1. Kaia e manakogina ei ne tatou te takitakiga a Ieova? Taku mai se fakaakoakoga.

 FAKAATAATA i tou mafaufau me galo koe i se togavao. E fakatamilo koe ne mea fakama‵taku e uke: ko manu fe‵kai, tamā manu kolā e mafai o fai ei koe ke masaki, lakau poisini, mo laukele fatufatua. Ka loto fakafetai eiloa koe māfai e isi se tino telā e iloa ‵lei ne ia te koga fakamataku tenā, ke takitaki ne ia te auala o kolua! E fai eiloa te lalolagi tenei e pelā mo te togavao tenā. E ‵fonu i mea fakama‵taku kolā e mafai o fakamasei ei ‵tou ola ‵lei faka-te-agaga. Kae e isi eiloa se ‵tou Takitaki ‵lei katoatoa—ko Ieova. E takitaki ne ia tatou kea‵tea mai mea fakama‵taku, kae ke olo ‵tonu atu ki te koga e fakamoe‵moe tatou ki eiko te ola se-gata-mai i te lalolagi fou.

2. E takitaki pefea ne Ieova tatou?

² E takitaki pefea ne Ieova tatou? Muamua la, e auala i tena Muna tusia ko te Tusi Tapu. Kae e fakaaoga foki ne ia a tino ke takitaki tatou. E pelā me se fakaakoakoga, e fakaaoga ne ia “te tavini fakamaoni kae poto” ke tuku mai ne ia a mea‵kai faka-te-agaga kolā e fesoasoani mai ke fai ne tatou a fakaikuga ‵poto. (Mata. 24:45) E fakaaoga foki ne Ieova a nisi tāgata ata‵mai ke takitaki tatou, e pelā mo ovasia o te seketi mo toeaina i te fakapotopotoga kolā e tuku mai ne latou a fakamalosiga mo fakatonuga ke fesoasoani mai ki a tatou i taimi faiga‵ta. E loto fakafetai eiloa tatou ki takitakiga fakatuagagina kolā e maua ne tatou i taimi faiga‵ta o aso fakaoti konei! E fesoasoani mai ke maua faeloa ne tatou te taliaga a Ieova kae ke tumau i te auala ki te ola.

3. Ne a mea ka sau‵tala tatou ki ei i te mataupu tenei?

³ Kae i nisi taimi, e faigata ki a tatou ke tau‵tali i te takitakiga a Ieova, maise eiloa māfai e tuku mai a fakatonuga konā ne tāgata sē ‵lei katoatoa. Kaia? Kāti ka sē fia‵fia tatou ki pati fakatonutonu konā. Io me e mafau‵fau tatou me e se ‵lei a fakatonuga konā kae fakaiku aka me e seki aumai i a Ieova a pati  fakatonutonu konā. Konā a taimi e manakogina i ei ke tali‵tonu tatou me ko Ieova eiloa e takitaki ne ia ana tino, kae ko te tau‵tali i tena takitakiga e iku atu ki te mauaga o fakamanuiaga. Ko te mea ke fakamalosi aka a ‵tou loto tali‵tonu, ka sau‵tala tatou i te mataupu tenei ki (1) auala ne takitaki ne Ieova ana tino i taimi o te Tusi Tapu, (2) auala e takitaki ne ia tatou i aso nei, mo te (3) auala e maua ei ne tatou a mea aoga māfai e tau‵tali i tena takitakiga.

TE AUALA NE TAKITAKI NE IEOVA TE FENUA O ISALAELU

4-5. Ne fakaasi atu pefea ne Ieova me ne fakaaoga ne ia a Mose ke takitaki a te kau Isalaelu? (Onoono ki te ata i te ‵kava.)

