E vinakata o Jiova meda waraki koya tiko ena vosota me vakayacora na nona inaki ena kena gauna. Na cava e vinakata kina o Jiova meda wawa? Cava meda cakava meda marautaka noda wawa tiko?

CAVA E VINAKATA KINA O JIOVA MEDA WAWA?

E kaya na iVolatabu: “E wawa tiko ga ena vosota o Jiova me yalovinaka vei kemuni, ena tu vakarau o koya me lomani kemuni. Ni Kalou lewadodonu o Jiova. Era marau o ira kece na waraki koya tiko.” (Aisea 30:18) Na vosa qori a tukuni taumada vei ira na Jiu dau be. (Aisea 30:1) Ia era tiko eso na Jiu yalodina, e vakacegui ira sara ga na vosa qori. E vakacegui keda tale ga na dausokalou yalodina nikua.

E bibi meda wawa tiko ni o Jiova tale ga e wawa tiko ena vosota. E tiko na nona gauna lokuci ena vakarusa kina na ituvaki ca ni vuravura qo, sa waraka sara tiko ga na siga qori kei na kena aua. (Maciu 24:36) Ena gauna qori, ena vakalasui kina na veibeitaki nei Setani me baleti Jiova kei ira na qaravi koya. Ena vakarusai Setani kei ira kece na nona ito, ia ena “lomani” keda o Jiova.

Ena rairai sega ni vakaotia o Jiova na veivakatovolei nikua, ia e vakadeitaka nida rawa ni marau nida wawa tiko. E kaya kina o Aisea eda rawa ni marau nida waraka tiko me yaco na veika vinaka. (Aisea 30:18) a Eda rawa ni marau vakacava? Dikeva mada qo e va na ka meda cakava.

MARAU NIDA WAWA TIKO

Vakasamataka na veika vinaka e yaco ena nomu bula. E levu sara na ka ca e raica o Tui Tevita ena nona bula. (Same 37:35) Ia e vola: “Galu tiko ga ena mata i Jiova qai waraki koya ena vakanuinui. Kua ni rarawataka na tamata e rawaka ni vakayacora na nona lalawa.” (Same 37:7) E muria na ivakasala qori o Tevita ni kauaitaka ga na yalayala i o Jiova me vakabulai koya. Kena ikuri, e vakavinavinakataka nona dau vakalougatataki koya o Jiova. (Same 40:5) Ke da vakasamataka tale ga na ka vinaka e yaco ena noda bula, ia eda sega ni kauaitaka vakasivia na  veika ca e yaco wavoliti keda tiko, ena rawarawa noda waraki Jiova.

Vakacaucautaki Jiova e veigauna. E rairai vola o Tevita na ika71 ni Same. E kaya vei Jiova: “Au na wawa tiko ga, au na kuria na nomuni vakacaucautaki.” (Same 71:14) Ena vakacaucautaki Jiova vakacava o Tevita? Qori ni tukuna yani na veika me baleti Jiova, e vakacaucautaki koya tale ga ena sere. (Same 71:16, 23) Me vakataki Tevita, eda rawa tale ga ni marau nida waraki Jiova tiko. Eda vakacaucautaki koya ena noda cakacaka vakaitalatala, noda veivosaki e veisiga, kei na noda lagata na sere ni sokalou. Na gauna tarava o lagata kina na sere ni sokalou, vakasamataka vakabibi na qaqana qai marautaka.

Veimaliwai kei ira na mataveitacini mera vakayaloqaqataki iko. Ni sotava o Tevita na ituvaki dredre, e kaya vei Jiova: “E matadra na nomuni tamata yalodina, au na vakanuinui ena yacamuni.” (Same 52:9) Na cava eda vulica? E rawa tale ga nira vakayaloqaqataki keda na tacida yalodina ena gauna ni soqoni kei na cakacaka vakaitalatala, vaka kina ena so tale na gauna eda veimaliwai kina.—Roma 1:11, 12.

Me dei na nomu inuinui. E kaya na Same 62:5: “Au waraka galugalu na Kalou ni vu mai vua na noqu vakabulai.” Na dei ni noda inuinui e okati kina na ka eda vakanamata kina, ke sega mada ga ni totolo mai na icavacava me vaka eda namaka. Meda nuidei ni veika kece e yalataka o Jiova ena yaco dina, se mani vakacava na dede ni noda wawa tiko. Eda rawa ni vaqaqacotaka na noda vakabauta nida vulica na Vosa ni Kalou, ya na parofisai, na veisemati ni nodra itukutuku na dauvola iVolatabu, kei na itukutuku matailalai me baleti Jiova. (Same 1:2, 3) E bibi tale ga meda “masu” tiko ga ena “veiuqeti ni yalo tabu” me dei kina na noda veiwekani kei Jiova nida waraka tiko na kena vakayacori na nona yalayala me baleta na bula tawamudu.—Juta 20, 21.

Me vakataki Tui Tevita, eda nuidei ni o Jiova e vakaraici ira na waraki koya tiko, e vakaraitaka tale ga na dei ni nona loloma vei ira. (Same 33:18, 22) Mo waraki Jiova tiko ga ena vosota, ni o vakasamataka na veika vinaka e yaco ena nomu bula, ni o vakacaucautaki koya, ni o veimaliwai kei ira na mataveitacini mera vakayaloqaqataki iko, me dei tale ga na nomu inuinui.