1. Fu san ede wi abi a tiri fu Yehovah fanowdu? Gi wan eksempre.

 KOW taki dati yu lasi na busi. Ogri kan miti yu fu di ogri meti de drape, sneki kan beti yu, èn kande a busi dungru srefsrefi. A no de fu taki dati yu ben o breiti te wan sma di sabi a busi e yepi yu fu waka na ini a busi sondro taki wan sani psa nanga yu. A grontapu disi de leki a busi dati. A lai nanga ogri di kan pori a matifasi di wi abi nanga Yehovah. Ma wi abi a yoisti sma di kan sori wi a pasi di wi musu waka. A sma dati na Yehovah. A e yepi wi fu wai pasi gi ogri èn a e tyari wi pe wi musu go. A e tyari wi go na ini a nyun grontapu pe wi o kisi têgo libi.

2. Fa Yehovah e tiri wi?

² Fu di Yehovah na a sma di e sori wi a pasi di wi musu waka, meki wi e si en leki wi Tiriman. Fa Yehovah e tiri wi? Moro furu a e du dati nanga yepi fu Bijbel, a Wortu fu en. Ma a e gebroiki libisma tu di e teki presi gi en. Fu eksempre, a e gebroiki a „koni srafu di de fu frutrow” fu gi wi yeye n’nyan na a reti ten so taki wi kan teki koni besroiti (Mat. 24:45). Yehovah e gebroiki tra man tu di man tyari frantwortu. Fu eksempre, kring-owruman nanga gemeente owruman e gi wi dek’ati nanga rai di kan yepi wi fu hordoro na ini muilek ten. Wi de nanga tangi trutru taki wi kan fertrow a tiri di wi e kisi fu Yehovah na ini den muilek lasti dei disi. Disi e yepi wi fu tan mati fu Yehovah so taki wi kan nyan bun fu a libi now èn fu ala ten.

3. San wi o luku na ini na artikel disi?

³ Ma son leisi wi kan feni en muilek fu teki a tiri fu Yehovah, spesrutu te a e gebroiki sondu libisma fu tiri wi. Fu san ede dati de so? Kande na fu di a rai di den e gi wi a no san  wi wani yere. Noso kande wi feni taki a rai di wi e kisi no bun èn fu dati ede a no kan kmoto fu Yehovah. Spesrutu na ini den situwâsi dati wi musu abi a fertrow taki na Yehovah e tiri a pipel fu en èn taki wi o kisi blesi te wi e teki a tiri fu en. Na artikel disi o yepi wi fu kon abi moro fertrow na ini a tiri fu Yehovah. Dati meki wi o poti prakseri na (1) fa Yehovah tiri a pipel fu en na ini Bijbel ten, (2) fa a e tiri wi na ini a ten disi, èn (3) fa wi e kisi wini te wi e tan teki a tiri fu en.

FA YEHOVAH TIRI A PIPEL FU ISRAEL

4-5. Fa Yehovah sori taki a ben e gebroiki Moses fu tiri Israel? (Luku a prenki.)

⁴ Yehovah ben poti Moses fu tyari den Israel sma kmoto na ini Egepte. Èn a gi den Israelsma krinkrin beweisi taki a ben e gebroiki Moses fu tiri den. Fu eksempre, a meki wan wolku di ben gersi wan pilari sori den a pasi na deiten èn na neti wan pilari fu faya ben e du dati (Eks. 13:21). Moses ben e waka baka a pilari disi di tyari en nanga den Israelsma go na a Redi Se. Ma di den Egeptesma hari go baka den Israelsma, dan den Israelsma bigin frede srefsrefi fu di den ben e denki taki den Egeptesma ben o kiri den. Den ben denki taki Moses ben meki wan fowtu fu tyari den go na a Redi Se. Ma dati no ben de so. Na Yehovah ben meki Moses tyari a pipel fu en go drape (Eks. 14:2). Ne Gado du wan bigi wondru fu ferlusu den.​—Eks. 14:26-28.

⁵ Den 40 yari baka dati, Moses tan waka baka a wolku fu tyari a pipel fu Gado psa a gran sabana. a Wan pisi ten, Yehovah meki a wolku go tnapu na tapsei fu a tenti fu Moses so taki ala sma ben man si en (Eks. 33:7, 9, 10). Yehovah ben e taki nanga Moses kmoto fu a wolku èn Moses ben e taigi a pipel san Gado ben taigi en (Ps. 99:7). Den Israelsma ben abi nofo beweisi fu bribi taki Yehovah ben e gebroiki Moses fu tiri den.

