Kɛ é mínndɛ Zoova’n maan e klun jɔ
?Ɔ ƝIN o blɛ mɔ Zoova wá yí ɲrɛnnɛn’n kwlaa, kpɛkun ɔ́ yó maan ninnge’m bé káci uflɛ’n i sin? (Ngl. 21:1-5) Nanwlɛ, e kwlakwla e ɲin o blɛ sɔ’n i sin kpa. Sanngɛ nanwlɛ, nán blɛ kwlaa nun yɛ Zoova i minndɛlɛ’n ti pɔpɔ-ɔ. I li kɛ sa kekle wo e su’n, yɛ i sɔ yolɛ’n kwla yo kekle kpa’n niɔn. Like nga be ɲin wo i sin m’ɔ baman ndɛndɛ’n, ɔ kpɛ awlɛn.—Ɲan. 13:12.
Zoova kunndɛ kɛ e tra e awlɛn e minndɛ blɛ mɔ i bɔbɔ wá síesíe ninnge mun’n. ?Ngue ti yɛ Zoova kunndɛ kɛ e yo sɔ-ɔ? ?Kɛ é mínndɛ Zoova’n, ngue yɛ ɔ kwla uka e naan y’a di aklunjɔɛ?
?NGUE TI YƐ ZOOVA KUNNDƐ KƐ E TRA E AWLƐN E MINNDƐ I-Ɔ?
Biblu’n se kɛ: “Zoova su minndɛ kpa naan ɔ́ sí amun aunnvɔɛ, ɔ́ wá jáso, kpɛkun ɔ́ sí amun aunnvɔɛ. Afin Zoova ti Ɲanmiɛn kun m’ɔ yo sa nuan su sɛsɛ-ɔ. Be nga be ɲin trɛn i sin titi’n, be liɛ su ti ye.” (Eza. 30:18) Zifu ɲin keklefuɛ’m be ti yɛ i klikli nun’n, Ezai klɛli ndɛ sɔ’n niɔn. (Eza. 30:1) Sanngɛ Zifu wie’m be ɲin yili Ɲanmiɛn. Ɔ maan ndɛ sɔ’n guali be awlɛn su nzue. Ndɛ kunngba sɔ’n gua Zoova i sufuɛ’m be awlɛn su nzue wie andɛ.
Ɔ fata kɛ e tra e awlɛn e minndɛ, afin Zoova bɔbɔ trɛ i awlɛn wie. Zoova sieli blɛ trele nga i nun yɛ ɔ́ núnnún mɛn tɛ nga’n. Yɛ ɔ su minndɛ kɛ cɛn’n nin dɔ’n be ju naan w’a yo sɔ. (Mat. 24:36) Blɛ sɔ’n nun’n, é wún i wlɛ weiin kɛ Zoova nin be nga be su i’n, be su ndɛ nga Satan kannin’n ɔ ti ato. Kɛ ɔ ko yo sɔ’n, Ɲanmiɛn núnnún Satan nin sran kwlaa nga be o i sin’n. Sanngɛ e liɛ’n ‘ɔ́ sí e aunnvɔɛ.’
Zoova su yiman sa kwlaa nga be o e su’n dɔ nga su. Sanngɛ ɔ se e kɛ kannzɛ sa’m be o e su’n, e kwla di aklunjɔɛ. Kɛ nga Ezai fa kannin’n sa’n, kɛ é mínndɛ like kpa kun’n e kwla di aklunjɔɛ. (Eza. 30:18) ?Sanngɛ é yó sɛ naan y’a di aklunjɔɛ? É wá kán like nnan mɔ e kwla yo’n be ndɛ.
?KƐ É MÍNNDƐ ZOOVA’N É YÓ SƐ NAAN Y’A DI AKLUNJƆƐ?
E fa e ɲin e sie i sa kpakpa nga be ju e su’n be su. Klunwifuɛ’m be kleli Davidi i yalɛ dan. (Jue. 37:35) Sanngɛ ɔ seli kɛ: “Tran diin Zoova ɲrun, yɛ tran minndɛ i. Sran ng’ɔ sunnzun sa tɛ’n, m’ɔ yo ye’n, nán fɛ i wun ya.” (Jue. 37:7) Davidi bɔbɔ nantili ajalɛ sɔ’n su.Yɛle kɛ ɔ fɛli i ɲin sieli i delɛ mɔ Zoova seli kɛ ɔ́ dé i’n su. Asa’n ɔ fɛli i ɲin sieli i ninnge kpakpa kwlaa nga Zoova yo mɛnnin i’n be su. (Jue. 40:5) E kusu’n, sa kpakpa nga be ju e su’n, be su yɛ ɔ fata kɛ e fa e ɲin e sie-ɔ. Sɛ e yo sɔ’n, é kwlá trá e awlɛn é mínndɛ Zoova.
