1. Hi mhaka muni hi fanele hi landzela nkongomiso wa Yehovha? Nyikela xikombiso.

 TIPIMISI na u lahlekile ka khwati la ku chavisa hintamu naswona lani u nga kona ku tale hi swiharhi swa ku chavisa swa ku fana ni tinyoka ni swizavanani. A wu ta titwisa ku yini loko ko humelela munhu lweyi a li tivaka kahle khwati, a ku khoma a ku kongomisa, swaku u fambela kule ni nghozi? Leswo a swi ta ku tsakisa. Phela misava leyi ya fana ni khwati lolelo. Yi tale hi swilo swa ku biha, leswi swi nga wonhaka a wunghanu la hina na Yehovha. Kambe hi na Yehovha, Mukongomisi wamukulu. Yena wa hi khoma a hi kongomisa swaku hi ya ka misava ya nyuwani, funtshi nkama lowu a hi kongomisaka a hi pfuna swaku hi fambela kule ni swilo leswi swi nga hi vavisaka.

2. Yehovha a hi kongomisisa ku yini namuntlha?

² Yehovha a hi kongomisisa ku yini namuntlha? Yehovha a tirhisa Rito la yena ku nga Bibele swaku a hi kongomisa. Kambe a tlhela a tirhisa vanhu swaku va hi kongomisa. Hi xikombiso a tirhisa “mutirhi wa ku tshembeka ni wa ku tlhariha” leswaku a hi nyika leswi hi swi lavaka swaku hi tiyisa wunghanu la hina na Yena ni kuva hi yendla swiboho swaswinene. (Mat. 24:45) Kambe, handle ka mutirhi wa ku tshembeka ni wa ku tlhariha, a tirhisa vavanuna van’wanyani va ku fana ni vadjikelezi ni madoda abandleni leswaku va hi tiyisa va tlhela va hi pfuna loko hi kumana ni swikarhatu. Ha khensa hintamu hi ku va ni vavanuna lava leswaku va hi kongomisa ngopfungopfu ka masiku lawa hi hanyaka ka wona. Phela nkongomiso lowu va hi nyikaka wa hi pfuna swaku hi tama hi va vanghanu va Yehovha ni ku tlhela hi va ni wutomi la ku kala li nga heli ka nkama lowu taka.

3. Hi ta djondza hi yini ka nhlokomhaka leyi?

³ Hambileswo, minkama yin’wani swi nga hi karhatela ku landzela nkongomiso wa Yehovha, ngopfungopfu loko wu ta hi ka vanhu va ku kala ku hetiseka. Hi mhaka muni? Hikusa nkongomiso lowu hi nyikiwaka wona, swi nga yendleka wu nga hi tsakisi, kumbe swi  nga yendleka hi pimisa swaku nkongomiso lowu hi nyikiwaka wona a hi wunene ni swaku a wu ti hi ka Yehovha. Loko leswo swi hi yendlekela, hi fanele hi tama hi tshemba swaku Yehovha hi yena a kongomisaka vanhu va yena ni swaku ku landzela nkongomiso wa yena swi ta hi nyika minkateko. Nhlokomhaka leyi yi ta hi pfuna ku tiva swaku hi nga swi yendlisa ku yini swoleswo. Hi xikombiso, ka nhlokomhaka leyi hi ta vona swaku: 1) Yehovha a va kongomisise ku yini vanhu va yena khale; 2) a va kongomisisa ku yini vanhu va yena namuntlha ni swaku 3) hi pfuneka hi yini loko hi tama hi landzela nkongomiso wa Yehovha.

YEHOVHA A VA KONGOMISISE KU YINI VAYISRAYELE?

4-5. Yehovha a swi kombisise ku yini swaku a a tirhisa Moxe swaku a kongomisa tiko la Israyele? (Vona mufoto wa pajina la ku sungula.)