6. Fa den Israelsma ben e si a tiri fu Yehovah? (Numeri 14:2, 10, 11)

⁶ A sari taki furu fu den Israelsma no ben wani bribi taki na Moses ben e taki gi Yehovah. (Leisi Numeri 14:2, 10, 11.) Ibri tron baka den ben e weigri fu bribi taki Yehovah ben e gebroiki Moses fu tiri den. Dati meki Yehovah no gi pasi taki den go na ini a Pramisi Kondre.​—Num. 14:30.

7. Kari wan tu sma di ben teki a tiri fu Yehovah. (Numeri 14:24) (Luku a prenki.)

⁷ Ma son Israelsma ben teki a tiri fu Yehovah. Fu eksempre, Yehovah ben taki: „Kaleb . . . tan du ala san mi taigi en.” (Leisi Numeri 14:24.) Gado blesi Kaleb èn en srefi ben mag besroiti pe fu a Pramisi Kondre a ben wani libi (Yos. 14:12-14). Den bakapkin fu den Israelsma di ben dede na ini a gran sabana, ben teki a tiri fu Yehovah tu. Di Yosua tron fesiman fu den Israelsma na ini a presi fu Moses, dan „den kon abi bigi lespeki gi en” (Yos. 4:14). Dati meki Yehovah blesi den èn a gi den a kondre di a ben pramisi den.​—Yos. 21:43, 44.

8. Ferteri fa Yehovah tiri a pipel fu en na a ten fu den kownu. (Luku a prenki.)

⁸ Furu yari baka dati, Yehovah poti krutuman fu tiri a pipel fu en. Baka dati, na a ten fu den kownu, Yehovah poti profeiti fu tiri en pipel. Den kownu di ben e dini Yehovah na wan getrow fasi ben e gi yesi na den rai fu den profeiti. Fu eksempre,  Kownu David ben de klarklari fu teki a pir’ai fu a profeiti Natan (2 Sam. 12:7, 13; 1 Kron. 17:3, 4). Kownu Yosafat ben e gi yesi na den rai fu a profeiti Yahasiyel èn a ben e gi a pipel fu Yuda dek’ati fu ’sori taki den e bribi den sani di den profeiti fu Gado e taki’ (2 Kron. 20:14, 15, 20). Di Kownu Heskia ben de na ini wan muilek situwâsi, dan a suku rai na a profeiti Yesaya (Yes. 37:1-6). Ibri leisi te den kownu ben e gi yesi na den rai fu Yehovah, a ben e blesi den èn a pipel ben e kisi kibri (2 Kron. 20:29, 30; 32:22). A ben musu de krin fu si gi ala sma taki Yehovah ben e gebroiki den profeiti fu en fu tiri en pipel. Ma tòg furu fu den kownu nanga den Israelsma no ben e arki den profeiti fu Yehovah.​—Yer. 35:12-15.

FA YEHOVAH TIRI DEN FOSI KRESTEN

9. Suma Yehovah gebroiki fu tiri den Kresten na ini a fosi yarihondro? (Luku a prenki.)

⁹ Na ini a fosi yarihondro, Yehovah seti a Kresten gemeente. Fa a ben tiri den Kresten fu a ten dati? A ben poti Yesus leki ede fu a gemeente (Ef. 5:23). Ma Yesus no ben e taki langalanga nanga ibri disipel fu taigi den san den ben musu du. A ben e gebroiki den apostel nanga den owru man na ini Yerusalem fu teki fesi (Tori 15:1, 2). Boiti dati, a poti owruman fu tiri den gemeente.​—1 Tes. 5:12; Tit. 1:5.

10. (a) Fa furu fu den Kresten na ini a fosi yarihondro ben e si a tiri di den ben e kisi? (Tori fu den apostel 15:30, 31) (b) Fu san ede son sma na ini Bijbel ten no ben wani gi yesi na den sma di Yehovah ben e gebroiki fu tiri den? (Luku a faki „ Fu san ede son sma no ben wani bribi krinkrin beweisi”.)

