili-kue. Lo yeke fa lege na e ti gue yongoro na akpale nga lo yeke gue na e ti wara fini ti lakue lakue na yâ ti fini dunia.

2. Jéhovah ayeke fa lege na e tongana nyen?

² Jéhovah ayeke fa lege na e tongana nyen? Kozo ni, na lege ti Mbeti ti lo Bible. Me lo yeke sara nga kua na azo so ayeke sara kua na iri ti lo. Na tapande, lo yeke sara kua na “ngbâa be-ta-zo so ayeke sara ye na ndara” ti mû na e akobe ti yingo so ayeke aidé e ti mû anzoni desizion (Mat. 24:45). Jéhovah ayeke sara nga kua na ambeni koli so alingbi ti fa lege na e. Na tapande, lo yeke sara kua na asurveillant ti circonscription nga na a-ancien ti mû wango na e nga ti fa na e aye so apeut ti aidé e ti gbu ngangu na yâ ti akpale. E kiri singila mingi na Jéhovah so ayeke fa lege na e tâ nzoni mingi na angoi ti ngangu ti lâ ti nda ni so. Ye so a-aidé e ti ngbâ akamarade ti Jéhovah tongaso si e ngbâ na ndö ti lege so ague na fini.

3. Nyen la e yeke bâ na yâ ti article so?

³ Atâa so kue, na ambeni ngoi, e peut ti bâ so a yeke ngangu na e ti sara ye alingbi na fango lege ti Jéhovah, mbilimbili tongana azo so ayeke mbilimbili-kue ape la afa na e ye ti sara. Ngbanga ti nyen? Ngbanga ti so ye so a fa na e apeut ti duti ye so e ye ape. Wala e peut ti bâ so ye so a fa na e ayeke na lege ti  ndara ape nga e peut ti tene so wango ni alondo na Jéhovah ape. Na angoi tongaso, e yeke tâ na bezoin ti duti na confiance so Jéhovah la ayeke fa lege na azo ti lo nga ti sara ye alingbi na fango lege ti lo ayeke ga lakue na e anzoni ye. Ti aidé e ti sara confiance mingi na Jéhovah, na yâ ti article so e yeke bâ (1) tongana nyen la Jéhovah afa lege na azo ti lo ândö, (2) tongana nyen la lo yeke fa lege na e laso nga (3) tongana nyen la e yeke bâ nzoni tongana e ngbâ ti sara ye alingbi na fango lege ti lo.

FASON SO JÉHOVAH AFA LEGE NA AZO TI ISRAËL ÂNDÖ

4-5. Tongana nyen la Jéhovah afa so lo sara kua lani na Moïse ti fa lege na azo ti Israël? (Bâ foto ti couverture ni.)

⁴ Jéhovah asoro lani Moïse ti fa lege na azo ti Israël ti sigi na Égypte. Lo sara nga si azo ti Israël abâ aye so afa so lo la lo yeke fa lege na ala na lege ti Moïse. Na tapande, na kota lâ lo yeke fa lani lege na ala na lege ti mbinda nga na bï na lege ti mbeni wâ (Ex. 13:21). Moïse amû lani peko ti mbinda ni asara si lo na azo ti Israël asi na Kota Ngu-Bengba. Li ti azo ni aga lani kirikiri na ngoi so ala bâ so Kota Ngu-Bengba ayeke na devant ti ala nga aturugu ti Égypte ayeke tomba peko ti ala. Ala tene lani so Moïse asara ye na lege ni ape la lo si na ala na Kota Ngu-Bengba. Me, Moïse asara ye lani na lege ni. Jéhovah aye lani ti tene Moïse ague na ala kâ (Ex. 14:2). Tongaso, Nzapa asö ala na mbeni lege so asara si li ti ala akpe kue.—Ex. 14:​26-28.

⁵ Ngu 40 na pekoni, Moïse angbâ lani ti duti na confiance so Jéhovah asara kua na mbinda ti fa lege na azo ti lo na yâ ti benyama. a Teti mbeni ngoi, Jéhovah asara si mbinda ni aluti na li ti tente ti Moïse, ndo so azo ti Israël kue apeut ti bâ ni (Ex. 33:​7, 9, 10). Jéhovah ayeke sara lani tënë na Moïse na yâ ti mbinda ni, na pekoni Moïse ayeke fa na azo ni aye so Jéhovah afa na lo (Ps. 99:7). Azo ti Israël abâ lani polele so Jéhovah ayeke sara kua na Moïse ti fa lege na ala.