⁴ Ne ‵tofi ne Ieova a Mose ke ‵taki ne ia a tino Isalaelu ki tua mo Aikupito. Kae ne tuku atu ne Ia ki tino Isalaelu a fakamaoniga matea me e takitaki ne Ia latou e auala i a Mose. E pelā mo mea konei, ne tuku atu ne ia se pou kaumana i te ao mo se pou afi i te po. (Eso. 13:21) Ne tautali a Mose i te pou kaumana telā ne ‵taki ne ia latou mo tino Isalaelu ki te Tai Kula. Ne pole‵pole i te ma‵taku a tino me ne mafau‵fau latou me ka ‵poa aka latou i te vasia o te Tai Kula mo te kautau Aikupito i olotou tua. Ne fakaiku aka ne latou me ‵se a te mea ne fai ne Mose i te aumaiga o latou ki te Tai Kula. Kae e ‵se eiloa latou. Ne manako tonu eiloa a Ieova ke takitaki ne Mose ana tino ki te koga tenā. (Eso. 14:2) Tenā ne faka‵sao ei ne te Atua a latou i te ‵toe auala fakaofoofogia eiloa.—Eso. 14:​26-28.

⁵ Mai konā eiloa mo tausaga e 40 ki tua ifo, ne tumau a Mose i te fakalagolago ki te pou kaumana ke takitaki ei a tino o te Atua i loto i te koga lavaki. a E isi se taimi ne fakatu ne Ieova a te pou kaumana mai luga o te faleie o Mose, telā ne mafai o lavea ne tino Isalaelu katoa. (Eso. 33:​7, 9, 10) Ne faipati atu a Ieova ki a Mose mai te pou kaumana tenā, kae fakaoko atu ne Mose Ana fakatonuga ki tino Isalaelu. (Sala. 99:7) Ne lavea faka‵lei eiloa ne te kau Isalaelu me ne fakaaoga ne Ieova a Mose ke takitaki latou.

6. Ne ‵saga atu pefea a tino Isalaelu ki te takitakiga a Ieova? (Numela 14:​2, 10, 11)

⁶ Se mea fakafanoanoa, me ne ‵teke atu a te tokoukega o tino Isalaelu ki fakamaoniga ma‵nino me ne fakaaoga ne Ieova a Mose e pelā me ko Tena sui. (Faitau te Numela 14:​2, 10, 11.) Ne ‵teke atu faeloa latou ki a Mose. Ona ko te mea tenā, ne seki talia ei ke ulu atu te kautama tenā o tino Isalaelu ki te Fenua o te Folafolaga.—Nume. 14:30.

7. Taku mai ne fakaakoakoga o latou kolā ne tau‵tali i te takitakiga a Ieova. (Numela 14:24) (Onoono foki ki te ata.)

⁷ Kae ui i ei, ne tau‵tali eiloa a nisi tino Isalaelu ki te takitakiga a Ieova. E pelā me se fakaakoakoga, ne fai mai a Ieova: “Kalepo . . . ne tumau i te tautali mai i a au mo te loto kātoa.” (Faitau te Numela 14:24.) Ne fakamanuia ne te Atua a Kalepo, kae tuku atu foki ke filifili ne ia te koga e manako a ia o nofo i ei i te Fenua o te Folafolaga. (Iosua 14:​12-14) Ne fai foki a te suā kautama o te kau Isalaelu e pelā me se fakaakoakoga ‵lei i te tau‵tali i te takitakiga a Ieova. I te taimi ne sui ei ne Iosua a Mose e pelā me se takitaki o te kau Isalaelu, ne “āva malosi latou ki a ia i aso katoa o tena olaga.” (Iosua 4:14) Ona ko te mea tenā, ne fakamanuia ne Ieova latou mai te avatu o latou ki te fenua telā ne tauto a ia me ka tuku mō latou.—Iosua 21:​43, 44.

8. Fakamatala mai te auala ne takitaki ne Ieova ana tino i taimi o tupu. (Onoono foki ki te ata.)

⁸ I tausaga fakamuli, ne ‵tofi aka ne Ieova a famasino ke takitaki ana tino. Mai tua ifo, i taimi ne pule mai ei a tupu, ne ‵tofi ne Ieova  a pelofeta ke takitaki ana tino. Ne faka‵logo eiloa a tupu fakamaoni ki pati fakatonutonu a te kau pelofeta. E pelā mo te tupu ko Tavita ne talia ne ia mo te loto maulalo a pati fakatonutonu mai te pelofeta ko Natano. (2 Samu. 12:​7, 13; 1 Nofo. 17:​3, 4) Ne fakalagolago a te tupu ko Iosefatu ki te takitakiga a te pelofeta ko Iasielu kae ne fakamalosi atu a ia ki tino o Iuta ke “fakatuanaki ki . . . pelofeta” a te Atua. (2 Nofo. 20:​14, 15, 20) I te taimi ne puapuaga ei, ne ‵sala atu a te tupu ko Hesekia ki te pelofeta ko Isaia mō se fesoasoani. (Isa. 37:​1-6) I taimi katoa ne tau‵tali a tupu i te takitakiga a Ieova, ne maua ne latou a fakamanuiagina kae ne puipui ei a te fenua kātoa. (2 Nofo. 20:​29, 30; 32:22) Ne ‵tau o lavea ‵lei ne tino katoa me ne fakaaoga ne Ieova ana pelofeta ke takitaki ana tino. Kae ko te tokoukega o tupu penā foki mo tino ne ‵teke atu ki pelofeta a Ieova.—Iele. 35:​12-15.

