Ọrheyerriọ, e Jehova ye hoo ne ima ya izinegbe dia khẹ ẹghẹ ne irẹn khian ya zẹ emwi ru. Vbọzẹ ne Jehova na hoo ne ima zin egbe? De emwi nọ khian ru iyobọ ne ima ya gha sọyẹnmwẹ zẹvbe ne ima ya zin egbe?

VBỌZẸ NE JEHOVA NA HOO NE IMA ZIN EGBE?

E Baibol khare wẹẹ: “Sokpan e Jehova keghi zin egbe, nọ mieke na tohan uwa. Ọ mu egbe nọ ya tohan uwa, rhunmwuda, emwi nọ gbae ẹre irẹn ru vbe ẹghẹ hia. Oghọghọ nọ ne iran ni mudia khẹ ọre.” (Aiz 30:18) Ivbi e Ju ni zẹ utun vbe ehọ ẹre Aizaia ghaa gu guan vbe ako na. (Aiz 30:1) Sokpan, Ivbi e Ju eso rrọọ ni ghaa ya ẹkoata ga e Jehova, te ẹmwẹ ne Aizaia ta na, wa rhie igiọdu ne iran. Ẹmwẹ na wa vbe rhie igiọdu ne emwa ni ya ẹkoata ga e Jehova vbe ẹdẹnẹrẹ.

Nọnaghiyerriọ, te ọ khẹke ne ima gha mwẹ izinegbe rhunmwuda te Jehova tobọre vbe zin egbe. E Jehova mwamwa ẹghẹ yọ nẹ, nọ khian ya guọghọ agbọn Esu na, te irẹn wa ya izinegbe dia khẹ ẹdẹ ne ẹdẹrriọ. (Mat 24:36) Ọ gha sẹ ẹghẹ nii, ọ ghi gele do vẹ ne agbọn hia rẹn wẹẹ, ohoghe ẹre Esu kevbe emwa ni gae ta vbekpa e Jehova. Ọ ghi wabọ e Setan kevbe emwa hia ni ye ẹre ike, sokpan ọ ghi “tohan” ima.

A sẹtin miẹn wẹẹ, e Jehova i khian wa sọfurre ye ọlọghọmwa ne ima ye nian sokpan, ọ gi ima rẹn wẹẹ, ma gha sẹtin gha mwẹ oghọghọ zẹvbe ne ima ya zin egbe. Zẹvbe ne Aizaia tae, ma gha sẹtin gha mwẹ oghọghọ deghẹ ima na ya aro ye emwi nọ maan nọ khian sunu vbe odaro. (Aiz 30:18) a Vbe ima khian ya sẹtin gha mwẹ oghọghọ na guan kaẹn na? Gi ima guan kaẹn emwi enẹ nọ gha ru iyobọ ne ima.

VBENE U KHIAN YA SẸTIN GHA MWẸ OGHỌGHỌ ZẸVBE NE U YA ZIN EGBE

Gha rhie aro tua afiangbe ne u sọyẹnmwẹ ọnrẹn. Ẹ i re emwi kherhe Ọba ighẹ e Devid miẹn vbe agbọn. (Psm 37:35) Ọrheyerriọ, ọ na ye kha wẹẹ: “Zin egbe ne u rhie ẹghẹ ne Jehova ya winna. Ghẹ si osi ye ẹmwẹ iran ne agbọn maan rẹn, ra ye emwa ne iro dan ne iran zẹ dunna na.” (Psm 37:7) E Devid tobọre wa lele ibude na, ọ na rhie aro tua imiẹnfan ọghẹe. Ọ vbe rhie aro tua afiangbe nọ ghaa miẹn vbe obọ e Jehova. (Psm 40:5) Deghẹ ima na vbe gha rhie aro  tua afiangbe ne ima miẹn, ne ima gha te ya gha rhie aro tua ọlọghọmwa ne ima la gberra, ẹ i khian lọghọ ima, ne ima sẹtin ya izinegbe diakhẹ e Jehova.

