Se loloolo ɔ, Yehowa hyɛɔ blɔ kaa wa maa to wa tsui si kɛ mlɛ lɛ konɛ e tsu níhi a he ní ngɛ be nɛ sa mi. Mɛni he je nɛ Yehowa hyɛɔ blɔ kaa waa to wa tsui si kɛ mlɛ lɛ ɔ? Mɛni maa ye bua wɔ konɛ waa kɛ bua jɔmi nɛ mlɛ?

MƐNI HE JE NƐ YEHOWA HYƐƆ BLƆ KAA WAA MLƐ LƐ Ɔ?

Baiblo ɔ de ke: ‘Yehowa ngɛ mlɛe kaa e maa na nyɛ mɔbɔ; ejakaa nɔ́ nɛ da pɛ e peeɔ daa. Nihi nɛ ngɔɔ a hɛ ngɔ fɔɔ Yehowa nɔ ɔ, a náa bua jɔmi.’ (Yes. 30:18) Yesaya ngma munyu nɛ ɔ kɛ ya ha Yuda bi nɛ a tue mi ti ɔ. (Yes. 30:1) Se Yuda bi komɛ ngɛ nɛ a yeɔ anɔkuale, nɛ e ngɛ heii kaa munyu nɛ ɔ ha nɛ a ná hɛ nɔ kami. Ngɛ anɔkuale mi ɔ, munyu nɛ ɔ haa nɛ Yehowa sɔmɔli anɔkualetsɛmɛ nɛ a ngɛ mwɔnɛ ɔ hu náa hɛ nɔ kami.

Enɛ ɔ he ɔ, e sa nɛ waa to wa tsui si kɛ mlɛ ejakaa Yehowa nitsɛ hu ngɛ jã pee. E to be pɔtɛɛ nɛ e kɛ ma kpata je yaya nɛ ɔ hɛ mi, nɛ e ngɛ mlɛe konɛ jamɛ a be ɔ kɛ ngmlɛfia a nɛ su. (Mat. 24:36) Ke jamɛ a be ɔ su ɔ, e maa pee heii kaa munyuhi nɛ Abosiami po kɛ fɔ Yehowa kɛ e we bi a nɔ ɔ ji lakpa. Yehowa ma kpata Satan kɛ nihi tsuo nɛ a fĩ e se ɔ a hɛ mi, se wɔɔ lɛɛ, ‘e maa na wɔ mɔbɔ.’

E ngɛ mi kaa Yehowa be nyagbahi nɛ waa kɛ kpeɔ amlɔ nɛ ɔ jee kɛ je mohu lɛɛ, se e ha nɛ wa ná nɔ mi mami kaa wa ma nyɛ ma ná bua jɔmi be mi nɛ wa ngɛ mlɛe ɔ. Kaa bɔ nɛ Yesaya de ɔ, wa ma nyɛ ma ná bua jɔmi be mi nɛ wa ngɛ mlɛe kaa wa nine maa su nɔ́ kpakpa ko nɔ ɔ. (Yes. 30:18) Mɛni ma nyɛ ma ha nɛ wa ná jamɛ a bua jɔmi ɔ? Ní eywiɛ komɛ ma nyɛ maa ye bua wɔ.

NƆ́ NƐ MAA YE BUA MO NƐ O NÁ BUA JƆMI BE MI NƐ O NGƐ MLƐE

Mo susu ní kpakpahi a he. Matsɛ David na yi wu tso ní peepeehi fuu ngɛ e si himi mi tsuo. (La 37:35) Se ngɛ lɔ ɔ tsuo se ɔ, e ngma ke: ‘Pee dii ngɛ Yehowa hɛ mi; too o tsui si, nɛ o hyɛ lɛ blɔ. Koo ye o tsui ngɛ nihi nɛ ná a he ɔ a he; nihi nɛ pee yayami nɛ a kɛ ná a he ɔ, koo ye o tsui ngɛ a he.’ (La 37:7) David nitsɛ ngɔ ga womi nɛ ɔ kɛ tsu ní. Enɛ ɔ he ɔ, e ngɔ e juɛmi kɛ ma si nɛ Yehowa wo kaa e maa ye bua lɛ ɔ nɔ. Jehanɛ hu ɔ, e je hɛsa kpo ngɛ ní kpakpahi tsuo nɛ Yehowa pee ha lɛ ɔ he. (La 40:5) Jã nɔuu kɛ̃ nɛ ke wa ngɔ wa juɛmi kɛ ma ní kpakpahi nɛ ngɛ nɔ yae ngɛ wa si  himi mi ɔ nɔ, nɛ wa ngɔɛ wa juɛmi kɛ mɛ wa nyagba amɛ a nɔ ɔ, e he be wae ha wɔ kaa wa maa mlɛ Yehowa.

