1. ¿Tuku xlakata kilistalanitkan xtapulalit Jehová? Kalichuwinanti akgtum liʼakxilhtit.

 KALILAKPUWANTI pi tsankganita kʼakgtum lanka kakiwin. Lhuwa anan tuku kalipekua wili milatamat: anan animales nema wanankgo, tipalhuwa luwa nema lakapala namakgniyan komo naxkayan chu laklanka talhpan o niku lakgaju niku max xtamakgwasti. ¿Ni xlikana pi lu tlan xlimakgkatsi komo chatum tiku liwana lakgapasnan anta xpulalin chu xmakgtayan xlakata nitu x’akgspulan? Kkakilhtamaku niku lamaw xtachuna la akgtum lanka kakiwin. Litsama lhuwa tuku nitlan, liwaka tuku laktlawaputun chuna la talalinaw Jehová. Pero kgalhiyaw lu xatlan pulalina: Jehová. Xla kinkawaniyan tukuya tiji kili’anatkan xlakata nitu nakinkaʼakgspulayan chu tlan nachanaw kxasasti kakilhtamaku, niku tlan nalatamayaw putum kilhtamaku.

2. ¿La kinkapulalinan Jehová?

² ¿La kinkapulalinan Jehová? Tuku tlakg maklakaskin wa xTachuwin. Pero na kamaklakaskin latamanin. Akgtum liʼakxilhtit, maklakaskin «skujni xatalipaw chu xaskgalala» tiku kinkamaxkiyan tuku matliwakglha kintakanajlakan xlakata chuna tlan nalaksakaw tuku tlan (Mat. 24:45). Pero ni kajwatiya umakgolh lakchixkuwin kamaklakaskin Jehová xlakata nakinkapulalinan. Superintendentes de circuito chu lakgkgolotsin xalak congregación na kinkamaʼakgpuwantinikgoyan chu kinkamaxkikgoyan tastakyaw xlakata natayaniyaw tuku tuwa. Lu paxtikatsiniyaw Jehová pi kinkapulalinan kʼuma lu xatuwa kilhtamaku. Uma kinkamakgtayayan chuntiya xʼamigos nalitaxtuyaw chu chuntiya naʼanaw ktiji nema linan klatamat.

3. ¿Tuku nalichuwinanaw kʼuma artículo?

³ Maski chuna, max min kilhtamaku tuwa makgkatsiyaw nastalaniyaw xtapulalit Jehová, liwaka xlakata kamaklakaskima lakchixkuwin tiku makglakgalhinanin. ¿Tuku xlakata? Max xlakata nakinkawanikgoyan tuku akinin ni kgaxmatputunaw. O max  xlakata lakpuwanaw pi xtastakyawkan ni lu litamakgtayakan, chu wa xlakata max nawanaw pi ni wa Jehová kamaklakaskima. Ama kilhtamaku tlakg talakaskin nalipawanaw pi Jehová kapulalima xkachikin chu pi lu tlan nakinkakitaxtuniyan komo wa nastalaniyaw xtapulalit. Kʼuma artículo nalichuwinanaw pulaktutu tuku nakinkamakgtayayan tlakg nalipawanaw Jehová: 1) la kapulalilh Jehová xkachikin makgasa, 2) la kinkapulaliman la uku, chu 3) tuku tlan kitaxtu komo ankgalhin nastalaniyaw xtapulalit.

LA PULALILH JEHOVÁ KACHIKIN ISRAEL

4, 5. ¿La limasiyalh Jehová pi xmaklakaskima Moisés xlakata nakapulalin israelitas? (Kaʼakxilhti xmakni revista).

⁴ Jehová laksakli Moisés xlakata xkatamakxtulh israelitas kʼEgipto chu lhuwa tuku kalimasiyanilh pi wa uma chixku tiku xla xlaksaknit xlakata nakapulalin. Pulaktum tuku kalimasiyanilh wa puklhni nema xlakan xʼakxilhkgo kakuwani chu lhkuyat nema x’akxilhkgo katsisni (Éx. 13:21). Moisés stalanilh puklhni chu lhkuyat, chu chuna xla chu israelitas chankgolh kxaSpinini pupunu. Akxni israelitas akxilhkgolh pi kxlakatinkan xwi lanka pupunu chu kxchankgenkan xmimakgo egipcios, lu pekuankgolh. Lakpuwankgolh pi Moisés lu nitlan tuku tlawalh xlakata anta kalilh. Pero uma ni xlikana xwanit. Wa Jehová tiku tlawalh pi Moisés xkalilh anta (Éx. 14:2). Chu alistalh Jehová tlawalh akgtum milagro nema kaks malakawaninan xlakata xkalakgmaxtulh (Éx. 14:​26-28).

