Naaso, Jehovah pɛ dɛ yenya abotar na yɛtweɔn kesi dɛ ɔbɛyɛ dza ɔaka no wɔ ber a ɔsɛ mu. Ebɛnadze ntsi na Jehovah pɛ dɛ yenya abotar tweɔn no? Ebɛnadze na obotum aboa hɛn ma yɛdze enyigye aakɔ do atweɔn no?

EBƐNADZE NTSI NA JEHOVAH PƐ DƐ YENYA ABOTAR TWEƆN NO?

Bible no ka dɛ: ‘Jehovah bɔtweɔn, ama ɔaayɛ adom ama hom, dɛm ntsi na wɔbɛma no do, ama oeehu hom mbɔbɔr: na Jehovah yɛ atsɛntsenenee Nyankopɔn; enyigye nye hɔn a wɔtweɔn no nyinara.’ (Isa. 30:18) Isaiah kaa dɛm asɛm yi kyerɛɛ Jewfo a nna hɔn aso yɛ dzen no. (Isa. 30:1) Naaso nna Jewfo no mu binom dzi Jehovah nokwar, na dɛm asɛm yi maa wonyaa enyidado. Jehovah n’asomfo anokwafo a yɛwɔ hɔ ndɛ so, asɛm a Isaiah kae yi ma yenya enyidado.

Dɛm ntsi, ɔsɛ dɛ yenya abotar tweɔn Jehovah, osiandɛ ɔno so enya abotar rotweɔn. Jehovah ahyɛ ber a ɔdze bɛsɛɛ dɛm wiadze bɔn yi, na ɔrotweɔn dɛ da na dɔn no bɔso. (Matt. 24:36) Sɛ dɛm ber no so a, ɔbɛda edzi ma obiara ehu dɛ sombo a Abɔnsam dze abɔ Jehovah nye n’asomfo no nnyɛ nokwar. Afei, obeyi Satan nye hɔn a wodzi n’ekyir no nyina efi hɔ koraa. Naaso Jehovah ‘bohu hɛn mbɔbɔr.’

Kesi dɛ dɛm aber no bɔso no, bi a Jehovah rinnyi ɔhaw a yehyia no mmfi hɔ, naaso ɔma hɛn awerɛhyɛmu dɛ yebotum dze enyigye atweɔn no. Dɛ mbrɛ Isaiah kae no, yebotum ama hɛn enyi agye aber a yɛrohwɛ kwan dzendzenndzen dɛ Jehovah bɛyɛ ndzɛmba pa ama hɛn daakye no. (Isa. 30:18) a Yebesi dɛn enya enyigye a ɔtse dɛm? Ndzɛmba anan yi botum aboa hɛn.

MBRƐ IBESI DZE ENYIGYE ATWEƆN

Dwendwen ndzɛmba pa a wo nsa aka no ho. Ɔhen David hun ndzɛmba bɔn pii no nkwa nda nyina. (Ndw. 37:35) Naaso ɔkaa dɛ: ‘Yɛ dzinn wɔ Jehovah mu, na tweɔn no abotar mu. Mma nnhaw woho wɔ nyimpa a ɔma ne tsirmsɛm bɔn ba mu no ntsi.’ (Ndw. 37:7) David nankasa dze asɛm a ɔkae no yɛɛ edwuma, na ɔdze n’adwen nyina sii enyidado a nna ɔwɔ dɛ wɔbɛgye no nkwa no do. Afei so, ɔdwendween ndzɛmba pa a Jehovah maa onyae no nyina  ho. (Ndw. 40:5) Hɛn so, sɛ yɛdwendwen ndzɛmba pa a hɛn nsa aka no ho, na yɛammfa hɛn adwen ennsi ɔhaw a yerihyia no do a, ɔbɛyɛ mberɛw ama hɛn dɛ yebenya abotar atweɔn Jehovah.

Kɔ do yi Jehovah ayɛw. Ɔbɛyɛ dɛ David na ɔkyerɛɛw Ndwom 71 no. Ɔkaa kyerɛɛ Jehovah dɛ: ‘Emi dze, mobɔtweɔn daa, na mada ho eyi wo ayɛw mbordo mbordo.’ (Ndw. 71:14) Nna ebɛnadze na ɔbɛyɛ dze eyi Jehovah ayɛw? Nna ɔbɛka Jehovah ho asɛm akyerɛ nkorɔfo na ɔatow ayɛyindwom ama no. (Ndw. 71:​16, 23) Hɛn so, aber a yɛrotweɔn Jehovah no, yebotum esuasua David na yaama hɛn enyi agye. Sɛ yɛyɛ asɛnka edwuma no a, yeyi Jehovah ayɛw. Afei so, sɛ yɛnye nkorɔfo ridzi nkɔmbɔ na yɛka Jehovah ho asɛm kyerɛ hɔn a, nna yeriyi no ayɛw. Adze fofor so a yebotum ayɛ dze eyi Jehovah ayɛw nye dɛ yɛbɔtow asafo ndwom. Ntsi aber biara a ebɔtow asafo ndwom no, ɔyɛ a tɔ wo bo ase na dwendwen mbrɛ no mu nsɛm no ka akoma na ɔhyɛ nkuran no ho.

Ma wo nuanom nhyɛ wo nkuran. Aber a David kɔr ɔhaw mu no, ɔkaa kyerɛɛ Jehovah dɛ: ‘Mobɔtweɔn wo dzin wɔ w’anokwafo no enyim.’ (Ndw. 52:9) Dɛmara na hɛn so, hɛn nuanom Christianfo a yɛnye hɔn som no botum ahyɛ hɛn nkuran. Wobotum ahyɛ hɛn nkuran wɔ asafo nhyiamu ase, asɛnka mu nye ber a yɛnye hɔn ehyia mu regye hɛn enyi no.—Rom. 1:​11, 12.

Hyɛ enyidado a ewɔ no mu dzen. Ndwom 62:5 ka dɛ: “Me kra yɛ komm hwɛ Nyankopɔn ara: na m’enyidado fi no hɔ.” No ho hia dɛ yɛhyɛ enyidado a yɛwɔ no mu dzen paa osiandɛ sɛ ewiei no ammba ntsɛm dɛ mbrɛ yɛhwɛ kwan no mpo a, ɔno bɛma yeenya abotar atweɔn. Ɔsɛ dɛ yenya gyedzi dɛ, sɛ ɔkyɛr dɛ dɛn ara mpo a, Jehovah no bɔhyɛ ahorow no bɛba mu ɔkwan biara do. Sɛ yesua Bible no a, obotum aboa hɛn ma yaahyɛ hɛn enyidado no mu dzen. Dɛ nhwɛdo no, nsɛm a Bible no kae a ne nyina aba mu, mbrɛ Bible akyerɛwfo no hɔn nsɛm hyia nye nsɛm a Jehovah ma yehu fa no ho no, ibotum adwendwen ho. (Ndw. 1:​2, 3) Afei so, aber a yɛrotweɔn dɛ Jehovah bɛma hɛn nsa aka daa nkwa a ɔdze ahyɛ hɛn bɔ no, ɔsɛ dɛ yɛkɔ do ‘bɔ mpaa wɔ sunsum krɔnkrɔn mu’ mbrɛ ɔbɛyɛ a yɛnye no ntamu ebusuabɔ no bɔkɔ do ayɛ papa.—Jude 20, 21.

Ɔsɛ dɛ yɛyɛ hɛn adze tse dɛ Ɔhen David na yenya awerɛhyɛmu dɛ Jehovah hwɛ hɔn a wɔdze abotar rotweɔn no no do, na ɔda no nokwar dɔ edzi kyerɛ hɔn. (Ndw. 33:​18, 22) Dɛm ntsi, kɔ do ara nya abotar tweɔn Jehovah na dwendwen ndzɛmba pa a wo nsa aka no ho. Afei so, kɔ do yi Jehovah ayɛw, ma wo nuanom Christianfo nhyɛ wo nkuran na hyɛ enyidado a osi pi a ewɔ no mu dzen aber nyina.