1. Habwaki nitwetaaga oburagirizi bwa Yahwe? Bazaaho ekyokurorraho.

 TEERAMU akasisani obuliire omu kibira ekirumu ebisoro eby’akabi, amahwa hamu n’ebiina ebihamire. Nikisobora kukusemeza kakuba otunga omuntu ow’amanyire omuhanda oguhikire kandi akakwebembera. Ensi enu eri nk’ekibira eky’akabi. Ijwiremu ebintu ebisobora kusiisa enkoragana yaitu na Yahwe. Baitu, twine omuntu ow’asobora kutwebembera kurungi kandi ogu nuwe Yahwe. Natwebembera kutwiha omu kabi nukwo atuhikye omu nsi empyaka nambere turatungira obwomeezi obutahwaho.

2. Yahwe atwebembera ata?

² Yahwe atwebembera ata? Omulingo omukuru ogwakikora nukwo kuraba omu Kigambo kye Baibuli. Ekindi, akozesa abantu. Ekyokurorraho, akozesa ‘omwiru omwesigwa kandi ow’amagezi’ kutuha ebyokulya ebyomwoyo ebitukonyera kukora encwamu ez’amagezi. (Mat. 24:45) Yahwe akozesa abasaija abandi abesigwa kutwebembera. Ekyokurorraho, akozesa abaroleerezi b’ebicweka hamu n’abagurusi b’ekitebe kutugarramu amaani, n’okutuha oburagirizi obutukonyera obutuba tuli omu kasumi akagumire. Mali nitusiima muno oburagirizi Yahwe obwatuha omu biro binu ebya ha mpero! Kandi kitukonyera kwikara twine enkoragana enungi na Yahwe n’okwikara omu muhanda ogw’obwomeezi obutahwaho.

3. Nitwija kubazaaho ki omu kicweka kinu?

³ Baitu obwire obumu, nikisobora kutugumira kuhondera oburagirizi bwa Yahwe, kukira muno obubutuheebwa abantu abatahikiriire. Habwaki? Habwokuba obwire obumu batugambira ebintu ebitutarukugonza. Rundi nitusobora kurora oburagirizi obubatuhaire nk’obutali bw’amagezi kandi nikituleetera kutekereza ngu tiburugire hali Yahwe. Omu kasumi nk’ako,  tusemeriire kukiijuka ngu Yahwe nuwe aliyo nayebembera abantu be kandi kuhondera oburagirizi bwe kitugasira. Kusobora kutukonyera kwesiga obwebembezi bwa Yahwe, ekicweka kinu nikiija kubazaaho (1) omulingo Yahwe yayebembiire abantu be omu kasumi akaakara, (2) omulingo arukutwebembera kasumi kanu (3) n’omulingo tugasirwa obutuhondera oburagirizi bwe.

OMULINGO YAHWE YAYEBEMBIIRE ABAISALERI

4-5. Yahwe akooleka ata ngu akaba nakozesa Musa kwebembera Abaisaleri? (Rora ekisisani.)

⁴ Yahwe akakoma Musa kwebembera Abaisaleri kuruga Misiri. Kandi akabaha obwakaiso oburukwoleka ngu akaba nabebembera nakozesa Musa. Ekyokurorraho, Yahwe yayebemberaga Abaisaleri nakozesa enyomyo y’ekicu nyamusana, n’enyomyo y’omurro ekiro. (Kurug. 13:21) Musa hamu n’Abaisaleri bakahondera enyomyo kandi yabahikya ha Nyanja Erukutukura. Abantu obubaarozere ihe ly’Abamisiri niribahambya kandi omu maiso gaabo haliyo enyanja, bakatiina muno. Bakatekereza ngu Musa akozere ensobi kubarabya omu muhanda ogu. Baitu ekaba etali nsobi. Yahwe akakozesa Musa kubarabya omu muhanda ogu akigenderiire. (Kurug. 14:2) Kandi hanyuma Ruhanga akabajuna omu mulingo ogurukuhuniiriza.—Kurug. 14:​26-28.

⁵ Kumara emyaka 40, Musa akebembera abantu ba Ruhanga omu irungu obu nahondera enyomyo y’ekicu. a Kumara akasumi, Yahwe akateeka enyomyo y’ekicu haiguru y’eheema ya Musa nambere Abaisaleri boona baali nibasobora kugirora. (Kurug. 33:​7, 9, 10) Yahwe yabazaaga na Musa kuraba omu kicu eki, kandi hanyuma Musa yagambiraga Abaisaleri oburagirizi obw’amuhaire. (Zab. 99:7) Abaisaleri baakirorraga kimu ngu Yahwe akaba nakozesa Musa kubebembera.

