1. Yihowa massagaanchonke assiꞌra hasiissannonkehu mayiraatiro leellishanno lawishsha kuli.

 HANNI dubbu giddo heedheenna ragu bainohehu gede assite hedi. Hakkiicho moyichu, hadho afidhinoti shiimmaadda lubbuwanna muꞌro no; qoleno bobbooddate giddo uwattora dandaatto. Hakko daafira nootto bayichi lowo geeshsha gawajjannoha ikkinoti dihuluullissannote. Gawajjanno coyi noo bayicho bade afinohanna hakko bayichinni gatte fulatto gede kaaꞌlannohe mancho afiꞌrittoro lowo geeshsha hagiidhatto! Tini alameno hakko dubbi gedeeti. Tenne alamera roorenkanni ayyaanaamittenke gawajjanno coyi batiꞌrino. Ikkirono guutu massagaanchi Yihowa noonke. Isi gawajjanno coyi noowiinni xeertiꞌneemmo gede massagannonke; hattono jeefote bayicho yaano haaro alame eꞌne hegere heeshsho afiꞌneemmo gede assannonke.

2. Yihowa massagannonkehu hiittoonniiti?

² Yihowa massagannonkehu hiittoonniiti? Isi massagannonketi qara doogo Qaalesi Qullaawa Maxaafaati. Ikkirono isi ninke massagate mannano horoonsiꞌranno. Lawishshaho dancha doorsha doodhineemmo gede kaaꞌlitannonketa ayyaanaamittete sagale qixxeessate ‘ammanaminohanna wodanaamo borojjicho’ horoonsiꞌranno. (Mat. 24:45) Qoleno Yihowa ninke massagate dandoo noonsare woloota labballo horoonsiꞌranno. Lawishshaho woradu aliidi laꞌꞌaanonna songote cimeeyye qarra dandiine saꞌneemmo gede kaaꞌlitannonke jawaantenna amaale uyitannonke. Tenne qarrissannote goofimarchu barruwara addaxxinanni biddishsha afiꞌranke lowo geeshsha hagiirsiissannote! Tini woꞌmanka woyite Yihowa hagiirsiinseemmo gedenna heeshshote doogonni fulleemmokki gede kaaꞌlitannonke.

3. Konni birxichira maa ronseemmo?

³ Ikkirono mito woyite Yihowa, roorenkanni biddishsha guuntete  xeꞌne noonsa labballi widoonni aannonke woyite konne biddishsha harunsa qarra ikkitankera dandiitanno. Mayira? Korkaatuno uyinanninke biddishshi banxeemmokkiha ikkara dandaanno. Woy ‘Kuni biddishshi kaaꞌlannori dinooho hattono Yihowawiinni dayinoha diꞌꞌikkino’ yine hendammora dandiineemmo. Roorenkanni togoo woyite, mannasi massagannohu Yihowa ikkinotanna isi biddishsha harunsa atoote afiꞌnanni gede assitannota addaxxa hasiissannonke. Konni birxichira Yihowa biddishsha albinni roore addaxxineemmo gede kaaꞌlannonkere xiinxallineemmo; insano, (1) Yihowa hundi waro mannasi massagino gara, (2) isi xaa yannara massaganni noonke garanna (3) woꞌmanka woyite isi biddishsha harunsa kaaꞌlitannonke gara.

YIHOWA ISRAEELETE DAGA MASSAGINO GARA

4-5. Yihowa Israeele massagate Muse horoonsiꞌranni noota leellishinohu hiittoonniiti? (Misile lai.)

⁴ Yihowa, Israeele Gibitsetenni fushshanno gede Muse doorino. Qoleno Yihowa Israeelete, insa massaganni noonsahu Muse widoonni ikkinota afanno gede assitanno taje leellishinonsa. Lawishshaho Isi insa massagate barra gomichu heelliicho hashsha qole giirate heelliicho horoonsiꞌrino. (Ful. 13:21) Muse tenne heelliicho harunse Israeelete ledo Duumu Baariwa iillino. Israeelete manni albansaanni baaru noota badhensaanni kayinni Gibitsete olanto hordoffanni noonsata afiti lowo geeshsha masino. Insa Muse Duumu Baariwa abbinonkehu soꞌrino daafiraati yite heddino. Kayinni isi disoꞌrino. Muse horoonsiꞌre mannasi hakkira massinohu Yihowaati. (Ful. 14:2) Hakkiinni Maganu insa lowo geeshsha maalale ikkanno garinni gatisinonsa.—Ful. 14:26-28.