⁴ Yehovha a lange Moxe swaku a humesa Vayisrayele ka tiko la Gibita. Yena a va kombile Vayisrayele leswaku a a tirhisa Moxe swaku a va kongomisa. Hi xikombiso, ninhlikanhi Yehovha a a va kongomisa hi ku tirhisa rhefu kasi niwusiku a a tirhisa ndzilu. (Eks. 13:21) Moxe a landze rhefu leli swaku a kongomisa Vayisrayele anze va ya fika ka Lwandle La Ku Pshuka kambe Vagibita va game va hlongolisa Vayisrayele. Leswo swi yendle leswaku Vayisrayele va chava hintamu hikusa a va pimisa swaku Vagibita a va ta va dlaya. Se va gama va pimisa swaku Moxe a a nga va kongomisanga hi ndlela yayinene. Kambe Moxe a a nga phazamanga, Yehovha a a va kongomise ka Lwandle La Ku Pshuka leswaku a ya va ponisa hi ku tirhisa Moxe. (Eks. 14:2) Naswona a va ponisile hi ndlela ya ku hlamalisa hintamu swinene. — Eks. 14:26-28.

⁵ Ka 40 wa malembe lawa va nga tshama amananga, Yehovha a tame a tirhisa rhefu swaku a kongomisa tiko la Israyele, a naswona Yehovha a yendle leswaku a rhefu leli li va ahenhla ka tende la Moxe lani Vayisrayele hinkwavu a va li vona. (Eks. 33:7, 9, 10) Se hi ku tirhisa rhefu leli, Yehovha a a vulavula na Moxe se Moxe a hundzisela rungula leli Yehovha a a mu byele lona ka tiko. (Ps. 99:7) Vayisrayele a va swi vona swaku hikakunene Yehovha a a tirhisa Moxe swaku a va kongomisa.

6. I mpsini leswi Vayisrayele van’wani va nga swi yendla? (Tinhlayo 14:2, 10, 11)

⁶ Xa ku vava, hileswaku Vayisrayele va vanyingi a va mu yingisanga Yehovha, hambileswi a swi tikomba swaku i Yehovha lweyi a a va kongomisa hi ku tirhisa Moxe. (Lerha Tinhlayo 14:2, 10, 11.) Hi ku phindhaphindha va yale ku yingisa leswi Moxe a a va byela swona. Hi mhaka leyo, Vayisrayele lavayani a va nghenanga ka Tiko la Xitshembiso. — Tin. 14:30.

7. Nyikela swikombiso swa lava va nga yingisa nkongomiso wa Yehovha. (Tinhlayo 14:24) (Vona mufoto.)

⁷ Kambe ku ve ni Vayisrayele van’wani lava va nga landza nkongomiso wa Yehovha. Hi xikombiso, Yehovha a te: ‘Kalebe . . . a ni yingise hi mbilu hinkwayu.’ (Lerha Tinhlayo 14:24.) Naswona Yehovha a mu katekisile Kalebe hi ku mu tshika a langa ndhawu leyi yena a a lava ku tshama ka yona ka Tiko la Xitshembiso. (Yox. 14:12-14) Phela Vayisrayele lava va nga swi kota ku nghena ka Tiko la Xitshembiso na vona va yendle swilo swaswinene hi ku yingisa nkongomiso wa Yehovha. A buku la Yoxuwa 4:14 li kombisa swaku Yoxuwa a hloniphiwile nkama hinkwawu lowu a nga rhangela tiko la Israyele, loko Moxe se a file. Hi mhaka leyo Yehovha a va katekisile Vayisrayele hi ku va nyika hinkwaswu leswi a a va tshembise swona. — Yox. 21:43, 44.

8. Tlhamusela swaku Yehovha a a va kongomisisa ku yini vanhu va yena ka nkama wa tihosi ta Israyele. (Vona mufoto.)

⁸ Hi ku famba ka nkama, Yehovha a tirhise vayavanyisi swaku a kongomisa vanhu va yena. Naswona ka nkama lowu tiko la Israyele a li ni tihosi, Yehovha a tirhise vaprofeta swaku a va  kongomisa. Tihosi tin’wani ti yingisile nkongomiso lowu a a va nyika wona hi ku tirhisa vaprofeta. Hi xikombiso, Hosi Davhida a pfumelile ku layiwa hi muprofeta Natani nkama a nga djoha. (2 Sa. 12:7, 13; 1 Tik. 17:3, 4) Hosi Yehoxafati a kombele ku kongomisiwa hi muprofeta Yahaziyele naswona a khutaze tiko la Yuda swaku li tshemba vaprofeta va Yehovha. (2 Tik. 20:14, 15, 20) Hosi Hezekiya, a nkama a a li ku karhatekeni a kombele ku pfuniwa hi muprofeta Esaya. (Esa. 37:1-6) Se minkama hinkwayu loko tihosi ti yingisa nkongomiso wa Yehovha, yena a a katekisa tiko a tlhela a li vhikela. (2 Tik. 20:29, 30; 32:22) Swa tikomba swaku Yehovha a a tirhisa vaprofeta swaku a kongomisa vanhu va yena. Hambileswo tihosi ta tinyingi ni vanhu va vanyingi, a va va yingisanga vaprofeta va Yehovha. — Yer. 35:12-15.