¹⁰ A de so taki den Kresten na ini a fosi yarihondro ben e teki a tiri fu Yehovah? Furu fu den ben breiti nanga den rai di den ben e kisi. Fu taki en leti, „den prisiri” fu di den rai dati ben e gi den dek’ati. (Leisi Tori fu den apostel 15:30, 31.) Ma fa Yehovah e tiri a pipel fu en na ini a ten disi?

FA YEHOVAH E TIRI WI NA INI A TEN DISI

11. Gi wan eksempre di e sori fa Yehovah tiri den wan di e teki fesi na ini a ten disi.

¹¹ Yehovah e tiri a pipel fu en ete na ini a ten disi. A e du dati nanga yepi fu en Wortu èn nanga yepi fu en Manpkin di de na ede fu a gemeente. Wi man si taki Yehovah  e tan gebroiki libisma fu teki presi gi en? Iya. Prakseri fu eksempre san ben psa baka a yari 1870. Charles Taze Russell nanga den mati fu en bigin ferstan taki a yari 1914 ben o de wan prenspari yari. Soleki fa Bijbel profeititori e sori, dan a yari dati a Kownukondre fu Gado ben o seti (Dan. 4:25, 26). Den kon sabi disi fu di den ondrosuku Bijbel èn den ben abi a fertrow taki den ben o si fa den profeititori na ini ben o kon tru. A de so taki Yehovah ben e tiri den di den ben e ondrosuku Bijbel? A de krin taki Yehovah ben e tiri den. Den sani di psa na ini 1914 e sori krin taki Gado Kownukondre ben bigin tiri. A yari dati a Fosi Grontapufeti bigin, baka dati takru siki kiri ip’ipi sma èn gronseki nanga angriten ben de na a wan presi baka a trawan (Luk. 21:10, 11). A de krin taki na Yehovah ben e gebroiki den ret’ati Bijbel Ondrosukuman disi fu yepi a pipel fu en.

12-13. San den brada di ben e teki fesi du na a ten fu a Di Fu Tu Grontapufeti fu meki a preikiwroko go na fesi?

¹² Prakseri tu san psa na a ten fu a Di Fu Tu Grontapufeti. Den brada na a edekantoro studeri Openbaring 17:8 finfini. Ne den kon si taki a grontapufeti no ben o tyari Armagedon kon. Na so den kon sabi taki baka a grontapufeti disi, wan pisi ten fu freide ben o de èn Yehovah Kotoigi ben o man preiki gi moro sma srefi na ini a pisi ten dati. Sobun, den brada seti a skoro di wi sabi now leki a Waktitoren Bijbelskoro Gilead. A skoro disi ben seti fu train zendeling fu preiki èn fu gi leri na ini kondre na heri grontapu. Den zendeling ben e go na tra kondre srefi na a ten fu a feti. Boiti dati, a koni srafu di de fu fertrow seti a skoro Les na ini a Theokrasia Diniwroko, b fu yepi ala sma na ini ala gemeente fu tron moro bun preikiman nanga leriman. Na den fasi disi Gado ben e sreka a pipel fu en gi a wroko di ben de fu du.

¹³ Na ini a ten disi, wi man si krin taki Yehovah ben e tiri a pipel fu en na ini a muilek ten dati. Sensi a Di Fu Tu Grontapufeti, a pipel fu Yehovah ben man preiki fri na ini furu kondre. Fu taki en leti, furu  sma kon sabi Yehovah èn den futuboi fu en e preiki na heri grontapu.

14. Fu san ede wi kan fertrow den rai di wi e kisi fu Yehovah en organisâsi èn fu den owruman di a poti? (Openbaring 2:1) (Luku a prenki.)

¹⁴ Na ini a ten disi, den brada fu a Tiri Skin e tan suku a tiri fu Krestes. Den wani taki den rai di den e gi den brada nanga sisa musu kruderi nanga a fasi fa Yehovah nanga Yesus e si sani. Èn den e gebroiki kring-owruman nanga gemeente owruman fu teki fesi na ini den gemeente. c Den salfu owruman èn sosrefi ala den owruman na ini den gemeente de na ini Krestes en ret’anu. (Leisi Openbaring 2:1.) A no de fu taki dati den owruman disi na sondu libisma èn den e meki fowtu. Moses nanga Yosua ben e meki fowtu son leisi èn den apostel ben e du dati tu (Num. 20:12; Yos. 9:14, 15; Rom. 3:23). Ma wi kan si krin taki Yesus e tiri a koni srafu di de fu fertrow èn sosrefi den owruman di a poti fu teki fesi. A o tan du dati „ala dei te na a kaba fu grontapu” (Mat. 28:20). Dati meki wi abi ala reide fu fertrow den rai di wi e kisi nanga yepi fu den brada di a poti fu teki fesi.

