1. Apeleche chisyasyo chakulosya ligongo lyakwe tukusasosekwa Yehofa kuti atulongoleleje?

 TUWANICHISYE kuti wawojo asokonechele mungalango jajigumbele ni yindu yakogoya mnope, mpela yinyama yakogoya, majoka gakogoya, yitekete ya miŵa nambosoni masimbo gakogoya mnope. Mpaka aŵe ŵakusangalala kwenda ni mundu jwakumanyilila chenene ngalangojo kuti jwaŵambasyeje ku yindu yakogoyayi. Chilambochi chili mpela ngalangoji, ligongo chigumbele ni yindu yakogoya yampaka yitujonanje mwausimu. Nambo chakusangalasya chili chakuti tukwete Yehofa jwakusatulongolela. Jwalakwe akusatuŵambasya ku yindu yakogoya mwakutulongolela kuti chitukapate umi wangamala m’chilambo chasambano.

2. Ana Yehofa akusatulongolela chamtuli?

² Ana Yehofa akusatulongolela chamtuli? Jwalakwe akusatulongolela kupitila m’Maloŵe gakwe Baibulo. Nambosoni akusakamulichisya masengo ŵandu ŵakusamjimila pachilambopa kuti atulongoleleje. Jwalakwe akusakamulichisya masengo “kapolo jwakulupichika ni jwalunda” kuti atupeje chakulya chausimu chachikusatukamuchisya kuti tusaguleje yindu mwalunda. (Mat. 24:45) Yehofa akusakamulichisyasoni masengo achalume ŵakulupichika kuti atulongoleleje. Ŵakulolela madela soni achakulungwa ŵa mumpingo akusatulimbikasya soni kutupa malangiso gagakusatukamuchisya kuti tukomboleje kupilila yakusawusya yatukusasimana nayo. Tuli ŵakusangalala mnope kuti Yehofa akutulongolela mundaŵi jakusawusyaji mbesi mkanijiyiche. Yeleyi yikusatukamuchisya kuti tupitilisye kuŵa mu gulu ja Mlungu soni kwembecheya umi wangamala m’chilambo chasambano.

3. Ana chitukambilane chichi munganiji?

³ Nambo ndaŵi sine mpaka yiŵeje yakusawusya kwa m’weji kupikanila malangiso ga Yehofa mnopemnope pagakupelechedwa ni ŵandu ŵangali umlama. Mpaka yiŵe myoyo ligongo lyakuti malangiso gampaka atusalileje mpaka gaŵe gakuti ngagakutusangalasya. Kapena mpaka tuyiwoneje kuti malangiso gakutusalilago gali gangapikanika ni kwika pakuŵecheta kuti nganigaŵa gakutyochela kwa Yehofa. Payitendekwe  yeleyi tukusasosekwa kukola chikulupi chakuti Yehofa ni jwakutupa malangisogo soni kuti kupikanila kukusayikasya upile wekulungwa. Pakusaka kutukamuchisya kuti tumdalileje mnope Yehofa, munganiji chitukambilane mbali sitatu syakuyichisyasi: (1) Chitulole yaŵatendaga Yehofa pakwalongolela ŵandu ŵakwe mu ndaŵi ja m’Baibulo, (2) yakutenda Yehofa pakwalongolela ŵandu ŵakwe masiku agano, soni (3) yayikusati pakutujendela chenene yindu patukupikanila malangiso ga Yehofa.

YAŴATENDAGA YEHOFA PAKWALONGOLELA AYISALAYELI

4-5. Ana Yehofa jwalosisye chamtuli kuti jwamkamulichisyaga masengo Mose pakwalongolela Ayisalayeli? (Alole chiwulili cha pachikuto.)

⁴ Yehofa ŵamsagwile Mose kuti ŵalongolele Ayisalayeli pakukopoka mu Iguputo. Nambosoni ŵapele Ayisalayeliwo umboni wakuti akwalongolela kupitila mwa Mose. Yehofa jwakamulichisye masengo liwunde lyakuwoneka mpela chipilala pakwalongolela jemanjaji musi nambosoni moto wakuwoneka mpela chipilala pakwalongolela chilo. (Eks. 13:21) Mwamti Mose jwakuyaga chipilalachi pakwalongolela Ayisalayeli kupitila ku Nyasa Jechejewu. Nambo Ayisalayeli ŵatandite kutenda woga paŵayiweni kuti kusogolo kwawo kwana nyasa soni kuti munyuma mwawo mwayikaga asilikali ŵa ku Iguputo. Mwamti jemanjaji ŵatandite kuganisya kuti Mose nganatenda chenene pakupitila ku Nyasa Jechejewu. Nambotu Mose nganalemwesya chilichose ligongo jaliji pulani ja Yehofa kuti ŵalongolele Ayisalayeli kupitila ku Nyasa Jechejewuji. (Eks. 14:2) Mwamti kaneko Mlungu ŵakulupwisye jemanjajo m’litala lyakusimonjesya mnope.—Eks. 14:​26-28.