YEHOVHA A VA KONGOMISISE KU YINI VAKRESTE VA KU SUNGULA?

9. I vamani lava Yehovha a nga va tirhisa swaku a kongomisa Vakreste ka nkama wa vapostolo? (Vona mufoto.)

⁹ Hi nkama wa vapostolo Yehovha a vumbe bandla la Wukreste. Se Yehovha a va kongomisise ku yini Vakreste hi nkama wolowo? Yehovha a veke Yesu swaku a va nhloko ya bandla. (Efe. 5:23) Kambe Yesu a a nga kongomisi mun’wani ni mun’wani hi ku kongoma. Handle ka leswo, a veke vapostolo ni madoda aYerusalema swaku va rhangela. (Min. 15:1, 2) Naswona madoda a ma vekiwa amabandleni swaku ma kongomisa vamakwerhu. — 1 Tes. 5:12; Tit. 1:5.

10. a) Indjhe Vakreste va nkama wa vapostolo va wu yamukelile nkongomiso lowu a wu ta hi ka Yehovha? (Mintirho 15:30, 31) b) Hi mhaka muni vanhu va nkama lowu wu nga hundza va kalaka va nga pfumelanga ku kongomisiwa hi vanhu lava Yehovha a nga va veka? (Vona kwadru leli nge “ Hi Mhaka Muni Vanhu Van’wani Va Yale Ku Yingisa Nkongomiso Wa Yehovha?”)

¹⁰ Indjhe Vakreste va nkama wa vapostolo va wu yamukelile nkongomiso lowu a wu ta hi ka Yehovha? Ina, a hi kanakani swaku va wu yamukelile. Vanyingi va vona va tsake hintamu hi nkongomiso lowu va nga wu yamukela. Vona a va tsaka hi ku tiyisiwa. (Lerha Mintirho 15:30, 31.) Se namuntlha ke, Yehovha a va kongomisisa ku yini vanhu va yena?

YEHOVHA A VA KONGOMISISA KU YINI VANHU VA YENA NAMUNTLHA?

11. Nyikela xikombiso xa leswi Yehovha a va kongomisisaka xiswona lava rhangelaka ka nhlengeletanu ya yena namuntlha.

¹¹ Yehovha a tama a kongomisa vanhu va yena namuntlha. A yendla leswo hi ku tirhisa Rito la  yena ku nga Bibele ni N’wana wa yena Yesu ku nga nhloko ya bandla. Se namuntlha ke, indjhe Yehovha a ha tama a tirhisa vavanuna swaku a rhangela nhlengeletanu ya yena? Ina. Hi xikombiso, pimisa hi leswi swi nga yendleka ndzhaku ka loko ku hundze lembe la 1870. Makwerhu Russell ni vanghanu va yena a va swi tiva swaku hi 1914 a ku ta yendleka nchumu wa lisima wa ku yelana ni Mfumu wa Xikwembu. (Dan. 4:25, 26) Kambe leswaku va swi tiva leswo, swi lave va kambisisa wuprofeta la Bibele. Phela hi Yehovha lweyi a nga va kongomisa swaku va twisisa wuprofeta lolelo. Se hi 1914 swi vhele swi tikomba swaku a Mfumu wa Xikwembu se a wu sungule ku fuma hikusa hi lembe lolelo ku ve ni Nyimpi Ya Ku Sungula Ya Misava, ku va ni mavabyi ya manyingi, ku tsekatseka ka misava ni ku pfumaleka ka swakudla. (Luk. 21:10, 11) Phela Yehovha a tirhise vavanuna lava va ku tiveka hansi swaku va pfuna vanhu va yena.

12-13. I mpsini leswi vamakwerhu lava a va rhangela hi nkama wa Nyimpi Ya Wumbirhi Ya Misava va nga swi yendla leswaku ku chumayeliwa hi xitalu?

