1. Kɔɔpɛyɛ ndjɔmbɔmba kɛnyɛ lamo oyɛso ladjɛ ndɔnda ɛlɔndjɛlɔ kɛ Yehova.

 KOOKANELA djɛ ombovunga l’okonda. Ombodjingama má nkete nkoka nkoyakala mbalaka: nyama yɛ mpango, etamba la tofáfumbɔ tɔ ndɛngɔ, edjinge okoka nkitela kaanga la mpeku djɛ tolonga tɔ djika kana tɔ okombo. Ɔsɔngo nghongoyala la djedjɛ te ndɔndji kewa okonda wɔsɔ wɔlɔ, kewa idjena ilekɔ́ mbalaka la kekoka nkokotshɛ́ djɛ ndjewɔ mbalaka inkfumɔ yɛsɔ! Andja wanɛ walekɔ etengo okonda wɔsɔ. Wambolola kfu la mbalaka ikoka ntshita pekapeka lonyuma lɔso. Koko tolekɔ la Ndɔndji kɛ djɔ, Yehova. Nde ntowangoyɛka otale má ambalaka la ntɔlɔndjɛka tá lowiko l’etshinda l’andja wa bango.

2. Wopo wɔkɔnge Yehova ɔtɔlɔndjɛnde?

² Wopo wɔkɔnge Yehova ɔtɔlɔndjɛnde? Ntondontondo, má mbamba kɛ Otepela wɔnde w’ombófunamá, Bible. Koko, angokambake lonkina la wana w’anto djɛ ntɔlɔndjɛ. Ndjɔmbɔmba, nde nkambaka la ‘mfumbe kɛ nkɔmano la nkɛsɔ,’ djɛ ntɔpɛyɛ oleelo wɔ nyuma wotokotshɛ́ djɛ ndɔsa akano wa wɔlɔ. (Mat. 24:45) Yehova akamba lonkina l’ampame inkina ilekɔ́ l’akoka djɛ ntɔlɔndjɛ. Ndjɔmbɔmba, elami wɛ djingadjinga la tokokolo tɔ ntshumano, wangɔtɔpɛyɛke lokembo la alako wakoka ntokotshɛ́ winá w’opomanaso l’ekakasano. Ɔsɔngo oyɛso la djedjɛ tá ɛlɔndjɛlɔ k’ɛdje ndjilela oloko kɛsɔ l’etsho w’ekomo wɛ wolo wɛnɛ! Ketokotshɛ djɛ nkindjɛ ndjawolama me Yehova la nkindjɛ ntshikala lá mboka kɛ lowiko.

3. Kɛkɔnge k’oshishimaso lɔ lá djamba djɛnɛ?

³ Kaanga oyɛwɔ nghɔsɔ, tokoka ndjala l’okakasano lá mbamba imɔtshi djɛ ndɔnda ɛlɔndjɛlɔ kɛ Yehova, pekapeka winá w’ɔpɛyamawɔ me anto wa ntshamba djɛ djɔ. Lamo? Ɛlɔndjɛlɔ kɛsɔ kekoka ndjala kɛ sopakɔpɛ. Kana tokoka nyɛna ente ɛlɔndjɛlɔ k’ɔtɔpɛyɛwɔ kepalekɔ kɛ balo edjinge tokoka ntepela ente dako djɛsɔ  mpaye me Yehova. Lá winá wɛ nghɔsɔ, tongoyalake pekapeka la djonyi djɛ ndjala l’eshikikelo ente Yehova ndeke lɔlɔndjɛ enkambi wɛnde, la ente ndɔnda ɛlɔndjɛlɔ kɛnde ndjakalaka esako. Djɛ nkembɛ wɛkamo wɔso, djamba djɛnɛ ngotepela 1) wopo wɔ Yehova ndalɔndjɛ enkambi wɛnde l’etsho w’efunamaki Bible, 2) wopo w’ɔtɔlɔndjɛnde lɔɔko kɛnɛ, la 3) wapɔ w’owaso má nkindjɛ ndɔnda ɛlɔndjɛlɔ kɛnde.

WOPO WƆ YEHOVA NDALƆNDJƐ OWILA WƆ ISARIYƐLƐ

4-5. Wopo wɔkɔnge Yehova ndɛnyɛ ante nde ndeke lokambaki la Mɔsɛ djɛ ndɔndjɛ ase Isariyɛlɛ? (Lenda ntshango djelá loposo.)

