1. Hikwalahokayini hi lava ku kongomisiwa hi Yehovha? Vula xikombiso.

 A HI nge u lahlekile ekhwatini naswona ekhwatini rolero ku ni swilo leswi nga ni khombo swo fana ni swivandzana, switsotswana leswi nga ni mavabyi, swimilana swa chefu ni magoji lawa u nga welaka eka wona. U nga swi tlangela loko u ri ni mukongomisi loyi a tivaka laha ku nga ni makhombo wolawo naswona a ku pfuna ku ma papalata. Misava leyi yi fana ni khwati rolero. Yi tele hi makhombo lama nga dlayaka vuxaka bya wena na Yehovha. Kambe hi ni Mukongomisi lonene Yehovha. U hi yisa ekule ni makhombo ivi a hi kongomisa emisaveni leyintshwa laha hi nga ta kuma vutomi lebyi nga heriki.

2. Xana Yehovha u hi kongomisa njhani?

² Yehovha u hi kongomisa njhani? Xa nkoka swinene, u hi kongomisa hi Rito rakwe ku nga Bibele. Nakambe u tlhela a tirhisa vanhu leswaku va hi kongomisa. Hi xikombiso, u tirhisa “nandza wo tshembeka ni wo tlhariha” leswaku a hi phamela swakudya leswi hi tiyisaka ripfumelo hi kota ku endla swiboho swa vutlhari. (Mat. 24:45) Yehovha u tlhela a tirhisa vavanuna lava fanelekaka leswaku a hi kongomisa. Hi xikombiso, valanguteri va miganga ni vakulu emavandlheni va hi khutaza ni ku hi nyika swiletelo leswi nga ta hi pfuna hi tiyisela swiphiqo. Ha swi tlangela swinene leswi Yehovha a hi kongomisaka hi ndlela leyinene emikarhini leyi yo nonon’hwa makumu ma nga si fika. Sweswo swi hi pfuna leswaku hi tshama hi ri karhi hi amukeriwa hi Yehovha ni ku ya emahlweni hi famba endleleni leyi yisaka evuton’wini.

3. Hi ta bula hi yini eka nhlokomhaka leyi?

³ Hambiswiritano, mikarhi yin’wana swi nga hi tikela ku yingisa nkongomiso wa Yehovha, ngopfungopfu loko hi nyikiwa wona hi vanhu lava endlaka swihoxo. Hikwalahokayini? Hikuva va nga hi nyika nkongomiso lowu nga fambisaniki ni ngati ya hina. Kumbexana hi nga vona onge nkongomiso wolowo a wu twali ivi hi tibyela  leswaku a wu humi eka Yehovha. Eka swiyimo swo tano, swi ta lava hi titsundzuxa leswaku Yehovha hi yena a kongomisaka vanhu vakwe nileswaku swa vuyerisa ku yingisa nkongomiso wakwe. Leswaku hi twa leswi nga hi pfunaka ku tshemba nkongomiso wakwe, eka nhlokomhaka leyi hi ta bula hi (1) ndlela leyi Yehovha a va kongomiseke hayona vanhu vakwe emikarhini ya Bibele, (2) ndlela leyi a hi kongomisaka hayona namuntlha ni (3) ndlela leyi hi nga vuyeriwaka hayona loko hi nga tshiki ku landzela nkongomiso wakwe.

NDLELA LEYI YEHOVHA A VA KONGOMISEKE HAYONA VAISRAYELE

4-5. Yehovha u swi kombise njhani leswaku a a tirhisa Muxe ku kongomisa Vaisrayele? (Vona xifaniso lexi nga eka xifunengeto.)

⁴ Yehovha u hlawule Muxe leswaku a humesa Vaisrayele eEgipta. U tlhele A komba Vaisrayele vumbhoni bya leswaku A A va kongomisa hi ku tirhisa Muxe. Hi xikombiso, A A va rhangela hi ku tirhisa papa ninhlikanhi kasi nivusiku A A va voningela hi ku tirhisa ndzilo. (Eks. 13:21) Muxe u landzelele papa leri yiseke yena ni Vaisrayele eLwandle ro Tshwuka. Vanhu va sungule ku chava hileswi emahlweni ka vona a va siveriwe hi lwandle kasi endzhaku ka vona a va hlongorisiwa hi vuthu ra Vaegipta leri a ri lava ku va dlaya. Va vule leswaku Muxe u endle xihoxo hi ku va tisa eLwandle ro Tshwuka. Kambe a ku nga ri xihoxo. Yehovha u tirhise Muxe leswaku a kongomisa vanhu vakwe endhawini yoleyo. (Eks. 14:2) Endzhaku ka sweswo, Xikwembu xi va ponise hi ndlela yo hlamarisa.—Eks. 14:​26-28.