⁵ Kwa yaka 40 yaŵajendaga m’chipululu, Mose jwapitilisye kudalila liwunde lyakuwoneka mpela chipilala pakwalongolela ŵandu ŵa Mlungu. a Nambosonitu ndaŵi sine Yehofa ŵachijimikaga chipilalachi pa tenti ja Mose kuti ŵandu wosope achiwoneje. (Eks. 33:​7, 9-10) Kupitila mu chipilalachi, Yehofa ŵamsalilaga Mose yindu yaŵasakaga kuti ŵasalile Ayisalayeli. (Sal. 99:7) Mwamti Ayisalayeli nganakayichilaga yakuti Yehofa akumkamulichisya masengo Mose pakwalongolela.

6. Ana Ayisalayeli ŵajinji ŵatendaga uli Yehofa paŵalongolelaga kupitila mwa Mose? (Numeli 14:​2, 10, 11)

⁶ Nambo chakutesya chanasa chaliji chakuti Ayisalayeli ŵajinji, ŵakanile umboni wakuwoneka chenene wakuti Yehofa ŵamkamulichisyaga masengo Mose pakwalongolela jemanjajo. (Aŵalanje Numeli 14:​2, 10, 11.) Mwakuwilisyawilisya jemanjaji ŵamkanaga Mose kuti ŵalongoleleje. Yeleyi yatendekasisye kuti Ayisalayeli ŵajinji ŵa mu mpago welewo akajinjila m’chilambo chiŵasalile Mlungu kuti chachapa.—Num. 14:30.

7. Ana ni ŵandu ŵane ŵapi ŵaŵapikanile malangiso ga Yehofa? (Numeli 14:24) (Alole chiwulili.)

⁷ Nambope Ayisalayeli ŵane ŵapikanilaga malangiso gaŵapaga Yehofa. Mwachisyasyo, Yehofa jwasasile kuti, “Kalebu . . . Aŵele jwakulupichika.” (Aŵalanje Numeli 14:24.) Yehofa jwampele upile Kalebu mwamti ŵayikene pakumsalila kuti, asagule malo gachigamsangalasye kutama m’chilambo cha Kanani. (Yos. 14:​12-14) Nambosoni mpago wakuyichisya wa Ayisalayeli wapeleche chisyasyo chambone pakupikanila malangiso ga Yehofa. Yeleyi ni yayatendekwe mundaŵi ja Yoswa. Jwalakwe paŵajinjile mmalo mwa Mose pakwalongolela Ayisalayeli “jemanjajo ŵamchimbichisye jwalakwejo mu umi wakwe wosope.” (Yos. 4:14) Yakuyichisya yakwe Yehofa ŵapele upile Ayisalayeli mwakwajinjisya m’chilambo chele ŵasalile kuti chachapa.—Yos. 21:​43, 44.

8. Alondesye yaŵatendaga Yehofa pakwalongolela ŵandu ŵakwe mu ndaŵi ja achayimwene. (Alole chiwulili.)

⁸ Pali papitile yaka yejinji, Yehofa ŵasagwile ŵakulamula kuti ŵalongoleleje ŵandu ŵakwe. Kaneko mundaŵi ja achayimwene, Yehofa ŵasagwile ŵakulochesya kuti ŵalongoleleje ŵandu ŵakwe. Pandaŵi jelejo mamwenye gakulupichika gapikanilaga malangiso gaŵasalilaga  ŵakulochesyawo. Jumo mwa jemanjaji jwaliji Mwenye Daudi. Mwakulinandiya jwalakwe jwapikanile yaŵamjamwiche jwakulochesya Natani. (2 Sam. 12:​7, 13; 1 Mbi. 17:​3, 4) Nombe Mwenye Ahasi jwadalilaga malangiso gaŵapochelaga kutyochela kwa jwakulochesya Ahasiyele nambosoni ŵalimbikasyaga ŵandu ŵa ku Yuda kuti “ŵakulupilileje ŵakulochesya ŵa Mlungu.” (2 Mbi. 20:​14, 15, 20) Nombe najo Mwenye Hesekiya pajwasimanaga ni yakusawusya jwajawulaga kwa jwakulochesya Yesaya kukupata malangiso. (Yes. 37:​1-6) Mamwenyega pagapikanilaga malangiso gakutyochela kwa Yehofa yindu yajendelaga chenene soni Yehofa jwachenjelaga ŵandu ŵakwe. (2 Mbi. 20:​29, 30; 32:22) Mwamti ŵandu wosope ŵamanyililaga kuti Yehofa akwakamulichisya masengo ŵakulochesya pakwalongolela ŵandu ŵakwe. Nambope achayimwene ŵane soni ŵandu ŵajinji nganiŵapikanilaga ŵakulochesyaŵa.—Yel. 35:​12-15.

