Wahilila Muze Unashimbwila Muli Yehova ni Uhumikizo
SHINA wakushimbwila ni mbunge helu-helu tangwa lize Yehova makahwisa upi weswe hano hashi ni kupwisa yuma yeswe yaha? (Uso. 21:1-5) Chochene, yino ye wakulinga! Alioze, hi chashi ko mashimbu eswe kushimbwila muli Yehova ni kulihumikiza, chipi-chipi nyi tunapalika mu yipikalo. Nyi tunashimbwila chinji chuma chize kuchishi kulingiwa ni kawashi mutuhasa kuhonga.—Yishi. 13:12.
Chipwe chocho, nihindu Yehova kanazange hanga tushimbwile muli iye ni uhumikizo ndo haze malingila yuma ha shimbu lialita. Mumu liaka anazange tulinge chocho? Yika muyitukwasa tununge ni kuwahilila muze tunashimbwila muli Yehova?
MUMU LIAKA YEHOVA ANAZANGE TUSHIMBWILE MULI IYE?
Mbimbiliya yinambe ngwo: “Yehova kanashimbula akanulinge vumbi; kashika kanalinangamisa ha kunuvwila keke. Mumu Yehova iye Zambi ya ululi, kawaha waze mamutwaminyina.” (Iza. 30:18) Maliji wano a profeta Izaia, chitangu kaasonekenene A-Yunda waze te keshi kwononoka. (Iza. 30:1) Mukachi ka A-Yunda jacho, mwapwila nawa atu akwo waze te akwononoka, hachino, maliji wano te kakuhana kutalatala kuli atu jacho. Musono, tuvumbi twa Yehova ashishika mahasa kuwana kutalatala ha kutanga maliji wano a Izaia.
Yetu twatamba kushimbwila ni uhumikizo, mumu Yehova neye kakushimbwila ni uhumikizo. Iye hanatese tangwa lize makaneha songo lia chifuchi chino chipi, chipwe chocho machinunga ni kushimbwila tangwa ni ola yacho. (Mateu 24:36) Ha tangwa liacho, yuma yeswe muyikasoloka zwalala ngwo, yize Satana akwamba hali Yehova ni hali tuvumbi twenyi yili ya mahuza. Mba hi Yehova manongesa Satana ni waze eswe akumukwasa, alioze yetu ‘makatuvwila keke.’
Ndo haze tangwa liacho muliheta, hanji Yehova kechi kuhwisa yipikalo yetu yeswe, alioze iye kanatwehe shindakenyo ngwenyi, mutuhasa kuwahilila muze tunashimbwila. Ngwe chizechene Izaia ambile, mutuhasa kuwahilila aku tunatwaminyina yuma yipema hanga yilingiwe. (Iza. 30:18) a Kuchi chino muchihasa kulingiwa? Tutalenu yuma yiwana yize muyihasa kutukwasa.
CHIZE MUTUHASA KUWAHILILA MUZE TUNASHIMBWILA
Lihulikile ha yuma yipema. Mwanangana Ndawichi, kamwene yuma yinji yipi ku mwono wenyi. (Samu 37:35) Chipwe chocho, yasoneka ngwenyi: “Hwima hali Yehova, umutwaminyine ni uhumikizo. Kanda ulifwita mumu hali yoze wakuwaha mujila yenyi, hanji hali yoze wakumanununa kutaka chenyi chipi.” (Samu 37:7) Ndawichi kakawile chiyulo chino, chocho yalihulikila ha kutalatala cha ulamwine chize Yehova amuhele. Iye nawa kasakwilile ha yuma yeswe yipema yize Yehova apwile ni kumulingila. (Samu 40:5) Ni yetu nyi mutulihulikila ha yuma yipema yize yinalingiwa ku mwono wetu, shimbu tulihulikile ha yuma yipi, muchipwa chashi kushimbwila muli Yehova.
Fupa uhashi wa kuhalisa Yehova. Mukwa-kusoneka Samu 71, yoze kota wapwile Ndawichi yamba ngwenyi: “Yami mungutala matangwa eswe; ni kuweza uhaliso weka ni weka kuli yena.” (Samu 71; 14) Kuchi Ndawichi te mahasa kuhalisa Yehova? Iye te mahasa kuchilinga ha kulweza akwo hakutwala kuli Yehova ni kumuhalisa ha kumwimbila miaso. (Samu 71:16, 23) Chizechene ngwe Ndawichi, ni yetu mutuhasa kufunga uwahililo wetu muze tunashimbwila muli Yehova. Yetu twakumuhalisa muze twakwambujola, ha yize twakuhanjika tangwa ha tangwa ni muze twakwimba miaso ya mu ululikiso wetu. Kashika, ha shimbu lieswalio muwimba mwaso wa Wanangana, nyi muchilita lihulikile ha sona ni kumona chize sona jacho mujihasa kukukwata ku mbunge.
Wana utakamiso kuli mandumbu je. Muze Ndawichi te anapalika mu yipikalo, yalweza Yehova ngwenyi: “Mungutalatala ku jina lie kumeso ja asandu je.” (Samu 52:9) Ni yetu mutuhasa kuwana utakamiso kuli mandumbu jetu a ku ufulielo, hi wika ko muze tuli ha kukunguluka hanji muze tunambujola, alioze ni muze tuli no ha mashimbu akwo.—Roma 1:11, 12.
Kolesa kutalatala che. Samu 62:5 yinambe ngwo: “Mbunge yami hwima muli Zambi wika, mumu kutalatala chami chili kuli iye wika.” Chili chilemu kukolesa kutalatala chetu, chipi-chipi nyi tunashimbwila songo lia chifuchi chino ha miaka yinji. Twatamba kupwa ni shindakenyo ngwetu, yilakenyo yeswe ya Yehoha muyikamanunuka, chipwe ngwe twakuyishimbwila ha miaka yeswayo. Mutuhasa kukolesa kutalatala chetu ha kulilongesa Liji lia Zambi, uprofeto, chize yihanda yimwe ya Mbimbiliya yinalite ni yikwo ni chize Yehova asolwele utu wenyi. (Samu 1:2, 3) Twatamba nawa kununga “ni kulemba muli spiritu yisandu” hanga tukolese usepa wetu ni Yehova muze tunashimbwila umanunuko wa chilakenyo cha mwono wa mutolo.—Yunda. 20, 21.
Chizechene ngwe Ndawichi, fuliela ngwe Yehova kakufunga ni kusolola zango lingunu kuli waze eswe akushimbwila muli iye. (Samu 33:18, 22) Kashika, nunga ni kushimbwila muli Yehova ni uhumikizo, lihulikile ha yuma yipema yize yinalingiwa ku mwono we, muhalise, wana utakamiso kuli mandumbu ni kukolesa kutalatala che.
a Liji “kutwaminyina” hanji kushimbwila, mu limi lize asonekene Mbimbiliya, mulihasa nawa kulumbunuka “kuzanga chinji chuma hanga chilingiwe.” Chino chinasolola ngwo, hi chipi ko kuzanga hanga Yehova ahwise yipikalo yize tuli nayo.