⁵ Eka malembe ya 40 lama landzeleke, Muxe u ye emahlweni a titshega hi papa leswaku a kongomisa vanhu va Xikwembu emananga. a Ku ringana nkarhi wo karhi, Yehovha u veke papa ehenhla ka tende ra Muxe laha Vaisrayele hinkwavo a va kota ku ri vona. (Eks. 33:​7, 9-10) Yehovha a a vulavula na Muxe hi ku tirhisa papa rolero naswona Muxe a a hundzisa swileriso sweswo eka vanhu. (Ps. 99:7) Vaisrayele a va ri ni vumbhoni byo tala bya leswaku Yehovha a a tirhisa Muxe ku va kongomisa.

6. Vaisrayele va endle yini loko Yehovha a va kongomisa? (Tinhlayo 14:​2, 10, 11)

⁶ Lexi twisaka ku vava, Vaisrayele va byi be hi makatla vumbhoni lebyi nga lo tlangandla bya leswaku Yehovha a a tirhisa Muxe tanihi Muyimeri wakwe. (Hlaya Tinhlayo 14:​2, 10, 11.) Hi ku phindhaphindha va ale ku pfumela leswaku Muxe a a tirhisiwa hi Yehovha. Hikwalaho ka sweswo, Yehovha a nga va pfumelelanga Vaisrayele volavo leswaku va nghena eTikweni leri Tshembisiweke.—Tinhl. 14:30.

7. Vula swikombiso swa lava yingiseke nkongomiso wa Yehovha. (Tinhlayo 14:24) (Nakambe vona xifaniso.)

⁷ Hambiswiritano, ku ni Vaisrayele van’wana lava landzeleke nkongomiso wa Yehovha. Hi xikombiso, Yehovha u te: ‘Kalebe u ndzi yingise hi mbilu hinkwayo.’ (Hlaya Tinhlayo 14:24.) Xikwembu xi katekise Kalebe ni ku tlhela xi n’wi pfumelela a hlawula laha a lavaka ku tshama kona etikweni ra Kanana. (Yox. 14:​12-14) Vaisrayele lava pfumeleriweke ku nghena eTikweni leri Tshembisiweke va veke xikombiso lexinene xa ku yingisa nkongomiso wa Yehovha. Loko Yoxuwa a sive Muxe tanihi murhangeri loyi a hlawuriweke, Vaisrayele va “n’wi xixime swinene vutomi byakwe hinkwabyo.” (Yox. 4:14) Yehovha u va katekisile hikwalaho ka sweswo hi ku va nghenisa etikweni leri a va tshembiseke rona.—Yox. 21:​43, 44.

8. Hlamusela ndlela leyi Yehovha a kongomiseke vanhu vakwe hayona hi nkarhi lowu a va fumiwa hi tihosi. (Nakambe vona xifaniso.)

⁸ Emalembeni lama landzeleke, Yehovha u vekele vanhu vakwe vaavanyisi. Endzhaku ka  sweswo, loko vanhu vakwe va fumiwa hi tihosi, Yehovha u hlawule vaprofeta leswaku va va kongomisa. Tihosi to tshembeka ti yingise switsundzuxo swa vaprofeta. Hi xikombiso, Hosi Davhida u pfumerile ku tshinyiwa hi muprofeta Nathani. (2 Sam. 12:​7, 13; 1 Tikr. 17:​3, 4) Hosi Yehoxafati u titshege hi switsundzuxo swa muprofeta Yahaziyele ni ku tlhela a khutaza vanhu va le Yuda leswaku va ‘tshemba vaprofeta va Xikwembu.’ (2 Tikr. 20:​14, 15, 20) Loko ri n’wi xele kambirhi, Hosi Hezekiya u kombele mpfuno eka muprofeta Esaya. (Esa. 37:​1-6) Mikarhi hinkwayo loko tihosi ti landzela nkongomiso wa Yehovha, A A ti katekisa naswona tiko a ri sirheleleka. (2 Tikr. 20:​29, 30; 32:22) Vanhu hinkwavo a va fanele va swi vonile leswaku Yehovha a a tirhisa vaprofeta vakwe ku va kongomisa. Hambiswiritano, tihosi ni Vaisrayele vo tala a va va yingisanga vaprofeta va Yehovha.—Yer. 35:​12-15.

