1. Mu susunnag fan nsusun e ngad leked Jehovah ni Ir e Be Pow’iydad.

 MU SUSUNNAG ni kam malog u fithik’ bangi garger. Bay e riya’ ko gin’em ni bochan e bay e gamanman u rom nib maloboch, nge gek’iy ni bay e yub riy, nge boch e chachangeg ni be fek boch e m’ar, nge yu yang nde pach e but’ riy ma boor e malang riy. Machane ga ra felfelan’ ni faanra bay be’ ni be un ngom ni manang fan e gin’em nrayog ni nge pow’iyem, maku manang e gin bay e riya’ riy nge rogon ni ngam siyeg! Re fayleng ney e bod fithik’ e ngi garger nem. Boor ban’en riy nrayog ni nge magawonnagdad ko tirok Got ban’en. Machane bay Be’ ni Be Pow’iydad nib fel’ rogon ni aram Jehovah. Ma chuwegdad ko gin bay e riya’ riy me pow’iydad i yan ko gin gad be nameg ni aram e yafos ni manemus u lan e bin nib beech e fayleng.

2. Uw rogon ni ma pow’iydad Jehovah?

² Uw rogon ni ma pow’iydad Jehovah? Ba ga’ ni ma rin’ e re n’ey u daken e Thin rok ni aram e Bible. Machane ku ma fanay boch e girdi’ ni yad owchen. Bod ni ma fanay “fare tapigpig nib yul’yul’ ma ba gonop” ni nge pi’ e ggan ni fan ko tirok ban’en ni ma ayuwegdad ni ngad dugliyed boch ban’en u fithik’ e gonop. (Matt. 24:45) Ku ma fanay boch e pumoon ni ngar pow’iyed gadad. Bod ni ma pi’ e pi walag ni pumoon ni yad ma lekag e ulung nge piin piilal u lan e ulung e athamgil nga lanin’dad, maku yad ma pi’ boch e fonow nrayog ni nge ayuwegdad ni ngad athamgilgad u fithik’ e pi magawon ni gad ma mada’nag. Ri gad ba felfelan’ nrib fel’ rogon ni yibe pow’iydad e ngiyal’ ney ko tin tomuren e rran ni kari mo’maw’ e par! Re n’ey e ma ayuwegdad ni ngad pared ni gad ba fel’ u wan’ Jehovah ma gad ulul i lek fare pa’ i kanawo’ ni be sor i yan ko yafos.

3. Mang e gad ra weliy ko re article ney?

³ Yugu aram rogon ma bay yu ngiyal’ nrayog ni nge mo’maw’ ni ngad folgad u rogon ni be pow’iydad Jehovah, nib ga’ ni faanra be rin’ u daken boch e girdi’ ndawor ra flontgad. Mang fan? Ya rayog  nder m’agan’dad ko fonow ni yad be pi’ ngodad. Fa reb e rayog ni gad be lemnag nde puluw e n’en yad be yog ni ngad rin’ed, ere dabisiy ni pi n’em e gathi Jehovah e ke yib rok. Machane aram e ngiyal’ nrib t’uf ni nge pagan’dad ni Jehovah e ir e be pow’iy e girdi’ rok, ma ra yib angin ngodad ni faan gad ra fol u rogon ni be pow’iydad. Ra ngari pagan’dad nga rogon ni yibe pow’iydad, ma aram e gad ra weliy ko re article ney (1) rogon ni i pow’iy Jehovah e girdi’ rok kakrom, (2) rogon ni be pow’iydad e ngiyal’ ney, nge (3) angin nra yib ngodad ni faanra ud folgad u rogon ni be pow’iydad.

ROGON NI I POW’IY JEHOVAH FARE NAM NU ISRAEL

4-5. Uw rogon ni dag Jehovah ni be fanay Moses ni nge pow’iy piyu Israel? (Mu guy e sasing ni bay u wuru’.)

⁴ I mel’eg Jehovah Moses ni nge pow’iy piyu Israel nga wuru’ yu Egypt. Ki dag boch ban’en ngak piyu Israel ni nge micheg ngorad ni be pow’iyrad u daken Moses. Bod nra rran ma bay bangi manileng nib k’iy nga lang ni be pow’iyrad, ma ra nep’ ma be pow’iyrad ba nifiy nib k’iy nga lang. (Ex. 13:21) Aram e n’en ni i lek Moses, ma aram me fekrad piyu Israel i yan ko fare Red Sea. Machane me lol’ograd piyu Egypt, ma aram mi ri rus piyu Israel ni bochan e yad be lemnag ni aram e nge thang piyu Egypt e fan rorad. Ere ra lemnaged nde puluw e n’en ke rin’ Moses ni ke fekrad i yan ko fare Red Sea. Machane gathi ke oloboch Moses, ya ke fanay Jehovah Moses ni nge pow’iy e girdi’ rok ngaram. (Ex. 14:2) Ere ayuweg Got e yafos rorad u reb e kanawo’ nri yira ngat ngay.​—Ex. 14:​26-28.

