Nka, Jehova bena koow kɛ wagati tigitigi min na, a b’a ɲini an fɛ an ka muɲu k’o makɔnɔ. Mun na do? K’an to o makɔnɔni na, mun lo be se k’an dɛmɛ ka to ninsɔndiya la?

MUN NA JEHOVA B’A ƝINI AN FƐ AN KA KƆNƆNI KƐ?

Bibulu ko: “Masaba be waati dɔ le kɔnɔna k’aw dɛmɛ, a bena wili ka makari aw la. Bari, Masaba Ala tilennin lo. Mɔgɔ minw bɛɛ b’u jigi la a kan, olu dagamuna!” (Ezayi 30:18). Ezayi tun y’o kumaw fɔ Yahutu tulogwɛlɛnw lo ye (Ezayi 30:1). Nka Yahutu kantigi dɔw tun b’u cɛma ani o kumaw ye jigiya di u ma. O kumaw be jigiya di Jehova sagokɛla kantigiw fana ma bi.

O la, an ka ɲi ka muɲu ka kɔnɔni kɛ sabu Jehova be muɲuna ka kɔnɔni kɛ. A ye wagati tigitigi dɔ lo latigɛ o min na a bena duniɲa nin halaki ani a be kɔnɔni kɛra o loon, n’a lɛri ka se (Mat. 24:36). O wagati la, bɛɛ bena a ye ko Sutana ye ngalon lo tigɛ ka la Jehova ani a sagokɛlaw kan. Minw be tugura Sutana kɔ, olu wo, Sutana wo, Jehova bena u bɛɛ halaki pewu. Nka, a bena ‘makari an na.’

Sanni o cɛ, n’a sɔrɔ Jehova tɛna sin k’an ka gwɛlɛyaw ban. Nka, a b’an hakili sigi ko k’an to kɔnɔni na, an be se ka ninsɔndiya. I ko Ezayi y’a fɔ cogo min na, n’an be koo ɲuman dɔ makɔnɔna, an be se ka ninsɔndiya (Ezayi 30:18). a An be se k’o ninsɔndiya sɔrɔ cogo di? Koo naani be se k’an dɛmɛ.

MUN LO BE SE K’AN DƐMƐ KA KƆNƆNI KƐ NINSƆNDIYA LA?

Koo ɲuman minw be kɛra i ka ɲɛnamaya kɔnɔ, to ka miiri o la. Masacɛ Dawuda ye koo jugu caaman ye a ka ɲɛnamaya kɔnɔ (Zab. 37:35). O bɛɛ n’a ta, a y’a sɛbɛ ko: “I hakili sigi Masaba ɲakɔrɔ, ka kɔnɔni kɛ a fɛ. Mɔgɔ min ka koo be ɲa, i kana dimi o kɔrɔ. I kana dimi kojugukɛla kɔrɔ.” (Zab. 37:7). Dawuda yɛrɛ y’o ladili sira tagama. Jehova tun ye layidu min ta a ye ko a bena a kisi, a tora ka miiri o la. Jehova ye koo ɲuman minw  bɛɛ kɛ a ye, a y’a waleɲuman lɔn fana o kosɔn (Zab. 40:6). Koo ɲuman minw be kɛra an ka ɲɛnamaya kɔnɔ, n’an fana tora ka miiri o la sanni ka miiri an ka gwɛlɛyaw la, a bena nɔgɔya an ma ka Jehova makɔnɔ.

Tɛmɛ sababuw bɛɛ fɛ ka Jehova tando. A be komi Dawuda lo ye Zaburuw 71nan sɛbɛ. A y’a fɔ Jehova ye ko: “Ne kɔni, ne jigi bena to ele lo kan. Ne bena to k’i tanu kudayi.” (Zab. 71:14). A tun be Jehova tando cogo di? A tun be a kofɔ tɔɔw ye ani ka tandoli dɔnkiliw la a ye (Zab. 71:16, 23). I ko Dawuda, an be se ka Jehova makɔnɔ ninsɔndiya la. An b’a tando waajuli la, an ka barow la ani an ka tandoli dɔnkiliw sababu fɛ. N’i be Masaya dɔnkili dɔ lara, miiri a kɔnɔnakumaw na koɲuman ani a filɛ u b’i ninsɔn diya cogo min na.

A to i balimaw k’i jija. Tuma min na gwɛlɛyaw tun be Dawuda kan, a y’a fɔ Jehova ye ko: “Ne na ne jigi da i tɔgɔ kan i ka senumaw ɲɛ kɔrɔ.” (Zab. 52:11, Bible senuma). An fana be se ka jijali sɔrɔ an balimaw fɛ lajɛnw ni waajuli la ani n’an be ɲɛnagwɛra n’u ye.—Ɔrɔm. 1:11, 12.

I ka jigiya barika bonya. Zaburuw 62:6 b’a fɔ ko: “Ne bena n ɲamalɔ Ala kelenpe gɛrɛfɛ, bari ne be jigi sɔrɔ o yɔrɔ la.” Walisa ka kɛ ni jigiya barikaman ye, an ka ɲi ka la a la kosɔbɛ ko an jigi be min na, o bena dafa. O kɔrɔtanin lo kosɔbɛ sanko ni duniɲa nin laban ma se joona i ko an tun b’a miirila cogo min na. An mana Jehova ka layiduw dafali makɔnɔ ka mɛɛn cogo o cogo, an ka ɲi ka la a la kosɔbɛ ko u bena dafa. An be se k’an ka jigiya barika bonya n’an be to ka Ala ka Kuma sɛgɛsɛgɛ. Misali la, kiraya kuma minw bɛɛ dafara ani cogo min na Bibulu sɛbɛbagaw tɛ ɲɔgɔn sɔsɔ, miiri o la. Miiri k’a filɛ fana Jehova ye koo minw bɛɛ fɔ a yɛrɛ koo la (Zab. 1:2, 3). An ka to ka “Ala daali Nii Senuman barika la” fana walisa ka to ka jɛnɲɔgɔnya teriman kɛ n’a ye. An ka to k’o kɛ k’an to kɔnɔni na walisa a ye layidu min ta ɲɛnamaya banbali koo la, o ka dafa.—Zude 20, 21.

I ko masacɛ Dawuda, la a la ko minw be Jehova makɔnɔna, a b’a janto olu la ani a be u minɛ ni kanuya kantigiman ye (Zab. 33:18, 22). To ka koo nunu kɛ walisa ka muɲu ka Jehova makɔnɔ: Koo ɲuman minw be kɛra i ka ɲɛnamaya kɔnɔ, to ka miiri o la, to ka Jehova tando, a to i balimaw k’i jija ani i be ni jigiya ɲuman min ye, o barika bonya.