⁵ Moisés stalanilh puklhni 40 kata xlakata tlan xkapulalilh xkachikin Dios kdesierto. a Xmin kilhtamaku Jehová xtlawa pi puklhni xtawilalh kxʼakgpun aktsu chiki xaxuwa niku Moisés xwi xlakata putum israelitas xʼakxilhkgolh (Éx. 33:​7, 9, 10). Lata kpuklhni, Jehová xtachuwinan Moisés, chu alistalh Moisés xkalitachuwinan kachikin tuku xwanit Jehová (Sal. 99:7). Chuna israelitas liwana xʼakxilhkgo pi Jehová xlimaklakaskima Moisés xlakata nakapulalin.

6. ¿La makgamakglhtinankgolh israelitas xtapulalit Jehová? (Números 14:​2, 10, 11).

⁶ Lu nitlan, pero lhuwa israelitas ni makgamakglhtinankgolh pi Jehová xlaksaknit Moisés xlakata nakapulalin (kalikgalhtawakga Números 14:​2, 10, 11). Xlakata makglhuwa lakgmakgankgolh Moisés, Jehová ni kamaxkilh talakaskin natanukgo ktiyat nema xkamalaknuninit (Núm. 14:30).

7. ¿Tiku stalanikgolh xtapulalit Jehová? (Números 14:24; na kaʼakxilhti dibujo).

⁷ Pero na anankgolh israelitas tiku stalanikgolh xtapulalit Jehová. Akgtum liʼakxilhtit, Jehová wa: «Caleb [...] xliputum xnaku chuntiya kiskujnanilh» (kalikgalhtawakga Números 14:24). Dios sikulunatlawalh chu asta maxkilh talakaskin pi xlaksakli niku xʼamputun latama kCanaán (Jos. 14:​12-14). Xtachuna la Caleb, israelitas tiku latamakgolh alistalh, stalanikgolh xtapulalit Jehová. Biblia wan pi «lu maxkikgolh kakni» Josué, chixku tiku Jehová laksakli xlakata xtawilalh xlakgxokgo Moisés chu xpulalilh xkachikin (Jos. 4:14). Wa xlakata Jehová kasikulunatlawalh chu kamaxkilh tiyat nema xkawaninit pi nakamaxki (Jos. 21:​43, 44).

8. ¿La kapulalilh Jehová xkachikin akxni xwilakgolha mapakgsinanin? (Na kaʼakxilhti dibujo).

⁸ Titaxtulh kilhtamaku, Jehová kalaksakli jueces xlakata xpulalinkgolh xkachikin. Alistalh, akxni xkgalhikgoya xmapakgsinakan, kalaksakli palakachuwinanin xlakata napulalin xkachikin. Mapakgsinanin tiku ni xmakgxtakgkgo Jehová kgaxmatkgolh xtastakyawkan palakachuwinanin. Akgtum liʼakxilhtit, mapakgsina David taktujulh chu makgamakglhtinalh xtastakyaw palakachuwina Natán (2 Sam. 12:​7, 13;  1 Crón. 17:​3, 4). Mapakgsina Jehosafat kuenta tlawanilh tuku wanilh palakachuwina Jahaziel chu kamaʼakgpuwantinilh tiku xlamakgo kJudá pi xkakanajlanikgolh xpalakachuwinanin Dios (2 Crón. 20:​14, 15, 20). Chu akxni xtitaxtumakgo tuku tuwa, mapakgsina Ezequías skinilh xtamakgtay palakachuwina Isaías (Is. 37:​1-6). Akxni mapakgsinanin kstalanikgo xtapulalit Jehová, xla xkasikulunatlawa chu xkuentajtlawa kachikin (2 Crón. 20:​29, 30; 32:22). Liwana xtasiya pi Jehová xkamaklakaskima palakachuwinanin xlakata napulalin xkachikin. Pero lhuwa mapakgsinanin chu israelitas kalakgmakgankgolh (Jer. 35:​12-15).