⁵ Aningeg i ragag e duw nga tomuren ni ulul Moses ni nga i taga’ ko gi manileng nem nib k’iy nga lang ni nge pow’iy e girdi’ rok Got u nap’an ni yad be yan u daken e ted. a Ku bay ba ngiyal’ ni n’igin Jehovah e gi manileng nem nge yan i par nga puluwon e tent rok Moses nga lang ko gin nrayog ni nge guy piyu Israel riy. (Ex. 33:​7, 9, 10) Fithik’ e gi manileng nem e ma non Jehovah riy ngak Moses, me yog Moses e n’en ke yog Jehovah ko girdi’. (Ps. 99:7) Ere rayog ni nge guy piyu Israel ni be fanay Jehovah Moses ni nge pow’iyrad.

6. Uw rogon u wan’ piyu Israel rogon ni i pow’iyrad Jehovah? (Numbers 14:​2, 10, 11)

⁶ Ba gel e kireban’ riy ya yooren piyu Israel e de riyul’ u wan’rad e mich riy ni be fanay Jehovah Moses ni nga i yog e thin rok ngorad. (Mu beeg e Numbers 14:​2, 10, 11.) Boor yay nda i m’agan’rad ngay ni be fanay Jehovah Moses ni nge pow’iyrad. Bochan e re n’ey ma aram e de pag Jehovah e binem e mfen ko girdi’ nu Israel ni ngar thapgad nga lan fare Nam ni Kan Micheg.​—Num. 14:30.

7. Mu weliy murung’agen boch e girdi’ nra folgad u rogon ni be pow’iyrad Jehovah. (Numbers 14:24) (Kum guy e sasing.)

⁷ Machane bay boch e girdi’ nu Israel nra folgad u rogon ni be pow’iyrad Jehovah. Bod ni yog Jehovah ni gaar: “Kaleb e . . . par nib yul’yul’ ngog.” (Mu beeg e Numbers 14:24.) I tow’athnag Kaleb, miki pag ni nge mel’eg e gin baadag ni nge par riy u lan fare Nam ni Kan Micheg. (Josh. 14:​12-14) Kub manigil e n’en ni rin’ e bin migid e mfen ni yib nga tomuren u rogon ni ur folgad u rogon ni be pow’iyrad Jehovah. Nap’an nni mel’eg Joshua ni nge yan nga lon Moses ni nge pow’iy piyu Israel, mi yad “ta’ fan u n’umngin nap’an e yafos rok.” (Josh. 4:14) Bochan e re n’ey, me tow’athnagrad Jehovah ni aram e fekrad i yan nga lan fare nam ni micheg nra pi’ ngorad.​—Josh. 21:​43, 44.

8. Mu weliy rogon ni i pow’iy Jehovah e girdi’ rok u nap’an ni i gagiyeg e pi pilung. (Kum guy e sasing.)

⁸ Boch e duw nga tomuren, me mel’eg Jehovah boch e girdi’ ni ngar manged judge ni ngar pow’iyed e girdi’ rok. Ma nap’an ni i gagiyeg e pi pilung miki mel’eg e pi profet ni ngar pow’iyed e  girdi’ rok. Pi pilung ni yad ba yul’yul’ e ur folgad ko fonow ni i pi’ e pi profet ngorad. Bod ni David ni Pilung e sobut’nag laniyan’ nge fol ko fonow ni pi’ Nathan ni profet ngak. (2 Sam. 12:​7, 13; 1 Kron. 17:​3, 4) Ma Jehoshafat ni Pilung e taga’ ngak Jahaziel ni profet ni nge pow’iy, me pi’ e athamgil nga laniyan’ e girdi’ nu Judah ni ‘nge mich u wun’rad e n’en ke yog e pi profet rok’ Got. (2 Kron. 20:​14, 15, 20) Nap’an nri magafan’ Hezekiah ni Pilung, ma aram me ning e ayuw ngak Isaiah ni profet. (Isa. 37:​1-6) Gubin yay ni i fol e pi pilung nem u rogon ni be pow’iyrad Jehovah, ma aram me tow’athnagrad me ayuweg e girdi’ rok nde buch ban’en rorad. (2 Kron. 20:​29, 30; 32:22) Ere susun e ba mom ni nge guy gubin e girdi’ e ngiyal’ nem ni be fanay Jehovah e pi profet rok ni ngar pow’iyed e girdi’ rok. Yugu aram rogon, ma yooren e pilung nge girdi’ e ngiyal’ nem e dar motoyilgad ko pi profet rok Jehovah.​—Jer. 35:​12-15.

ROGON NI I POW’IY JEHOVAH E TIN SOM’ON E KRISTIANO

9. Mini’ e fanay Jehovah ni nge pow’iy e piin Kristiano u nap’an e bin som’on e chibog? (Kum guy e sasing.)

⁹ Nap’an e bin som’on e chibog C.E., me sunmiy Jehovah e ulung ni Kristiano. Ere uw rogon ni i pow’iy e tin som’on e Kristiano? I tay Jesus ni nge mang lolugen e ulung. (Efe. 5:23) Machane da i non Jesus ngak pi gachalpen ni tat’abagayad ni be yog e n’en ngar rin’ed. Ya fanay e pi apostal nge piin piilal u Jerusalem ni nga u rogned e thin ko ulung. (Acts 15:​1, 2) Kun mel’eg e piin piilal ni ngar pow’iyed e pi ulung e ngiyal’ nem.​—1 Thess. 5:12; Titus 1:5.

10. (a) Uw rogon u wan’ yooren e Kristiano ko bin som’on e chibog rogon ni un pow’iyrad? (Acts 15:​30, 31) (b) Mang fan ni immoy boch e girdi’ kakrom nda ur folgad ko piin ni i fanayrad Jehovah ni ngar pow’iyed yad? (Mu guy fare kahol ni kenggin e “ Fan ni i Siyeg Boch e Girdi’ e Mich Riy.”)

¹⁰ Ere gur, i fol e pi Kristiano e ngiyal’ nem u rogon ni yibe pow’iyrad, fa? Yooren i yad e ba felfelan’ ni nge fol ko pi fonow ni yibe pi’ ngorad. Bin riyul’ riy e ur felfelan’gad ko thin ni unog ngorad “ni be pi’ e athamgil nga lanin’rad.” (Mu beeg e Acts 15:​30, 31.) Machane uw rogon ni be pow’iy Jehovah e girdi’ rok ko ngiyal’ ney ni gad bay riy?

ROGON NI BE POW’IYDAD JEHOVAH E NGIYAL’ NEY

11. Mu weliy ban’en ni ke buch ni be dag rogon ni ke pow’iy Jehovah e piin yad be yog e thin ko ngiyal’ ney ni gad bay riy.

¹¹ Ka be ulul Jehovah ni nge pow’iy e girdi’ rok e ngiyal’ ney. Ma rin’ e re n’ey u daken e Thin rok nge Fak ni ir lolugen e ulung. Rayog ni ngad  guyed e mich riy ni ka be ulul Got ni nge fanay boch e girdi’ ni ngar manged owchen, fa? Arrogon. Am lemnag boch ban’en ni buch u tomuren e duw ni 1870. I tabab ni nge tamilang u wan’ Charles Taze Russell nge piin yad ba muun ngak ni fare duw ni 1914 e aram reb e duw nib ga’ fan ni bay rogon nga Gil’ilungun Got. (Dan. 4:​25, 26) Ra nanged e re n’ey ni bochan e ra fal’eged i gay murung’agen u Bible me pagan’rad ngay ni yad ra guy e pi yiiy u Bible ni ke lebug. Ere gur, i pow’iy Jehovah rogon e pi n’en ur gayed murung’agen u Bible, fa? Arrogon. N’en ni buch u fayleng u nap’an e duw ni 1914 e micheg ni ke tabab Gil’ilungun Got ko gagiyeg. I tabab e Bin Som’on e Mahl ko Fayleng, me sum boch e m’ar nib machreg ni ma af, nge durru’, ma be lich e ggan. (Luke 21:​10, 11) Ere riyul’ ni i fanay Jehovah e pi pumoon nem ni yad boch e Kristiano ni yad ba yul’yul’ ni ngar ayuweged e girdi’ rok.

12-13. Mang boch ban’en nni yarmiy ni ngan rin’ u nap’an e Bin L’agruw e Mahl ko Fayleng ya nge yag ni ngkun machibnag boor e girdi’?

