Kyɛ Jehoova naŋ boɔrɔŋ ka te maŋ dire kannyiri a kyɛnloo a te ta saŋa na oŋ na wa maale yelzaa. Ananso la wala oŋ boɔrɔ ka te maŋ erɛ lɛ? Boŋ na baŋ soŋ te ka te taa popeɛloŋ kyɛ naŋ kyɛnlɛ?

ANANSO LA WALA KA JEHOOVA BOƆRƆ KA TE MAŊ KYƐNLƐ?

A Baabole yeleeŋ ka: “Kyɛ Jehoova di la kannyiri a kyɛnlɛ ka o soŋ yɛ, o na vaa iriŋ a zo yɛ nembaaloŋ. Bonso Jehoova eɛ dantorii Naaŋmen. Noba na zaa naŋ di kannyiri a kyɛnloo na taaɛ popeɛloŋ.” (Aiz. 30:18) Gyuumine na naŋ da erɛ tokpeɛne na la ka Aizeeya da sɛge a yɛlɛ ŋa ko. (Aiz. 30:1) Kyɛ yelmeŋɛ deme mine da poɔ la ba poɔŋ, azuŋ a yɛlɛ ŋa da ko baŋ teɛretɔ. A yelbie ŋa naŋ korɔ la Jehoova yelmeŋɛ puorebiiri teɛretɔ zenɛ ŋa.

Azuŋ aseŋ ka te di kannyiri a kyɛ kyɛnlɛ bonso Jehoova meŋ di la kannyiri a kyɛ kyɛnlɛ. O biŋ la wagre kaŋa oŋ na de a donfaa ŋa waneŋ o baaraa, azuŋ o kyɛnlɛŋ ka a lɛ bebiri na ane a wagre ta sɛre kyɛ ka o e lɛ. (Mat. 24:36) A lɛ saŋa na a na wa pɛleŋ ka yɛlɛ na zaa a Dɛɛvul naŋ yel kyaare Jehoova ane O puorebiiri na eɛ zirii. A lɛ saŋa o na iree Setaana ane bana na zaa naŋ are o puoriŋ na bare, kyɛ o na taa la “nembaaloŋ ne [te].”

Kyɛ pampana ŋa yɛŋ, aminekaŋaŋ Jehoova koŋ iri te yelkpeɛne bare, kyɛ o eŋ teŋ faŋa ka te na baŋ taa la popeɛloŋ a kyɛ kyɛnlɛ. Aŋa lɛ na Aizeeya naŋ yel na, te na baŋ taa la popeɛloŋ a kyɛ kyɛnlɛ ka yelsoŋ kaŋa e. (Aiz. 30:18) a Wala teŋ na baŋ e nyɛ a popeɛloŋ ŋa? Yɛlɛ anaare mine na baŋ soŋ teŋ.

LƐ TEŊ NA BAŊ E TAA POPEƐLOŊ KYƐ NAŊ KYƐNLƐ

Teɛrɛ yelsonne na naŋ erɛ ho zemmo poɔŋ na. Naa Deevid da tuoree yelfaare yaga zaa o zemmo zaa poɔŋ. (Yiem. 37:35) Kyɛ o da sɛgɛɛŋ ka: “Taŋ ho noɔre Jehoova nimitɔɔreŋ di kannyiri a mãã ho meŋɛ a kyɛnloo. Ka hooŋ wa nyɛ dɔɔ kaŋa naŋ erɛ o daware yɛlɛ a nyɛrɛ nimitɔɔre gaabo ta wa vɛnɛ ka ho suuri ire.” (Yiem. 37:7) Deevid meŋ da de la a lɛ kawane ŋa toŋ neŋ toma a da de o teɛroŋ zaa  eŋ noɔre na Jehoova naŋ da eŋ ka o na faa oŋ na. O niŋe meŋ da paɛŋ yaga zaa ane maaloo na zaa oŋ da nyɛ yi Jehoova zie na. (Yiem. 40:5) Ka teneeŋ meŋ maŋ teɛrɛ yelsonne na naŋ erɛ te zemmo poɔŋ kyɛ iri te teɛroŋ yi te yelkpeɛne eŋɛŋ, a na eɛ mɔlɔ ko te ka te kyɛnlɛ Jehoova.

