Punn Jehova tem ghoddoun haddttolo to vell ieta meren ami pasiensan tachi vatt polloilʼli Jehovak zai. Kiteak? Ani tednam meren ami koxim khuxal ravonk xoktat?

AMI KITEAK PASIENSAN VATT POLLOILʼLI JEHOVAK ZAI?

Bible sangta: “Tumcher upkar korunk Jehova pasiensan ravla, tumkam doia dakhounk to uttʼttholo. Karonn Jehova nitivont Dev, tachi vatt polloun asat tim soglim khuxal!” (Iz. 30:18, NW) Tor Izaiasan him utram Jehovachem aikonk toiar naslolea Judevank boroilim tem khorem. (Iz. 30:1) Punn hea utrantlean thoddea visvaxi Judevank bhorvonso mellʼllo. Ani aizui Jehovachea visvaxi sevokank hea utrantlean bhorvonso melltta.

Tor Jehova pasiensan vatt polloita mhunnttoch, ami-i pasiensan vatt pollounk zai. Hea noxttea sonvsaracho nas korunk tannem ek vell tharaila, ani tea disachi ani vellachi to vatt polloita. (Mt. 24:36) To vell ietolo tednam Soitanan Jehovacher, toxench tachea sevokancher ghatlole sogle arop fott mhunn kollon ietolem. Ani tednam Soitan, toxench taka sangat ditat tankam Jehova nas korun uddoitolo. Punn aplea lokank to ‘doia dakhoitolo.’

Jehova atam amche tras kaddun uddoina. Punn to te kaddun uddoitolo to dis ieta meren, ami khuxal ravonk zata. Zoxem Izaiasan mhunnttlem ki borem zaunk ravtat tednam pasun ami khuxal ravonk zata. (Iz. 30:18, NW) a Tor ami koxim khuxal ravonk xoktat? Ami char vatto polloum-ia.

JEHOVACHI VATT POLLOITANA AMI KHUXAL KOXIM RAVONK XOKTAT?

Tumchea jivitant kitem borem ghoddtta tacher dhean diat. Raza Davidan aplea jivitant zaitem vaittponn polloilem. (St. 37:35) Tori astana tannem boroilem: “Sorvespora mukhar thondd-xant rav ani Tacher visvas dovor . . . naddbudhi ievjitat tanchi porva korum naka.” (St. 37:7) Ani Davidan hench kelem. Apleak salvar kortolo mhunn Jehovan ji bhas dilʼli, tacher tannem dhean dilem. Toxench, Jehovan dilʼlea soglea boreponna pasot to upkari aslo. (St. 40:5) Tor ami kitem xikonk zata? Amchea bhonvtonnim kitem  vaitt ghoddtta tacher nhoi, punn kitem borem zata tacher ami dhean dilem zalear, Jehovachi vatt polloit ravonk amkam sompem zatolem.

Tumkam melltta ti dor ek sondhi uzar korun Jehovachi vakhannʼnni korat. Stotr 71 chodd korun Davidan boroilem, ani tea Stotrant tannem oxem mhunnttlem: “Hanv kodinch visvas soddcho na, odik-odik Tuji stuti korit ravtolom.” (St. 71:14) Tor Davidan Jehovachi stuti koxi keli? To dusream lagim Jehova vixim uloitalo ani taka vakhannʼnnechim gitam gaitalo. (St. 71:16, 23) Tor Davida bhaxen ami pasun Jehovachi vatt polloitat toxim, tachi vakhannʼnni korun khuxal zaunk zata. Ami porgottnni kortat tednam, amchea ixttam ani famili lagim Jehova vixim uloitat tednam, ani gitam gaitat tednam Jehovachi vakhannʼnni kortat. Tor fuddlea pavtti tumi ek Raj-git gaitat tednam tea gitantlim utram ani tantuntlean tumkam koxi khuxalkai melltta tacher dhean diat.

Bhav-bhoinnam sangata vell sarun urba melloun gheiat. Davidak oddchonneancho fuddo korunk poddlo tednam tannem oxem mhunnttlem: “Tuzo mog kortoleam mukhar Tum bhov konnvallo mhonn hanv porgottʼtolom.” (St. 52:9) Tor ami fokot mittingent ani porgottnnent nhoi, punn her vellar pasun bhav-bhoinnam sangata vell sartana urba melloun gheunk zata.—Rom. 1:11, 12.

Tumcho bhorvonso ghott korat. Stotr 62:5 sangta: “Devachea gopant xant rav: To ekloch mhozo Bhorvanso!” Tor amkam ghott bhorvonso asop gorjecho. Ani khas korun xevott ieunk ami chintlolea poros chodd vell lagta, oxem amkam dista tednam. Kitlo-i kallav zalear pasun Devacheo bhasaunneo purnn zatoleoch mhunn amcho bhorvonso ghott asonk zai. Tor Devachea Utracho obheas korun ami amcho bhorvonso ghott korunk zata. Udharonnak, tantunt dilʼleo bhasaunneo koxeo purnn zaleo, Bible veg-vegllea munxamnim boroilo tori astana tantunt asloli mahiti eka-mekak koxi zuddloli asa, ani Jehovan tantunt aplea vixim kosli mahiti dilea tacher ami obheas korunk zata. (St. 1:2, 3) Toxench amkam sasnachem jivit ditolo mhunn Devan dilʼli bhas to purnn korisor tachea sangata amchi ixttagot ghott dovrunk, ami “povitr xoktechea margdorxona pormonnem magnnem” korit ravonk zai.—Jud. 20, 21.

Apli pasiensan vatt polloitat, tankam Jehova polloita ani aplo visvaxi mog dakhoita mhunn ami Davida bhaxen khatri dovrunk zata. (St. 33:18, 22) Tor amchea jivitant kitem borem ghoddtta tacher dhean diun, Jehovak vakhannʼnni diun, bhav-bhoinnam thaun urba melloun gheun, ani amcho bhorvonso ghott korit ravon pasiensan ami Jehovachi vatt polloit ravom-ia.