Kop Inemesịt Nte Osụk Enyenede Ime Ebet Jehovah
NDI ọdọn̄ fi ndikụt ini emi Jehovah edikpọride kpukpru idiọkn̄kpọ ifep, onyụn̄ anam kpukpru n̄kpọ ẹdi mbufa? (Edi. 21:1-5) Idịghe se ẹbobụp! Edi ndika iso nnyene ime mbet Jehovah isimemke ndusụk ini, akpan akpan ekpedi mfịna ke esịm nnyịn. Se idoride enyịn ndinyene ekpebịghi akan nte ikekerede, esịt nnyịn ekeme ndidọn̄ọ.—N̄ke 13:12.
Kpa ye oro, Jehovah oyom inyene ime ibet enye anam se enye oyomde ndinam ke ini emi enye ekenịmde. Ntak emi enye oyomde ibet enye? Nso ikeme ndin̄wam nnyịn ikop inemesịt nte isụk ibetde enye?
NTAK EMI JEHOVAH OYOMDE IBET ENYE?
Bible ọdọhọ ete: “Jehovah eyetie ebet ndifọn mbufo mfọn, enye oyonyụn̄ adaha ada nditua mbufo mbọm. Koro Jehovah edi Abasi emi ekpede edinen ikpe. Kpukpru mbon oro ẹtiede ẹbet enye ẹyekop inemesịt.” (Isa. 30:18) Etop Isaiah oro ekenyene mme Jew oro ẹkesọn̄de ibuot akpan akpan. (Isa. 30:1) Edi ama enyene ndusụk mme Jew emi ẹkesọn̄ọde ẹda ẹnam n̄kpọ Abasi, ndien etop oro ama anam mmọ ẹnyene idotenyịn. Etop oro anam mbon emi ẹsọn̄ọde ẹda ye Abasi mfịn n̄ko ẹnyene idotenyịn.
Ntre, ana inyene ime ibet Jehovah sia enye n̄ko ke enyene ime ebet ndinam se enye ọkọn̄wọn̄ọde. Jehovah enịm ini emi enye edisobode idiọk ererimbot emi, enye ke onyụn̄ ebet usen ye hour oro ẹdisịm. (Matt. 24:36) Ini oro ama esịm, ẹyenen̄ede ẹkụt ke kpukpru se Devil okodoride Jehovah ye mbon emi ẹkponode Jehovah ẹdi nsu. Ekem Jehovah oyosio Satan efep onyụn̄ osobo owo ekededi emi adade ye enye. Edi enye ‘ayatua nnyịn mbọm.’
Kan̄a ke emi, Jehovah ekeme ndiyak se ifịnade nnyịn aka iso odu, edi enye anam idiọn̄ọ ke imekeme ndikop inemesịt nte isụk ibetde enye. Ekeme ndidi enyene eti n̄kpọ emi ọdọn̄de nnyịn, m̀mê idoride enyịn ke eyetịbe. Imekeme ndikop inemesịt ke adan̄aemi ibetde n̄kpọ oro etịbe kpa nte Isaiah eketịn̄de. (Isa. 30:18) a Nso idin̄wam nnyịn ikop utọ inemesịt oro? N̄kpọ inan̄ emi ẹkeme ndin̄wam.
NTE IKEMEDE NDIKOP INEMESỊT KE ADAN̄AEMI IBETDE
Sịn ekikere ke nti n̄kpọ emi ẹtịbede ke uwem fo. Ndiọi n̄kpọ emi Edidem David okokụtde ke eyouwem esie ikedịghe ekpri. (Ps. 37:35) Kpa ye oro, enye ekewet ete: “Dop uyo ke iso Jehovah nyụn̄ bet enye ye ọkpọsọn̄ udọn̄. Kûyat esịt ye owo ekededi eke okụtde unen ke usụn̄ esie, ye owo eke anamde ekikere idemesie.” (Ps. 37:7) David ke idemesie ama anam item esie oro. Nte enye akanamde oro ekedi enye ndisịn ekikere ke nte Jehovah ọn̄wọn̄ọde ndiyan̄a enye. Enye ama onyụn̄ ama kpukpru nti n̄kpọ emi Jehovah akanamde ọnọ enye. (Ps. 40:5) Edieke nnyịn n̄ko isịnde ekikere ke nti n̄kpọ emi ẹtịbede ke uwem nnyịn utu ke ndiyak mme mfịna emi ẹsịmde nnyịn ẹmen nnyịn ẹmen, ayafiak emem nnyịn utom ndibet Jehovah.