¹² Tlhela u vona leswi swi nga yendleka ka Nyimpi Ya Wumbirhi Ya Misava. Loko vamakwerhu lava a va rhangela nhlengeletanu hi nkama wolowo va djondze buku ya Nhlawutelo 17:8, va twisise swaku a nyimpi liyani a yi nga ta yendla swaku ku fika Armajedoni kambe a ku ta va ni ku rhula ka nkamanyana loku a ku ta pfula swipfalu swaku a ntirho wa ku chumayela wu yendliwa hi xitalu. Hambileswi a swi tikomba ingi nkama lowu a wu nga li kahle, vamakwerhu lavaya va pfule Xikola Xa Jiliyadi lexi a xi trenara vamisiyonariyu ku chumayela ni ku djondzisa leswaku va rhumeliwa ka tindhawu ta ku hambanahambana amisaveni, naswona hi nkama wolowuyani wa nyimpi vamisiyonariyu lava va rhumeliwile. Handle ka xikola lexo, ku tlhele ku pfuliwa xikola xin’wani b lexi a xi ta trenara vamakwerhu hinkwavu amabandleni leswaku va va vachumayeli va kahle va tlhela va va vadjondzisi va kahle. Hi ndlela leyo a va ta lunghekela ku yendla ntirho wa ku chumayela lowu a wa ha li kona.

¹³ Namuntlha ha swi vona swaku Yehovha hi yena lweyi a a kongomisa vanhu va yena ka nkama lowuyani wa ku karhata. Ku sukela hi nkama lowuyani wa Nyimpi Ya Wumbirhi Ya Misava, vanhu va Yehovha va tindhawu ta ku hambanahambana amisaveni, va tirhisa nkamanyana lowu  va nga na wona wa ku rhula leswaku va chumayela mahungu ya ku tsakisa. Naswona ntirho lowu wu humesa mihandzu ya kahle hikusa vanhu va vanyingi va ya va tiva Yehovha.

14. Hi mhaka muni hi fanele hi tshemba nkongomiso lowu hi nyikiwaka wona hi nhlengeletanu ya Yehovha ni hi madoda? (Nhlawutelo 2:1) (Vona mufoto.)

¹⁴ Namuntlha Ntlawa Lowu Rhangelaka wu tama wu landzela nkongomiso wa Yesu Kreste. Phela wu swi lava hintamu swaku nkongomiso lowu wu nyikelaka wu fambisana ni ku rhandza ka Yehovha. Se wu gama wu tirhisa vadjikelezi ni madoda swaku va nyikela minkongomiso leyo amabandleni. c Madoda lawa ma nga totiwa ma li “ka voko la xinene” la Kreste. (Lerha Nhlawutelo 2:1.) Ku fana ni leswi Moxe, Yoxuwa ni vapostolo minkama yin’wani a va phazama, na wona madoda a ma hetisekanga, minkama yin’wani ma nga ha yendla swihoxo. (Tin. 20:12; Yox. 9:14, 15; Rom. 3:23) Hambileswo Kreste a ha tama a kongomisa Ntlawa Lowu Rhangelaka ni madoda hi ndlela yayinene, funtshi a ta tama a yendla leswo “anze ku fika magamu.” (Mat. 28:20) Hi mhaka leyo, hi ni swivangelo swa swinyingi swaku hi tshemba nkongomiso lowu Yesu a hi nyikaka wona hi ku tirhisa vavanuna lava va hi rhangelaka.

LOKO HI YINGISA NKONGOMISO WA YEHOVHA SWI TA HI FAMBELA KAHLE

15-16. U djondze yini ka xikombiso xa Andy, Robyn, na Marcia hileswi va nga landzela nkongomiso wa Yehovha?

¹⁵ Loko hi yingisa nkongomiso wa Yehovha swi ta hi fambela kahle. Hi xikombiso, Andy ni nsati wa yena Robyn va vevukise wutomi la vona. (Mat. 6:22) Hi mhaka leyo va ve ni nkama wa ku ya pfuneta ka ntirho wa ku yaka. Robyn a vula leswi: “A hi hanya ka tindhawu tatitsongo, funtshi minkama yin’wani a hi nga na kozinya. Naswona swi lave ni xavisa michini ya mina ya ku susa mafoto. Phela ni rilile nkama ni nga yi xavisa hikusa ni swi rhandza hintamu ku susa mafoto. Kambe ku fana na Sara a ni tivekisele ku tsakisa Yehovha ku nga li mina.” (Heb. 11:15) I mpsini leswi swi nga va yendlekela hi mhaka leswi va nga teka xiboho lexi? Robyn a li: “Hi tsake hintamu hi ku tiva swaku hi tirhela Yehovha. Naswona leswi hi titwisaka xiswona hi leswi hi tirhaka ka maprojetu ya nhlengeletanu i switsongonyana swa ndlela leyi hi nga ta titwisa xiswona loko hi ta va ka misava ya nyuwani.” Andy na yena a li: “Phela hi tsake hintamu hi ku tiva swaku hi tirhisa nkama wa hina ni matimba swaku hi tirhela Yehovha.”

