Mé, Jéova ka doumandé nou pran pasyans kanmenm épi antann jou i désidé aji-a. Poukisa i ka doumandé nou fè sa ? É kisa ki pouvé idé nou antann ké tchò kontan ?

POUKISA JÉOVA KA DOUMANDÉ NOU PRAN PASYANS ÉPI ANTANN ?

Labib-a ka di : « Jéova ka pran pasyans é i ka antann pou aji ké konpasyon ké zòt é i ké lévé pou fè zòt mizérikòrd. Paské Jéova sa roun Bondjé lajistis. Sa-ya ki ka kontinyé antann li, yé tchò kontan » (Is. 30:18). Izayi té ka palé bay Jwif-ya yé tèt té dou (Is. 30:1). Mé sa menm paròl-ya té ka bay Jwif-ya ki té fidèl roun èspwar. É i ka bay sa-ya ki ka adoré Jéova ké fidélité jòdla roun èspwar osi.

Donk, nou divèt pran pasyans épi antann paské Jéova ka pran pasyans épi ka antann. I prévwè roun moman prési pou i fini ké sa sistèm-an é i ka antann sa jou-a ké sa lèr-a rivé (Mat. 24:36). Lò sa ké rivé, tout moun ké byen wè ki tousa Satan di asou Jéova ké so sèrvitèr-ya, a manti. É Jéova ké pouvé fin ké Satan ké tout sa ki ka maché ké li-ya. Mé nou menm, i ké « fè [nou] mizérikòrd ».

Anvan sa jou-a rivé, pitèt Jéova pa ké tiré tout éprèv nou ka jwenn. Parkont, i ka promèt nou ki nou pouvé antann li ké tchò kontan. Kou Izayi di l’, menm si nou présé wè promès Jéova fè nou fèt, nou tchò pouvé kontan (Is. 30:18 a). Annou wè kat lidé ki ké idé nou gen lajwa annan nou tchò.

SA KI POUVÉ IDÉ NOU ANTANN KÉ TCHÒ KONTAN

Mété to lidé asou bon bagaj ki ka rivé to annan to lavi. Pannan tout so lavi, rwa David wè roun patché moun fè méchansté (Ps. 37:35). Pourtan, men konsèy i bay-a : « Pa di anyen douvan Jéova épi antann li ké pasyans. Pa lévé faché kont moun-an ki ka rivé fè mové bagaj i ka kalkilé » (Ps. 37:7). David li menm swiv sa konsèy-a. I mété so lidé asou promès Jéova té fè li. I té promèt sové li. I té gen rékonésans osi pou tout bèl bénédiksyon Bondjé té ka bay li (Ps. 40:5). Si nou menm osi nou ka mété nou lidé asou bon bagaj  ki ka rivé nou annan nou lavi, é ki nou pa ka lésé problèm-yan néyé nou, sa ké pi fasil pou nou antann Jéova.

Louwé Jéova chak fwa to pouvé fè l’. Men sa moun-an ki ékri Psaume 71, nou ka pansé ki a té David, di Jéova : « Kanta pou mo menm, mo ké kontinyé antann ; mo ké louwé to ankò plis » (Ps. 71:14). Kouman David té ka louwé Jéova ? I té ka palé moun-yan di li é i té ka chanté pou li (Ps. 71:16, 23). Kou David, nou menm osi, nou pouvé louwé Jéova pou antann li ké tchò kontan. Nou ka louwé l’ lò nou ka préché, lò nou ka palé nou zanmi ké nou fanmi di li é lò nou ka chanté nou kantik. Prochen kou to ké chanté roun kantik, to pouvé pran tan byen réfléchi asou paròl chanté-a é asou kouman yé ka fè to tchò kontan.

Pran kouraj òbò to frè ké sò-ya. Lò David té annan éprèv, i di Jéova : « Douvan to sèrvitèr-ya ki fidèl, mo ké mété mo èspwar annan to non » (Ps. 52:9). Nou menm osi, nou frè ké sò-ya ké ankourajé nou si nou ka pasé tan ké yé pannan réinyon-yan ké prédikasyon-an mé osi lò nou ka anmizé ké yé (Rom. 1:11, 12).

Fè èspwar to ganyen-an vin pi fò. Annan Psaume 62:5, nou ka li : « Mo ka antann Bondjé san mo pa di anyen, paské a li ki ka bay mo èspwar. » Pou èspwar nou gen-an fò, a pou nou sir ki nou ké gen sa nou ka antann-an. Sa enpòrtan èspésyalman si nou té ka pansé ki lafen sa monn-an té ké vini pi bònò. Menm si a pou nou antann lontan anvan promès Jéova fèt, a pou nou sir ki yé ké fèt vré, asiré pa pitèt. Nou pouvé étidyé Labib pou fè nou èspwar vin pi fò. Parèkzanp, nou pouvé fouyé pou konnèt plis asou profési-ya, nou pouvé pran plézi gadé kouman sa-ya ki ékri Labib ka tonbé dakò roun ké ròt épi réfléchi asou tousa Jéova anprann nou asou li (Ps. 1:2, 3). Annou kontinyé « priyè ké lèspri sen-an » osi pou nou lanmityé ké nou Bondjé rété fò toupannan nou ka antann i bay nou lavi pou tout-tan, kou i promèt nou fè l’ (Jude 20, 21).

Kou David, a pou to sir ki Jéova ka gadé pou sa-ya ki ka antann li é i ka montré yé so lanmou fidèl (Ps. 33:18, 22). Donk, kontinyé pran pasyans épi antann Jéova ké tchò kontan. Pou fè sa, mété to lidé asou bon bagaj ki ka rivé to annan to lavi, louwé Jéova, pran kouraj òbò to frè ké sò-ya épi fè èspwar to ganyen-an vin pi fò.