Lau sun lira, busenti Heowá lun gaguraasunmeme wamá luma lun wagurabuni dan le direi laalibei lun laransehani sun katei. Ka uagu busén lubéi Heowá lun wadügüni katei le? Ani ka gayaraabei líderaguniwa lun meferidirun wani wagundan dan le awanha lan agurabaha?

KA UAGU BUSÉN LUBÉI HEOWÁ LUN WAGURABAHAN?

Teni wamá lun le tariñagubei Bíbülia: “Lagurabuñadün Wabureme lau lugudemehabu hun; busenti larufuduni línsiñehabu hun, lugundun richati Wabureme le Wabungiute. Fuleseiwatiña sun ha hemenigibaña luagu!” (Isa. 30:18). Ariñaga lumuti Isaíasi dimurei burí le houn huríu mabuchahatiña (Isa. 30:1). Lau sun lira, lidan dan ligira añahein meha huríu ha úaraguabaña lun Heowá. Ruti dimurei burí le emenigini houn, ani gayaraati giñe líchugun emenigini woun uguñe weyu.

Ligíati, ka uagu lunti lubéi wagurabahan lau gurasu? Lugundun íbini Heowá lagurabahaña giñe lau gurasu. Direi laali Heowá weyu luma oura le lunbei lagumuchun lau ubóu le ani lagurabahaña lachülürün dan ligía (Mat. 24:36). Danme lachülürün weyu ligía, lerederuba furangu luagu iyeeni lan sun le lariñagubei Mafia luagu Heowá luma hawagu lubúeingu. Ligíabati lagumuchun Heowá lau lubafu Satanási luma hau sun ha luéigiñe baaña lóubadina. Gama lumoun, füramaseti houn lubúeingu larufudubei lan “lugudemehabu” houn.

Gayaraati magida lubéi lan Heowá sun waturobulin lidan awanha lan agurabaha. Lau sun lira chouru lumuti woun gayara lan gunda wamá. Ligíati, kei lariñaguni Isaíasi, gayaraati gunda wamá sun awanha lan agurabahei lachülürün katei buiti le wayumahabei (Isa. 30:18). a Ida luba wibihini ugundani ligía? Ariha wamá gádürü katei le gayaraabei wadügüni.

IDA LUBA GUNDAN WAMÁ SUN AWANHA LAN AGURABAHA?

Lau wetenirun lun katei buiti. Arihati meha urúei Dawidi bandi wuribani lidan sun libagari (Sal. 37:35). Íbini ítara, abürühati: “Maniba liñúarü Aburemei bagurabahame lau gurasu darí líderagunibu. Magañidabá hawagu  ha buídubaña lidin houn lidan habagari, ha aransehabaña lun hadügün wuribani” (Sal. 37:7). Falá lumuti Dawidi guánarügü adundehani le. Ida? Luéigiñe aban oubaü, aba letenirun lun füramasei le ladügübei Heowá lun luagu lesefurubei lan. Ani luéigiñe le aban oubaü, aba gebegi lan sun katei buiti le ladügübei Bungiu luagu (Sal. 40:5). Ánhawa giñe etenira lun katei buiti le geyegubei wau, ani mama lun katei wuribati, ménrenguntimabei woun wasigirun agurabahei ladügüni Heowá le lunbei ladügüni.

Yusu waméi sun chansi le wámabei lun walawahani Heowá. Genegeti urúei lan Dawidi abürühabalin Sálumu 71, le ñein lubéi lariñaga lun Heowá: “Nagurabahaba súnwandan, ani neremuhatimaba bun” (Sal. 71:14). Ka meha ladügübei Dawidi lun lalawahani Heowá? Adimurehati meha Dawidi luagu Heowá houn amu ani alawaha lumuti meha giñe lau uremu (Sal. 71:​16, 23). Gayaraati giñe wáyeihani Dawidi lau walawahani Bungiu dan le wapurichihan, dan le wayanuhan luagu houn wamadagu luma houn waduheñu lúmati dan le weremuhan lun. Ligíati, dánmeya le heremuhan aban uremu lun halawahani Heowá, teni humá lun ka lan uagu layanuha uremu ligía. Líderagubadiwa sun katei le lun wakipuruni wagundan sun awanha lan agurabahei Heowá.

Sügǘ wamá dan hama wábirigu. Dan meha le gaturobulin lubéi Dawidi, ariñagati lun Heowá: “Nagurabahaba lidan biri hagibugiñe bánigu, ladüga wéiriti bubuidun” (Sal. 52:9). Ítara kei láluahaniña Dawidi amu lubúeingu Heowá lun libihin gurasu, gayaraati giñe wibihin gurasu hámagiñe wábirigu mámarügü lidan adamuridaguni, luma lidan apurichihani gayaraati giñe wibihini dan le wásügürün dan úara lidan isebáhari (Rom. 1:​11, 12).

Derebugüda waméi wemenigin. Ariñagati Sálumu 62:5: “Lúmarügüñein Bungiu nadarira darangilaü; ani lúmagiñe liabin nemenigin”. Súdiniti lun inarüni lan wemenigin woun, dántima le miábingili lan lagumuchagüle ubóu lau lufuresen kei yebe wasaminaruni. Meberesenga átiribei lan dan wagurabahan, mosu wachoururuni lagunfulirubei lan Heowá sun le füramase lubéi. Ida luba wederebudagüdüni emenigini le? Lau waturiahanu Lererun Bungiu ani lau wetenirun lun burí profesía le tídanbei, warihini úaraguni le hádanbei ámuñegueinarügü gürigia ha abürühabarun Bíbülia lúmati katei burí le larufudahabei Heowá woun luougua (Sal. 1:​2, 3). Lunti giñe wasigirun afurieida lun Heowá amuriahei lani sífiri sandu lun líderaguniwa akipura aban lubuidun umadaguaü luma, sun awanha lan agurabaha lagunfuliruni le füramase lubéi, líchugun ibagari magumuchaditi woun (Hud. 20, 21).

Ítara kei urúei Dawidi, gayaraati giñe wachoururuni larihiña lan Heowá hawagun ha agurabahabalin luma lun larufudun ínsiñeni le magumuchaditi houn (Sal. 33:​18, 22). Ligíati, lun gúndaameme wamá sun awanha lan agurabahei Heowá lau gurasu, teni wamá lun katei buiti le lídanbei wabagari, alawaha waméi Bungiu, sügǘ wama dan hama wábirigu ani derebugüda waméi lubuidun wemenigin.