Kantmenm sa, Zeova i ekspekte ki nou esper avek pasyans ziska ki i azir dan sa letan ki i’n swazir. Akoz i ekspekte ki nou fer sa? Kwa ki kapab ed nou zwaye anmezir nou esper Zeova?

AKOZ ZEOVA I EKSPEKTE KI NOU ESPER LI?

Labib i dir: “Zeova pe esper avek pasyans pour demontre son labonte e i pou azir pour montre ki i pran pitye pour zot. Parski Zeova i en Bondye lazistis. Ere tou bann ki kontinyen esper li.” (Iza. 30:18) Izai ti dir sa bann parol avek bann Zwif, ki ti antete. (Iza. 30:1) Me parmi bann Zwif, i ti annan serten ki ti fidel avek Zeova e ler zot ti tann sa ki Izai ti dir, sa ti donn zot lespwar. Sa bann parol i osi donn bann serviter Zeova dan nou letan lespwar.

Alor nou bezwen esper Zeova avek pasyans parski Zeova osi pe esper avek pasyans. Zeova in swazir en letan kot i pou detri sa move lemonn e i pe espere pour sa zour ek sa ler arive. (Mat. 24:36) Ler sa letan i arive, i pou kler ki bann lakizasyon ki Dyab in fer kont Zeova e kont bann ki servi Li, i fo. Apre sa, Zeova pou retir Satan ek tou bann ki pran kote avek Satan, me Zeova pou “pran pitye pour [nou].”

Me antretan, menm si Zeova pa tir nou bann problenm, i asir nou ki nou kapab zwaye anmezir ki nou esper li. Zis parey Izai ti dir, nou kapab ere anmezir ki nou espere pour en bon keksoz arive. (Iza. 30:18) Ki mannyer nou kapab zwaye? I annan kat keksoz ki kapab ed nou.

KI OU KAPAB FER POUR OU ZWAYE ANMEZIR OU ESPER ZEOVA?

Konsantre lo bann bon keksoz ki pe arive dan ou lavi. Tou dilon son lavi, Lerwa David ti’n vwar en kantite move keksoz. (Ps. 37:35) Kantmenm sa, i ti dir: “Reste trankil devan Zeova e esper avek pasyans. Pa bezwen ankoler avek sa zonm ki reisi realiz son bann move plan.” (Ps. 37:7) David ti aplik sa konsey par konsantre lo bann promes Zeova. I ti osi rekonesan pour tou bann bon keksoz ki Zeova ti fer pour li. (Ps. 40:5) Si nou osi nou  konsantre lo bann bon keksoz ki pe arive dan nou lavi olye lo nou bann problenm, nou pou vwar li pli fasil pour esper Zeova.

Servi tou loportinite pour loue Zeova. Ekriven Psonm 71, ki aparaman ti David, ti dir Zeova: “Mon pou kontinyen espere. Mon pou loue ou plis ankor.” (Ps. 71:14) Ki mannyer i ti pou loue Zeova? I ti pou koz lo Zeova avek lezot e sant bann kantik pour loue Zeova. (Ps. 71:16, 23) Parey David, nou kapab trouv lazwa anmezir ki nou esper Zeova. Nou loue Zeova ler nou partisip dan sa travay predikasyon, ler nou koz lo Zeova avek nou zanmi ek fanmir e ler nou sant bann kantik. Laprosenn fwa ki ou sant en kantik, reflesir byen lo parol sa kantik e lo lafason ki son parol i fer ou zwaye.

Rod lankourazman par pas letan avek ou bann frer ek ser. Ler David ti fer fas avek bann difikilte, i ti dir Zeova: “Devan bann dimoun ki fidel avek ou, mon pou annan lespwar dan ou non.” (Ps. 52:9) Nou osi nou kapab ganny ankouraze avek nou bann frer ek ser pandan renyon oubyen dan predikasyon me osi ler nou pas letan avek zot dan bann moman detant.—Rom. 1:11, 12.

Ranforsi ou lespwar. Psonm 62:5 i dir: “Mon esper an silans pour Bondye parski mon lespwar i sorti kot li.” I vreman enportan ki nou asire ki bann promes Zeova pou vin vre, sirtou si lafen pa vin dan sa letan ki nou pe ekspekte. Nou bezwen asire ki bann promes Zeova pou vin vre menm si i kapab ki nou bezwen esper pour en kantite letan. Nou kapab ranforsi nou lespwar par etidye Parol Bondye. Par egzanp, nou kapab etidye bann profesi, etidye lafason ki bann liv Labib i an armoni avek kanmarad e etidye bann keksoz ki Zeova i dir konsernan li. (Ps. 1:2, 3) Osi, nou bezwen kontinyen “priye an armoni avek lespri sen” pour nou kapab kontinyen annan en bon lanmitye avek Zeova anmezir ki nou esper li akonplir son promes konsernan lavi eternel.—Zid 20, 21.

Parey Lerwa David, nou bezwen asire ki Zeova i vey lo tou bann ki pe esper Li e i demontre lanmour fidel anver zot. (Ps. 33:18, 22) Kontinyen esper Zeova avek pasyans par konsantre lo bann bon keksoz ki pe arive dan ou lavi, par loue li, par rod lankourazman avek ou bann frer ek ser e par ranforsi ou lespwar.