⁵ Hakkunni gedensaanni Muse 40 diro woꞌma halalla Maganu manna massagate gomichu heelliicho harunsino. a Mite yanna geeshsha Yihowa tenne heelliicho Muse dukkanira aleenni worino; hakkiicho Israeelete manni baalu tenne heelliicho laꞌꞌa dandaanno. (Ful. 33:7, 9, 10) Yihowa gomichu giddo heeꞌre Muse hasaawisinosi; Museno Yihowa biddishsha Israeelete kulanno. (Far. 99:7) Israeelete mannira Yihowa insa massagate Muse horoonsiꞌranni noota leellishshannoti kaajja taje noonsa.

6. Israeelete manni Yihowa biddishsha harunsa giwinohu ma garinniiti? (Kiiro 14:2, 10, 11)

⁶ Rooru Israeelete manni Yihowa insa massagate Muse horoonsiꞌranni noota leellishshanno taje ammana giwino; tini dadillissannote. (Kiiro 14:2, 10, 11 nabbawi.) Insa Yihowa Muse widoonni massaganni noonsata duucha higge ammana gibbino. Hakko daafira hatti ilama Hexxote Gobba ragidhukki gattino.—Kir. 14:30.

7. Yihowa biddishsha harunsitinori lawishsha kuli. (Kiiro 14:24) (Misileno lai.)

⁷ Ikkirono mitu Israeelete manni Yihowa biddishsha harunsino. Lawishshaho Yihowa Kaaleebi iso “coꞌo yiino wodaninni [harunsinota]” coyiꞌrino. (Kiiro 14:24 nabbawi.) Maganu Kaaleebi baꞌraasinosi; Kanaꞌꞌaani gobbara doodhino bayicho heeꞌranno gede nafa fajjinosi. (Iya. 14:12-14) Aante nooti Israeelete ilamano Yihowa biddishsha harunsite dancha lawishsha ikkitino. Iyyaasu Muse lekkise Israeele massaga hanafita insa “lubbotenni heeꞌri yanna baalantera [ayirrissinosi].” (Iya. 4:14) Hakko daafira Yihowa insa, qaale einota Hexxote Gobba ragidhanno gede asse maassiꞌrinonsa.—Iya. 21:43, 44.

8. Mootoollate yannara Yihowa mannasi massaginohu hiittoonniitiro xawisi. (Misileno lai.)

⁸ Lowo diri gedensaanni Yihowa mannasi massagganno gede daanyoota doorino. Hakkunni gedensaanni mootoollate yannara  Yihowa mannasi massagate masaalaano shoomino. Ammanantino mootoolla masaalaano kultannonsa amaale macciishshitino. Lawishshaho Moote Daawiti Masaalaanchu Naataani seejjinosi seejjo umosi heeshshi asse macciishshe adhino. (2 Sam. 12:7, 13; 1 Dud. 17:3, 4) Moote Iyosaafiixi masaalaanchu Yahazieeli uyinosi biddishsha harunsino; hattono Yihudu manni ‘Maganu himanaano ammananno’ gede jawaachishino. (2 Dud. 20:14, 15, 20) Moote Hiziqiyaasi qarru amadisi yannara masaalaancho Isayaasi amaaꞌlino. (Isa. 37:1-6) Mootoolla biddishshasi harunsitino yanna baalantera Yihowa maassiꞌrinonsa; hattono mannasi agarino. (2 Dud. 20:29, 30; 32:22) Baalunku manni Yihowa mannasi massagate masaalaano horoonsiꞌrinota huwata dandaanno. Ikkirono roore mootoollanna Israeelete manni Yihowa masaalaano yitannore macciishsha giwino.—Erm. 35:12-15.

YIHOWA UMI XIBBI DIRO HEEꞌRINO KIRISTAANA MASSAGINO GARA

9. Yihowa umi xibbi diro heeꞌrino Kiristaana massagate ayeoo horoonsiꞌrino? (Misileno lai.)

⁹ Yihowa umi xibbi diro Kiristaanu songo xintino. Isi umi xibbi diro heeꞌrino Kiristaana massaginohu hiittoonniiti? Yihowa Yesuusa songote umo asse shoomino. (Efe. 5:23) Ikkirono Yesuusi mittu mittunku rosaanchi maa assa hasiissannosiro xaaddotenni dikulino. Isi insa massagate soqqamaasinenna Yerusaalamete heedhanno cimeeyye horoonsiꞌrino. (Soq. 15:1, 2) Qoleno songuwa massagganno gede cimeeyye shoommoonni.—1 Tes. 5:12; Tit. 1:5.

10. (a) Umi xibbi diro heeꞌrinohu rooru Kiristaani uyinoonninsa biddishshira hajajaminohu hiittoonniiti? (Soqqamaasinete Looso 15:30, 31) (b) Hunda heeꞌrinohu mitu manni Yihowa mannasi massagate horoonsiꞌrino mannira hajajaminokkihu mayiraati? (“ Mitu Manni Xabbe Leeltanno Taje Ammaninokkihu Mayiraati?” yitanno saaxine lai.)