6. Azo ti Israël asara ye lani tongana nyen na fango lege ti Jéhovah? (Nombre 14:​2, 10, 11).

⁶ Mawa ni ayeke so mingi ti azo ti Israël ake ti yeda na ye so afa polele so Moïse ayeke sara kua na iri ti Jéhovah. (Diko Nombre 14:​2, 10, 11.) Fani mingi, ala ke ti yeda so Jéhovah asara kua na Moïse ti fa lege na ala. Tongaso, Jéhovah ake na ala ti lï na Sese ti zendo.—Nom. 14:30.

7. Fa ambeni zo so asara ye alingbi na fango lege ti Jéhovah. (Nombre 14:24). (Bâ nga foto.)

⁷ Me ambeni zo ti Israël asara ye lani alingbi na fango lege ti Jéhovah. Na tapande, Jéhovah atene: ‘Caleb angbâ ti mû peko ti mbi na bê ti lo kue.’ (Diko Nombre 14:24.) Nzapa afuta lani Caleb, lo zia même lege na lo ti soro ndo so lo yeke sara kodro dä na Canaan (Jos. 14:​12-14). Azo ti Israël so Jéhovah amû lege na ala ti lï na Sese ti zendo azia nga lani nzoni tapande na lege so ala sara ye alingbi na fango lege ti lo. Na ngoi so Josué ayeke fa lani lege na azo ti Israël na peko ti Moïse, ala “ne lo mingi na lâ ti fini ti lo kue”. (Jos. 4:14). A sara si Jéhovah asara tufa na ndö ti ala nga lo mû na ala sese so lo mû lani zendo ni.—Jos. 21:​43, 44.

8. Fa tongana nyen la Jéhovah afa lege lani na azo ti lo na ngoi ti agbia. (Bâ nga foto.)

⁸ Ambeni ngu na pekoni, Jéhovah asoro ajuge ti fa lege na azo ti lo. Ambeni ngoi na pekoni, na ngoi ti agbia, Jéhovah asoro aprophète ti fa lege na azo ti lo. Agbia so ayeke be-ta-zo amä lani wango ti aprophète. Na  tapande, Gbia David asara terê ti lo kete lo yeda ti tene prophète Nathan akiri na lo na nzoni lege (2 Sam. 12:​7, 13; 1 Chron. 17:​3, 4). Gbia Josaphat amä lani wango ti prophète Jahaziel nga lo wa azo ti Juda ti “zia bê ti ala kue na aprophète ti [Nzapa]”. (2 Chron. 20:​14, 15, 20). Na ngoi so Gbia Ézéchias ayeke lani na yâ ti ye ti ngangu, lo tourné na mbage ti prophète Ésaïe (És. 37:​1-6). Na ngoi kue so agbia asara ye alingbi na fango lege ti Jéhovah, lo sara tufa na ndö ti ala nga lo bata azo ti kodro ni (2 Chron. 20:​29, 30; 32:22). A doit ti duti polele na lê ti azo kue so Jéhovah ayeke sara lani kua na aprophète ti fa lege na azo ti lo. Me mingi ti agbia nga na azo ti Israël amä lani aprophète ti Jéhovah ape.—Jér. 35:​12-15.

FASON SO JÉHOVAH AFA LEGE NA AKOZO CHRÉTIEN

9. Azo wa la Jéhovah asara lani kua na ala ti fa lege na akozo Chrétien? (Bâ nga foto.)

⁹ Na Pentecôte ti ngu 33, Jéhovah asigi na congrégation ti aChrétien. Tongana nyen la Jéhovah afa lege lani na akozo Chrétien so? Lo zia lani Jésus mokonzi ti congrégation ni (aÉph. 5:23). Me Jésus asara lani tënë pëpe na disciple oko oko kue ti fa na ala ye ti sara. Lo sara kua lani na abazengele nga na a-ancien so ayeke na Jérusalem ti mû li ni (Kus. 15:​1, 2). A soro nga lani a-ancien ti fa lege na acongrégation.—1 aThes. 5:12; Tite 1:5.

10. (a) Mingi ti akozo Chrétien asara ye lani tongana nyen na fango lege so ala wara? (Kusala 15:​30, 31). (b) Ngbanga ti nyen la ândö ambeni zo ake ti yeda na fango lege ti azo so asara kua na iri ti Jéhovah? (Bâ encadré “ Ndani so ambeni zo ake ti yeda so Jéhovah asara kua na azo ti fa lege na azo ti lo.”)

¹⁰ Eskê akozo Chrétien asara lani ye alingbi na aye so a fa na ala? Mingi ti ala ayeke lani na ngia ti sara ye alingbi na aye so a fa na ala. Ti vrai ni, “bê ti ala ayeke na ngia ndali ti atënë ni so akpengba zo” so a tene na ala. (Diko Kusala 15:​30, 31.) Me Jéhovah ayeke fa lege tongana nyen na azo ti lo na ngoi ti e?

