Upéicharõ jepe, Jehová oipota ñanepasiénsia ha ñahaʼarõ pe tiémpo haʼe omoĩ vaʼekue osolusiona hag̃ua entéro mbaʼe. ¿Mbaʼérepa Jehová oipota jajapo upéva? ¿Ha mbaʼépa ñanepytyvõta jasegi hag̃ua javyʼa ñahaʼarõ aja?

¿MBAʼÉREPA JEHOVÁ OIPOTA ÑAHAʼARÕ?

La Biblia heʼi: “Jehová ningo ipasiénsia, haʼe ohaʼarõ hína ohechauka hag̃ua imbaʼeporãha penendive, haʼe opuʼãta ha pendeporiahuverekóta. Jehová ningo ihústo, ovyʼa enterove umi osegíva oreko esperánsa hese” (Is. 30:18). Isaías heʼi vaʼekue upéva umi judío hovaʼatãitévape (Is. 30:1). Péro upe tiémpope oĩ vaʼekue umi judío ifiélva Jehovápe, ha la Isaías heʼi vaʼekue omeʼẽ chupekuéra esperánsa ha ñandéve avei ko tiémpope.

Upéicharõ, ¿mbaʼérepa ñanepasiénsia vaʼerã ñahaʼarõ aja? Pórke Jehová voi ohaʼarõkuaa. Haʼe orekóma peteĩ día ha óra ohundi hag̃ua ko múndo aña, ha ohaʼarõ hína og̃uahẽ upe moménto (Mat. 24:36). Ág̃a og̃uahẽ vove upe día, ojekuaa porãitereíta Satanás ijapu hague Jehová ha isiervokuéra kóntrape. Upépe Jehová ohundíta Satanáspe ha entéro umi omoirũvape chupe. Péro isiervokuérape oprometéma vaʼekue voi ‘oiporiahuverekotaha’ chupekuéra.

Ñahaʼarõ aja ikatu hína Jehová ndoipeʼapaitéi ñandehegui umi ñane provlemakuéra, péro si oasegura ñandéve ikatuha javyʼa. Proféta Isaías heʼíma vaʼekue voi vyʼápe ikatuha ñahaʼarõ umi mbaʼe porã hiʼãitémava ñandéve oiko (Is. 30:18). a ¿Péro mbaʼépa ikatu jajapo upearã? Jahechamína 4 mbaʼe ikatúva ñanepytyvõ.

¿MBAʼÉICHAPA IKATU JAVYʼA ÑAHAʼARÕ AJA?

Ñapensa meme umi mbaʼe iporãvare. Rréi David ohecha vaʼekue heta mbaʼe vai ijerére oikove aja pukukue (Sal. 37:35). Upéicharõ jepe heʼi vaʼekue: “Ehaʼarõ kirirĩháme Jehová renondépe, nepasiénsia ha ehaʼarõ la haʼe ojapótava. Ani rerrenega umi iñañáva osẽ haguére ijidéape” (Sal. 37:7). David voi osegi vaʼekue ko konsého heʼíva. ¿Mbaʼéichapa? Haʼe imanduʼa meme vaʼekue Jehová opromete hague osalvataha chupe. Upéicha rupi omombaʼe entéro mbaʼe Jehová ojapo vaʼekue hesehápe (Sal. 40:5). Ñande avei ñapensa meméramo umi mbaʼe porã oikóvare ñande  jerére, ha ndahaʼéi la ivaívare añónte, ifasilvéta ñandéve jasegi hag̃ua ñahaʼarõ Jehovápe.

Jaaprovechákena opa oportunida ñamombaʼeguasu hag̃ua Jehovápe. Amalisia David oskrivi vaʼekue pe Salmo 71 ha haʼe heʼi vaʼekue Jehovápe: “Che katu asegíta ahaʼarõ nde chepytyvõ, ha upépe katu el dóvle rombotuicháta” (Sal. 71:14). ¿Mbaʼépa haʼe ojapo vaʼekue omombaʼeguasu hag̃ua Jehovápe? Oñeʼẽ ótrope hese ha opurahéi chupe (Sal. 71:​16, 23). Ñande avei ikatu jasegi David ehémplo ha ñañeʼẽ Jehováre japredika jave, ñañeʼẽ jave ñane amigokuérandi, ñane hentekuérandi, ha japurahéi jave chupe g̃uarã. Upévare ág̃a japurahéi jey vove umi kántiko, ñañatende porã mbaʼéichapa ñanemokyreʼỹ la heʼíva. Péicha jasegíta javyʼa ñahaʼarõ aja Jehová ñanepytyvõ.

Jahasa tiémpo ñane ermanokuérandi. David iprovléma hetárõ guare heