Tapi, Jahwe pasti erban janjiNa terjadi bas waktu si enggo tetapkenNa, janah ateNa gelah sabar kita nimaisa. Engkai maka arapkenNa kita sabar? Kai si banci nampati kita ermeriah ukur sanga nimai?

ENGKAI MAKA ARAPKEN JAHWE KITA SABAR?

Nina Pustaka, “Sabar Jahwe nimai guna ncidahken perkuah ateNa man kena. Ertindak pagi Ia guna ncidahken perkuah ateNa man kena. Sebap Jahwe eme Dibata si adil. Ermeriah ukur kap kalak si ngarap man baNa.” (Jes. 30:18) Kata-kata Jesaya enda itujuken man kalak Jahudi si keras kepala. (Jes. 30:1) Tapi, lit piga-piga kalak Jahudi si setia i je janah kata-kata enda erban kalak e tek maka reh ulina nge pagi keadan kalak e. Kata-kata e pe mere arapen man umat Jahwe si setia gundari.

Emaka, arus kita sabar nimai Jahwe perban Ia pe sabar nimai. Enggo tetapkenNa ndigan waktuna engkernepken doni si jahat enda, janah sabar Ia nimai wari ras jamna guna ngelakoken si e. (Mat. 24:36) Paksa si e pagi, jelas kel teridah maka kerina tuduhen Setan man Jahwe bage pe man kalak si setia ngelayani Ia la tuhu. Kenca si e, kernepken Jahwe me Setan ras kerina si ndukung ia, tapi cidahken Jahwe ‘perkuah ateNa man banta.’

Selain si e, banci saja labo masapken Jahwe percuban si sangana siadapi. Tapi, petetapNa ukurta maka banci kita ermeriah ukur sanga nimai masa depan si ijanjiken Jahwe. Bage ka me si ikataken Nabi Jesaya. (Jes. 30:18) a Uga kita banci ndatken keriahen ukur si bage? Lit empat cara si banci nampati kita.

UGA CARANA TETAP ERMERIAH UKUR SANGA NIMAI JAHWE?

Teruslah ukuri kai si mehuli. Enggo idah Raja Daud melala kel kejahaten bas segedang geluhna. (Ms. 37:35) Tapi bagenda itulisna, “Timailah Jahwe alu sabar. Timailah Ia alu dem pengarapen. Ula kam rate segat man kalak si berhasil rencana jahatna.”  (Ms. 37:7) Daud pe dalankenna nasehat e. Terus ukurina janji Jahwe guna nelamatken Ia. Ukurina ka tiap pasu-pasu si alokenna arah Jahwe. (Ms. 40:5) Adi terus siukuri kai si mehuli janah la siukuri kai si la mehuli, e erban reh nukahna siakap nimai Jahwe.

Tetaplah sibuk muji Jahwe. Si nulis Masmur 71 banci saja Daud, nina man Jahwe, “Lalap pagi Kam kutimai, lalap pagi Kam kupuji.” (Ms. 71:14) Uga Daud muji Jahwe? Ceritakenna kerna Jahwe man kalak si deban janah endekenna lagu pujin man baNa. (Ms. 71:​16, 23) Bagi Daud, banci sipuji Jahwe sanga kita erberita, sanga sicakapken kerna Ia man teman-temanta ras keluargata, bage pe sanga siendeken lagu-lagu Kerajan. Sanga endekenndu salah sada lagu Kerajan, cuba perdiateken lirikna ras ukuri uga e banci erban kam ermeriah ukur.

Ergaullah ras turang senina guna ndatken pergegeh. Sanga adapi Daud erbage-bage masalah, bagenda nina man Jahwe, “I lebe-lebe umatNdu si setia, ngarap aku man gelarNdu.” (Ms. 52:9) Bali bagi Daud, kita pe banci terpegegehi adi ergaul kita ras turang senina. Banci silakoken si e sanga perpulungen, erberita, bage pe bas acara-acara santai.—Rom. 1:​11, 12.

Pepaguhlah kinitekenndu man janji Jahwe. Nina bas Masmur 62:​5, “Sabar aku nimai Dibata, perban Ia kap pengarapenku.” Penting kel kiniteken si paguh, terlebih adi wari e lenga reh bagi si arapken kita. Arus kita tek maka janji-janji Jahwe pasti terjadi, la soal asa kai nari dekahna kita arus nimai. Banci ka sipepaguh arapenta alu mpelajari Pustaka. Contohna, banci siukuri kerna nubuat-nubuat Pustaka si enggo terjadi, uga isi Pustaka cocok sada ras si debanna, bage pe uga Jahwe nuriken kerna diriNa. (Ms. 1:​2, 3) Selain si e, perlu ka kita rusur ‘ertoto alu kesah si badia’ gelah hubungenta tetap rembak ras Jahwe janahta nimai janjiNa kerna kegeluhen si rasa lalap terjadi.—Jud. 20, 21.

Bali bagi Raja Daud, teklah kam maka terus iperdiateken Jahwe kalak si nimai Ia janah lalap cidahkenNa kekelengenNa si setia man kalak e. (Ms. 33:​18, 22) Emaka teruslah ukuri kai si mehuli, pujilah Jahwe, ergaullah ras turang senina, ras pepaguhlah kinitekenndu. Alu bage, pasti banci terus timaindu Jahwe alu sabar.