TE AUALA NE TAKITAKI NE IEOVA A KELISIANO MUA

9. Ko oi ne fakaaoga ne Ieova ke takitaki a Kelisiano i te senitenali muamua? (Onoono foki ki te ata.)

⁹ I te senitenali muamua T.A., ne fakatu aka ne Ieova te fakapotopotoga Kelisiano. Ne takitaki pefea ne ia a Kelisiano mua konā? Ne ‵tofi ne ia a Iesu ke fai mo ulu o te fakapotopotoga. (Efe. 5:23) Kae ne seki fakatonutonu ne Iesu ana soko taki tokotasi. Ne fakaaoga ne ia te kau apositolo mo toeaina i Ielusalema ke fai ne latou te takitakiga. (Galu. 15:​1, 2) E se gata i ei, ne ‵tofi aka a toeaina ke takitaki ne latou a fakapotopotoga.—1 Tesa. 5:12; Tito 1:5.

10. (a) Ne ‵saga atu pefea a Kelisiano i te senitenali muamua ki te takitakiga ne maua ne latou? (Galuega 15:​30, 31) (e) Kaia ne seki talia ne nisi tino i aso o te Tusi Tapu a sui o Ieova? (Onoono ki te pokisi “ Pogai ne Seki Talia ne Nisi Tino a Fakamaoniga Matea.”)

¹⁰ Ne ‵saga atu pefea ki ei a Kelisiano i te senitenali muamua? Ne fia‵fia a te tokoukega o tau‵tali i fakatonuga ne maua ne latou. A te ‵tonuga loa, ne “fia‵fia . . . latou ona ko pati fakamalosi” ne tuku atu ki a latou. (Faitau te Galuega 15:​30, 31.) Kae e takitaki pefea ne Ieova ana tino i aso fakamuli nei?

TE AUALA E TAKITAKI NE IEOVA TATOU I ASO NEI

11. Taku mai se fakaakoakoga e fakaasi mai ei me ne takitaki ne Ieova a tino kolā e fai ne latou te takitakiga i aso nei.

¹¹ Koi tumau eiloa i te takitaki ne Ieova ana tino i aso nei. Ne fai ne ia te mea tenā e auala i  tena Muna mo tena Tama, telā ko te ulu o te fakapotopotoga. E mata, e lavea ne tatou a fakamaoniga me koi tumau eiloa i te fakaaoga ne te Atua a tino i aso nei e pelā me ne ana sui? Ao. Mafaufau ki mea ne ‵tupu mai tua o te tausaga e 1870. Ne kamata o iloa ne Charles Taze Russell mo ana taugasoa me i te tausaga 1914 se tausaga tāua, telā ne fakatu aka i ei a te Malo o te Atua. (Tani. 4:​25, 26) Ne iloa ne latou te mea tenā ona ko olotou sukesukega ne fai ki te Tusi Tapu, kae tali‵tonu me ka lavea ne latou te fakataunuga o te valoaga tenā. E mata, ne takitaki ne Ieova olotou sukesukega ki te Tusi Tapu? Ao, e mautinoa eiloa. Ne fakamaoni mai ne mea kolā ne ‵tupu i te lalolagi i te 1914 me ko oti ne kamata o pule a te Malo o te Atua. Ne tupu te Taua Muamua i te lalolagi, ‵tao atu ki ei ko famai, mafuie, mo oge mea‵kai. (Luka 21:​10, 11) E mautinoa me ne fakaaoga eiloa ne Ieova a tāgata Kelisiano loto fakamaoni konā ke fesoasoani atu ki ana tino.

