Jehova i wantem se yumi gat longfala tingting mo wet long hem blong i tekem aksen long stret taem. ?From wanem hem i wantem se yumi wet? ?Wanem i save halpem yumi blong yumi glad nomo blong wet?

?FROM WANEM JEHOVA I WANTEM SE YUMI WET?

Baebol i talem se: “Jehova i stap wet wetem longfala tingting, blong mekem i gud long yufala, mo bambae hem i girap blong soem sore long yufala. From Jehova i God blong jastis. Olgeta evriwan we oli stap wet long hem, oli glad.” (Aes. 30:18) Ol tok ya, Aesea i raetem i go stret long ol man Jiu we oli stronghed. (Aes. 30:1) Be i gat sam man Jiu we oli ol gudfala man, mo ol tok ya i givim hop long olgeta. Mo hemia i givim hop tu long ol gudfala man blong Jehova tede.

Taswe yumi mas gat longfala tingting blong wet, from we Jehova tu i stap wet wetem longfala tingting. Hem i putum wan stret taem finis blong finisim rabis sistem blong wol ya, mo hem i stap wet blong dei mo aoa ya i kamtru. (Mat. 24:36) Long taem ya, bambae i klia se ol tok we Devel i stap talem agensem Jehova mo ol man blong Hem, oli giaman. Biaen, Jehova bambae i spolem Setan mo eni man we i stap sapotem hem, be bambae Hem i “soem sore” long yumi.

Long taem ya we yumi stap wet, Jehova i no save tekemaot ol trabol blong yumi, be hem i promes se yumi save stap glad. Olsem Aesea i talem, yumi save stap glad taem yumi gohed nomo blong wet, blong luk gudfala samting i hapen. (Aes. 30:18) a ?Yumi save mekem wanem blong stap glad? I gat fo samting we yumi save mekem.

ROD BLONG STAP GLAD TAEM YUMI STAP WET

Tingbaot nomo ol gudfala samting. Long ful laef blong King Deved, hem i bin luk plante man we oli gat ol rabis fasin. (Sam 37:35) Be yet, hem i raetem se: “Yu mas stap kwaet long fes blong Jehova mo yu wet blong luk samting we bambae hem i mekem. Yu no mas harem nogud from man we i stap win long ol plan blong hem.” (Sam 37:7) Deved i folem advaes ya taem hem i tingbaot nomo promes  ya blong Jehova blong sevem hem. Mo tu, hem i tinghae long olgeta gudfala samting we Jehova i mekem long hem. (Sam 40:5) Yumi tu, sipos yumi tingbaot nomo ol gudfala samting, be i no ol nogud samting we i stap hapen raon long yumi, bambae i isi blong yumi wet long Jehova.

Yusum evri janis blong presem Jehova. I luk olsem se Deved, we i raetem Ol Sam 71, i tokbaot Jehova se: “Bambae mi gohed blong wet, bambae mi presem yu moa.” (Sam 71:14) ?Olsem wanem bambae hem i presem Jehova? Bambae hem i tokbaot Jehova long ol narafala mo i singsing blong presem hem. (Sam 71:​16, 23) Olsem Deved, yumi save stap glad taem yumi wet long Jehova. Yumi presem Jehova taem yumi prij, storian wetem ol narafala evri dei, mo sing long ol singsing blong yumi. Taswe, nekis taem we yu sing long wan singsing blong Kingdom, i gud yu tingting gud long ol tok blong singsing ya mo tingbaot olsem wanem i mekem yu glad.

Letem ol brata mo sista oli leftemap tingting blong yu. Taem Deved i fesem trabol, hem i talem long Jehova se: “Long fes blong ol man we oli holemstrong long yu, bambae mi putum hop blong mi long nem blong yu.” (Sam 52:9) Ol brata mo sista tu oli save leftemap tingting blong yumi, i no long ol miting nomo mo long wok blong prij, be long taem ya tu we yumi joen tugeta blong pleplei mo kakae.—Rom 1:​11, 12.

Mekem hop blong yu i kam strong moa. Ol Sam 62:5 i talem se: “Mi mi stap kwaet nomo mi wet long God from we hop blong mi i kamaot long hem.” I impoten tumas blong gat wan strong hop, speseli sipos en i no kam kwiktaem olsem we yumi bin tingbaot. Yumi mas trastem fulwan se ol promes blong Jehova bambae oli kamtru, nomata se yumi wet longtaem finis. Taem yumi stadi long Tok blong God, hop blong yumi i save kam strong moa. Eksampol, yumi save stadi long ol profet tok we oli kamtru finis, mo luk olsem wanem ol defren haf blong Baebol oli joen gud, mo ol smosmol save we Jehova i talem blong soemaot hem. (Sam 1:​2, 3) Mo tu, oltaem yumi mas ‘prea mo letem tabu spirit i lidim yumi,’ blong yumi save gohed blong fren gud wetem Jehova taem yumi stap wet, blong promes ya blong laef olwe i kamtru.—Jud 20, 21.

Olsem King Deved, yumi mas trastem se Jehova i stap wajem olgeta we oli stap wet long Hem, mo i stap soemaot long olgeta se Hem i lavem olgeta oltaem. (Sam 33:​18, 22) Yumi save gohed blong gat longfala tingting mo wet long Jehova, taem yumi tingbaot nomo ol gudfala samting, yusum evri janis we yumi gat blong presem hem, letem ol brata mo sista oli leftemap tingting blong yumi, mo gohed blong mekem hop blong yumi i kam strong moa.