⁴ Yehova asɔnaka Mɔsɛ djɛ ndɔndjɛ ase Isariyɛlɛ dj’iwɔ mposa má Edjipito. La koko apɛyɛka wana w’Isariyɛlɛ ilembetelo yɛnamaki ente nde ndeke lalɔndjɛki má mbamba kɛ Mɔsɛ. Ndjɔmbɔmba, Nde álɔndjɛka má lotshimbo lɔ nkondji djɛ bonde la mbile edjinge la l’otsho má nkondji dj’iyɛ. (Epo. 13:21) Mɔsɛ la wana w’Isariyɛlɛ watalɔndaki nkondji ko djalɔndjɛka tá Ndjale kɛ Nkolankola. Ase Isariyɛlɛ wadjidjimaka lokomba winá wɔ yewe ambɔ ndjale kelekɔ lá ntondo kɛwɔ la koko angala w’ase Edjipito walakilika m’ɔkɔngɔ. Ekomo ekomo wayɛka ndotepela ambɔ Mɔsɛ ambonangha ovunga lá wopo wɔ ndombayakala lá Ndjale kɛ Nkolankola. Koko nde atanangha ovunga. Yehova ndeke lokambisá la Mɔsɛ djɛ ndɔndjɛ enkambi wɛnde t’eteyi. (Epo. 14:2) Ndjambe áwikɛka lá lɛdji lɔ nkamɔ efula.​—Epo. 14:26-28.

⁵ Masɔ, l’ilá k’ɛnɔnyi 40, Mɔsɛ akindjɛki nkilika ngo nkondji djɛ bonde djɛ ndɔndjɛ enkambi wɛ Ndjambe lá osowe wɔ lɔsɛkɛ. a L’ilá k’etsho ɛmɔtshi, Yehova ilaki nkondji djɛsɔ lá djiko dj’ivuvulu yɛ mpɛma yɛ Mɔsɛ, idjena y’ase Isariyɛlɛ ankfumɔ yakokaka ntangela. (Epo. 33:7, 9, 10) Yehova asawolaki nya Mɔsɛ má nkondji, ko l’onkoko wɔnde, Mɔsɛ ashimelaki ase Isariyɛlɛ kɛnɛ kɛ Ndjambe ndooshimelaka. (Yee. 99:7) Ase Isariyɛlɛ wayalaki la ilembetelo y’ekekete yɛnyɛki ente Yehova akambaki la Mɔsɛ djɛ ndalɔndjɛ.

6. Wopo wɔkɔnge ase Isariyɛlɛ yelola lá ɛlɔndjɛlɔ kɛ Yehova? (Ewadji 14:2, 10, 11)

⁶ Yɛnyi nde, efula kɛ wana w’Isariyɛlɛ watonaka ilembetelo yɛnyɛki papoo ente Yehova akambaki la Mɔsɛ etengo ontepetedji wɔnde. (Wala Ewadji 14:2, 10, 11.) Mbala la mbala, iwɔ watawolaki ambɔ Yehova akamba la Mɔsɛ. Eposelo weyalisá nde, Yehova atawola lɔlɔnga lɔ wana w’Isariyɛlɛ lɔsɔ ndjingela lá Looko lɔ Daka.​—Ew. 14:30.