Mo je Yehowa yi be fɛɛ be. E ma nyɛ maa ba kaa David ji nɔ nɛ ngma La 71 ɔ nɛ. Ngɛ lejɛ ɔ, e de Yehowa ke: “Imi lɛɛ ma ngɔ ye hɛ kɛ fɔ o nɔ be tsuaa be. Ma je o yi daa kɛ daa.” (La 71:14) Mɛni blɔ nɔ nɛ David maa gu kɛ je Yehowa yi? E maa tu Yehowa he munyu kɛ tsɔɔ ni kpahi, nɛ e ma la kɛ je e yi. (La 71:​16, 23) Kaa bɔ nɛ e ji ngɛ David blɔ fa mi ɔ, wɔ hu wa ma nyɛ ma ná bua jɔmi be mi nɛ wa ngɛ Yehowa mlɛe. Ke wa fiɛɛ kɛ tsɔɔ nihi, nɛ wa tu Yehowa he munyu kɛ tsɔɔ wa weku li kɛ wa huɛmɛ, nɛ wa laa asafo ɔ la amɛ ɔ, lɔ ɔ tsɔɔ kaa wa ngɛ Yehowa yi jee. Be kpa mi nɛ o ma la Matsɛ Yemi la ko ɔ, mo susu e mi munyu ɔmɛ a he, nɛ o hyɛ bɔ nɛ o bua maa jɔ ha.

Mo ha nɛ nyɛmimɛ ɔmɛ nɛ a wo mo he wami. Benɛ David kɛ nyagbahi ngɛ kpee ɔ, e de Yehowa ke: “Ma na mo si ngɛ o ma a hɛ mi. Ma wo o biɛ ta, nɛ ma je o yi.” (La 52:9) Wa nyɛmimɛ ɔmɛ ma nyɛ maa wo wɔ he wami wawɛɛ. A ma nyɛ maa pee jã ngɛ asafo mi kpehi a sisi, ngɛ fiɛɛmi mi, kɛ be mi nɛ wa ngɛ wa hɛja jee.—Rom. 1:​11, 12.

Mo ná hɛ kɛ nɔ fɔmi nɛ mi wa. La 62:5 ɔ de ke: “Mawu pɛ nɔ i ngɔ ye hɛ kɛ fɔ; lɔ ɔ he ɔ, i pee dii kɛ ngɛ lɛ blɔ hyɛe, konɛ e ba he ye yi wami.” E he hia wawɛɛ kaa wa ma ná hɛ kɛ nɔ fɔmi nɛ mi wa, titli ɔ, ke wa ngɛ blɔ hyɛe kaa nyagbe ɔ maa ba mla, se e ngɛ se kpɛe ɔ. E sa nɛ wa ná nɔ mi mami kaa Yehowa si womi ɔmɛ tsuo maa ba mi niinɛ. Ke e se kɛ kaa mɛni po ɔ, e maa ba mi. Mawu Munyu ɔ nɛ wa maa kase ɔ ma ha nɛ wa hɛ kɛ nɔ fɔmi ɔ mi maa wa wawɛɛ. Kaa nɔ hyɛmi nɔ́ ɔ, o ma nyɛ ma pue o yi mi tɛ ngɛ Baiblo gbamihi nɛ a ba mi momo ɔ a he, kɛ bɔ nɛ munyuhi nɛ Baiblo ngmali ɔmɛ ngma ngɛ be slɔɔtohi a mi ɔ kɛ a he kpaa gbi ha. (La 1:​2, 3) Jehanɛ hu ɔ, e sa nɛ waa ya nɔ nɛ ‘waa sɔle kɛ mumi klɔuklɔu’ ɔ, konɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa be mi nɛ wa ngɛ mlɛe konɛ wa ná neneene wami nɛ e wo si ɔ.—Jud 20, 21.

Kaa bɔ nɛ Matsɛ David pee ɔ, mo ná nɔ mi mami kaa Yehowa hyɛɔ nihi nɛ a mlɛɔ lɛ ɔ a nɔ nɛ e jeɔ suɔmi nɛ se pui kpo kɛ tsɔɔ mɛ. (La 33:​18, 22) Yaa nɔ nɛ o to o tsui si kɛ mlɛ Yehowa, nɛ o ngɔ o juɛmi kɛ ma ní kpakpahi nɛ ngɛ nɔ yae ngɛ o si himi mi ɔ nɔ nɛ o je e yi. Jehanɛ hu ɔ, mo ha nɛ nyɛmimɛ ɔmɛ nɛ a wo mo he wami, nɛ o ha nɛ hɛ kɛ nɔ fɔmi nɛ se be nɛ o ngɛ ɔ mi nɛ wa wawɛɛ.