LA KAPULALILH JEHOVÁ XAPULANA KSTALANINANIN CRISTO

9. ¿La kapulalilh Jehová kstalaninanin Cristo xalak pulana siglo? (Na kaʼakxilhti dibujo).

⁹ Kxapulana siglo, Jehová lakkaxwililh congregación xla kstalaninanin Cristo. ¿La pulalilh xkachikin ama kilhtamaku? Laksakli Jesús xlakata xʼakgxakga congregación xlitaxtulh (Efes. 5:23). Pero Jesús ni xkatachuwinan chatunu kstalaninanin xlakata xkawanilh tuku xlitlawatkan xwanit, wata xkamaklakaskin apóstoles chu lakgkgolotsin xalak Jerusalén xlakata napulalin taskujut (Hech. 15:​1, 2). Nachuna, kʼakgatunu congregación kalaksakka lakgkgolotsin xlakata xkapulalinkgolh natalan (1 Tes. 5:12; Tito 1:5).

10. 1) ¿La makgamakglhtinankgolh kstalaninanin Cristo xalak pulana siglo xtapulalit Jehová? (Hechos 15:​30, 31). 2) ¿Tuku xlakata makgapitsi ni kamakgamakglhtinankgolh tiku Jehová xkalaksaknit xlakata xkapulalinkgolh? (Kaʼakxilhti recuadro « ¿Tuku xlakata makgapitsin kalakgmakgankgo tiku Jehová kalaksaknit?»).

¹⁰ ¿La makgamakglhtinankgolh kstalaninanin Cristo xalak pulana siglo xtapulalit Jehová? Lhuwa tiku xatapaxuwan makgamakglhtinankgolh. Biblia wan pi «lu lipaxuwakgolh xlakata tlan kamamakgkatsinika» (kalikgalhtawakga Hechos 15:​30, 31). ¿Chu la pulalima Jehová xkachikin xala uku?

LA KINKAPULALINAN JEHOVÁ LA UKU

11. Kalichuwinanti akgtum liʼakxilhtit nema limasiya la Jehová kapulalinit xkachikin xala uku.

¹¹ Kkinkilhtamakujkan, Jehová chuntiya maklakaskima xTachuwin chu xKgawasa, tiku x’akgxakga congregación litaxtu, xlakata napulalin xkachikin. ¿Anan tuku limasiya pi Jehová chuntiya kamaklakaskima lakchixkuwin xlakata napulalin xkachikin? Chuna. Kalilakpuwaw  tuku lalh akxni xʼamaja sputa siglo akgkunajatsa. Charles Russell chu xmakgtayananin akgatekgskgolh pi kkata 1914 wi tuku xlakaskinka xʼama tlawa xTamapakgsin Dios (Dan. 4:​25, 26). ¿Tuku xlakata chuna xlakpuwankgo? Xlakata lakputsananikgolh tuku Biblia xwanit pi xʼama la. Chu Jehová sikulunatlawalh xtaskujutkan. Tuku lalh kkakilhtamaku kkata 1914 limasiyalh pi xTamapakgsin Dios xtsukunita mapakgsinan: ama kilhtamaku tsukulh xaPulana Guerra kxLikalanka Katiyatni chu analh lhuwa tajatat, tachikilh tiyat chu analh tatsinksni (Luc. 21:​10, 11). Liwana tasiyalh pi Jehová xkamaklakaskima umakgolh lakchixkuwin xlakata namakgtaya xkachikin.

12, 13. ¿Tuku tlawaka akxni xlamajku xliʼAkgtiy Guerra kxLikalanka Katiyatni xlakata tlakg xlichuwinanka Dios chu xmasiyaka?