7. Koowala ndjɔmbɔmba y’anto wakilikisá ɛlɔndjɛlɔ kɛ Yehova. (Ewadji 14:24) (Lenda edjinge ntshango.)

⁷ Koko, ase Isariyɛlɛ amɔtshi wakilikaki ɛlɔndjɛlɔ kɛ Yehova. Ndjɔmbɔmba, Yehova atepelaka ante: ‘Kalɛbɛ . . . akindjɛ nkilika lemi l’oloko ɔmɔ.’ (Wala Ewadji 14:24.) Ndjambe afutaka Kalɛbɛ, ɔpɛyɛka edjinge lotshungɔ lɔ nde nyɔmɛlɛ nsɔna etatshi kɛ looko kɛ ndakɔpɛ t’intansɛ lá Looko lɔ daka. (Yos. 14:12-14) Lɔlɔnga lɔ wana w’Isariyɛlɛ lɔwɔlamisá lotshikaka lonkina ndjɔmbɔmba kɛ wɔlɔ lá kɛnɛ kelendana la nkilika ɛlɔndjɛlɔ kɛ Yehova. Winá wɔ Yosua ndakite Mɔsɛ etengo ndɔndji kɛmbɔsɔnamá kɛ wana w’Isariyɛlɛ, iwɔ ‘wɔlɛmɛyɛki lá lɛdji l’efula mfu inkfumɔ yɛ lowiko lɔnde.’ (Yos. 4:14) Eposelo weyalisá nde, Yehova ásakolaka má ndawingeyɛ tii lá owila wɔ ndalake.​—Yos. 21:43, 44.

8. Kopakisola wopo wɔ Yehova ndalɔndjɛ enkambi wɛnde l’etsho w’ankfumi. (Lenda edjinge ntshango.)

⁸ Ɛnɔnyi efula m’ɔkɔngɔ, Yehova asɔnaka tosushi djɛ ndɔndjɛ enkambi wɛnde. M’ɔkɔngɔ wɔ lasɔ, l’eleko k’ankfumi, Yehova asɔnaka  aprɔfɛtɛ djɛ ndɔndjɛ enkambi wɛnde. Ankfumi yɛ nkɔmano walɔndaka alako w’aprɔfɛtɛ. Ndjɔmbɔmba, Nkfumi Davidɛ awolaka l’okitshakitshɛ onkfumɔ ikako yɛ me ɔprɔfɛtɛ Natana. (2 Sa. 12:7, 13; 1 Ɛk. 17:3, 4) Nkfumi Yehoshafata ayawɛkɛka te ɔprɔfɛtɛ Jahaziyɛlɛ djɛ mpona ɛlɔndjɛlɔ, edjinge akembɛka ase Juda djɛ ‘ndjala la djawo te aprɔfɛtɛ wa [Ndjambe].’ (2 Ɛk. 20:14, 15, 20) Winá wɔ ndayalaka la yɛnyi, Nkfumi Izikiya ahonaka okotshɔ me ɔprɔfɛtɛ Izaya. (Iza. 37:1-6) Mbala inkfumɔ y’ankfumi yalɔndaka ɛlɔndjɛlɔ kɛ Yehova, iwɔ wasakolamaki la owila wolamemaki. (2 Ɛk. 20:29, 30; 32:22) Onto onkfumɔ ayalaka ladjɛ nyɛna papoo ante Yehova akambaki la aprɔfɛtɛ djɛ ndɔndjɛ enkambi wɛnde. Koko ankfumi ole ase Isariyɛlɛ efula, watawolaki aprɔfɛtɛ wa Yehova.​—Jɛr. 35:12-15.

WOPO WƆ YEHOVA NDALƆNDJƐ AKRISTO WA L’ƐTƐNDƆ KƐ NTONDO

9. Yehova ndakambe l’anto wakɔna djɛ ndɔndjɛ Akristo wa l’ɛtɛndɔ kɛ ntondo? (Lenda edjinge ntshango.)

⁹ Lá ɛtɛndɔ kɛ ntondo D.D., Yehova akfumbaka otshumano wɔ Akristo. Wopo wɔkɔnge Yehova ndalɔndjɛ Akristo wa ntondo wasɔ? Nde asɔnaka Yeso etengo owandji w’otshumano. (Ɛfɛ. 5:23) Koko Yeso atashimelaki ombeki l’ombeki kɛnɛ k’oyɛnde ladjɛ nangha nyɔmɛlɛ. Nde akambaka l’apɔstɔlɔ edjinge la nkokolo djɛ Jerusalɛmɛ dj’iwɔ ndɔndjɛ. (Ele. 15:1, 2) Lonkina, tokokolo tɔsɔnamaka djɛ ndɔndjɛ otshumano.​—1 Te. 5:12; Tito 1:5.

10. a) Wopo wɔkɔnge Akristo wa l’ɛtɛndɔ kɛ ntondo yelola lá ɛlɔndjɛlɔ kɛ yawa? (Elemo 15:30, 31) b) Lamo anto wa l’etsho wefunamaki Bible yatone anto wasɔnamisá me Yehova? (Lenda ipapango “ Lamo anto amɔtshi yatone ilembetelo yɛnamaki papoo.”)