6. Abaisaleri baketwaza bata Yahwe obuyabahaire oburagirizi? (Okubara 14:​2, 10, 11)

⁶ N’obukiraaba ngu Abaisaleri baingi bakaba bakimanyire ngu Yahwe akaba nakozesa Musa kubebembera, bakanga kumuhuliiriza. (Soma Okubara 14:​2, 10, 11.) Kandi emirundi nyingi, bakanga kwikiriza ngu Yahwe akaba nakozesa Musa. Kandi ekyarugiremu, Yahwe atabaikirize kutaaha omu nsi ey’Ekaba Eraganiziibwe.—Kubar. 14:30.

7. Bazaaho ebyokurorraho eby’abantu abaahondiire oburagirizi bwa Yahwe. (Okubara 14:24) (Rora ekisisani.)

⁷ Baitu, Abaisaleri abamu bakahondera oburagirizi bwa Yahwe. Ekyokurorraho, Yahwe akakirora ngu: ‘Kalebu akamukuratirra kimu.’ (Soma Okubara 14:24.) Ruhanga akaha Kalebu emigisa, yamwikiriza kwekomeramu nambere akaba nagonza kwikara omu Nsi ey’Ekaba Eraganiziibwe. (Yos. 14:​12-14) Abaisaleri abaataahire omu Nsi ey’Ekaba Eraganiziibwe, nabo bakateekaho ekyokurorraho ekirungi eky’okuhondera oburagirizi bwa Yahwe. Yosuha obuyagarukire omu bigere bya Musa kwebembera Abaisaleri, “bakamutina . . . ebiro byona ebyobwomezi bwe.” (Yos. 4:14) Ekyarugiremu, Yahwe akabaha emigisa yabataahya omu Nsi ey’Ekaba Eraganiziibwe.—Yos. 21:​43, 44.

8. Soborra omulingo Yahwe akaba nayebembera abantu be omu kasumi ak’abakama. (Rora ekisisani.)

⁸ Hanyuma y’emyaka, Yahwe akakoma abacwi b’emisango kwebembera abantu be. Hanyuma, omu kasumi ak’abakama, Yahwe akakoma banabbi kwebembera abantu be. Abakama abesigwa, baahonderaga obuhabuzi bwa banabbi. Ekyokurorraho, n’obwebundaazi, Omukama Daudi akaikiriza obuhabuzi  obwamuhairwe nabbi Nasani. (2 Sam. 12:​7, 13; 1 Byom. 17:​3, 4) Omukama Yehosafati akahondera oburagirizi nabbi Yahazyeri obuyamuhaire kandi yayekambisa abantu ba Yuda ‘kwikiriza banabbi ba Ruhanga.’ (2 Byom. 20:​14, 15, 20) Omukama Hezekiya obwakaba ayetuntwire akasaba nabbi Isaya oburagirizi. (Is. 37:​1-6) Buli murundi abakama baahonderaga oburagirizi bwa Yahwe, yabahaga emigisa kandi yalindaga ihanga lyona. (2 Byom. 20:​29, 30; 32:22) Kandi buli muntu wena yakiroraga ngu Yahwe nakozesa banabbi be kwebembera abantu be. Baitu abakama abarukukira obwingi hamu n’Abaisaleri, batahuliirize banabbi ba Yahwe.—Yer. 35:​12-15.

OMULINGO YAHWE YAYEBEMBIIRE ABAKRISTAAYO ABAAKARA

9. Yahwe akakozesa oha kwebembera Abakristaayo omu kyasa eky’okubanza? (Rora ekisisani.)

⁹ Omu kyasa eky’okubanza Y.A.K., Yahwe akatandikaho ekitebe Ekikristaayo. Akebembera ata Abakristaayo kasumi ako? Akakoma Yesu kwebembera ekitebe. (Bef. 5:23) Baitu Yesu tiyabazaaga n’abegeswa be omu omu nabagambira eky’okukora. Akakozesa abakwenda n’abakuru omu Yerusalemu kwebembera ekitebe. (Eng. 15:​1, 2) Ekindi, abagurusi bakakomwa kukonyera abakwenda.—1 Bas. 5:12; Tit. 1:5.

10. (a) Abakristaayo ab’omu kyasa eky’okubanza abarukukira obwingi baketwaza bata obubaatungire oburagirizi? (Engeso Ezabakwenda 15:​30, 31) (b) Habwaki abamu baayangire kuhuliiriza abantu Yahwe abaakaba nakozesa? (Rora akasanduuko “ Habwaki Abamu Banga Kuhondera Obuhabuzi Obubaheebwa Abantu Yahwe Abaakozesa.”)

¹⁰ Abakristaayo baketwaza bata? Abarukukira obwingi bakahondera oburagirizi bw’abakwenda. Kandi obubaahuliire oburagirizi, “basemererwa obwokuhumuzibwa oku.” (Soma Engeso Ezabakwenda 15:​30, 31.) Yahwe nayebembera ata abantu be kasumi kanu?