NDLELA LEYI YEHOVHA A VA KONGOMISEKE HAYONA VAKRESTE VO SUNGULA

9. Yehovha u tirhise vamani leswaku va rhangela Vakreste vo sungula? (Nakambe vona xifaniso.)

⁹ Hi Pentekosta ya 33 C.E., Yehovha u simeke vandlha ra Vukreste. Xana u va kongomise njhani Vakreste volavo vo sungula? U hlawule Yesu leswaku a va nhloko ya vandlha. (Efe. 5:23) Kambe Yesu a nga kongomisanga mudyondzisiwa ha un’we un’we. U tirhise vaapostola ni vakulukumba eYerusalema leswaku ku va vona va rhangelaka. (Mit. 15:​1, 2) Nakambe ku hlawuriwe vakulu leswaku va rhangela emavandlheni.—1 Tes. 5:12; Tito 1:5.

10. (a) Vakreste vo tala va endle yini loko va nyikiwa nkongomiso? (Mitirho 15:​30, 31) (b) Hikwalahokayini vanhu van’wana emikarhini ya Bibele va nga va yingisanga vanhu lava Yehovha a va tirhiseke ku rhangela vanhu vakwe? (Vona bokisi leri nge, “ Leswi Endleke Van’wana Va Bakanya Vumbhoni Lebyi Nga eRivaleni.”)

¹⁰ Xana Vakreste vo sungula va endle yini? Vo tala va vona a swi va tsakisa ku yingisa swiletelo leswi va swi kumeke. Entiyisweni, ‘va tsake ngopfu hileswi va khutaziweke.’ (Hlaya Mitirho 15:​30, 31.) Xana Yehovha u va kongomise njhani vanhu vakwe emalembeni ya sweswinyana?

NDLELA LEYI YEHOVHA A HI KONGOMISAKA HAYONA NAMUNTLHA

11. Vula xikombiso lexi kombisaka ndlela leyi Yehovha a va kongomiseke hayona lava rhangeleke emalembeni ya sweswinyana.

¹¹ Yehovha u ya emahlweni a kongomisa vanhu vakwe namuntlha. U endla tano hi ku tirhisa Rito rakwe ni N’wana wakwe loyi a nga nhloko  ya vandlha. Xana ha byi vona vumbhoni bya leswaku Xikwembu xi ya emahlweni xi tirhisa vanhu lava nga vayimeri va xona? Ina. Hi xikombiso, ehleketa hi leswi endlekeke endzhaku ka lembe ra 1870. Charles Taze Russell ni vanghana vakwe va sungule ku twisisa leswaku lembe ra 1914 a ku ta va lembe ra nkoka leri Mfumo wa Xikwembu wu nga ta simekiwa ha rona. (Dan. 4:​25, 26) Sweswo va swi tive hi leswi va endleke ndzavisiso eBibeleni ni ku tshemba leswaku a va ta vona vuprofeta bya yona byi endleka. Xana Yehovha a a ri eku va kongomiseni loko va endla ndzavisiso wolowo wa le Bibeleni? Ina. Swilo leswi endlekeke laha misaveni hi 1914, swi kombise leswaku Mfumo wa Xikwembu wu sungule ku fuma. Ku ve ni Nyimpi yo Sungula ya Misava naswona endzhaku ka sweswo ku ve ni mintungu, ku tsekatseka ka misava ni ku kayivela ka swakudya. (Luka 21:​10, 11) Hakunene Yehovha a a tirhisa Vakreste volavo vo tshembeka leswaku a pfuna vanhu vakwe.

12-13. Vamakwerhu lava rhangelaka va endle yini leswaku ku chumayeriwa vanhu vo tala hi nkarhi wa Nyimpi ya Vumbirhi ya Misava?

