Yéhôva a yi na bi tabe ne mieññ a yange na a zu bo mam éyoñ émien a nga tyik. Amu jé a yi na bi bo de? Jé é ne volô bia na bi ba’ale avak dangane nté bia yange?

JÉ YÉHÔVA A YI NA BI BO NTÉ BIA YANGE?

Kalate Zambe a jô na: “Yéhôva a ye yange, nde te a ye bo mia mvam; ajô te fe a ye betebane yôp, nde te a ye ko mia éngôngo: amu Yéhôva a ne Zambe ya nya ntyi’ane mejôô; ébotan a ba bese ba yange nye.” (Ésa. 30:18) Mejô me Ésaïe mete me mbe me taté fombô bejuif be mbe be bene’e njôan. (Ésa. 30:1) Ve bejuif béziñe be mbe be wulu ba’aba’a a Yéhôva, a mejô mete me nga ve be ndi nlem. Ma ve fe bebo bisaé be Yéhôva ya melu ma ndi nlem.

Ajô te, bia yiane yange a ôjibi ôse, amu Yéhôva fe a yange a ôjibi ôse. A teléya ngum éyoñ a ye tyame mbia nta’ane mame nyi, nde fe a yange na môs a awolo éte é kpwan. (Matt. 24:36) Éyoñ éte, môt ase a ye yeme na mame mese Diable a nga jô a lat a Yéhôva a bebo bisaé Bé me ne minsos. Yéhôva a ye wôé Satan a bôte bese ba su’u nye, ve a ye “ko [bia] éngôngo.”

Nté bia yange, éko éziñe Yéhôva a ye bo te vaa minjuk bia tôbane mie, ve a jô bia na bi ne bo mevak nté bia yange. Aval Ésaïe a nga jô, bi ne bo mevak nté bia yange na mbamba jam éziñ a kui. (Ésa. 30:18) a Jé é ne bo na bi bo mevak? Bi tame zu yene mame menyin me ne volô bia.

MAME ME NE VOLÔ BIA NA BI BO MEVAK NTÉ BIA YANGE

Beme’e ôsimesane wôé mbamba be mame be kuiya wo ényiñ. Njô bôte David a nga tôban abui minju’u ényiñe jé. (Bsa. 37:35) Ve a nga tili na: “Tabe’e ne mieññ be Yéhôva, a yange nye nlem ô bô wo si. Te wô’ô ôlun amu nyu a nen a zene jé, amu môt a bo mbia mefe’e na me boban.” (Bsa. 37:7) David émien a nga tôñe melebe mete éyoñ a nga bem ôsimesane wé ngaka’a Yéhôva a nga bo na a ye nyii nye. A nga ve fe Yéhôva akiba asu mbamba be mame bese a  nga bo asu dé. (Bsa. 40:5) Nge bia fe bia bem ôsimesane wongane mbamba be mame ba kui bia ényiñ, teke nyoñ éyoñe ya ke bia fombô mbia be mame ba bobane bia mefefel, da ye bo tyi’ibi asu dangane na bi yange Yéhôva.

Bela’ane fane ése ô bili na ô kobô bôt ajô Yéhôva. Ntili Besam 71, a mbe a yiane bo David, a nga jô Yéhôva na: “Ma ye tabe ndi nlem melu mese, a ma ye dañedañe kañe wo.” (Bsa. 71:14) Aval avé a mbe a kañe’e Yéhôva? A mbe a kobô’ô bôte bevo’o ajô Yéhôva, a yia fe nye bia ya ékaña’a. (Bsa. 71:​16, 23) Aval ane David, bi ne bo mevak nté bia yange Yéhôva. Bia kañe nye éyoñe bia bo ésaé nkañete jangan, éyoñe bia kobô bemvôé bangan a bibu’a ya menda me bôte mangan ajô dé, a éyoñe bia yia nye bia ya ékaña’a biangan. Éyoñe wo yia jia éziñe ya bia ya ékaña’a biangan, kôme nyoñ éyoñe ya vô’ôlô bifia ya jia éte a yen abime mevak wo bi éyoñe wo yia je.

Kañese’e na bobejañ a besita be ve wo ngule nyul. Éyoñe David a nga tôbane minjuk, a nga jô Yéhôva na: “Ma ye tabe jôé dôé ndi nlem, amu é ne mvaé, vôme mbamba be bôte bôé be to.” (Bsa. 52:9) Bobejañ a besita be ne bia ve ngule nyule sake fo’o ve éyoñe bia tabe bisulan a be, nge ke éyoñe bia be be bia kui nkañete, be ne fe de bo éyoñe bia be be bia lôte mbamba biyoñe nsamba.—Rom. 1:​11, 12.

Yemete’e ndi nleme jôé. Kalate Besam 62:5 a jô na: “[Ma] yange ve Zambe [me] to évô, amu ndi nlem jame ja so be nye.” É ne nya mfii na bi bi ndi nlem é ne ngul, e dañedañe nge bia yene na asu’ulane da so ki éyoñe bi mbe bi yange de. Bia yiane tabe ndi na Yéhôva a ye tôé bengaka’a bé bese, to’o bia yen abim éyoñ évé é lôte’e. Bi ne yemete ndi nleme jangan éyoñe bia yé’é minkulane mejô ya Kalate Zambe. Bi ne nyoñ éyoñe ya fas aval avé mame méziñe Kalate Zambe a nga jô me nga tôéban, a aval avé mame betili Kalate Zambe be nga tili ma ke ma wô’an. (Bsa. 1:​2, 3) Bia yiane ke ôsu a “ye’elane fe a mfufube nsisim” asu na bi ke ôsu a ba’ale mbamba élat a Yéhôva, nté bia yange na ngaka’a jé ya ve bia ényiñe ya nnôm éto é tôéban.—Jude 20, 21.

Aval ane Njô bôte David, taba’ané ndi na Yéhôva a bôô évevé a bôte bese ba yange Nye, a liti fe be mvame Jé. (Bsa 33:​18, 22) Kele’e ôsu a yange Yéhôva a ôjibi ôse a mevak. Beme’e ôsimesane wôé mbamba be mame ba kui wo ényiñ. Kañe Yéhôva, a kañese na bobejañe ya nsisime be ve wo ngule nyul. Kele’e fe ôsu a ba’ale édima ndi nleme jôé ngul.