WI E KISI WINI TE WI E TEKI A TIRI FU YEHOVAH

15-16. San yu leri fu den ondrofenitori fu den wan di teki a tiri fu Yehovah?

¹⁵ Te wi e tan teki a tiri fu Yehovah, dan wi e kisi blesi srefi na ini a ten disi. Fu eksempre, Andy nanga Robyn ben teki a rai di den kisi fu libi wan simpel libi. Dati meki den ben man go yepi fu bow Kownukondre zaal nanga tra gebow fu Yehovah Kotoigi. Robyn e taki: „Son leisi wi ben e tan na presi di ben pkin srefsrefi èn nofo tron den presi disi no ben abi wan kukru. Èn aladi mi ben lobi meki fowtow, mi seri furu fu den camera nanga den lens fu mi. Mi krei di mi seri den sani dati. Ma neleki Abraham en wefi, Sara, mi besroiti fu no sari, ma fu si en leki wan grani taki mi ben kan du den sani disi gi Yehovah” (Hebr. 11:15). Fa a trowpaar disi kisi wini fu den kenki di den tyari kon? Robyn e taki: „Wi breiti srefsrefi fu di wi sabi taki wi e gi Yehovah ala san wi abi. Te mi nanga mi masra e wroko gi Yehovah, dan wi man si kba fa a libi o de na ini a nyun grontapu.” Andy e taki: „Wi e prisiri fu di wi e gebroiki ala wi ten nanga krakti fu horbaka gi a Kownukondre.”

 ¹⁶ San na wan tra fasi fa wi e kisi wini te wi e teki a tiri fu Yehovah? Baka di Marcia klari middelbaar skoro, a kisi a rai fu go pionier èn a ben wani du dati trutru (Mat. 6:33; Rom. 12:11). A e taki: „Mi ben kisi wan studiebeurs fu go studeri fo yari na wan universiteit. Ma mi ben wani du moro gi Yehovah. Dati meki mi besroiti fu go leri du wan wroko fu sorgu misrefi so taki mi ben man pionier. Dati ben de wan fu den moro bun besroiti di mi teki. Now mi de wan gewoon pionier èn mi de koloku. Fu di mi srefi kan besroiti o furu mi e wroko, meki mi man yepi na Betel èn mi man du furu tra moi sani gi Yehovah.”

17. Sortu tra wini wi o kisi te wi e tan teki a tiri fu Yehovah? (Yesaya 48:17, 18)

¹⁷ Son leisi wi e kisi rai di e yepi wi fu no feti baka gudu èn fu no du sani di kan meki wi psa den wet fu Gado. Te a abi fu du nanga den sani dati, dan wi o kisi wini te wi e teki a tiri fu Yehovah. Wi o tan abi wan krin konsensi èn wi o man wai pasi gi furu problema (1 Tim. 6:9, 10). Na so wi o man dini Yehovah fayafaya. Nowan enkri sani kan gi wi moro prisiri leki dati.​—Leisi Yesaya 48:17, 18.

18. Fu san ede yu wani tan teki a tiri fu Yehovah?

¹⁸ A de krin taki Yehovah o tan gebroiki libisma fu tiri wi na a ten fu a bigi banawtu èn te na ini a Dusun Yari Tiri (Ps. 45:16). Ma wi o tan teki a tiri dati, awinsi wi ben o wani du sani tra fasi? A o moro makelek fu du dati te wi e teki a tiri fu Yehovah nownow kba. Sobun, meki wi tan teki a tiri di wi e kisi fu Yehovah èn fu den man di a poti fu luku den skapu fu en (Yes. 32:1, 2; Hebr. 13:17). Wi kan abi ala fertrow na ini wi Tiriman, Yehovah, fu di a e yepi wi fu wai pasi gi iniwan sani di kan pori a matifasi di wi abi nanga en. Èn san moro prenspari, na taki a e tyari wi go na ini a nyun grontapu pe wi o kisi têgo libi.