¹² Kum lemnag e n’en ni buch u nap’an e Bin L’agruw e Mahl ko Fayleng. Tomuren ni fil e pi walag ni pumoon ni yad ma yog e thin ni ur moyed ko tochuch rodad fare thin ni bay ko Revelation 17:​8, ma aram me tamilang u wan’rad nre mahl nem e dabi tababnag e Armageddon, ya nga tomuren e ra aw e gapas me mab e kanawo’ ni ngkun machibnag boor e girdi’. Ere tababnag e ulung rok Jehovah fare skul ni ka nog e Watchtower Bible College (School) of Gilead ngay ni ngan skulnag e pi missionary u rogon ni ngar machibgad mar filed e thin rok Got ko girdi’ ko pi nam u ga’ngin yang e fayleng ni yugu aram rogon ni gowa de puluw ni ngan rin’ e re n’ey e ngiyal’ nem. Ku bay boch e missionary nni pi’rad nga boch e nam u nap’an e re mahl nem. Ki yarmiy fare tapigpig nib yul’yul’ ni ngan tababnag reb e skul u gubin e ulung ni ka nog e Course in Theocratic Ministry b ngay ni nge ayuweg e pi walag ni ngar mon’oggad ko machib nge rogon ni yad be fil ban’en ko girdi’. Ireray boch e kanawo’ ni i fal’eg Got rogon e girdi’ rok riy ni fan ko maruwel ni ka bay nib t’uf ni ngan rin’.

¹³ Gad ra sul ngad lemnaged e n’en ni i buch, ma rayog ni ngad guyed riy ni i pow’iy Jehovah e girdi’ rok e ngiyal’ nem. Ka nap’an e Bin L’agruw e Mahl ko Fayleng ni be yag ni nge machib e girdi’ rok Jehovah u boor e nam nib puf rogorad. Bin riyul’ riy e ke yag ni nge mon’og e re maruwel ney.

14. Mang fan nrayog ni nge pagan’dad ko n’en be yog e ulung rok Jehovah nge piin kan mel’egrad ni ngar manged piilal ni ngad rin’ed? (Revelation 2:1) (Kum guy e sasing.)

 ¹⁴ Ka be ulul girdien fare Ulung ni Ma Pow’iyey e ngiyal’ ney ni ngaur sapgad ngak Kristus ni nge pow’iyrad. Yad baadag ni nge puluw e n’en yad be yog ko pi walag ni ngar rin’ed ko n’en yibe lemnag u tharmiy. Ma yad ma fanay e pi walag ni pumoon ni yad ma lekag e ulung nge piin piilal ni nga rogned e n’en nge rin’ e pi walag u lan e ulung. c Piin piilal ni kan dugliyrad e yad bay u lan e “ba’ ni mat’aw i pa’” Kristus. (Mu beeg e Revelation 2:1.) Machane pi piilal ney e dawor ra flontgad ma ka yad ma oloboch. Immoy yu ngiyal’ ni i oloboch Moses nge Joshua, maku arrogon e pi apostal. (Num. 20:12; Josh. 9:​14, 15; Rom. 3:23) Yugu aram rogon mab fel’ rogon ni be pow’iy Kristus fare tapigpig nib yul’yul’ nge piin kan dugliyrad ni ngar manged piilal, ma ra ulul ni nge rin’ e re n’ey “nge yan i mada’ nga tomren e fayleng [“ngiyal’ ni ke chugur nga tomuren e re m’ag ney, NW].” (Matt. 28:20) Ere aram fan ni bay tapgin ni nge pagan’dad nga rogon ni be pow’iydad u daken e piin kan mel’egrad ni nga u rogned e thin rodad.

FAANRA UD FOLGAD U ROGON NI BE POW’IYDAD JEHOVAH MA RA YIB ANGIN NGODAD

15-16. Mang e ga be fil ko n’en ke buch rok e piin kar dugliyed ni ngar folgad u rogon ni be pow’iyrad Jehovah?