¹⁰ Wopo wɔkɔnge Akristo w’ɛtɛndɔ kɛ ntondo yelola? Efula wayalaki l’osasa djɛ nkilika alako wa yalongolaka. Lá nsɔsɔlɔ, ‘iwɔ wasasangaka la lokembo’ lɔ yawaka. (Wala Elemo 15:30, 31.) Iya wopo wɔkɔnge Yehova ɔlɔndjɛnde enkambi wɛnde l’etsho wɛso wɛnɛ?

WOPO WƆ YEHOVA ƆTƆLƆNDJƐNDE LƆƆKO KƐNƐ

11. Kɔɔpɛyɛ ndjɔmbɔmba kɛnyɛ wopo wɔ Yehova ndalɔndjɛ anto wawangisá ndokilika l’etsho wɛso wɛnɛ.

¹¹ Yehova akindjɛ ndɔndjɛ enkambi wɛnde tii lɔɔko kɛnɛ. Nde anangha nkambo djɛsɔ má lotshimbo lɔ Otepela wɔnde edjinge lɔ Wɔnande, kanga lolekɔ́ owandji w’otshumano. Tokoka  nyɛna ilembetelo yɛnyɛ ente Ndjambe akindjɛ nkamba l’anto l’etsho wɛso wɛnɛ? Ɛwo. Ndjɔmbɔmba, tokolenda akambo amɔtshi wananghemisá m’ɔkɔngɔ wɔ 1870. Charles Taze Russell l’anto wande wawangaka nsipisoyɛ ambɔ ɔnɔnyi wɔ 1914, wongoyala ɔnɔnyi wɔ djonyi efula lá kɛnɛ kelendana l’Onkfumi wɔ Ndjambe. (Dan. 4:25, 26) Wasipisoyɛka nghɔsɔ mande wananghaka ehonelo lá Bible, la washikikɛka ambɔ prɔfɛsi yɛnde ingokotshama. Yehova alɔndjɛka ehonelo wɛwɔ wɛsɔ? Ɛnama papoo ente alɔndjɛka. Akambo wahetaki l’andja lá 1914 wɛnyɛka papoo ente Onkfumi wɔ Ndjambe wombowanga ndɔndjɛ. Mbandji kɛ ntondo kɛ l’andja w’otondo kewangaka, ko masɔ epela, atshikito wa looko la ndjala yɛ nkasa yɛnamaka. (Luka 21:10, 11) Lá nsɔsɔlɔ, Yehova akambaka l’Akristo w’eloko wɔlɔ wasɔ djɛ ndɔndjɛ enkambi wɛnde.

12-13. Nonghanyi yɛkɔnge yɔsamisá djɛ mfudjɛ olemo w’ipoposanyɛ la wɔ wekelo lá mbandji k’ape k’andja w’otondo?

¹² Tokolenda ole kɛnɛ kenanghemisá lá Mbandji k’ape k’andja w’otondo. M’ɔkɔngɔ wɔ wekelo wɔ Ndjiso 17:8, wananyɔ walɔndjɛki lá biro dj’ekekete djel’andja w’otondo wasipisoyɛka ambɔ, mbandji kɛsɔ kepangɔtɔla tá Armagɛdɔ, koko tá eleko kɛ ndambo kɛ vu kengodjipola mbamba yɛ ndeka mfudjɛ olemo w’ipoposanyɛ. Koko kaanga yɛnamaka etengo alekɔ okakasano efula djɛ nangha nkɛndɔ tá djena dj’etale lá winá wɔkɔ wɔsɔ, olonghanyelo w’oposɛka Nkalasa kɛ Giliyadɛ djɛ nkfumba wa misiɔnɛrɛ dj’iwɔ ntopoposanyɛ la ndakanyɛ lá otshuku ankfumɔ wa looko. Watomaka amisiɔnɛrɛ kaanga lá winá wɔ mbandji. Lá djiko djɛ lasɔ, mfumbe kɛ nkɔmano alonghanyɛka djɛ nanghaka Nkalasa k’Olemo wɔ Teokrasi b, djɛ nkfumba ntshumano nkfumɔ dj’iwɔ nkoma ansakodji la wetsha wɛ wɔlɔ. Lá lɛdji lɔsɔ, enkambi wɛ Ndjambe walɔngɔswamaka lá nkambo dj’olemo wakongaki.