FASON SO JÉHOVAH AYEKE FA LEGE NA E LASO

11. Mû mbeni tapande so afa tongana nyen la Jéhovah ayeke fa lege na azo so ayeke mû li ni na ngoi ti e.

¹¹ Jéhovah angbâ ti fa lege na azo ti lo na ngoi ti e. Lo yeke sara ni na lege ti Bible nga na Molenge ti lo so ayeke mokonzi ti congrégation. Eskê e bâ so Nzapa angbâ nga ti sara  kua na azo na ngoi ti e? En! Na tapande, gbu li na ndö ti ye so asi na peko ti ngu 1870. Charles Taze Russell nga na amba ti lo akomanse ti comprendre so mbeni kpengba ye ayeke si na ngu 1914 so andu Royaume ti Nzapa (Dan. 4:​25, 26). Ala hinga ni ndali ti so ala sara recherche na ndö ti aprophétie ti Bible. Eskê Jéhovah la afa lani lege na ala na ngoi ti recherche ni? A yeke polele so a yeke lo. Aye so asi na yâ ti dunia na ngu 1914 afa so Royaume ti Nzapa akomanse ti komande awe. Kozo bira so amû sese kue akomanse, na pekoni asioni kobela amû ndo, sese ayengi nga akota nzara atï (Luc 21:​10, 11). Biani, Jéhovah asara lani kua na awamandango Bible so ti aidé azo ti lo.

12-13. Aye wa la a leke ni lani ti fa tënë nga ti fa ye mingi na ngoi ti Use bira so amû sese kue?

¹² Bâ nga ye so apassé na ngoi ti Use bira so amû sese kue. Na peko ti so aita so ayeke mû li ni na kota ndokua ti e amanda Apocalypse 17:​8, ala bâ so bira ni ayeke si na Harmaguédon ape, me mbeni ngoi ti siriri ayeke duti dä na lege ayeke zi ti fa tënë mingi. Atâa so na bango ni a yeke na lege ti ndara ape, bungbi ti Jéhovah azia na sese Ekole ti Galaad ti fa na amissionnaire ti fa tënë nga ti fa ye na yâ ti akodro na ndö ti sese kue. A tokua lani amissionnaire na ando nde nde même na ngoi ti bira ni. Na ndö ni, ngbâa be-ta-zo asigi na Cours pour le ministère théocratique, b ti fa ye na aita na yâ ti acongrégation kue ti fa tënë nga ti fa ye nzoni. Aye so aleke awakua ti Nzapa ndali ti kua so ayeke ku ala na devant.

¹³ Laso, e bâ polele so Jéhovah ayeke fa lani lege na awakua ti lo na ngoi ti ngangu so. Na peko ti Use bira so amû sese kue ti ga na ni, awakua ti Jéhovah ayeke na liberté ti fa tënë na yâ ti akodro mingi. Ti vrai ni, kua ti fango tënë amû ndo mingi.

14. Ngbanga ti nyen la e peut ti sara confiance na fango lege ti bungbi ti Jéhovah nga na ti a-ancien? (Apocalypse 2:1). (Bâ nga foto.)

 ¹⁴ Laso, amembre ti Bebungbi angbâ ti bâ ndo na mbage ti Christ ti fa lege na ala. Ala ye ti tene aye so ala fa na aita ti sara ague oko na bango ndo ti Jéhovah na Jésus. Ala yeke sara nga kua na asurveillant ti circonscription nga na a-ancien ti fa lege na acongrégation. c A-ancien so a soro ala ti gue na yayu ayeke na yâ ti “maboko ti [Christ] ti koli”. (Diko Apocalypse 2:1.) A-ancien so ayeke mbilimbili-kue ape nga ala yeke sara afaute. Na ambeni ngoi, Moïse na Josué asara afaute, abazengele nga kue (Nom. 20:12; Jos. 9:​14, 15; aRom. 3:23). Me e bâ polele so Jésus ayeke fa lege na ngbâa be-ta-zo nga na a-ancien, na lo yeke ngbâ ti sara ni “lango oko oko kue juska na lâ ni so aye ti ngoi so ayeke gue ti hunzi.” (Mat. 28:20). Tongaso, e yeke na araison kue ti sara confiance na fango lege ti azo so lo soro ala ti mû li ni.

TONGANA E NGBÂ TI SARA YE ALINGBI NA FANGO LEGE TI JÉHOVAH E YEKE BÂ NZONI DÄ

15-16. Nyen la mo manda na lege ti aye so asi na azo so asara ye alingbi na fango lege ti Jéhovah?

¹⁵ Tongana e ngbâ ti sara ye alingbi na fango lege ti Jéhovah, e yeke bâ nzoni dä même laso. Na tapande, Andy na Robyne asara ye alingbi na wango so ngbâa be-ta-zo amû ti duti na aye mingi ape. (Bâ note ti étude na ndö ti Matthieu 6:​22, na Français.) Ye so asara si ala wara lege ti duti avolontaire ti leke ada so a yeke sara kua ti Jéhovah dä. Robyne atene: “Na ambeni ngoi, e lango na ando so ayeke tâ kete mingi, na e yeke même na place ti tö kobe dä ape. Mbi doit nga lani ti kä gbâ ti aye so mbi yeke sara na foto atâa so mbi ye sarango foto mingi. Mbi toto na ngoi so mbi kä ni. Me tongana ti Sara, wali ti Abraham, mbi leke lani na bê ti mbi ti bâ ndo na devant me na peko ape.” (aHéb. 11:15). Eskê a yeke lani nzoni desizion la couple so amû so? Robyne atene: “E yeke na ngia mingi ndali ti so e hinga so e mû na Jéhovah ye kue so e yeke na ni. Na ngoi so mbi na koli ti mbi e yeke sara akua so Jéhovah amû na e, e bâ kete yanga ti fason so azo ayeke vivre ande na ni na yâ ti fini dunia.” Andy ayeda, lo tene: “E yeke na ngia ndali ti so e mû ngoi nga na ngangu ti e kue ndali ti kua ti Jéhovah.”

¹⁶ Tongana e ngbâ ti sara ye alingbi na fango lege ti Jéhovah, mbeni ye ti nzoni nde wa la e yeke wara? Na tapande, na peko ti so Marcia ahunzi mandango mbeti na lycée, lo ye biani ti sara ye alingbi na wango so a mû na lo ti sara kua ti pionnier (Mat. 6:33; aRom. 12:11). Lo tene: “A ye lani ti mû na mbi bourse ti ngu osio na yâ ti mbeni université. Me mbi ye lani ti sara kua ti Jéhovah mingi.  Tongaso, mbi soro ti sara mbeni ekole technique ti manda mbeni kua ti maboko, tongaso si mbi wara nginza so apeut ti aidé mbi ti sara kua ti pionnier. A yeke lani oko ti apendere desizion so mbi mû. Fadeso mbi yeke mbeni pionnier so ayeke na ngia, kapa ti kua ti mbi amû lege na mbi ti sara kua tongana volontaire na Béthel, nga ti sara ambeni pendere kua nde ndali ti Jéhovah.”

17. Tongana e ngbâ ti sara ye alingbi na fango lege ti Jéhovah, ambeni nzoni ye wa la e yeke wara? (Ésaïe 48:​17, 18).

¹⁷ Na ambeni ngoi, bungbi ti Jéhovah ayeke mû na e awango so a bata e. Na tapande, a yeke gboto mê ti e na ndö ti ndoye ti nginza nga na ambeni ye so apeut ti gue na e ti doro andia ti Nzapa. Ge nga kue, tongana e sara ye alingbi na fango lege ti Jéhovah, e yeke bâ nzoni dä. E yeke duti na nzoni conscience nga e yeke wara gbâ ti akpale ape (1 Tim. 6:​9, 10). Tongaso, e peut ti sara na Jéhovah na bê ti e kue. Mbeni ye ti sara si e duti na ngia nga na siriri ti hon so ayeke dä ape.—Diko Ésaïe 48:​17, 18.

18. Ngbanga ti nyen la mo leke na bê ti mo ti ngbâ ti sara ye alingbi na fango lege ti Jéhovah?

¹⁸ Kite ayeke dä ape so Jéhovah ayeke ngbâ ande ti sara kua na azo ti fa lege na e na ngoi ti kota ye ti vundu nga na ngoi ti Komandema ti ngu saki oko ti Christ (Ps. 45:16). Eskê e yeke ngbâ ande ti sara ye alingbi na fango lege so atâa tongana ague nde na ye so e ye ti sara? A yeke duti ande ngangu na e ape ti sara ni tongana e yeke sara ye alingbi na fango lege ti Jéhovah laso. Tongaso, zia e sara ye lakue alingbi na fango lege ti Jéhovah, même ti so alondo na azo so a soro ala ti bâ ndo na ndö ti e (És. 32:​1, 2; aHéb. 13:17). E peut ti zia bê ti e kue na Jéhovah so ayeke fa lege na e, ndali ti so lo yeke gue na e yongoro na aye kue so apeut ti buba songo ti e na lo nga lo yeke gue na e ti wara fini ti lakue lakue na yâ ti fini dunia.