Da ifet ekededi emi enyenede toro Jehovah. Owo emi ekewetde Psalm 71 ọkọdọhọ Jehovah ete: “Nyebet kpukpru ini, nyonyụn̄ nnam itoro fo awak.” Ikere ke David ekewet Psalm oro. (Ps. 71:14) Didie ke enye editoro Jehovah? Enye eyetịn̄ aban̄a Jehovah ọnọ mbon en̄wen onyụn̄ ọkwọ itoro ọnọ Jehovah. (Ps. 71:16, 23) Ukem nte David, imekeme ndikop idatesịt ke adan̄aemi isụk ibetde Jehovah. Imesitoro Jehovah ini ikwọrọde ikọ, ke nneme emi inemede kpukpru usen, ye ke ini ikwọde mme ikwọ esop Abasi. Ama afiak ọkwọ ikwọ esop Abasi, nen̄ede tịm kere mme ikọ ikwọ oro ye nte mmọ ẹnamde idem enem fi.
Yak nditọete fo ẹsọn̄ọ fi idem. Ini mme mfịna ẹkesịmde David, enye ọkọdọhọ Jehovah ete: “[Nyodori] enyịn ke enyịn̄ fo, . . . ke iso mbon emi ẹsọn̄ọde ẹda ye afo.” (Ps. 52:9) Idịghe ke mbono esop m̀mê ke ini ikade ukwọrọikọ kpọt ke nditọete nnyịn emi ẹsọn̄ọde ẹda ẹnam n̄kpọ Abasi ẹsisọn̄ọ nnyịn idem. Mmọ ẹsisọn̄ọ nnyịn idem n̄ko ini itiede kiet inem idem esịt.—Rome 1:11, 12.
Nam se idin̄wamde fi enen̄ede enyene idotenyịn. Psalm 62:5 ọdọhọ ete: “O ukpọn̄ mi dop bet Abasi, koro idotenyịn mi otode enye.” Edi ata akpan n̄kpọ nnyịn nditetịm ndori enyịn ke Abasi akpan akpan ekpedi utịt isọpke idi nte ikekerede. Ana inen̄ede inịm ke se Jehovah ọn̄wọn̄ọde eyetịbe inamke n̄kpọ m̀mê idibet ebịghi didie. Se ikemede ndinam man inen̄ede inyene idotenyịn edi nnyịn ndikpep Ikọ Abasi. Nte isụk ikpepde, imekeme ndikere nte mme prọfesi Bible ẹsude ye nte mme andikewet Bible mîkedịghe enye emi etetịn̄ esịn, enye eken etetịn̄ osio. Imekeme ndikere n̄ko mme n̄kpọ emi Jehovah ayararede aban̄a idemesie. (Ps. 1:2, 3) N̄kpọ en̄wen edi ke oyom ika iso “[ibọn̄] akam ke edisana spirit” man ika iso idi ufan Jehovah ke adan̄aemi ibetde enye ọnọ nnyịn nsinsi uwem emi enye ọkọn̄wọn̄ọde.—Jude 20, 21.
Ukem nte Edidem David, nen̄ede nịm ke Jehovah eyese aban̄a mbon emi ẹbetde Enye, ke enye esinyụn̄ owụt ke ima mmọ nsinsi ima. (Ps. 33:18, 22) Ka iso kop inemesịt nte osụk enyenede ime ebet Jehovah. Nte edinamde oro edi afo ndisịn ekikere ke nti n̄kpọ emi ẹtịbede ke uwem fo, nditoro Jehovah, ndiyak nditọete fo ẹsọn̄ọ fi idem, ndinyụn̄ nnam se idin̄wamde fi enen̄ede enyene idotenyịn.
a Ke usem Hebrew emi ẹkedade ẹkabade itie Bible oro, ikọ emi ẹkabarede nte “nditie mbet” ekeme n̄ko ndiwọrọ “ndinen̄ede ndọn̄ owo ndikụt nte n̄kpọ etịbede m̀mê owo ndidori enyịn ndikụt nte n̄kpọ etịbede.” Oro owụt ke nte ọdọn̄de nnyịn ndikụt nte edinyan̄ade nnyịn idịghe esen n̄kpọ.