¹³ Lɔɔko kɛnɛ, tokoka nyɛna papoo ente Yehova alɔndjɛki enkambi wɛnde lá deko dj’ekakasano djɛsɔ. Má Mbandji k’ape k’andja w’otondo, enkambi wɛ Yehova w’ewila efula wasasangaka la ndambo kɛ vu edjinge la lotshungɔ winá wɔ yapoposanyɛka. Lá nsɔsɔlɔ, olemo w’ofulaka.

14. Lamo ilelaso ɛlɔndjɛlɔ k’olonghanyelo wɔ Yehova la kɛ tokokolo tɔmbɔsɔnamá oloko? (Ndjiso 2:1) (Lenda edjinge ntshango.)

 ¹⁴ Lɔɔko kɛnɛ, wananyɔ w’Iloyi yɛ lɔndjɛ wakindjɛ mpona ɛlɔndjɛlɔ me Yeso Kristo. Iwɔ nkombolaka djɛ alako w’ɔpɛyɛwɔ wananyɔ nyɛnyɛ wopo wɔ Yehova ɛnande akambo. Edjinge wangokambake l’elami wɛ djingadjinga ole la tokokolo djɛ mpɛyɛ ntshumano alako. c Tokokolo tombokfutama avuta tolekɔ lá ‘wɔmɛ-lɔwɔ’ lɔ Kristo. (Wala Ndjiso 2:1.) Lá nsɔsɔlɔ, tokokolo tɔsɔ oyɛwɔ nde anto wa ntshamba djɛ djɔ, la wangonanghake evunga. Mɔsɛ, Yosua edjinge apɔstɔlɔ wananghaki evunga winá ɛmɔtshi. (Ew. 20:12; Yos. 9:14, 15; Ɔrɔ. 3:23) Koko, Kristo alɔndjɛ la nkɔmɛ nkfumɔ mfumbe kɛ nkɔmano la tokokolo tɔmbɔsɔnama, edjinge angokindjɛ nangha nghɔsɔ ‘mfu inkfumɔ tii l’ekomo k’andja wanɛ.’ (Mat. 28:20) Djɛkondeke tolekɔ l’elonga kɛ wɔlɔ efula kɛ ndáwɛkɛ tá ɛlɔndjɛlɔ k’owaso má lotshimbo l’anto wasɔnamisá wasɔ.

TONGOWAKE WAPƆ WINÁ W’OKINDJƐSO NKILIKA ƐLƆNDJƐLƆ KƐ YEHOVA

15-16. Olakanyelo wɔkɔnge ngombowa má kɛnɛ kekomelisá wanɛ wakilikisá ɛlɔndjɛlɔ kɛ Yehova?

¹⁵ Winá w’okindjɛso nkilika ɛlɔndjɛlɔ kɛ Yehova, tongowake esako w’efula kaanga má winá wɔsɔ. Ndjɔmbɔmba, Andy nya Robyn wakambaka la dako djɛ mfumbe kɛ nkɔmano djɛ ndjila lowiko lɔwɔ onghanghunya. (Lenda nɔtɛ kɛ Mateo 6:22.) Eposelo weyalisá nde, wayalaka l’akoka wa ndápɛyɛ l’ɛkɔpa l’elemo w’opikelo w’amvulu yɛ teokrasi. Robyn atepela ante: “Titansɛki l’ivuvulu imɔtshi yɛ daambi, mbala efula itayala la nkfuko. Edjinge ndjalaka ladjɛ nsadjɛ mpeko djɛmi efula djɛ mavundaka afoto, olemo wɔ makɔpaka efula. Nkiyanaka efula winá wɔ masadjɛka. Koko ngete Sara kɛ wadjɛ Abrahama, ndɔsaka nkano djɛ ndenda tá ntondo, koko ape t’ɔkɔngɔ.” (Heb. 11:15) Kɛkɔnge k’ampɛtshɛki yɛsɔ yawa má kɛnɛ kakomelisá? Robyn atepela ante: “Tolekɔ l’osasa má ndjewa ente tɔpɛyɛ Yehova ekete kenkfumɔ k’okotshɛso. Winá w’okambaso olemo wɔ Yehova ndatɔpɛyɛ, angoyalake etengo ɛnaso nde wopo wɔ lowiko yongoyala l’andja wa bango.” Andy awola etepela wɛsɔ má ntepela ante: “Tolekɔ l’osasa efula lá wopo w’oyapɛyɛso djɛ nsuka Onkfumi.”