¹² Nakambe ehleketa hi leswi endlekeke hi nkarhi wa Nyimpi ya Vumbirhi ya Misava. Endzhaku ka loko vamakwerhu lava rhangelaka va le ntsindza wa misava hinkwayo va hlaye Nhlavutelo 17:​8, va xiye leswaku nyimpi yoleyo a yi nga ta tisa Armagedoni kambe a ku ta va ni ku rhula endzhaku ka yona loku a ku ta endla leswaku ku chumayeriwa vanhu vo tala. Hambileswi sweswo a swi vonaka swi nga twali, vamakwerhu lava rhangelaka va sungule Kholichi (Xikolo) ya Bibele ya Gilead ya Watchtower leswaku va letela varhumiwa ku ya chumayela ni ku dyondzisa emisaveni hinkwayo. Varhumiwa a va chumayela hambi ku ri hi nkarhi wa nyimpi. Ku engetela kwalaho, nandza wo tshembeka ni wo tlhariha u hlele leswaku ku va ni Dyondzo ya Vutirheli bya le Tilweni b leswaku vamakwerhu emavandlheni va leteriwa ku va vachumayeri ni vadyondzisi lavanene. Hi tindlela leti, vanhu va Xikwembu a va leteriwa ntirho lowu a va ta wu endla enkarhini lowu taka.

¹³ Namuntlha hi kota ku swi vona kahle leswaku Yehovha a a ri eku kongomiseni ka vanhu vakwe hi nkarhi wolowo wo tika. Ku sukela hi nkarhi wa Nyimpi ya Vumbirhi ya Misava, vanhu va Yehovha ematikweni yo tala va tiphine hi ku rhula ni ku chumayela va ntshunxekile.  Entiyisweni, ku ve ni vuyelo lebyinene hikwalaho ka ntirho lowu.

14. Hikwalahokayini hi nga tshembaka nkongomiso lowu humaka eka nhlangano wa Yehovha ni vakulu? (Nhlavutelo 2:1) (Nakambe vona xifaniso.)

¹⁴ Namuntlha vamakwerhu lava nga swirho swa Huvo leyi Fumaka va ya emahlweni va titshega hi Yesu leswaku a va kongomisa. Va lava leswaku swiletelo leswi va swi nyikaka vamakwerhu swi fambisana ni langutelo ra Yehovha na Yesu. Nakambe va tlhela va tirhisa valanguteri va miganga ni vakulu leswaku va kongomisa mavandlha. c Vakulu lava hlawuriweke ku ya fuma na Kreste etilweni va le ka “voko rakwe ra xinene.” (Hlaya Nhlavutelo 2:1.) I ntiyiso leswaku vakulu lava va swi endla swihoxo. Ku fana ni vaapostola, ku ve ni mikarhi leyi Muxe na Yoxuwa va endleke swihoxo. (Tinhl. 20:12; Yox. 9:​14, 15; Rhom. 3:23) Ninamuntlha Kreste u ya emahlweni a kongomisa nandza wo tshembeka ni vakulu naswona u ta ya emahlweni a endla tano “mikarhi hinkwayo kukondza makumu ma fika.” (Mat. 28:20) Hikwalaho hi ni swivangelo swo tshemba nkongomiso lowu a hi nyikaka wona hi ku tirhisa vavanuna lava hlawuriweke leswaku va rhangela.

HA VUYERIWA LOKO HI YA EMAHLWENI HI YINGISA NKONGOMISO WA YEHOVHA

15-16. U dyondza yini eka mitokoto ya vamakwerhu lava yingiseke nkongomiso wa Yehovha?