¹² Na kalilakpuwaw tuku lalh akxni xlamajku xliʼAkgtiy Guerra kxLikalanka Katiyatni. Natalan tiku xpulalinankgo lakputsananikgolh tuku wan Apocalipsis 17:​8, chu akgatekgskgolh pi akxni ksputli xliʼAkgtiy Guerra kxLikalanka Katiyatni nina xʼama chin Armagedón, wata xʼama anan tsinu takaksni nema xʼama kamaxki talakaskin tlakg xlichuwinankgolh xatlan tamakatsinin. Wa xlakata, xkachikin Jehová lakkaxwililh tuku max makgapitsin lakpuwankgolh pi ni lu tlan xwanit: lakkaxwililh Colegio Superior Bíblico de la Watchtower de Galaad b xlakata xkamakgtayaka misioneros tlakg liwana nalichuwinankgo Dios chu namasiyakgo kʼatanu kachikinin. Chu maski xlamajku guerra, kamalakgachaka natalan ktanu tanu países. Nachuna, skujni xatalipaw lakkaxwililh Curso en el Ministerio Teocrático c xlakata xkamakgtayaka putum publicadores tlakg tlan namakgalhtawakgenankgo. Putum uma kamakgtayalh kskujnin Jehová xlakata tlan xmakgantaxtikgolh taskujut nema aku xʼamakgo tlawakgo.

¹³ Liwana tasiya pi Jehová kapulalilh xkachikin kʼuma lu xatuwa kilhtamaku. Lata sputli xliʼAkgtiy Guerra kxLikalanka Katiyatni, kskujnin Jehová tlan lichuwinankgonit xatlan tamakatsinin klakalhuwa kachikinin. Lhuwa latamanin lakgapaskgonit Jehová, chu la uku lichuwinamaka xatlan tamakatsinin kxlikalanka Katiyatni.

14. ¿Tuku xlakata tlan nalipawanaw xkachikin Jehová chu tlan nakalipawanaw lakgkgolotsin tiku xla kalaksaknit xlakata nakinkapulalinan? (Apocalipsis 2:1; na kaʼakxilhti dibujo).

¹⁴ La uku, lakgkgolotsin tiku xatalaksakni chuntiya putsakgo xtapulalit Cristo. Lu liskujkgo xlakata tuku nakinkawanikgoyan pi kilitlawatkan wa tuku Jehová chu Jesús lakaskinkgo. Chu kamaklakaskinkgo superintendentes de circuito chu lakgkgolotsin xlakata nakamakatsinikgo congregaciones tuku xlitlawatkan. d Lakgkgolotsin tiku xatalaksakni, chu putum amakgapitsin lakgkgolotsin, wilakgo «kxpakgastakat» Cristo (kalikgalhtawakga Apocalipsis 2:1). Xlakata makglakgalhinanin, min kilhtamaku tlawakgo tuku nitlan chuna la Moisés, Josué chu apóstoles (Núm. 20:12; Jos. 9:​14, 15; Rom. 3:23). Pero liwana katsiyaw pi Jesús kapulalima skujni xatalipaw chu lakgkgolotsin xalak congregación, chu chuntiya nakapulalin «chali chali asta kxlisputni kakilhtamaku» (Mat. 28:20). Wa xlakata, pulaklhuwa tuku kinkalimasiyaniyan pi tlan nakalipawanaw tiku Jehová kalaksaknit xlakata nakinkapulalinan.

TUKU TLAN KITAXTU AKXNI STALANIKAN XTAPULALIT JEHOVÁ

15, 16. ¿Tuku masiyaniyan xliʼakxilhtitkan natalan tiku mastakgonit talakaskin pi Jehová nakapulalin?

