Sõò, Jìhóvà gbĩ́ kọ é ĩ̀ìmà vaá elàẹ̀ banàèe dọ̀ọ̀mà kà lèlà tṍó ea beè noo gè labví láb. Éé ní ea náa vaá à gbĩ́ kọ é naa vó é? Éé ní ea é láá nvèè bá nèi kọ é ié ẹ́ẹ́-ẹẹ̀ nyíe tṍó e gé élá bànàe ẽ́?

ÉÉ NÍ EA NÁA VAÁ JÌHÓVÀ À GBĨ́ KỌ É ELÀẸ̀ BANÀÈE Ẽ́?

Kpá Káí kọ́ọ̀: “Jìhóvà dì ea gé ĩimà élá bànà tṍó ea é íe tóè sàn kilma ló boolo, àé aa boo vaá iéi sàn nyíe ló. Boo béè kọọ̀ Jìhóvà dú Bàrì lé bèèla. Nyíè kọ̀láá gbò e bà gé ĩimà elá bànàe á ẹẹ.” (Àìz. 30:18) Àìzáíà beè ló gbò belí nè pá Júù e ba beè ié agẹ togó. (Àìz. 30:1) Sõò gbò belí beè naa kọọ̀ sìgà pá Júù e bà bọ́ló dẹ̀lẹ̀ nyíé boo á ié ból dẽesĩ́. Gbò belí náa nagé kọọ̀ gbò e bà gé fã̀ Jìhóvà mm̀ bọ́ọ̀ló dẹ̀lẹ̀ nyíé boo deè nieí á íe ból dẽesĩ́.

Vóà naa, èé íè ge ĩ̀ìmà elá, boo béè kọọ̀ Jìhóvà dì ea gé ĩimà elá. À íe tṍó ea beè noo gè nvèèmà kùbmà ló nakà bàlà booí, vaá à dì ea gé élá bànà deeá nè tṍóá. (Máát. 24:36) Kà lèlà tṍóá, àé palàge dọa bàlà kẽ kọọ̀ Sétàn beè kpó kyáá bel ló Jìhóvà nè gbò e bà gé fã́e. Tṍóá, àé kyọsĩ́ Sétàn nè gbò e bà nveèe sãa kúm, sõò àé íe “sàn nyíe ló [beele].”

Kátogóí, Jìhóvà náa é lọl dénè bẹẹ tã̀àgã̀, sõò à náa kọ é agala boo kọọ̀ èé láá ié ẹ́ẹ́-ẹẹ̀ nyíe tṍó e dì e gé éláí. Dẹ̀ẹ̀a boo bel e Àìzáíà beè kọ̀, èé láá ié ẹ́ẹ́-ẹẹ̀ nyíe tṍó e gé élá àbèè tṍó e gé ból dẽesĩ́ lé nu ea gé dú sĩ́. (Àìz. 30:18) a Éé ní eé náa kọbé è íe nakà ẹ́ẹ́-ẹẹ̀ nyíeí ẽ́? Nee ténì kà nú ea é láá nvèè bá nèií.

NÚ EA É NÁA KỌỌ̀ NYÍÉI Á ẸẸ TṌÓ E GÉ ÉLÁ

Olòó bugi togó boo gbò lé nu ea ni náaa ní ló. Méné Dévìd beè tení bá gã́bug tã̀àgã̀ mm̀ dùm. (Ps. 37:35) Sõò, a beè emí kọọ̀: “Pĩigã́ gbẹá kèsĩ́ Jìhóvà vaá ò kilsĩ́ gè elá bànàe. Ó gá nvèè sṹng ló nen tṍó e nu ea beè noo íe togó.” (Ps. 37:7) Dévìd beè tú dùùlà bá deè tṍá siimá tóm vaá ká bùlà gbẹẹ́  boo a ból dẽesĩ́ gè ié dùùà. Nyíée beè ẹẹ ló dénè nu e Jìhóvà ni náa nèe. (Ps. 40:5) Beè beele ká nágé bùlà gbẹẹ́ boo gbò lé nu ea ni náaí ló vaá née káà bùlà gbẹẹ́ boo bẹẹ tã̀àgã̀, àé valií ló gè elá bànà Jìhóvà.