OMULINGO YAHWE ATWEBEMBERAMU KASUMI KANU

11. Bazaaho ekyokurorraho ekirukwoleka omulingo Yahwe akozesa abantu kutwebembera kasumi kanu.

¹¹ Yahwe nakyagumizaamu kwebembera abantu be. Aikaire nakikora kuraba omu Kigambo kye Baibuli, n’Omwana we anyakuli mutwe gw’ekitebe. Niturora obwakaiso oburukwoleka ngu kasumi kanu Yahwe nakyatwebembera  nakozesa abantu? Ego. Tekerezaaho ekyabaireho hanyuma y’omwaka 1870. Charles Taze Russell n’abanywani be bakatandika kukyetegereza ngu omu mwaka 1914, hakubaireho ebintu ebirukwoleka ngu Obukama bwa Ruhanga butandikire kulema. (Dan. 4:​25, 26) Obunabbi bwa Baibuli nubwo bwabakonyiire kumanya ekintu kinu. Yahwe nuwe akaba nabebembera omu kuseruliiriza oku? Ego. Ebintu ebyabaireho omu 1914 bikooleka ngu Obukama bwa Ruhanga butandikire kulema. Obulemu obw’Ensi Yoona I bukatandika, hayongeraho endwaire ez’amaani, emisisa hamu n’enjara. (Luk. 21:​10, 11) Mali Yahwe akaba nakozesa abasaija abo abesigwa kuha abantu be oburagirizi.

12-13. Omu kasumi ak’Obulemu obw’Ensi Yoona II, ntekaniza ki ezakozerwe kweyongera kutebeza n’okwegesa abantu?

¹² Ekindi, tekerezaaho ekyabaireho omu Bulemu obw’Ensi Yoona II. Hanyuma y’okuseruliirizaaho Okusuku’rwa 17:​8, ab’oruganda ha kitebe ekikuru abakaba nibebembera, bakakirora ngu obulemu bunu tibwakurugiremu obulemu bwa Haramagedoni. Oihireho hanyuma yabwo hakubaireho akasumi ak’obusinge kandi eki kyakusobozeseze Abakristaayo kutebeza amakuru amarungi. Ekindi, n’obukiraaba ngu kasumi ako encwamu ey’okutandikaho isomero lya Gilead ekaba n’ezooka nk’etali y’amagezi, ekitebe kya Yahwe kikatandikaho isomero linu nukwo litendeke abamiisani kutebeza n’okwegesa abantu omu nsi yoona. Kandi n’omu kasumi ak’obulemu abamiisani bakasindikwa omu mahanga agarukwahukana. Ekindi, omwiru omwesigwa akatandikaho isomero lya Theocratic Ministry b kwegesa n’okutendeka abantu boona omu kitebe kufooka abatebezi kandi abegesa abarungi. Eki kyali nikitekaniza abantu ba Ruhanga habw’omulimo ogukaba gubalindiriire.

¹³ Kasumi kanu nitusobora kukirorra kimu ngu Yahwe aikaire nayebembera abantu be omu kasumi akagumire. Kuruga Obulemu obw’Ensi Yoona II bubaho, abantu ba Yahwe omu mahanga maingi baikaire baine obusinge n’obugabe kandi eki kibasoboseze kutebeza. Kandi mali omulimo gunu gurugiremu ebirungi bingi.

14. Habwaki nitusobora kwesiga oburagirizi oburuga omu kitebe kya Yahwe, n’obutuheebwa abagurusi b’ekitebe? (Okusuku’rwa 2:1) (Rora ekisisani.)

¹⁴ Kasumi kanu, abali h’Akatebe Akalemi bagumizaamu kuserra oburagirizi kuruga hali Kristo. Nibagonza ab’oruganda na banyaanya itwe bakirole ngu oburagirizi obubarukutunga niburuga hali Yahwe na Yesu. Kandi bakozesa abaroleerezi b’ebicweka n’abagurusi kuhikyaho ebitebe byona oburagirizi. c Abagurusi abaseserweho amagita hamu n’abagurusi abandi bali ‘omu mukono gwa Kristo ogwobulyo.’ (Soma Okusuku’rwa 2:1.) Ky’amananu ngu abagurusi banu tibahikiriire kandi obwire obumu bakora ensobi. Obwire obumu Musa, Yosuha hamu n’abakwenda nabo baakoraga ensobi. (Kubar. 20:12; Yos. 9:​14, 15; Bar. 3:23) Baitu nabwo, Kristo nakyakozesa omwiru omwesigwa n’abagurusi kwebembera abantu be kandi naija kugumizaamu nakikora “ebiro byona, okuhikya obusinge bunu obubulihwaho.” (Mat. 28:20) Nahabweki tusemeriire kwikiriza oburagirizi obw’arukutuha kuraba omu basaija banu abesigwa abaakomere kutwebembera.