¹⁰ Umi xibbi diro heeꞌrino Kiristaani uyinoonninsa biddishshira hajajamino? Rooru manni uyinoonninsa biddishshira hajajamino. Isinni insa ‘jawaachinshoonninsa’ daafira lowo geeshsha hagiidhitino. (Soqqamaasinete Looso 15:30, 31 nabbawi.) Ikkina yannankera Yihowa mannasi massaganni noohu hiittoonniiti?

YIHOWA XAA YANNARA MASSAGANNI NOONKE GARA

11. Yihowa yannankera albisa ikkite soqqantannore massagino gara leellishanno lawishsha kuli.

¹¹ Yihowa xaa yannarano mannasi massaganni no. Isi tenne assanni noohu Qaalisinna  songote umo ikkinohu Beettisi widoonniiti. Maganu xaa yannarano mannu ooso horoonsiꞌre massaganni noonketa leellishshanno taje laꞌꞌa dandiineemmo? Ee dandiineemmo. Lawishshaho hanni 1870 gedensaanni ikkinore laꞌno. Charlesi Teezi Raasilinna jaallasi 1914 Maganu Gashshooti xintamannoha baxxino diro ikkannota wodanchitino. (Dan. 4:25, 26) Insa tenne wodanchitinohu Qullaawu Maxaafi masaalo xiinxalliteeti. Insa Qullaawa Maxaafa xiinxallitu woyite Yihowa massaginonsa? Ee massaginonsa. Hakkiinni 1914nni alamete aana Maganu gashshooti gashsha hanafinota leellishannori ikkino. Umihu Alamete Oli kaino; hakkiinni aane addi addi dhibbi dayino, baattote huxano kaꞌino hattono hude ubbino. (Luq. 21:10, 11) Addanko Yihowa mannasi kaaꞌlate kuri ammanantino labballo horoonsiꞌrino.

12-13. Layinkihu Alamete Oli yannara sabbakatenna rosiisate looso halashshate maa assinoonni?

¹² Hanni Layinkihu Alamete Oli yannarano mayi ikkinoro laꞌno. Qara biirora soqqantannori ammanantino roduuwi Yohaannisi Ajuuja 17:8 xiinxallituhu gedensaanni kuni oli Armagedooni oliwa massannoha ikkinokkita wodanchitino; hatteentenni insa konni oli gedensaanni mito geeshshi keeri heeꞌrannotanna Yihowa manni sabbakate looso halashshate faro afiꞌrannota huwattino. Hatte yannara kaaꞌlannoha lawa hoogirono Yihowa dirijjite misiyoone qajeelsate Giiliyaadi Rosi Mine fantino; kuri misiyoone uulla woꞌmate sabbakkanno hattono rosiissanno. Misiyoone olu yannara nafa sabbakkanno gede sonkoonni. Qoleno ammanaminohunna wodanaamu borojjichi songuwate giddo noo halashshaano baala dancha gede sabbakkannonna rosiissanno gede qajeelsate Tiokiraasete Soqqansho Qajeelshi Rosi Mine b fannanni gede assino. Konni garinni Maganu manni albillitte loonsanni loosira qixxaawino.

¹³ Hakkawarita hendeemmo woyite hattee qarru yannara Yihowa mannasi massaganni noota huwanteemmo. Layinkihu Alamete Oli yannanni kayise Yihowa manni batinye gobbuwara sabbakate looso loosi woyite mito geeshshi keerenna wolapho afiꞌrino. Isinni kuni loosi dancha guma abbino.

14. Yihowa dirijjitenna shoomantino cimeeyye uyitannonke biddishsha addaxxa dandiineemmohu mayiraati? (Yohaannisi Ajuuja 2:1) (Misileno lai.)

 ¹⁴ Xaa yannarano Aliidi Bisi miilla Kiristoosi aanno biddishsha harunsitanno. Insa roduuwaho uyitanno biddishshi Yihowa hasiꞌrannohu gedeeha ikkara hasidhanno. Woradu aliidi laꞌꞌaanonna songote cimeeyye qolte konne biddishsha songuwate kultanno. c Buurantino cimeeyye Kiristoosite “qiniiticho angara” noohu gedeeti. (Yohaannisi Ajuuja 2:1 nabbawi.) Hige kuri cimeeyye guuntete xeꞌne noonsareetinna soꞌro loossannoreeti. Soqqamaasine soꞌro loossinonte gede Musenna Iyyaasuno soꞌro loossino woyiti no. (Kir. 20:12; Iya. 9:14, 15; Rom. 3:23) Ikkirono, Kiristoosi ammanaminohanna wodanaamo borojjicho hattono shoomantino cimeeyye dancha gede massaganni no; qoleno isi “alamete gumulo geeshsha barru baala” insa massaga diaguranno. (Mat. 28:20) Konnira Yihowa albisa ikkite soqqantannori shoomantino roduuwi widoonni aannonke biddishsha addaxxineemmo gede assannonkehu ikkadu korkaati no.