Tú kọ̀láá kà nèà deè eo íè lèèmà Jìhóvà. À dọa bàlà kẽ kọọ̀ Dévìd ní ea beè emí kpá Psalm 71 togó é, vaá a beè kọ́ nè Jìhóvà kọọ̀: “M̀ é kilsĩ́ gè elá; M̀ é kpáá palàge lèèlà ni.” (Ps. 71:14) Mósĩ́ deè ní ea é lèèlà Jìhóvà ẹ? Àé láá kọ́ nú ea kil ló Jìhóvà nè dõona gbò vaá ọlí sọ́l lèèmàe. (Ps. 71:​16, 23) Èé láá nó Dévìd vaá ié ẹ́ẹ́-ẹẹ̀ nyíe tṍó e gé élá bànà Jìhóvà. È ólò lèèlàẹ buù dee tṍó e gé zọ gbò nen loá bel, tṍó e gé kọ́ kpẹ̀a, nè tṍó e gé ọ́lí sọ́l nònù. Tṍó eo gé ọ́lí sọ́l nònù, àé dú lé be ò pãane tṍ ló gbò moǹ bel ea di mm̀ sọ́lá ea é náa kọọ̀ nyíe ni á ẹẹ.

Tú bel sìà kpóó ló ea aa bá pá vígà. Tṍó e Dévìd beè kpeesĩ́ ló tã̀àgã̀, a beè kọ́ nè Jìhóvà kọọ̀: “Gbẹá zẹ̀ẹ̀ gbò e bà bọ́ló dẹ̀lẹ̀ nyíé boo, Nda é íe ból dẽesĩ́ mm̀ o bée, boo béè kọ à dú lé.” (Ps. 52:9) Níì áá gbẹá nònù àbèè tṍó e gé kọ́ kpẹ̀a ní e pá vígà é láá sièi kpóó lóé nì, è ólò ié nágé sìà kpóó ló tṍó e zọọ̀ pá vígà ié tṍó bõ̀séi.​—Róm̀ 1:​11, 12.

Agẹlẹ ló o ból dẽesĩ́. Kpá Psalm 62:5 kọ̀ọ̀: “Nda pĩ́ì elá bànà Bàrìboo béè kọọ̀ ẹlẹ ní e nda ból dẽesĩ́ ẽ́.” À palàge dú bíi kọ é agẹlẹ ló bẹẹ ból dẽesĩ́, bọọ èlmà tõ̀ò beè kùbmà náa valẹ̀bá bã ló bàlà booí belí bé e géè ẹbmà dẽe naa. È agàlà boo kọọ̀ Jìhóvà é ḿm̀-mè gbò nú ea beè zìgà kọ̀láá bé e gã́bug tṍó téní ló naa. Èé láá agẹlẹ ló bẹẹ ból dẽesĩ́ tení dú ló gè nó Kpá Káí vaá bugi togó boo bé e gbò kọ́ọ̀ bùlà Bàrì ea di m ni ḿḿ-má naa, bé e gbò nú e ba beè emí m gbááá ló ene naa, nè gbò nú e Jìhóvà kọ́ kilma ló a bá. (Ps. 1:​2, 3) À dú nágé bíi kọ é kilsĩ́ gè ‘nè deè nyómá káí kọ á tulèi mm̀ bẹẹ tã̀àgã ló’ kọbé è láá kilsĩ́ gè zọ̀ Jìhóvà ié kà lé gbaa ló vaá elá dọ̀ọ̀mà tṍó ea é ḿm̀-mè a zìgànù kilma ló dùm e bè náa tá ea beè zigà nèiá.​—Júùd 20, 21.

Dì belí Méné Dévìd, agala boo kọọ̀ Jìhóvà dì ea gé ẹb nú ea kil ló gbò e bà gé élá bànàe vaá à íe vulè ea kyãa mm̀ bọ́ọ̀ló dẹ̀lẹ̀ nyíé boo kìlmà vá ló. (Ps. 33:​18, 22) Kilsĩ́ gè ĩ̀ìmà elá bànà Jìhóvà tení dú ló gè ká bùlà gbẹẹ́ boo gbò lé nu ea ni náa ní ló, lèèlàẹ, tú bel sìà kpóó ló ea aa bá pá vígà, vaá ò kilsĩ́ gè agẹlẹ ló o ból dẽesĩ́.