¹⁵ Faan gad ra ulul ni ngad folgad u rogon ni be pow’iydad Jehovah, ma ra yib angin ngodad ni kub muun ngay e ngiyal’ ney. Bod ni Andy nge Robyn e ra folgow ko fare fonow ni kan pi’ mar momnagew rogon e par rorow. (Heb. 13:5) Angin ni yib riy e yag ni ngar ognagew yow ni ngar piew e ayuw ni ngan toy boch e naun rodad. I yog Robyn ni gaar: “Bay yu ngiyal’ ni kug parew u boch e naun nrib achig ndariy e taang riy. Ku boor e camera nge boch ban’en ni fanag nug ma fanay ni ngaug fek e sasing riy ni kug pi’ ni chuway’ ni yugu aram rogon ni aram reb e ban’en nrug baadag nug ma rin’. Gu yor u nap’an nug pi’ e pi n’ey ni chuway’. Machane gu dugliy u wan’ug ni nggu folwok rok Sarah ni leengin Abraham ni aram e nggu lemnag e pi n’en ka bay nga m’on ma gathi tin ke thumur.” (Heb. 11:15) Ere mang angin ni yib ko re wu’ i mabgol ney ni bochan e n’en nrin’ew? I yog Robyn ni gaar: “Ri gamow ba felfelan’ ni bochan e gamow manang ni gamow be pi’ urngin ban’en ni bay romow ngak Jehovah. Nap’an ni gamow ra rin’ boch e maruwel ni kan pi’ ngomow, ma ma ayuwegmow ni nggu nangew rogon e par ni gad ra tay u lan e bin nib beech e fayleng.” Ki yog Andy ni gaar: “Ri gamow ba felfelan’ ni bochan e gamow be fanay urngin e tayim romow nge gelngimow ko maruwel ni yibe rin’ ni fan nga Gil’ilungun Got.”

 ¹⁶ Ku mang reb i angin nra yib ngodad ni faanra ud folgad u rogon ni be pow’iydad Jehovah? Tomuren ni chuw Marcia u high school, ma ri baadag ni nge fol ko fonow ni kan pi’ ngak ni aram e nge un ko pioneer. (Matt. 6:33; Rom. 12:11) I yog ni gaar: “Ni ognag ba guruy i salpiy ngog nrayog ni nggu fanay ni nggu un nga reb e skul nib tolang ni aningeg e duw n’umngin nap’an. Machane gu baadag ni nggu nameg boch ban’en ni fan ko tirok Got. Ere gu mel’eg ni nggu fil rogon i rin’ ba mit e maruwel nib gaman e salpiy nra yag riy ngog ya nge yag nug un ko pioneer. Aram reb e ban’en nrib manigil ni kug dugliy ni nggu rin’. Chiney e gub felfelan’ nug ma pigpig ni gag reb e regular pioneer, maku be yag ni nggu pi’ e ayuw ko maruwel u Bethel nge ku boch e maruwel ni yibe rin’ ni bochan e rayog ni nggu dugliy urngin e tayim ni nggu maruwel riy.”

17. Ku mang boch i angin nra yib ngodad ni faanra ud folgad u rogon ni be pow’iydad Jehovah? (Isaiah 48:​17, 18)

¹⁷ Bay yu ngiyal’ ni yima pi’ boch e fonow ngodad ni ma ayuwegdad u chogowen e chugum nge boch ban’en ni yima rin’ nrayog ni nge k’aringdad ni ngad th’abed e pi motochiyel rok Got. Ere faan gad ra fol ko fonow ni be pi’ Jehovah ngodad u murung’agen e pi n’ey, ma aram e ra yib angin ngodad. Gad ra par nib beech e nangan’ rodad ma gad siyeg boor e magawon. (1 Tim. 6:​9, 10) Bochan e re n’ey ma aram e rayog ni ngad pigpiggad ngak Jehovah u polo’ i gum’ircha’dad, ni aram e n’en nra yibnag e felfelan’ ngodad me pi’ e gapas nga lanin’dad.​—Mu beeg e Isaiah 48:​17, 18. d

18. Mang fan ni kam dugliy u wan’um ni ngaum fol u rogon ni be pow’iyem Jehovah?

¹⁸ Dariy e maruwar riy nra ulul Jehovah ni nge fanay boch e girdi’ ni ngar pow’iyed gadad u nap’an fare gafgow nib ga’ i yan nga lan fare Biyu’ i Duw Nra Gagiyeg Kristus riy. (Ps. 45:16) Ere gad ra ulul ni ngad folgad ko biney e kanawo’ nra fanay ni nge pow’iydad riy ngki mada’ ko ngiyal’ nib thil e n’en gad baadag ni ngad rin’ed, fa? Re n’ey e be yan u rogon ni gad ma fol u rogon ni be pow’iydad Jehovah e chiney. Ere gubin ngiyal’ ni ngaud folgad u rogon ni be pow’iydad Jehovah, ni kub muun ngay rogon ni be pow’iydad u daken e pi pumoon ni kan mel’egrad ni ngaur ayuweged gadad. (Isa. 32:​1, 2; Heb. 13:17) Ma nap’an ni gad be rin’ e re n’ey, ma rayog ni nge pagan’dad ngak Jehovah ni ir e En Be Pow’iydad ni bochan e be palognagdad ko pi n’en nrayog ni nge magawonnag e tha’ u thildad, me pow’iydad i yan ko gin gad be nameg ni aram e yafos ni manemus u lan e bin nib beech e fayleng.