YAŴATENDAGA YEHOFA PAKWALONGOLELA AKLISTU ŴA M’YAKA 100 YANDANDA

9. Ana Yehofa ŵakamulichisye masengo ŵani pakwalongolela Aklistu ŵa m’yaka 100 yandanda? (Alole chiwulili.)

⁹ Mu yaka 100 yandanda, Yehofa jwatamilikasisye mpingo wa Chiklistu. Ana jwalakwe jwawulongolelaga chamtuli mpingowu? Jwasagwile Yesu kuŵa mtwe wa mpingo. (Aef. 5:23) Nambotu ngaŵa kuti Yesu jwaŵechetaga ni jwalijose jwa mumpingomo pajikapajika pakupeleka malangiso. Mmalomwakwe jwalakwe jwasagwile achakulungwa ŵa ku Yelusalemu kuti awulongoleleje mpingowo. (Mase. 15:​1, 2) Jwasagwilesoni achakulungwa ŵa mumpingo kuti akamuleje masengo gakuwulongolela mpingowo.—1 Ates. 5:12; Tit. 1:5.

10. (a) Ana Aklistu ŵajinji mu yaka 100 yandanda ŵatesile yamtuli ni malangiso gaŵapochele? (Masengo 15:​30, 31) (b) Ligongo chichi ŵandu ŵane mundaŵi ja m’Baibulo nganiŵapikanilaga ŵandu ŵaŵasagwile Yehofa? (Alole libokosi lyakuti, “ Ligongo Lyakwe Ŵandu Ŵane Ngakusiŵapikanila Ŵandu Ŵaŵasagwile Yehofa.”)

¹⁰ Ana Aklistu ŵa m’yaka 100 yandanda ŵatendaga yamtuli ni malangiso gaŵapochelaga? Ŵajinji mwa jemanjajo ŵasangalalaga ni malangisogo, mwamti ŵagakamulichisyaga masengo. Kusala yisyene, Aklistuŵa ‘ŵasangalele mnope pakupikana maloŵe gakulimbikasya’ gaŵapochele. (Aŵalanje Masengo 15:​30, 31.) Nambi uli masiku agano? Ana Yehofa akwalongolela chamtuli ŵandu ŵakwe?

YEHOFA AKUPITILISYA KWALONGOLELA ŴANDU ŴAKWE MASIKU AGANO

11. Ana Yehofa alosisye chamtuli kuti akwakamuchisya ŵandu ŵakulongolela masiku agano?

¹¹ Yehofa akupitilisya kwalongolela ŵandu ŵakwe masiku agano. Jwalakwe akutenda yeleyi kupitila  m’Maloŵe gakwe soni mwa Mwanache jwakwe jwali mtwe wa mpingo. Ana tukusawuwona umboni wakulosya kuti Yehofa akupitilisya kutulongolela pakwakamulichisya masengo ŵandu ŵakusamjimila? Elo. Aganichisye yindu yayatendekwe panyuma pa chaka cha 1870. Pandaŵi jeleji Charles Taze Russell ni achimjakwe ŵatandite kuyikopochela kuti chaka cha 1914 chili chaka chapadela chele Uchimwene wa Mlungu uchitanda kulamulila. (Dan. 4:​25, 26) Jemanjaji ŵayikopochele yeleyi panyuma pakuti awungunyisye yakulochesya ya m’Baibulo. Ngatukukayichila kuti Yehofa ŵalongolele jemanjaji paŵawungunyaga yeleyi. Mwamti yayatendekwe mu 1914 yapeleche umboni wakulosya kuti Uchimwene wa Mlungu utandite kulamulila. M’chaka chelechi jatandite Ngondo Jandanda Japachilambo Chosope kaneko kwatendekwe yisichinya, sala, soni milili. (Luk. 21:​10, 11) Yehofa ŵakamulichisyaga masengo achalume ŵeleŵa pakwakamuchisya ŵandu ŵakwe.

