Kadi bed kit meno, Jehovah mito ni wadi cwinywa kun wakure me timo jami i kare ma en omoko me timone. Pingo en mito ni watim meno? Gin ango ma romo konyowa me bedo ki yomcwiny ka wawoto ki kuro Jehovah?

PINGO JEHOVAH MITO NI WAKURE?

Baibul waco ni: “[Jehovah] tye ka kuro me nyuto berre botwu; meno omiyo en oyubbe pi timowu kica. Pien Rwot aye Lubanga ma ngolo kop atir, jo ducu ma gibedo kun gikure gitye ki gum [yomcwiny].” (Ic. 30:18) Icaya ocoyo lok magi bot Lujudaya ma guding. (Ic. 30:1) Ento onongo tye Lujudaya mogo manok ma lugen i kingi, dok lok meno ominigi gen. Lok meno bene miyo gen bot lutic pa Jehovah ma luwiny i kare-ni.

Dong omyero wadi cwinywa me kuro Jehovah pien en bene tye ka diyo cwinye. En otyeko moko kare ma ebijwero iye lobo man, dok tye ka kuro ninone ki cawane. (Mat. 24:36) I kare meno, binen ka maleng ni adot ma Catan omoro i kom Jehovah kacel ki jo ma gitiyo Pire obedo lok goba. En bijwero Catan kacel ki jo ma cwakke woko, ento En ‘bitimowa kica.’

I kare-ni, Jehovah pe oromo kwanyo pekkiwa ducu, ento en cuko cwinywa ni watwero bedo ki yomcwiny ka wawoto ki kuro kare meno. Kit ma Icaya otito kwede, watwero bedo ki yomcwiny ka watye ka kuro gin maber me timme. (Ic. 30:18) a Waromo nongo yomcwiny meno nining? Tye jami angwen ma watwero timone.

KIT ME BEDO KI YOMCWINY KA WAWOTO KI KURO JEHOVAH

Ket cwinyi i kom jami mabeco. Kabaka Daudi oneno jami maraco mapol i kare me kwone. (Jab. 37:35) Kadi bed kit meno, en ocoyo ni: “Bed mot i nyim Rwot [Jehovah], dok idi cwinyi ikure. Pe ipar pi ngat ma tye ka lony oyotoyot, kadi pi ngat ma cobo yubbe me timo gin maraco.” (Jab. 37:7) Daudi kikome bene olubo tam meno ki keto cwinye i kom genne me larre. En bene obedo ki pwoc pi jami mabeco ducu ma  Jehovah otimo pire. (Jab. 40:5) Ka wan bene waketo cwinywa i kom jami mabeco ma tye i kwowa, ento pe i kom pekkiwa, ci wabinongo ni yot me kuro Jehovah.

Ti ki kare mo keken me pako Jehovah. Laco Jabuli 71, ma nen calo obedo Daudi, owaco bot Jehovah ni: “Abimedde ki bedo ki gen i komi, abimedde ki paki nakanaka.” (Jab. 71:14) En onongo bipako Jehovah nining? En onongo bitito bot jo mukene lok i kom Jehovah kun bene wero wer me pakke. (Jab. 71:​16, 23) Calo Daudi, watwero bedo ki yomcwiny ka wawoto ki kuro Jehovah. Wapakke ka watito kwena bot jo mukene, waloko i kome bot wadiwa ki luremwa, dok wawero werwa me woro. Dong i nino mukene ka itye ka wero werwa mo, tam matut i kom lok ma tye iye ki kit ma gikeli kwede yomcwiny.

Wek omegini ki lumegini gucuk cwinyi. I kare ma Daudi okato ki i pekki, en owaco bot Jehovah ni: “Nyingi ber, abibedo ka tucone i nyim joni ma gingeyi.” (Jab. 52:9) Wan bene watwero nongo cuko cwiny ka watye kacel ki omegiwa ki lumegiwa, pe i cawa me cokke ki ticwa me pwony keken, ento bene ka watye ka namo kacel kwedgi.—Rom. 1:​11, 12.

Jing genni. Jabuli 62:5 waco ni: “Ageno mera Lubanga keken kun abedo aling gira mot, pien genna ducu a ki bote.” Pire tek adada ni wabed ki gen matek, tutwalle ka agikki piny pe obino i kare ma watamo ni bibino iye. Myero waye ni cikke pa Jehovah ducu bicobbe kakare kadi bed bimitte ni wakur pi kare malac makato ma wabyeko. Watwero jingo genwa ki kwano Lok pa Lubanga. Me labolle, tam i kom jami ducu ma Baibul otito pire con ma dong gucobbe woko, kit ma lok pa luco Baibul mapatpat rwatte kwede, ki dong jami ma Jehovah otitiwa madok i kome. (Jab. 1:​2, 3) Medo i kom meno, mitte ni wamedde ki ‘lego Lubanga i cwiny maleng’ wek liremwa ki Jehovah obed matek ka wawoto ki kure me cobo cikkene me miniwa kwo ma pe tum.—Juda 20, 21.

Calo Kabaka Daudi, bed ki tekcwiny ni Jehovah neno jo ma gitye ka Kure dok nyuto Marre ma pe lokke botgi. (Jab. 33:​18, 22) Medde ki diyo cwinyi ki kuro Jehovah ki yomcwiny kun iketo cwinyi i kom jami mabeco ma tye i kwoni, ipakke, inongo cuko cwiny ki bot luye luwoti, dok igwoko genni wek obed matek.