¹⁶ Hi pfunekisa ku yini loko hi yingisa nkongomiso wa Yehovha? Nkama a nga heta ku djondza  xikola secundária, Marcia a pfuniwe swaku a va mupfuli wa ndlela wa nkama hinkwawu naswona a a swi lava hintamu ku yendla leswo. (Mat. 6:33; Rom. 12:11) Yena a hlaya leswi: “Ni nyikiwe bolsa de estudo swaku ni ya djondza aunivhersidadi 4 wa malembe hi mahala. Kambe lexi mina a ni xi lava a ku li ku va mupfuli wa ndlela wa nkama hinkwawu. Hi mhaka leyo, ni lange ku yendlanyana kursu leli a li ta ni pfuna swaku ni tihanyisa ni tlhela ni va mupfuli wa ndlela hi nkama wun’we. Phela lexo ku ve xin’we xa swiboho swaswinene ni nga swi yendla. Swoswi ni mupfuli wa ndlela wa nkama hinkwawu naswona ni tsakile, funtshi xikala xa ntirho wa mina xa ni pfumelela swaku ni ya pfunisa Betele ni tlhela ni yendla mintirho yin’wani ya nhlengeletanu.”

17. I mpsini swin’wani leswi hi pfunekaka hi swona loko hi yingisa nkongomiso wa Yehovha? (Esaya 48:17, 18)

¹⁷ A nkongomiso lowu wu taka hi ka nhlengeletanu ya Yehovha wu nga hi vhikela. Hi xikombiso, hi basopisiwa ka ku rhandza male ni ka ku yendla swilo leswi swi nga hi yendlaka hi wela ka xidjoho. Kambe loko hi yingisa nkongomiso wa Yehovha hi ta kuma minkateko naswona a hi nge te wela ka swidjoho swoleswo, hi ta va ni lipfalu la ku basa hi tlhela hi fambela kule ni swikarhatu swin’wanyani. (1 Tm. 6:9, 10) Leswo swi ta yendla leswaku hi tama hi tirhela Yehovha hi mbilu hinkwayu leswi swi nga ta yendla swaku hi rhula mbilwini hi tlhela hi tsaka. — Lerha Esaya 48:17, 18.

18. Hi mhaka muni u tinyimisele ku tama u landzela nkongomiso wa Yehovha?

¹⁸ A hi kanakani swaku Yehovha a ta tama a tirhisa vavanuna swaku va kongomisa vanhu va nhlengeletanu ya yena, va va kongomisa ka nhlomulu wawukulu ni loko ku ta fika a Mfumu Wa 1.000 Wa Malembe. (Ps. 45:16) Indjhe u ta tama u landzela nkongomiso lowu wu taka hi ka Yehovha, hambiloko minkama yin’wani u nga nyimi na wona? Leswo swi ta ya hi swaku namuntlha wa wu landzela nkongomiso lowu Yehovha a ku nyikaka wona kumbe nada. Kambe na ka ha li swoswi a hi yendleni leswi hi nga swi kotaka swaku hi landzela hi tlhela hi yingisa nkongomiso wa Yehovha ku patsa ni lowu a hi nyikaka wona hi ku tirhisa vavanuna lava a nga va veka swaku va hi rhangela. (Esa. 32:1, 2; Heb. 13:17) Nkama lowu hi yendlaka leswo a hi tameni hi mu tshemba Mukongomisi wa hina Wamukulu Yehovha hikusa wa hi kongomisa swaku hi fambela kule ni swilo leswi swi nga wonhaka wunghanu la hina na yena, funtshi wa hi kongomisa swaku hi fika lomu hi yaka kona, ku nga misava ya nyuwani.