Nde to̱ na nika, Yehova a mapula ná jenge̱le̱ ponda ńena a te̱se̱no̱ o bo̱le̱ mitakisan. Ońola nje e? Nje pe̱ ye ná yongwane̱ biso̱ niponda jeno̱ jenge̱le̱ mo̱ e?

OŃOLA NJE YEHOVA A MAPULANO̱ NÁ JENGE̱LE̱ E?

Bibe̱l e makwala ná: “Ońola nika Yehova a menge̱le̱ ná a we̱le̱ bwea bińo̱ ndedi, nika nde a te̱mno̱ omo̱ń o lee̱le̱ bińo̱ muyao. Ebanja Yehova e nde Loba la te̱me̱ la sim, bonam na be̱se̱ ba pite̱ na mo̱.” (Yes. 30:18) Be byala ba Yesaya be ta nde bombwea Bonayuda ba pamo. (Yes. 30:1) Nde be byala be ta pe̱ be bola Bonayuda bena ba ta jemea dipita. Be byala be mabola pe̱ baboledi ba Yehova ba jemea dipita we̱nge̱.

Jangame̱n so̱ jenge̱le̱ ońolana Yehova pe̱ e o jenge̱le̱. A te̱se̱ ponda a me̱nde̱no̱ wana su la yen ebe̱yed’a mambo, e pe̱ jenge̱le̱ ná bo buńa na ni ponda ba ye. (Mat. 24:36) O ni ponda, e me̱nde̱ so̱ je̱ne̱ne̱ ná bwē ná mambo Diabolo a to̱pino̱ te̱nge̱ne̱ Yehova na baboledi bao me nde mpoṅ. A me̱nde̱ so̱ ńamse̱ Satan na be̱se̱ bena ba masue̱le̱ mo̱, nde a me̱nde̱ “lee̱le̱ [biso̱] muyao.”

Obiana ni ponda e mapo̱, yen ebe Yehova a si me̱nde̱ bo̱le̱ mitakisan masu, nde a mabola biso̱ mbaki ná je ná di be̱ bonam niponda jeno̱ jenge̱le̱. Ka nje te̱ Yesaya a kwalino̱, je ná di be̱ bonam niponda jeno̱ jenge̱le̱ lambo la bwam. (Yes. 30:18) a Nje ye ná yongwane̱ biso̱ o be̱ bonam e? Mambo mane̱i me ná mongwane̱ biso̱.

NE̱NI BE̱ BONAM NIPONDA JENO̱ JENGE̱LE̱

O̱nge̱le̱ nde mambo ma bwam. Kiṅe̱ David e̱n mambo ma bobe jita o longe̱ lao. (Mye. 37:35) Nde a tili ná: “Yoke̱ye̱ wame̱ne̱ na Yehova na pī, o we̱le̱ dipita lo̱ngo̱ na mo̱; o si linga ońola moto nu matombwane̱ o mao mangea, nu matongwe̱le̱ myano mao ma bobe.” (Mye. 37:7) David mo̱me̱ne̱ a we̱le̱ ma malea o ebolo ebanja a ta o̱nge̱le̱ ponda ye̱se̱ dikaki la Loba la sunga mo̱. A ta pe̱ o̱nge̱le̱ minam me̱se̱ a tano̱ a mákusane̱ Yehova. (Mye. 40:6) Biso̱ pe̱ jo̱nge̱le̱ te̱ mambo ma bwam di be̱nno̱ o longe̱, o mulopo ma jo̱nge̱le̱  mambo ma bobe ma dinge̱le̱ biso̱, e me̱nde̱ be̱ biso̱ lambo di bo̱bi o jenge̱le̱ Yehova.

Sesa Yehova ponda ye̱se̱. Mutiled’a Myenge 71 ńena ńe nde David yen ebe, a langwedi Yehova ná: “Nde mba na si mese̱le̱ dipita lam tom, na mabenga pe̱ sesa wa.” (Mye. 71:14) Ne̱ni a sesino̱ Yehova e? A langwedi bato bape̱pe̱ bebolo ba Yehova, a lo̱ngea pe̱ mo̱ myenge m’esese. (Mye. 71:16, 23) Kapo̱ ka David, je ná di be̱ muńe̱nge̱ niponda jeno̱ jenge̱le̱ Yehova. Di masesa mo̱ ke̱ je o dikalo, o longe̱ lasu la buńa te̱, na ke̱ di malo̱ngo̱ myenge masu. Ngedi nipe̱pe̱ o malo̱ngo̱no̱ mwenge masu mō̱, no̱ngo̱ ponda o dutea ońola byala bao.

Ese̱le̱ ná bonasango na bonańango ango̱ bembe̱ wa. Ke̱ e o lembe̱ mitakisan, David a langwedi Yehova ná: “Na mapandise̱ dina lo̱ngo̱ oboso ba badubedi bo̱ngo̱.” (Mye. 52:11) Bonasango na bonańango asu be ná bembe̱ biso̱, seto̱ buka te̱ o ndongame̱n asu to̱ ke̱ je o dikalo, nde ke̱ di matombise̱ pe̱ ponda na babo̱ o longe̱le̱ ńolo.—Rom. 1:11, 12.

Ouse̱ dipita lo̱ngo̱. Di malanga o Myenge 62:6 ná: “Na Loba mo̱me̱ne̱ nde mudī mam mweno̱ na pī; na mo̱ nde jongwane̱ lam di mawano̱.” Ye mweńa jita ná di be̱ne̱ dipita le ngińa, sepo̱n yete̱na di me̱ne̱ biana su le o jindea po̱ buka nje jo̱nge̱le̱no̱. Jangame̱n be̱ mbaki ná makaki ma Yehova ma me̱nde̱ londa, to̱ e be̱ nde ná yā pond’a bwaba jeno̱ jenge̱le̱. Je ná jouse̱ dipita lasu ke̱ di mokwa Eyal’a Loba, k’eyembilan bedinge̱ bena be londi, mulatako mwe oteten a kalat’a Bibe̱l, na mambo mena Yehova a bīse̱no̱ jombwea mo̱me̱ne̱. (Mye. 1:2, 3) Jangame̱n pe̱ benga “kane̱ o mudī musangi” ná di kombe̱ mulatako ma bwam na Yehova, niponda jeno̱ jenge̱le̱ ná dikaki lao la longe̱ la bwindea di londe.—Yuda 20, 21.

Ka kiṅe̱ David, be̱ mbaki ná Yehova a matata ba bena ba pite̱ na mo̱, a malee̱le̱ pe̱ babo̱ ndol’ao ńa jemea. (Mye. 33:18, 22) Benga so̱ jenge̱le̱ Yehova, o̱nge̱le̱ nde mambo ma bwam, sesa mo̱, ese̱le̱ na bonasango ango̱ bembe̱ wa, o benge pe̱ jouse̱ dipita lo̱ngo̱ la tiki.