12-13. Ne a fakatokaga ne fai i te Taua i te Lua a te Lalolagi ke momea aka te lasi o te faiga o te galuega talai mo te akoako atu?

¹² Mafaufau foki ki mea ne ‵tupu i te Taua i te Lua a te Lalolagi. Mai tua o sukesukega ne fai ki te Fakaasiga 17:​8, ne iloa aka ne taina tofia i te ‵tou laumua me ka se iku atu a te taua tenā ki a Amaketo, kae ki se vaitaimi o te filemu telā ka ‵tala mai ei a avanoaga ke gasolo ki mua a te galuega talai. E tiga loa ne seki foliga tonu mai i te taimi tenā, kae ne fakatu aka a te Watchtower Bible College (School) of Gilead ne te fakapotopotoga a Ieova ke akoako a misionale ke talai kae akoako i fenua o te lalolagi kātoa. Ne uga atu a misionale ke olo o talai i te taimi o te taua. E se gata i ei, ne fai a fakatokaga ne te tavini fakamaoni ke fakatu a te Akoga Fakaseokalatika b ke fakamasani a tino katoa i fakapotopotoga ke fai mo tino talai mo faiakoga apo. I auala konei, ne fakatoka eiloa a tino o te Atua mō te galuega i aso mai mua.

¹³ Kafai e toe ‵kilo ki tua, e lavea ‵lei ne tatou te takitakiga a Ieova ki ana tino i te taimi faigata tenā. Talu mai te Taua i te Lua a te Lalolagi, ne maua eiloa ne tino o Ieova i fenua e uke se tamā filemu kae ne saoloto foki ke fai te lotou galuega talai. E tonu, ne gasolo eiloa ki mua te faiga o te galuega talai.

14. Kaia e ‵tau ei o tali‵tonu tatou ki fakatonuga mai te fakapotopotoga kātoa a Ieova mo toeaina tofia? (Fakaasiga 2:1) (Onoono foki ki te ata.)

 ¹⁴ I aso nei, e tumau eiloa a sui o te Potukau Pule i te ‵kilo atu ki a Keliso mō se takitakiga. E ma‵nako latou ke maua ne taina a te kilokiloga me i fakatonuga konā ne aumai eiloa i te Atua. Kae e fakaaoga ne latou a ovasia o seketi mo toeaina ke tuku atu ne latou a fakatonuga konā ki fakapotopotoga. c A toeaina fakaekegina e puke ne Keliso ki “tena lima fakaatamai.” (Faitau te Fakaasiga 2:1.) E tonu, a toeaina konei e se ‵lei katoatoa kae fai mea ‵se. Ne fai ne Mose mo Iosua a mea ‵se i nisi taimi, kae penā foki te kau apositolo. (Nume. 20:12; Iosua 9:​14, 15; Loma 3:23) Kae e lavea ‵lei ne tatou me koi takitaki faka‵lei eiloa ne Keliso a te tavini fakamaoni mo toeaina tofia, kae ka tumau a ia i te fai penā “i aso katoa ke oko eiloa ki te gataga o te olaga tenei.” (Mata. 28:20) Tela la, e isi eiloa ne pogai ke tali‵tonu tatou ki te takitakiga e tuku mai ne ia e auala i a latou kolā ne ‵tofi aka ke fai ne latou te takitakiga.

TE AOGA O TE TUMAU I TE TAU‵TALI I TE TAKITAKIGA A IEOVA

15-16. Ne a mea e tauloto ne koe mai tala o latou kolā ne tau‵tali i te takitakiga a Ieova?