¹⁵ Loko hi ya emahlweni hi yingisa nkongomiso wa Yehovha, swa hi vuyerisa hambi ku ri sweswi. Hi xikombiso, Andy na Robyn va yingise xitsundzuxo lexi humaka eka nandza wo tshembeka xa leswaku va titsona swo karhi evuton’wini bya vona. (Hev. 13:5) Hikwalaho ka sweswo, va kote ku pfuneta eka tiprojeke to aka miako ya nhlangano. Robyn u ri: “Mikarhi yo tala a hi tshama eka tiyindlu letitsongo leti hakanyingi a ti nga ri na khixi. Nakambe ndzi boheke ku xavisa swilo swo tala leswi a ndzi swi tirhisela ku teka swifaniso hambileswi a ndzi rhandza ku teka swifaniso. Ndzi ririle loko ndzi swi xavisa. Kambe ku fana na Sara nkata Abrahama, a ndzi tiyimisele ku nga tlheleli endzhaku.” (Hev. 11:15) Xana xiboho xa vatekani lava xi va vuyerise njhani? Robyn u ri: “Hi enerisekile swinene hileswi hi tivaka leswaku hi nyika Yehovha hinkwaswo leswi hi nga na swona. Loko hi tirha eka tiprojeke ta nhlangano, hi kota ku vona ndlela leyi vutomi byi nga ta va hayona emisaveni leyintshwa.” Andy u pfumelelana na yena, u ri: “Hi enerisekile hikuva ha swi tiva leswaku swilo hinkwaswo leswi hi nga na swona hi swi tirhisela ku seketela Mfumo.”

 ¹⁶ Hi vuyeriwa hi tindlela tihi tin’wana loko hi nga tshiki ku yingisa nkongomiso wa Yehovha? Endzhaku ka loko Marcia a hete xikolo, a a lava ku tirhela Yehovha nkarhi hinkwawo. (Mat. 6:33; Rhom. 12:11) U ri: “Yunivhesiti yin’wana a yi ndzi tshembisa ku ndzi nghenisa xikolo mahala malembe ya mune.” Kambe a ndzi lava ku endlela Yehovha swo tala. Kutani ematshan’weni yo ya eyunivhesiti, ndzi dyondze ntirho wa mavoko lowu a wu ta ndzi pfuna leswaku ndzi tihanyisa loko ndzi phayona. Xolexo a ku ri xiboho lexinene lexi ndzi tshameke ndzi xi endla. Sweswi ndzi tiphina hi ku va phayona ra nkarhi hinkwawo naswona leswi ntirho wa mina wu ndzi pfumelelaka ku hlawula tiawara leti ndzi ti tirhaka, ndzi kota na ku pfuneta eBethele hi masiku yo karhi ni ku endlela Yehovha mitirho yo tsakisa.”

17. Hi vuyeriwa hi tindlela tihi tin’wana loko hi ya emahlweni hi yingisa nkongomiso wa Yehovha? (Esaya 48:​17, 18)

¹⁷ Mikarhi yin’wana nhlangano wa Yehovha wu hi tsundzuxa leswaku hi papalata ku rhandza mali ku katsa ni swilo leswi nga endlaka hi tlula milawu ya Xikwembu. Loko hi yingisa nkongomiso lowu wa Yehovha swa hi vuyerisa. Hi va ni ripfalo leri baseke ni ku tlhela hi nga tivangeli swiphiqo swo tala. (1 Tim. 6:​9, 10) Hikwalaho ka sweswo, hi kota ku tirhela Yehovha hi mbilu hinkwayo leswi endlaka hi tsaka, hi va ni ku rhula ni ku eneriseka.—Hlaya Esaya 48:​17, 18.

18. Hikwalahokayini u tiyimisele ku ya emahlweni u yingisa nkongomiso wa Yehovha?

¹⁸ A hi kanakani leswaku Yehovha u ta ya emahlweni a tirhisa vanhu lava n’wi yimelaka leswaku va hi nyika nkongomiso hi nkarhi wa nhlomulo lowukulu ni ku ya fika hi nkarhi wa Mfumo wa Gidi ra Malembe. (Ps. 45:16) Xana hi ta ya emahlweni hi yingisa nkongomiso wolowo hambiloko wu nga fambisani ni ku rhandza ka hina? Swi ta hi olovela ku endla tano loko ntsena hi tikarhatela ku yingisa nkongomiso wa Yehovha sweswi. Hikwalaho, mikarhi hinkwayo a hi tiyimiseleni ku yingisa nkongomiso wa Yehovha ku katsa ni lowu hi wu kumaka eka vamakwerhu lava hlawuriweke leswaku va hi kongomisa. (Esa. 32:​1, 2; Hev. 13:17) Loko hi endla tano, hi ta n’wi tshemba hi ku helela Yehovha Mukongomisi wa hina, loyi a hi yisaka ekule ni makhombo lama nga dlayaka vuxaka bya hina na yena ivi a hi fambisa endleleni leyi yisaka emisaveni leyintshwa laha hi nga ta hanya hilaha ku nga heriki.