¹⁵ Ankgalhin tlan kitaxtu akxni stalaniyaw xtapulalit Jehová. Akgtum liʼakxilhtit, Andy chu xpuskat, Robyn, stalanikgolh tastakyaw nema mastalh Jesús, pi ni lhuwa tuku nakgalhikan (kaʼakxilhti xliʼakgtiy nota de estudio xla Mateo 6:​22, anta kBiblia de estudio). Tuku tlawakgolh kamaxkilh talakaskin namakgtayanankgo niku katlawamaka Pukgalhtawakga. Robyn wan: «Minit kilhtamaku ktawilanitaw niku lu kalakgtsu, chu makglhuwa ni kkgalhinitaw niku naktlawayaw kiliwatkan. Nachuna, akit lu klakgati ktamakxtu fotos, pero talakaskilh naksta makgapitsi kincámaras chu atanu tuku xakmaklakaskin xlakata naktamakxtu fotos. Maski lu xaklipuwama akxni kstalh, liwana xaklakpuwanit nakstalani xliʼakxilhtit Sara, xpuskat Abrahán, chu ni wa klilakpuwa tuku xakmakgxtakgma, wata klilakpuwa tuku xakkama makgamakglhtinan» (Heb. 11:15). ¿La limakgkatsikgonit tuku laksakkgolh natlawakgo? Robyn wan: «Lu kpaxuwayaw xlakata kkatsiyaw pi kmaxkimaw Jehová putum tuku kkgalhiyaw. Tapaxuwan nema kmakgkatsiyaw akxni kskujnaniyaw Jehová kaj tsinu kinkalimasiyaniyan la nawan latamat kxasasti kakilhtamaku».  ¿Chu tuku lakpuwan Andy? Xla wan: «Lu kpaxuwayaw xlakata ktlawamaw putum tuku kmatlaniyaw xlakata naktatayayaw xTamapakgsin Dios».

¹⁶ ¿Tuku atanu tlan kitaxtu akxni stalaniyaw xtapulalit Jehová? Kalichuwinaw tuku titaxtulh chatum tala tiku wanikan Marcia. Akxni masputulh xtakgalhtawakga xalak escuela, lakpuwa naliskuja la precursora regular (Mat. 6:33; Rom. 12:11). Marcia wan: «Akgtum universidad kimalaknunilh akgtum beca akgtati kata. Pero akit tlakg xakskujnaniputun Jehová, wa xlakata klaksakli naktanu kʼakgtum escuela técnica xlakata xakkatsinilh akgtum taskujut nema xkimakgtayalh nakkgalhi tsinu tumin chu precursora naklitaxtu. Wa uma tuku tlakg tlan klaksaknit kkilatamat. La uku precursora regular akit, chu taskujut nema kkgalhi kimaxki talakaskin nakmakgtayanan kBetel chu naklipaxuwa atanu taskujut kxkachikin Jehová».

17. ¿Tuku tlan kinkakitaxtuniyan akxni stalaniyaw xtapulalit Jehová? (Isaías 48:​17, 18).

¹⁷ Min kilhtamaku, xkachikin Jehová kinkastakyawayan xlakata tlan nakinkakitaxtuniyan. Akgtum liʼakxilhtit, kinkawaniyan tuku nitlan kitaxtu akxni paxkikan tumin chu akxni tlawakan tuku lakatsala xlimapakgsin Jehová. Akxni stalaniyaw xtapulalit Jehová tlan kinkakitaxtuniyan, xlakata skulunku tawila kintalakapastaknikan chu ni kiʼakstukan malhuwiyaw kintaʼakglhuwitkan (1 Tim. 6:​9, 10). Uma kinkamakgtayayan wa tlakg kuenta natlawayaw chuna la skujnanimaw Jehová. Chu uma tlawa pi napaxuwayaw chu nakgalhiyaw takaksni (kalikgalhtawakga Isaías 48:​17, 18).

18. ¿Tuku xlakata ankgalhin stalaniputuna wix xtapulalit Jehová?

¹⁸ Jehová chuntiya nakamaklakaskin latamanin xlakata napulalin xkachikin akxni lama nawan lhuwa tapatin chu akxni namapakgsinan Cristo Akgtum Mil Kata (Sal. 45:16). Ama kilhtamaku, ¿chuntiya nastalaniyaw xtapulalit asta maski natalakaskin nalimakgxtakgaw tuku akinin lakgatiyaw? Komo la uku kgalhakgaxmatnanaw, tlakg ni tuwa katimakgkatsiw nakgalhakgaxmatnanaw kkilhtamaku nema aku mima. Wa xlakata, ankgalhin kastalaniw xtapulalit Jehová, chu uma kilhchanima pi na nakakgalhakgaxmataw lakchixkuwin tiku xla kalaksaknit nakinkapulalinkgoyan (Is. 32:​1, 2; Heb. 13:17). Anan pulaklhuwa tuku xlakata tlan nalipawanaw Jehová, kimPulalinakan, tiku kinkamakgtayayan xlakata nitu nalaktlawa chuna la talalinaw chu nachanaw kxasasti kakilhtamaku, niku tlan nalatamayaw putum kilhtamaku.