TUGASIRWA OBUTUHONDERA OBURAGIRIZI BWA YAHWE

15-16. Kiki ekyorukwegera ha byokurorraho eby’abantu abaahondiire oburagirizi bwa Yahwe?

¹⁵ Obutuhondera oburagirizi bwa Yahwe tugasirwa n’omu kasumi kanu. Ekyokurorraho, Andy na mukazi we Robyn bakahondera oburagirizi bw’omwiru omwesigwa oburukututererra kworobyamu obwomeezi bwaitu. (Mat. 6:22) Ekyarugiremu, bakasobora kukonyera ha purojekiti ez’ekitebe ez’okwombeka. Robyn n’agamba ati: “Twaikaraga omu nju entaito muno kandi obwire obumu ezitaine kicumbiro. N’obukiraaba ngu nagonzaaga kuteera ebisisani, nkaba nyine kutunda kamera n’ebintu ebimu ebinakozesaaga omu kuteera ebisisani. Eki kikansaasa muno. Baitu nka muka Iburahimu, Sara, nkacwamu kutateeka omutima ha bintu ebinkaba nyefeeriize, baitu naguteeka ha kuheereza Yahwe.” (Baheb. 11:15) Bakagasirwa bata? Robyn n’agamba ati: “Twine okumarwa kukimanya ngu nituha Yahwe buli kimu kyona ekitwine. Obutuba nitukora ha purojekiti ez’ekitebe, turora omulingo obwomeezi buliba omu nsi empyaka.” Andy nauwe n’agamba ati: “Twine okusemererwa habw’okumara obwire bwaitu bwona nitusagika Obukama.”

¹⁶ Mulingo ki ogundi ogutugasirwamu obutuhondera  oburagirizi bwa Yahwe? Marcia obuyamazire siniya, akateeka omu nkora obuhabuzi obw’omwiru omwesigwa obutwekambisa kwebembeza kuheereza Yahwe. (Mat. 6:33; Bar. 12:11) N’agamba ati: “Nkatunga omugisa gw’okusomera busa ha yunivasite kumara emyaka ena. Baitu nkaba ningonza kuhika ha bigendererwa byange eby’omwoyo. Nahabweki nkacwamu kugenda omu isomero erirukwegesa eby’engaro, nukwo nyege ekintu ekirankonyera kuheereza Yahwe. Egi eri ncwamu enungi einakakora omu bwomeezi bwange. Hati ninyegondeza omu kuheereza nka payoniya ow’akasumi koona kandi omulimo gwange gunsobozesa kukonyera ha Bbeseri n’okuhikiiriza obujunanizibwa obundi obuntunga omu kitebe.”

17. Migisa ki endi eitutunga obutuhondera oburagirizi bwa Yahwe? (Isaya 48:​17, 18)

¹⁷ Obwire obumu tutunga obuhabuzi obututererra kwetantara ebikorwa ebiratuleetera kucwa ebiragiro bya Ruhanga, n’okweserurra itungo. Tugasirwa obutuhondera oburagirizi Ruhanga obwatuha. Twikara twine omuntu w’omunda omurungi kandi twetantara ebizibu ebiruga omu kwanga kuhondera oburagirizi bwa Yahwe. (1 Tim. 6:​9, 10) Ekindi, tuheereza Yahwe n’omutima gwaitu gwona kandi eki kituleetera okusemererwa kwingi, obusinge, n’okumarwa.—Soma Isaya 48:​17, 18.

18. Habwaki ocweriiremu kimu kuhondera oburagirizi bwa Yahwe?

¹⁸ Hataroho kugurukyagurukya, Yahwe naija kwikara nakozesa abantu kutuha oburagirizi omu muhito omwingi, kuhikira kimu omu Bulemi bwa Yesu obw’Emyaka Rukumi. (Zab. 45:16) Turagumizaamu nituhondera oburagirizi obu n’obukiratwetaagisa kwefeereza ebintu ebimu ebitugonza? Nikiija kutwanguhira, kakuba tuhondera oburagirizi Yahwe obwarukutuha kasumi kanu. Nahabweki, leka tucweremu kimu kugumizaamu nituhondera oburagirizi Yahwe arukutuha, otwaliremu n’obu obutuheebwa ab’oruganda abaine obujunanizibwa. (Is. 32:​1, 2; Baheb. 13:17) Obuturakora eki, nitwija kweyongera kwesiga Yahwe ow’arukutwebembera kutwiha omu kabi ak’eby’omwoyo, nukwo atuhikye omu nsi empyaka nambere turatunga obwomeezi obutahwaho.