¹⁵ Kafai e tumau tatou i te tau‵tali i te takitakiga a Ieova, e maua ne tatou i te taimi nei a fakamanuiaga. E pelā mo Andy mo Robyn ne faka‵logo lāua ki te fakamalosiga ke tumau i te fakafaigofie lā olaga. (Onoono ki te manatu mō sukesukega i te Mataio 6:22.) Mai te fai penā, ne mafai ei o volenitia lāua ke ga‵lue i galuega fakatū‵tu a te ‵tou fakapotopotoga. E fai mai a Robyn: “Ne ‵nofo sāle māua i nisi fale kolā e fo‵liki ‵ki kae seai ne umu kūka i ei. Kae ne ‵tau o ‵togi ne au ki tua aku mea pei ata faitalia loa toku fiafia o pei ata. Ne tagi eiloa au i ei. Kae e pelā mo te avaga a Apelaamo ko Sala, ne fakaiku aka ne au ke kilo faeloa ki mua, kae e se ki mea ko oti ne tiaki ne au.” (Epe. 11:15) Ne a mea aoga ne maua ne te tauavaga tenei? Muna Robyn: “Ne lotoma‵lie malosi māua ke iloa atu me ne tuku atu ne māua ki a Ieova a mea katoa ne maua ne māua. Kafai e ga‵lue māua i galuega ne ‵tofi mai ne te fakapotopotoga, e mafai o fakaataata ne māua te vaegā olaga ka maua i te lalolagi fou.” Ne fai mai foki a Andy mo te lotomalie penei: “E fia‵fia māua me ne tuku katoatoa atu mā taimi mo malosi ke ‵lago atu ki te galuega a Ieova.”

 ¹⁶ Ne a foki nisi mea aoga e maua ne tatou māfai e tumau i te faka‵logo ki te takitakiga a Ieova? I tena otiga mai te akoga lasaga lua, ne fakagalue ne Marcia a te fakamalosiga ke kausaki atu ki te taviniga ki a Ieova. (Mata. 6:33; Loma 12:11) Ana muna: “Ne maua ne au se avanoaga ke akoga i te iunivesiti mō se fa tausaga. Kae ne manako au o kausaki atu ki fakamoemoega faka-te-agaga. Tenā ne filifili ei ke kau atu au ki se akoga puke lima ke tauloto ki se galuega telā e mafai o ‵lago mai ki taku galuega talai. Tenā eiloa te ‵toe fakaikuga ‵lei ne fai ne au. Ko tavini nei au e pelā me se paenia tumau, kae ona ko te mea e mafai o filifili ne au oku taimi galue i taku galuega ‵togi, ko avanoa ei au ke tavini atu i te Peteli kae fai a nisi tauliaga fakapito.”

17. Ne a nisi fakamanuiaga e maua ne tatou māfai e tumau i te tau‵tali i te takitakiga a Ieova? (Isaia 48:​17, 18)

¹⁷ I nisi taimi, e maua ne tatou a pati fakatonutonu kolā e puipui ei tatou mai te fia maumea mo nisi galuega kolā e mafai o soli i ei ne tatou a tulafono a te Atua. Konei a nisi feitu e maua foki ei ne tatou a fakamanuiaga mai te Atua māfai e tau‵tali tatou i te takitakiga a Ieova. E fakatumau ne tatou se loto lagona ‵ma kae ‵kalo kea‵tea mai fakalavelave e uke. (1 Timo. 6:​9, 10) Ona ko te mea tenā, e mafai o kausaki atu tatou ke tapuaki katoatoa atu ki a Ieova, telā e aumai ne ia a te fiafiaga sili, te filemu mo te lotomalie tonu.—Faitau te Isaia 48:​17, 18.

18. Kaia ne fakaiku aka ei ne koe ke tumau i te tautali i te takitakiga a Ieova?

¹⁸ E mautinoa me ka tumau eiloa i te fakaaoga ne Ieova a tino ke fai ne latou a te takitakiga i te taimi o te fakalavelave lasi penā foki mo te Pulega i te Afe Tausaga. (Sala. 45:16) E mata, ka tumau tatou i te faka‵logo ki te fakatonuga tenā faitalia me e ma‵nako tatou o fai se isi mea aka? Ka faigofie ke fai ne tatou a te mea tenei māfai e faka‵logo tatou ki te takitakiga a Ieova i te taimi nei. Tela la, ke na faka‵logo faeloa tatou ki te takitakiga a Ieova, e aofia i ei a mea kolā e tuku mai ne tāgata kolā ne ‵tofi aka ke tausi mai ki a tatou. (Isa. 32:​1, 2; Epe. 13:17) Kae kafai e fai tatou penā, e isi eiloa ne pogai e ‵tau o tali‵tonu tatou ki te ‵tou Takitaki, ko Ieova, telā e ‵taki kea‵tea ne ia tatou mai mea fakama‵taku i te feitu faka-te-agaga kae ki te koga e fakamoe‵moe tatou ki ei—ko te ola se-gata-mai i te lalolagi fou.