12-13. Ana abale ŵa maudindo ŵatesile yamtuli pandaŵi ja Ngondo Jaŵili Japachilambo Chosope kuti ŵakutumichila ŵa Yehofa alipelecheje mnope pa masengo gakulalichila?

¹² Aganichisyesoni yindu yayatendekwe panyuma pa Ngondo Jaŵili Japachilambo Chosope. Panyuma pakulijiganya mwakusamala lilemba lya Chiwunukuko 17:​8, abale ŵa udindo ku likulu lyetu lyapachilambo chosope ŵayikopochele kuti ngondoji nganijilongolelaga ku Alamagedo. Mmalomwakwe jemanjaji ŵayikopochele kuti panyuma pangondoji pachiŵasoni mtendele wawuchikamuchisya kuti ŵakutumichila ŵa Yehofa akombole kwalalichila ngani syambone ŵandu ŵajinji. Atamose kuti pandaŵijo yawonekaga kuŵa yangapikanika, abale ŵaudindo ŵalinganyisye yakutamilikasya sukulu jakulijiganya Baibulo ja Giliyadi. Chakulinga cha sukuluji chaliji kwajiganya amishonale kuti akakomboleje kulalichila m’madela gejinji pachilambopa. Mwamti amishonaleŵa ŵatumisyaga m’madela gakulekanganalekangana atamose pandaŵi ja ngondojo. Kupwatika pelepa kapolo jwakulupichika ni jwalunda jwatamilikasisye kosi ja sukulu ja Uchimwene b ni chakulinga chakuti ŵajiganye ŵandu wosope mumpingo kuti akomboleje kwalalichila soni kwajiganya ŵandu ŵane. Yeleyi yakamuchisye ŵandu ŵa Mlungu kuti aŵe ŵakoseka kulalichila ngani syambone.

¹³ Patukuganichisya yayatendekwe pandaŵiji, tukusayiwona kuti Yehofa ŵalongolelaga ŵandu ŵakwe mundaŵi jakusawusyaji. Kutandila mundaŵi ja Ngondo Jaŵili Japachilambo Chosope, ŵakutumichila ŵa Yehofa m’yilambo yejinji aŵele ali  mkulalichila mwa ufulu. Mwamti ŵandu ŵajinji atandite kumtumichila Yehofa, soni ŵakutumichila ŵakwe akombwele kulalichila madela gejinji pachilambopa.

14. Ligongo chichi tukusasosekwa kukulupilila malangiso gatukusapochela kutyochela ku gulu ja Yehofa soni kwa achakulungwa ŵa mumpingo? (Chiwunukuko 2:1) (Alole chiwulili.)

¹⁴ Masiku agano abale ŵa m’Likuga Lyakulongolela akusapitilisya kumdalila Klistu kuti ŵalongoleleje. Jemanjaji akusasaka kuti malangiso gakusapeleka kwa abale ni alongo gaŵeje gakamulana ni nganisyo sya Yehofa. Nombe ŵakulolela madela soni achakulungwa ŵa mumpingo akusajigala malangiso gapeleche kapolo jwakulupichika ni jwalundaga ni kugapeleka ku mpingo. c Mwamti achakulungwa ŵa mumpingoŵa akusaŵa kuti ali “kumkono wamlyo” wa Klistu. (Aŵalanje Chiwunukuko 2:1.) Yisyene kuti achakulungwa ŵa mumpingoŵa ali ŵangali umlama, mwamti ndaŵi sine akusalemwesyaga yindu. Nombe Mose ni Yoswa ŵalemwesyagasoni yindu ndaŵi sine mpela muŵatendelagasoni ŵandumetume. (Num. 20:12; Yos. 9:​14, 15; Alo. 3:23) Nambope, Klistu akupitilisyape kumlongolela kapolo jwakulupichika ni jwalunda soni achakulungwa ŵa mumpingo. Mwamti jwalakwe chapitilisye kutenda yeleyi “masiku gosope mpaka mbesi ja ndaŵi ajino.” (Mat. 28:20) Kusala yisyene, tukwete magongo gejinji gakututendekasya kwadalila mnope abale ŵakutulongolelaŵa.

YINDU YIKUSATUJENDELA CHENENE PATUKUPIKANILA MALANGISO GA YEHOFA

15-16. Ana alijiganyisye chichi kutyochela kwa ŵandu ŵaŵapikanile malangiso ga Yehofa?