Maan e manman Zoova titi. Atrɛkpa’n Davidi yɛ ɔ klɛli Jue Mun 71 niɔn. Ɔ seli Zoova kɛ: “Min liɛ’n, ń mínndɛ titi. Ń úka ɔ manmanlɛ’n su.” (Jue. 71:14) ?Wafa sɛ yɛ Davidi manmannin Zoova-ɔ? Ɔ kannin Zoova i ndɛ kleli i wiengu mun, kpɛkun ɔ toli jue fa mɛnmɛnnin i. (Jue. 71:16, 23) E kusu kɛ é mínndɛ Zoova’n, e kwla di aklunjɔɛ kɛ Davidi sa. Blɛ kwlaa nga é bó jasin fɛ’n, annzɛ é kɛ́n i ndɛ é klé e osufuɛ nin e janvuɛ mun’n, annzɛ é tó e jue mun’n, e manman Zoova. Cɛn nga á tó e Ɲanmiɛn sulɛ jue’m be nun kun’n, bu i nun ndɛ’m be su akunndan kpa.
Kplin su kɛ ɔ niaan Klisifuɛ’m be wla ɔ fanngan. I nun mɔ sa o Davidi su’n ɔ seli Zoova kɛ: “Ɔ sufuɛ kpa’m be ɲrun’n, ń fá min wla ń gúa ɔ dunman’n su.” (Jue. 52:9) E niaan’m be kwla wla e fanngan aɲia’m be bo nin jasin fɛ bolɛ’n nun. Asa’n kɛ e nin be e yia e yiyi e ɲin su’n, be kwla wla e fanngan wie.—Rɔm. 1:11, 12.
Yo naan lafi like nga ɔ wla o su’n i su kpa tra laa’n. Jue Mun 62:5 se kɛ: “Ń trán diin ń mínndɛ Ɲanmiɛn, afin like nga min wla o su’n, ɔ fin i.” Ɔ ti cinnjin kpa kɛ e lafi like nga e wla o su’n i su kpa. I li kɛ é mínndɛ mɛn nga i awieliɛ’n m’ɔ baman ndɛndɛ kɛ nga e fa sunnzunnin’n sa’n, yɛ ɔ fata kɛ e yo sɔ kpa’n niɔn. Ɔ fata kɛ e lafi su kpa kɛ kannzɛ ɔ́ cɛ́ sɛ’n, nda kwlaa nga Zoova tali e’n, bé kpɛ́n su. I lɛ nun’n maan e suan Ɲanmiɛn Ndɛ’n i nun like kpa. I wie yɛle kɛ e kwla suan Ɲanmiɛn nuan ijɔfuɛ’m be ndɛ nga be kannin m’ɔ kpɛnnin su’n be su like. Asa’n e kwla suan wafa nga Biblu’n i nun ndɛ’m be kɔ likawlɛ’n i su like. Annzɛ e kwla suan Zoova i su ndɛ wie mɔ Biblu’n kan’n i su like. (Jue. 1:2, 3) Asa ekun’n, maan Ɲanmiɛn wawɛ’n i fanngan nun’n e srɛ Ɲanmiɛn naan e nin i e afiɛn’n mantan kpa titi. I liɛ’n e ɲin trán nguan m’ɔ leman awieliɛ mɔ Zoova seli kɛ ɔ́ fá mán e’n su.—Zid. 20, 21.
Kɛ Davidi sa’n maan e lafi su kɛ Zoova i ɲin o be nga be sro i’n be su, naan ɔ klo be dan. (Jue. 33:18, 22) Maan e tra e awlɛn e minndɛ Zoova. I lɛ nun’n, maan e fa e ɲin e sie i ninnge kpakpa nga be ju e su’n be su. Maan e manman Zoova titi. Maan e kplin su kɛ e niaan’m be wla e fanngan. Yɛ maan e yo like kwlaa nga e kwla yo naan y’a lafi like nga e wla o su’n, i su kpa y’a tra laa’n.