¹⁶ Wopo wɔkɔnge w’owaso wapɔ lonkina winá w’okindjɛso nkilika ɛlɔndjɛlɔ kɛ Yehova?  M’ɔkɔngɔ wɔ nde nshiyɛ imanite, Marcia akambaka la dako djɛ nkindjɛ ndapɛyɛ l’olemo wɔ Yehova. (Mat. 6:33; Ɔrɔ. 12:11) Nde atepela ante: “Wampɛyɛka bursɛ dj’ɛnɔnyi ɛnɛyi l’inivɛrsite. Koko lakɔpaki nkindjɛ l’ekoma wɛ nyuma. L’edjena kɛ ndjawola mbamba kɛsɔ, ndɔsaka nkano djɛ ndjingela nkalasa djɛ mba onkfumbelo wɔ ndjewa nangha opoto w’okoka nkotshɛ́ l’olemo wɔmi w’ipoposanyɛ. Ɔsɔ ayalaka nkano djɛ wɔlɔ efula mɔshi. Ndekɔ nkamba etengo yat’ekalo yɛ lotshinda winá wɔsɔ, nonghanyi kɛmi kɛmpɛyɛ lonkina mbamba kɛ ntshɔ ɔkɛlɔ djɛ ntokamba lá Betɛlɛ edjinge djɛ nsasanga la edjito enkina wetshikitanyi.”

17. Esako enkina wɛkɔnge weyɛka winá w’okilikaso ɛlɔndjɛlɔ kɛ Yehova? (Izaya 48:17, 18)

¹⁷ Winá ɛmɔtshi tongowake alako watolama má ngandji k’okfudji la má elemo w’ekoka ntotshinda djɛ ntshita ɛlɛmbɛ wɛ Ndjambe. Edjinge l’akambo wa nghɔsɔ, tongowake esako má nkilika ɛlɔndjɛlɔ kɛ Yehova. Tongoyalake la nkfum’oloko kɛ piyɔɔ la tongoyalamake m’akambo wakoka ntotshimbɛ yimba. (1 Ti. 6:9, 10) Eposelo weyalaka nde, tokindjɛ ntɛmɔla Yehova, edjinge kɛsɔ ntoyakalaka osasa la vu dj’efula.​—Wala Izaya 48:17, 18.

18. Lamo nghɔmbɔsa nkano djɛ nkindjɛ nkilika ɛlɔndjɛlɔ kɛ Yehova?

¹⁸ Ape l’ehamo, Yehova angokindjɛ nkamba la wana w’anto djɛ ntɔpɛyɛ ɛlɔndjɛlɔ lá ndjolo k’ekekete ole lá Ɛlɔndjɛlɔ k’Ɛnɔnyi Kinunu. (Yee. 45:16) Tongokindjɛ nkilika ɛlɔndjɛlɔ kɛsɔ kaanga nangha nkambo djɛsɔ angɔlɔmba ntshika kɛnɛ k’ɔkɔpaso? Tongonangha nkambo djɛsɔ ipa l’okakasano ntsha tombokilika ɛlɔndjɛlɔ kɛ Yehova má winá wɔsɔ. Djɛkondeke, nyontshɔ tɔlɔndɛ winá enkfumɔ ɛlɔndjɛlɔ kɛ Yehova ndjila ole kɛnɛ k’ɔtɔpɛyɛnde má mbamba k’anto wa ndɔmbɔsɔná djɛ ntolama. (Iza. 32:1, 2; Heb. 13:17) Edjinge winá w’onanghaso nghɔsɔ, tongowa donga djɛ ndáwɛkɛ te Ndɔndji kɛso Yehova, kanga lotowangoyɛ má ambalaka inkfumɔ yɛ nyuma, la lɔtɔlɔndjɛ tá lowiko l’etshinda l’andja wa bango.