¹⁵ Patukupitilisya kupikanila malangiso ga Yehofa yindu yikusatujendela chenene. Mwachisyasyo, ŵalombane ŵane mena gawo Andy ni Robyn ŵapikanile malangiso gakutyochela kwa kapolo jwakulupichika ni jwalunda gakusala ya kwikutila ni yindu yakwete. (Aheb. 13:5.) Yeleyi yakamuchisye kuti akomboleje kukamuchisya nawo pamasengo ga kutaŵa. Jwamkongwe jwa m’liŵasali jwatite, “Twatamaga mkajumba kamwana kelesoni nganikakola kichini. Nambosoni nasumisye yindu yanakamulichisyaga masengo pakwambula, mwamti nalisile panasyumisyaga yinduyi. Nambo mpela muŵatendele Sala ŵamkwakwe Abulahamu, nalolaga yindu yamsogolo mmalo mwakulola yindu yamunyuma.” (Aheb. 11:15) Ana liŵasali lyatesile chenene kusagula yeleyi? Jwamkongweju jwasasilesoni kuti, “Tuli ŵakusangalala mnope ligongo lyakuti tukumpa Yehofa yiliyose yampaka tukombole. Une ni ŵamkwangu patukukamula masengo gatupele Yehofa yikusatukamuchisya kumanyilila mwayichiŵela yindu m’chilambo chasambano.” Nombe jwamlume jwa m’liŵasali jwatite, “Tukusangalala mnope ligongo lya yindu yatukutenda pakamuchisya masengo ga Uchimwene.”

 ¹⁶ Ana pana maumbone gane gapi gatukusapata patukupikanila malangiso ga Yehofa? Mlongo Marcia ali amalisisye sukulu, jwalinganyisye yakumtumichila Yehofa mwakutenda upayiniya. (Mat. 6:33; Alo. 12:11) Jwalakwe jwatite, “Napatile upile wakuti ngalijiganye mwalulele ku yunifesite kwa yaka mcheche. Nambo nasakaga kutenda yejinji pakumtumichila Yehofa. Myoyo, mmalo mwakwitichisya kuti ngalijiganye ku yunifesite, nalinganyisye yakuti nalijiganye masengo gakuti gangamuchisyeje kupata mbiya syakungamuchisya pakungutenda upayiniya. Kusala yisyene, yanasagwileyi yaliji yakusosekwa mnope paumi wangu. Apano ngusangalala mnope pangutenda upayiniya. Soni ligongo lyakuti masengo gangu gakusambaga lipesa lyakwanila, ngusakola upile wakuja kamuchisya nawo masengo ga pa Beteli soni kutenda mautumiki gane.”

17. Ana ni yindu yine yapi yakusangalasya yatukusapata patukupitilisya kupikanila malangiso ga Yehofa? (Yesaya 48:​17, 18)

¹⁷ Ndaŵi sine, tukusapochela malangiso gagakusatukamuchisya kuti tukanonyelaga mnope yindu yakuchilu kapena kutenda yindu yampaka yitutendekasye kasa malamusi ga Yehofa. Patupochele malangiso gakutyochela kwa Yehofa ni kugakamulichisya masengo, yindu yikusatujendela chenene. Yeleyi yikusatukamuchisya kuti tukole chikumbumtima chambone, soni tukusaŵambala kutenda yindu yampaka yitendekasye kuti tusimane ni yakusawusya. (1 Tim. 6:​9, 10) Yeleyi yikusatukamuchisya kuti tukomboleje kumtumichila Yehofa ni mtima wetu wosope, yayikusatutendekasya kuti tuŵeje ŵakusangalala, ŵamtendele soni ŵakwikutila.—Aŵalanje Yesaya 48:​17, 18.

18. Ligongo chichi wawojo ali ŵakusimichisya kupitilisya kukuya malangiso gakutyochela kwa Yehofa?

¹⁸ Ngatukukayichila kuti Yehofa ngasaleka kwakamulichisya masengo ŵandu ŵakusamjimila jwalakwe pakutupa malangiso mundaŵi ja yakusawusya yekulungwa mpaka mundaŵi ja Ulamusi wa Yaka 1000 ya Klistu. (Sal. 45:16) Ana tuchipitilisya kukuya malangiso gelego atamose yili mkuwoneka kuti gakutindana ni yatukusaka? Tuchikombola kupikanila malangiso gelego naga apano tukusapikanila malangiso gakusatupa Yehofa. Myoyo, kwende ndaŵi syosope tupikanileje malangiso gakutyochela kwa Yehofa soni kwa abale ŵasagulidwe kuti atulongoleleje. (Yes. 32:​1, 2; Aheb. 13:17) Kutenda yeleyi, kuchitukamuchisya kuti tumdalileje mnope Yehofa. Jwalakwe akutulongolela soni kutuchenjela ku yindu yampaka yitujonanje mwausimu patuli paulendo wakuja kupochela umi wangamala m’chilambo chasambano.