Андый да болзо, Иегова бисти јаманды јоголтотон ӧйди чыдажып сакызын деп кӱӱнзейт. Ол нениҥ учун сакызын деп кӱӱнзеп турган? Биске сӱӱнчибисти јылыйтпай, оны сакыырга не болужар?

ИЕГОВА НЕНИҤ УЧУН БИСТИ ОНЫ САКЫЗЫН ДЕП КӰӰНЗЕП ЈАТ?

Агару Бичикте мынайда айдылган: «Иегова слерди килеерге, чыдамкай болуп сакыйт. Ол туруп чыгар ла слерди килеер. Нениҥ учун дезе Иегова — справедливый Кудай. Ого иженип турган улустыҥ ончозы ырысту» (Иса. 30:18). Исайяныҥ бу сӧстӧри озо ло баштап еврейлерге айдылган, је Иегова олорды кедер уулдар деп айткан (Иса. 30:1). Андый да болзо, олордыҥ ортозында Кудайга чындык та ишчилер болгон. Бу сӧстӧр олорго ижемји берген. Анайда ок бу сӧстӧр Иегованыҥ бӱгӱнги де ишчилерине ижемји берет.

Иегова ол кӱнди чыдажып сакып турарда, биске де оны сакып турар керек. Кудай бу калју телекейди јоголтотон кӱнди тургузып салган (Матф. 24:36). Ол кӱнди ле саатты бойы да сакып јат. Ол кӱнде Сатананыҥ Иегова ла оныҥ ишчилерин јабарлаганы тӧгӱн деп јап-јарт кӧрӱне берер. Оноҥ Кудай Сатананы ла ого јӧмӧжип тургандарды јоголтып салар, а бисти «килеер».

Је бӱгӱнги кӱнде бис ченелтелерге табартып јадыс. Олордоҥ Иегова бисти айрыбай да турган болзо, калју телекейдиҥ јоголтыларын сакып тура, бисти сӱӱнчилӱ артар аргалу деп айдат. Исайяныҥ айтканыла, та нени де сӱреен тыҥ сакып турзаас, бис сӱӱнчилӱ болор аргалу (Иса. 30:18) a. Је сӱӱнчилӱ болорго нени эдер керек? Биске тӧрт јӧп болужар.

СӰӰНЧИНИ ЈЫЛЫЙТПАЙ, КАНАЙЫП САКЫЫР?

Јакшы неме керегинде сананыгар. Давид каанныҥ јӱрӱминде кӧп кыйын-шыра болгон (Сар. 37:35). Је андый да болзо, ол мынайда бичиген: «Иеговага сӧсуккур болуп, оны чыдажып сакы. Кара санааларына јединип турган улусты кӧрӱп, сӱриҥ тӱшпезин» (Сар. 37:7). Бу јӧпти ол бойы да бӱдӱрип јӱрген. Иегова оны артыргыспас деп бир де алаҥзыбаган. Анайда  ок Иегованыҥ болужы учун Давид быйанду болгон (Сар. 40:5). Бис те јаман санааларга алдыртпай, јакшы немени кӧрӧргӧ албаданзаас, Иегованы сакыырга јеҥил болор.

Иегованы кӧптӧдӧ мактап туругар. 71-чи Сарынды бичиген кижи, байла, Давид болгон болор. Ол мынайда бичиген: «Мен сени оноҥ ло ары сакып, оноҥ кӧп мактаарым» (Сар. 71:14). Ол Иегованы канайып мактаган? Улуска Кудай керегинде куучындаган ла кожоҥдор кожоҥдоп туратан (Сар. 71:16, 23). Бис Иегованы сакып тура, Давид ле чилеп сӱӱнчилӱ болор аргалу. Бис Иегованы кӱнӱҥ сайын куучыныста, јарлаар иште, анайда ок Каандыктыҥ кожоҥдорын кожоҥдоп, мактап јадыс. Оныҥ учун кожоҥдоп јатсаас, кожоҥныҥ учурын ла ол биске сӱӱнчибисти јылыйтпаска канай болужып турганын шӱӱп сананып јадыс.

Ийде-кӱчтӱ болорго, ака-эјелерле куучындажыгар. Давид кӱчтерге туштаарда Иеговага мынайда айткан: «Сениҥ чындык улузыҥа сениҥ адыҥа иженип турганымды кӧргӱзерим» (Сар. 52:9). Бис те ака-эјелерисле јаҥыс ла јуунныҥ туштажуларында ла јарлаар иштиҥ ӧйинде эмес, је ӧскӧ дӧ ӧйдӧ куучындажып турзаас, ийде-кӱчтӱ болорыс (Рим. 1:11, 12).

Ижемјигерди тыҥыдыгар. Сарын 62:5-те мынайда айдылат: «Мен Кудайымды унчукпай сакып јадым, нениҥ учун дезе ол меге ижемји берген». Биске бек ижемји калју телекейдиҥ учын узак ӧйдиҥ туркунына сакыырга келишсе, тыҥ керек болуп јат. Андый да болзо, биске Кудайдыҥ ончо берген сӧстӧри бӱдӱп калар деп, бир де алаҥзыбас керек. А ижемјибисти тыҥыдарга, Агару Бичикти шиҥдеери болужар. Ондогы судурларды, ондогы бичиктердиҥ бой-бойыла колбузын ла Иегова керегинде не айдылганын шӱӱп сананар керек (Сар. 1:2, 3). Анайда ок оноҥ ло ары «агару тынныҥ башкартузы аайынча» (ЈТ) мӱргӱп јӱрер керек. Мынай эдип турзаас, Иегованыҥ берерге турган сыйын, ӱргӱлји јӱрӱмди, сакып тура, оныла колбуларыс бек болор (Иуда 20, 21).

Айдарда, Давид кааннаҥ тем алып, Иегова оны сакып турган улусты кӧрӱп турган деп алаҥзыбагар. Кудай андый улусты чындык сӱӱжиле сӱӱйт (Сар. 33:18, 22). Јакшы неме керегинде сананыгар. Иегованы мактагар. Кӧгӱс јанынаҥ кӱчтӱ болорго, ака-эјелерле куучындажып туругар. Анайда ок баалап турган ижемјигерди бир де јылыйтпагар. Бу ончо неме слерге Иегованы сакыырга болужар.