Hambiketo Jehovha a lava ku hi emela ngu kutimisela kala kuza e maha timhaka ngu mbimo ya kona. Ngu kutxani a txi emela toneto kwathu? Niku nji txani txi no hi vhuna ku hi simama hi tsaka mbimo yi hi emelako?

NGU KUTXANI JEHOVHA A TXI LAVA KU HI EMELA?

Bhiblia yi womba tiya: “Ngu mhaka yeto, MKOMA a na verela ku mi mahela wumbilu; kambe ngu kumaha keto, a na guletwa kasi ku e mi pfela wusiwana, nguko MKOMA Njizimu txo diganisa [txa wululami]. Va katekile votshe vale va thembako kwakwe.” (Isaya 30:18) Mapswi yawa a mprofeti Isaya ngu kukongoma ma bhaletwe Vajudha vo kwa mbi engisa. (Isaya 30:1) Kambe hagari ka Vajudha vale ku ti ni vathu vo thembeka, se mapswi oneyo ma txi va ninga themba. Se malanda a Jehovha o thembeka nyamsi ni ona ma nga va ni themba mbimo yi ma gondako mapswi yawa a mprofeti Isaya.

Nanathu tilava hi emela ngu kutimisela nguku Jehovha nene a maha ati ti fanako. Ene se a yi vekile mbimo yi a no tisa magwito ya mafu yawa o biha. Ene a emela ditshiku ni mbimo kasi ku si hoka. (Mat. 24:36) Ka ditshiku donedo, ti nava hakubasani ti to ati Sathani a ti wombako ngu Jehovha kumweko ni malanda akwe makuhu. Se koneho, Jehovha a na hiyela Sathani kumweko ni vale va emako nayo, kambe ene a nava ni ‘wumbilu ni nathu.’

Kala kuza ditshiku donedo di hoka, ti nga maha Jehovha a si thavisi sikarato sathu, kambe ene wa hi tsanisekisa ti to hi nga tsaka kala kuza ditshiku donedo di hoka. Nga ha mprofeti Isaya a nga womba ngu kona ta koteka ku hi tsaka, ngu mbimo yoneyo ya yimweyo, hi txi emela tximaha txa txinene ku txi maheka. (Isaya 30:18) a Kambe ti kotekisa kutxani toneto? Ahi wone 4 wa tipontu ati ti nga hi vhunako.

HI NGA TSAKA NGU NZILA MUNI MBIMO YI HI KU NGADI HI TXI EMELA?

Veka mapimo ka timhaka ta tinene ati ti mahekako ka wutomi wako. Mkoma Dhavhidha a woni wubihi wa hombe ngutu ka wutomi wakwe. (Mas. 37:35) Hambi keto, ene a bhati tiya: “Themba MKOMA, u txi rinzela ene; u nga khatale ngu vale va humelelako wutomini kwawe, avale va humelelako ngu makungo  awe o biha.” (Mas. 37:7) Dhavhidha a londisili txileleto txonetxo ni ku veka mapimo ka themba ya ku hulukiswa ayi Jehovha a nga ti mningile. A txi tshumela e kombisa kubonga ngu totshe timhaka ta tinene a ti Jehovha a nga ti mmahete. (Mas. 40:5) Ngako hi txi maha ati ti fanako, hi txi veka mapimo ka timhaka ta tinene ati ti mahekako ka wutomi wathu, hahanze ko veka mapimo ka timhaka to biha, ti na hi hehukela nathu ku hi emela Jehovha.

Simama u di ñolekile u txi dhumisa Jehovha. M’bhali wa Masalmo 71, ti nga mahako i di Dhavhidha, a gete Jehovha a txi: “Ani ni na va ni kuthemba yotshe mbimo, ni na simama ni txi kudhumisa.” (Mas. 71:14) Dhavhidha adi na m’dhumisa ngu nzila muni Jehovha? A ndi na womba-womba ni vamwani mayelano ngu ngene ni ku m’dhumisa ngu kuembelela tindando. Kufana ni Dhavhidha, nanathu hi nga simama hi tsaka mbimo yi hi emelako Jehovha. Athu hi dhumisa Jehovha ngu ku txhumayela mahungu a manene, ka mabhulo athu a ditshiku ni ditshiku ni ku embelela tindando tathu ta Mfumo. Se ka dikhambi dimwani adi u no embelela tindando tathu ta Mfumo, ti ngo txani u riya kwati nzeve ka didungula ni kupimisa ngu nzila yi di gwesako ngu yona mbilu yako?

Tsaniswa ngu vanathu. Mbimo yi Dhavhidha a nga wonisana ni sikarato, a gete Jehovha a txi: “Masoni ka vasawuleki vako ni na dhumisa ditina dako.” (Mas. 52:9) Nanathu hi nga tsaniswa ngu vanathu, i singa ka mitshangano ni ka mthumo wo txhumayela dwe, kambe ni ka simahakalo simwani.—Var. 1:11, 12.

Tsanisa themba yako. Masalmo 62:5 a womba tiya: “Moya wangu wu themba Txizimu dwe, kuthemba kwangu kuta ngu ka txona.” Nda lisima ngutu ku hi simama hi tsanisa themba yathu, ngutu-ngutu se i di kale hi txi emela magwito. Tilava hi tsaniseka ti to sotshe sithembiso sa Jehovha si na hetiseka, ti si khataliseki ti to tilava hi emela kala mbimo muni. Athu hi nga tsanisa themba yathu ngu ku gonda dipswi da Txizimu, wuprofeti, nzila yi madungula mamwani ya mu ka Bhiblia ma tsimbitisanako ngu yona ni timhaka timwani ati Jehovha a nga tiveka hakubasani mayelano ni wuthu wakwe. (Mas. 1:2, 3) Nanathu tilava hi simama hi ‘khongela ngu ku ti tshanganisa ni moya wo sawuleka’ kasi ku hi simama hi tsanisa wungana wathu ni Jehovha mbimo yi hi emelako kuhetiseka ka txithembiso txa wutomi wo mbi guma.—Judha 20, 21.

Kufana ni Mkoma Dhavhidha, tsaniseka ka ti to Jehovha wa khatalela, wa vhikela ni ku kombisa lirando lo thembeka ka votshe vale va emelako kwakwe. (Mas. 33:18, 22) Ngu toneto, simama u emela Jehovha ngu ku timisela, u veka mapimo ka timhaka ta tinene ati ti mahekako ka wutomi wako, u m’dhumisa, u tsaniswa ngu vanathu ni ku tsanisa themba yako yo tsakisa.