Jehová Diosar pacienciamp suytʼkasajj kusisitakïsksnawa
JEHOVÁ DIOSAJJ taqe jan walinak chhaqtaykani machaqat taqe kuns lurkani uka urun puriniñap ¿walt suyaskta? (Apoc. 21:1-5). ¡Ukhamäpachawa! Ukampis Jehová Diosar pacienciampi suytʼañajj chʼamakïspawa, jan waltʼäwinakan uñjasktan ukhaw jukʼamp chʼamäspa. Ukatwa Biblian akham sispacha: “Kuntï maynejj suyki ukajj jan jankʼak phoqaski ukhajja, chuymarojj usuntayiwa” sasa (Prov. 13:12).
Ukhamäkchisa, amtki uka urun puriniñap pacienciamp suytʼaskakiñaswa Jehová Diosajj muni. ¿Kunatsa Jehová Diosajj suytʼaskakiñas muni? ¿Kunas suytʼkasajj kusisitäskakiñatak yanaptʼistani?
¿KUNATSA DIOSAJJ SUYTʼASKAKIÑAS MUNI?
Biblian akham siwa: “Jehová Diosajj jumanakar sum uñjañatakejj pacienciampiw suytʼaski, jumanakat khuyaptʼayasiñatakiw jupajj sartasirakini. Kuna laykutejj Jehová Diosajj cheqapar uñjir Diosawa. Taqe khitinakatï jupar suytʼasipki ukanakajj kusisitäpjjewa” sasa (Is. 30:18). Isaiasajj jan istʼasir judionakaruw ukham säna (Is. 30:1). Ukampis uka tiempon Diosat jan jitheqtir judionakajj utjarakïnwa. Uka arunakajj suytʼañatakiw jupanakar yanaptʼpachäna, jichhürunakan yanaptʼarakistuwa.
Ukhamajj ¿kunatsa pacienciamp suytʼaskakiñasa? Kuna laykutejj Jehová Diosas pacienciampiw suytʼaski. Kunürusa ukat kuna horarus akapach tukjani ukajj Jehová Diosan calendariopan marctʼatäjjewa, puriniñap suyaskaraki (Mat. 24:36). Uka urojj purinkani ukhajja, kuna kʼarinaktï Diablojj Dios contrasa servirinakap contras uñstayki ukanakan kʼarïtapajj qhanaw amuyasini. Supayarusa jupa toqet saytʼasirinakarus tukjaniwa, ukampis servirinakapat ‘khuyaptʼayasiñwa’ jupajj arsuwayi.
Suyañaskamajj inas Jehová Diosajj taqe llakinakas jan chhaqtaykchiniti. Ukampis kusisitakïsksnawa, ukwa jupajj qhanañchistu. Kunjamtï Isaiasajj siskänjja, kuntï wal suyktan ukanakan puriniñapkamajj kusisitakïsksnawa (Is. 30:18). a ¿Kunas kusisitäskakiñatakejj yanaptʼistani? Pusi toqet uk uñjañäni.
¿KUNAS SUYTʼKASAJJ KUSISITÄSKAKIÑATAK YANAPTʼISTANI?
Kunatï sumäki uk lupʼiñäni. David reyejj walja jan walinakwa jiwañkamajj uñjawayäna (Sal. 37:35). Ukhamäkchïnsa, akham sasaw qellqäna: “Jehová Dios nayraqatan amuktʼam, pacienciamp jupar suytʼam. Mä jaqe kawsajj jan colerasimti, uka jaqen jan wali amtanakapajj phoqaskchi ukas jan colerasimti” sasa (Sal. 37:7). David pachpaw uka arunakarjam luräna. Mä toqetjja, Jehová Diosajj jupar salvañ arskäna ukwa Davidajj lupʼirïna. Maysa toqetjja, kuna sumanaktï Diosajj jupa layku lurkäna ukanak wali valoranitwa uñjirïna (Sal. 40:5). Jiwasatï jan walinakat sipans kunatï sumäki ukanakat lupʼiñäni ukhajja, Jehová Diosar suytʼañajj janiw chʼamäkaniti.
Jehová Diosarojj jachʼañchapuniñäni. Salmo 71 qellqerejj inas Davidächïna, ukan akham siwa: “Ukampis nayajj suytʼaskakïwa, nayrat sipansa jukʼampiw jachʼañchäma” sasa (Sal. 71:14). ¿Kunsa jachʼañchañatakejj lurirïna? Yaqhanakaruw Jehová Diosat parlirïna, alabanzanak cantarakirïna (Sal. 71:16, 23). Jiwasajj Davidjamarakiw predicacionansa, amigonakasampiru familiaranakasampir Jehová Diosat parlktan ukhasa, tantachäwinakan cantasas Diosar jachʼañchsna. Ukhamajj Salonan mä canción cantkäta ukhajja, chʼamañchtʼkir arunakap amuyañatak chʼamachasim. Taqe ukanak lurañaw Jehová Diosar kusisit suytʼaskakiñatakejj yanaptʼistani.
Jilat kullakanakasampïñäni. Davidajj jan walinakan uñjaskäna ukhajja, Jehová Diosar akham sänwa: “Jumat jan jitheqtirinak nayraqatanwa jachʼañchäma, sutimaruw nayajj suytʼäjja” sasa (Sal. 52:9). Kunjamtï Davidajj Diosan servirinakapampïsajj chʼamañchtʼaskänjja, ukhamarakiw jiwasajj tantachäwinakansa, predicacionansa jan ukajj yaqha horasanakans jilat kullakanakamp chʼamañchtʼassna (Rom. 1:11, 12).
Taqe chuyma suytʼañatak chʼamachasiñäni. Salmo 62:5 texton akham siwa: “Nayajj amukiw Diosarojj suytʼaskta. Jupatwa nayan suytʼäwijajj juti” sasa. Kuntï suytʼasktan ukajj jiwasatak cheqäñapapuniwa, jukʼampis akapachan tukusiñapajj jan jankʼak purinki ukhaw ukhamäñapa. Qhawqha tiempoy suychiñäni, Jehová Diosan promesanakapajj phoqasipuniniw sasaw confiyañasa. ¿Kunsa uk taqe chuyma suytʼañatakejj lursna? Diosan Arupat yatjjatañasawa, profecianakapsa, kunja suma qellqtʼatasa, kunanaksa Jehová Diosat yatichistu ukanaks sum amuyañasawa (Sal. 1:2, 3). Wiñay jakañ churañ arsuwayki ukan phoqasiñapkamajja, Diosarojj oraskakiñasawa, espíritu santops mayiskakiñasawa, ukhamat jupamp sum apasiskakiñasataki (Jud. 20, 21).
David reyjamarakiw akat jan payachasktanti: Jehová Diosan nayranakapajj khitinakatï jupar suytʼasipki khitinakarutï jupajj munasiñampi jan jaytjasiñamp uñjki ukanakaruw uñchʼukiski (Sal. 33:18, 22). Ukhamajj Jehová Diosar pacienciamp kusisit suytʼkasajja, kunatï jakañ vidan sumäki ukanakat lupʼiñäni, Diosar jachʼañchañäni, jilat kullakanakasampïñäni, taqe chuyma suytʼañatak chʼamachasiñäni.
a Suytʼasipki siski uka arojja, mä kun pasañap suyaña sasaw traducisirakispa, ukajj salvaskañäni uka urun puriniñap wal suyañajj walikïskatapwa uñachtʼayistu.