Moɔ̃ nimiri a pugiro Jehoova. Deevid da sɛgɛɛ Yieme 71 a da yelko Jehoova ka: “Kyɛ maaŋ yɛŋ naŋ na kyɛnlɛ boŋ; N na de la pugibu a poɔ ho pugibu na poɔŋ.” (Yiem. 71:14) Wala oŋ da e pugi Jehoova? O maŋ yelee Jehoova yɛlɛ korɔ noba mine a kyɛ yiele puubu yiele a pugiro Jehoova. (Yiem. 71:16, 23) Aŋa Deevid, te meŋ na baŋ taa la popeɛloŋ a kyɛ kyɛnlɛ Jehoova. Te maŋ korooŋ puubu ka teneeŋ wa manna a duorisoŋ korɔ noba, a manna o yɛlɛ korɔ te booree deme ane te zɔmenne, ane ka teneeŋ wa yiele te Puoruu yiele na. Ka hooŋ wa yiele te puoruu yiele na, maŋ teɛre a yelbie yɛlɛ soŋ zaa a nyɛ lɛ aŋ maŋ korɔ bo popeɛloŋ.

Maŋ vɛŋ ka ho yɔɔmine eŋnɛ bo faŋa. Saŋa na Deevid naŋ da wa tuoro yelkpeɛne na, o da yelko la Jehoova ka: “N tamaa na be la ho yuori eŋɛŋ . . . ho neŋpɛgiyiriba poɔŋ.” (Yiem. 52:9) Te meŋ na baŋ nyɛ la faŋa emmo ka teneeŋ wa laŋna neŋ te yɔɔmine, a lammozie aneŋ a naaŋ moɔloo poɔŋ yoŋ naane, kyɛ ka te neŋ baŋ wa lantaa ka te pɛle te niŋe gba, te na baŋ nyɛɛ faŋa emmo yi be.—Uro. 1:11, 12.

Eŋ ho teɛretɔ na faŋa. Yieme 62:5 yeleeŋ ka: “Yelmeŋɛ zaa, N na mãã la N meŋɛ a kyɛnlɛ Naaŋmen bonso o zie la ka N tamaa yire.” A eɛ nimizeɛ ka te taa teɛretɔ, agaŋaazaa ka a donfaa ŋa baarooŋ ba wa wagre na teŋ da kaara soriŋ ka o wa na. Aseŋ ka te taa sagediibu ka Jehoova nɔ-ennee zaa na nyɛɛ eebo meŋɛmeŋɛ lɛ zaa teŋ na kyɛnle a kɔɔre seŋ. Ka teneeŋ boɔrɔ ka te teɛretɔ na e kpeɛŋaa, aseŋ ka te zanna Naaŋmen Yelbiri na. Aŋa mannoo poɔŋ, te na baŋ zannɛɛ yɛlɛ na zaa a Baabole naŋ yel biŋ ka a na eŋ na, ane lɛ a Baabole poɔ yɛlɛ zaa naŋ kyaare taa na. (Yiem. 1:2, 3) Ane meŋ, aseŋ ka te naŋ moɔ̃ niŋe a “puoro a vooroŋ soŋ poɔ” ka lɛ vɛŋ ka te neŋ Jehoova niiloŋ soma, a kyɛ kyɛnlɛ ka o wa paale noɔre na o naŋ eŋ ka o na ko teŋ nyɔvore naŋ ba taa baaraa na.​—Gyud. 20, 21.

Aŋa Naa Deevid, taa sagediibu ka Jehoova maŋ kaara la bana na zaa naŋ kyɛnloo na a maŋ wulo yelmeŋɛ nɔmmo a korɔ ba. (Yiem. 33:18, 22) Moɔ̃ nimiri a di kannyiri a kyɛnlɛ Jehoova, a de ho teɛroŋ zaa eŋ yelsonne na naŋ erɛ ho zemmo poɔŋ na, a pugiroo, a nyɛrɛ faŋa emmo a yire ho taaba zie, a kyɛ eŋnɛ ho teɛretɔ na faŋa yaga zaa.