Gha loo ẹkpotọ nọ rhirhi kie ya rho e Jehova. Ọ gha kẹ, e Devid ẹre ọ gbẹn ebe Psalm 71, ọ keghi tama e Jehova wẹẹ: “Sokpan, nọ ne imẹ, I gha mwẹ izinegbe. Te I khian ye gha rhie urhomwẹ nuẹn.” (Psm 71:14) De vbene ọ khian ya rhie urhomwẹ ne Jehova hẹ? Ọ ghi gha tama emwa ọvbehe vbekpa e Jehova, ọ ghi vbe gha so ihuan urhomwẹ gie ẹre. (Psm 71:​16, 23) Vbe na ghee Devid ma gha sẹtin gha mwẹ oghọghọ zẹvbe ne ima ya diakhẹ e Jehova. Ma keghi rhie urhomwẹ gie Jehova vbe ima ghaa kporhu, vbe ima ghaa gu emwa ọvbehe guan, kevbe vbe ima ghaa so ihuan urhomwẹ gie ẹre. Ẹghẹ ke ẹghẹ ne u ya so ihuan Arriọba, hia ne u gha muẹn roro ẹmwẹ na loo ro vbe ihuan nii.

Gi etẹn nikpia kevbe etẹn nikhuo rhie igiọdu nuẹn. Vbe Devid ghaa werriẹ aro daa ọlọghọmwa, ọ keghi tama e Jehova wẹẹ: “Vbe uwu ẹbu emwa ruẹ, I gha mu ẹtin yan eni ruẹ.” (Psm 52:9) Etẹn ima gha vbe sẹtin rhie igiọdu ne ima, vbe ima ghaa rre iko, ikporhu kevbe vbe ima gha si egbe koko gha sọyẹnmwẹ egbe.—Rom 1:​11, 12.

Hia ne u gha mwẹ ayayẹro nọ wegbe. Ebe Psalm 62:5 khare wẹẹ: “Osanobua ọkpa ẹre I ya egbe yan, rhunmwuda uwẹ ẹre ọ ya mwẹ mwẹ ayayẹro.” A gha we ne ọmwa gha mwẹ ayayẹro nọ wegbe, ọ rhie ma wẹẹ, te ọ khẹke nọ gha mwẹ ilẹkẹtin nọ wegbe wẹẹ, emwi nọ ya aro yi gha sẹ ọre obọ. Ọna ọre emwi ne ima wa gualọ ne ima mieke na sẹtin zin egbe ya sẹ ufomwẹ, ọ gha khọnrẹn wẹẹ, emwi ne ima te ya aro yi ma he sẹ obọ. Ọ khẹke ne ima ya ekhọe hia yayi wẹẹ, e Jehova gha mu eyan rẹn hia sẹ, ọ gha khọnrẹn we ọ rhie ẹghẹ. Ma gha sẹtin gha mwẹ ayayẹro nọ wegbe deghẹ ima na gha tie Baibol; ẹmwẹ akhasẹ ni rre uwu ẹre kevbe emwi ughughan ne Jehova tama ima vbekpa aro ọmwa ne irẹn khin, ma ghi vbe gha hia ne ima rẹn vbene emwi hia ni rre uwu ẹre ya rhilo ginna egbe hẹ. (Psm 1:​2, 3) Ọ vbe khẹke ne ima “gi orhiọn nọhuanrẹn gha dia [ima] vbe erhunmwu” ne ima na, ne ima mieke na sẹtin ye gha re ọsie Jehova zẹvbe ne ima ya diakhẹ ẹghẹ nọ khian ya ya arrọọ ọghe etẹbitẹ ru ima ẹse.—Jud 20, 21.

Vbe na ghee Ọba ighẹ e Devid, gha mwẹ ilẹkẹtin wẹẹ, e Jehova gbaroghe emwa ni ya izinegbe diakhẹ ọre kevbe wẹẹ, ọ vbe mwẹ ahoẹmwọmwa nẹi beghe daa iran. (Psm 33:​18, 22) Ye gha diakhẹ e Jehova, ne u ye gha rhie aro tua afiangbe ne u sọyẹnmwẹ ọnrẹn, gha loo ẹkpotọ nọ rhirhi kie ya rho e Jehova, gi etẹn nikpia kevbe etẹn nikhuo rhie igiọdu nuẹn, u ghi vbe gha mwẹ ayayẹro nọ wegbe.