Bisan pa niana, gidahom ni Jehova nga mapailobon tang maghulat nga molihok siya sa iyang gitakdang panahon. Nganong kanay iyang gidahom? Unsay makatabang nato nga magmalipayon samtang naghulat?

NGANONG GIDAHOM NI JEHOVA NGA MAGHULAT TA?

Ang Bibliya nag-ingon: “Si Jehova mapailobong naghulat nga pakitaan mog pabor, ug siya motindog aron pakitaan mog kaluoy. Kay si Jehova usa ka Diyos sa hustisya. Malipayon ang tanan nga padayong nagpaabot kaniya.” (Isa. 30:18) Kini nga mga pulong gisulti ni Isaias ngadto sa gahig ulo nga mga Hudiyo. (Isa. 30:1) Pero para sa matinumanong mga Hudiyo, kini naghatag nilag paglaom. Kini nga mga pulong makahatag pod ug paglaom sa matinumanong mga alagad ni Jehova karon.

Busa kinahanglan tang mapailobong maghulat kay si Jehova mapailobon pod nga naghulat. Naa siyay gitakdang panahon kon kanus-a niya taposon kining sistemaha, ug siya naghulat nga moabot kanang adlawa ug orasa. (Mat. 24:36) Nianang panahona, klaro gyong makita nga sayop ang mga akusasyon sa Yawa kang Jehova ug niadtong nag-alagad Kaniya. Dayon Iyang wagtangon si Satanas ug kadtong midapig kaniya, pero kita Iyang “pakitaan [ug] kaluoy.”

Sa pagkakaron, dili pa tingali wad-on ni Jehova ang atong mga pagsulay, pero iya tang gipasaligan nga puwede tang magmalipayon samtang naghulat. Sama sa giingon ni Isaias, puwede tang magmalipayon samtang naglaom o naghulat nga mahitabo ang usa ka maayong butang. (Isa. 30:18) a Sa unsang paagi mabatonan nato ang maong kalipay? Naay upat ka butang nga makatabang nato.

KON UNSAON NGA MAGMALIPAYON SAMTANG NAGHULAT

Magpokus sa positibong mga butang. Sa tibuok kinabuhi ni Haring David, nakita niya ang grabeng pagkadaotan sa mga tawo. (Sal. 37:35) Bisan pa niana, siya misulat: “Pagpakahilom sa atubangan ni Jehova ug paghulat nga mapailobon. Ayawg kalagot sa tawo nga nagmalamposon sa pagtuman sa iyang mga plano.” (Sal. 37:7) Gipadapat kini ni David pinaagi  sa pagpokus sa iyang hunahuna sa saad nga luwason siya ni Jehova. Mapasalamaton pod siya sa tanang panalangin nga iyang nadawat gikan kang Jehova. (Sal. 40:5) Kon magpokus pod ta sa positibong mga butang ug dili sa atong mga problema, mas dali para nato nga maghulat kang Jehova.

Gamita ang tanang kahigayonan sa pagdayeg kang Jehova. Ang magsusulat sa Salmo 71, nga lagmit mao si David, miingon kang Jehova: “Padayon kong maghulat; dugangan pa nako ang pagdayeg kanimo.” (Sal. 71:14) Giunsa niya pagdayeg si Jehova? Gisultihan niya ang uban bahin kang Jehova ug nag-awit siyag mga pagdayeg kaniya. (Sal. 71:​16, 23) Sama ni David, puwede tang magmalipayon samtang naghulat kang Jehova. Madayeg nato siya dihang magsangyaw ta, makig-estorya sa atong mga higala ug pamilya bahin kaniya, ug magkanta sa atong mga awit. Sa sunod nga higayon nga magkanta kag Kingdom song, puwede nimong hunahunaon pag-ayo ang lyrics ug ang makapalipay nga mensahe niini.

Tugoti ang mga igsoon sa pagdasig nimo. Dihang nag-atubang si David ug mga problema, miingon siya kang Jehova: “Sa atubangan sa mga maunongon kanimo, molaom ko sa imong ngalan.” (Sal. 52:9) Mapalig-on sab ta sa atong maunongong mga igsoon, dili lang panahon sa mga tigom ug sa pagsangyaw kondili panahon sab sa mga tapoktapok.—Roma 1:​11, 12.

Palig-ona ang imong paglaom. Ang Salmo 62:5 nag-ingon: “Mapailobon kong naghulat sa Diyos kay ang akong paglaom naggikan kaniya.” Importante kaayo ang lig-ong paglaom nga mahitabo gyod ang atong gilaoman—ilabina kon taastaas nga panahon na tang naghulat nga matapos ning sistemaha. Kinahanglang kombinsido gyod ta nga matuman ang mga saad ni Jehova bisag unsa pa ta ka dugay nga kinahanglang maghulat. Mapalig-on nato ang atong paglaom pinaagi sa pagtuon sa Pulong sa Diyos—sa mga tagna, sa kaharmonya sa mensahe niini, ug sa mga detalye nga gipadayag ni Jehova bahin kaniya. (Sal. 1:​2, 3) Kinahanglan sab tang mopadayon sa “pag-ampo sumala sa giya sa balaang espiritu” aron magpabilin ang atong maayong relasyon kang Jehova samtang nagpaabot nga matuman ang iyang saad nga kinabuhing walay kataposan.—Jud. 20, 21.

Sama kang Haring David, makasalig ka nga si Jehova nagbantay niadtong naghulat Kaniya ug nga Iyang ipakita ang Iyang maunongong gugma kanila. (Sal. 33:​18, 22) Padayon sa paghulat nga mapailobon kang Jehova pinaagi sa pagpokus sa positibong mga butang, pagdayeg kaniya, pagpakig-uban sa mga igsoon aron madasig ka, ug pagpalig-on sa imong bililhong paglaom.