WOꞌMANKA WOYITE YIHOWA BIDDISHSHA HARUNSINUMMORO HORO AFIꞌNEEMMO

15-16. Yihowa biddishsha harunsino manni woꞌnaalshinni maa rosootto?

¹⁵ Woꞌmanka woyite Yihowa biddishsha harunsinummoro xaa yannara nafa atoote afiꞌneemmo. Andinna Roobiini heeshshonsa bikkunnita assidhanno gede kulloonni amaale harunsino. (Mat. 6:22) Konnira insa uminsa fajjonni Magano magansiꞌnanni minna mina kaaꞌlino. Roobiini togo yitino: “Mito woyite shiima kifilera heeꞌneemmo daafira sagale qishiꞌneemmo bayichi nafa diheeꞌrannonke. Konni albaanni foto kayiseemmaha lowoha baxeemma uduunneꞌya hira hasiissinoe. Konne uduunne hirumma woyite wiꞌloomma. Kayinni Abirihaami minaama Saara gede aguroomma coye galagale qaaga hoogate murciꞌroomma.” (Ibi. 11:15) Kuri minaanninna minaama doodhino coyinni afiꞌrino horo maati? Roobiini togo yitino: “Noonke coye baala Yihowara uyinoommota afanke lowo geeshsha hagiidhineemmo gede assitinonke. Magano magansiꞌnanni minna mina kaaꞌlanke haaro alamera heeshsho hiittoota ikkitannoro hendeemmo gede assitinonke.” Andino, “Woꞌma yannankenninna wolqankenni Maganu Gashshooti looso loosa harshammi yineemmo gede assitinonke” yiino.

 ¹⁶ Woꞌmanka woyite Yihowa biddishsha harunsinummoro afiꞌneemmohu wolu atooti maati? Maarishiya yinanni rodoo layinki dirimi roso gudduhu gedensaanni woꞌma yanna soqqansho soqqantanno gede amaalloonnise amaale harunsa hasidhino. (Mat. 6:33; Rom. 12:11) Ise togo yitino “Woxe baaxxummakkinni shoole diro yuniversitete rosate qoosso afiꞌroomma. Kayinni ani ayyaanaamittete mixoꞌya wonshiꞌra hasiꞌroomma. Hakko daafira suwisaancho ikke soqqameemma woyitira hasiisannoe woxe afiꞌrate kaaꞌlitannoe dandoo rosa doodhoomma. Kuni kageeshsha doodhoomma doorsha baala roorannoho. Xa woꞌma yanna suwisaancho ikke hagiirrunni soqqamanni noomma; hattono mito woyite haꞌre Beeteelete kaaꞌleemma; qoleno addi addi qoosso afiꞌroomma.”

17. Woꞌmanka woyite Yihowa biddishsha harunsineemmoha ikkiro afiꞌneemmohu wolu atooti maati? (Isayaasi 48:17, 18)

¹⁷ Mito woyite, maalaamittete jiro shorrineemmokki gedenna Yihowa seera diingeemmokki kaaꞌlitanno amaale uyinanninke. Togoo woyiteno Yihowa biddishsha harunsineemmoha ikkiro atoote afiꞌneemmo. Keeraanchu tiiꞌꞌi heeꞌrannonke hattono lowo qarrinni ganteemmo. (1 Xim. 6:9, 10) Tini, woꞌmu wodaninkenni Yihowa magansiꞌne lowo hagiirre, keerenna harshammo afiꞌneemmo gede assitannonke.—Isayaasi 48:17, 18 nabbawi.

18. Woꞌmanka woyite Yihowa biddishsha harunsate murciꞌroottohu mayiraati?

¹⁸ Yihowa quuxxote qarri yannaranna Kumu Diri Gashshooti yannarano biddishsha aate mannu ooso horoonsiꞌrannoti dihuluullissannote. (Far. 45:16) Ninke hasiꞌneemmokkire asse yininkero nafa woꞌmanka woyite konne biddishsha harunsineemmo. Xaa yannara Yihowa aannonke biddishsha harunsineemmoha ikkiro hatte yannarano hajajama qarra diꞌꞌikkitannonke. Hakko daafira woꞌmanka woyite Yihowaranna isi shoomino labballi uyitannonke biddishshira hajajammo. (Isa. 32:1, 2; Ibi. 13:17) Hatto assineemmoha ikkiro, ayyaanaamittenke gawajjannoriwiinni agarannonkehanna haaro alamera hegere heeshsho afiꞌneemmo gede assannonkeha Massagaanchonke Yihowa addaxxineemmo gede assannonkehu ikkadu korkaati heeꞌrannonke.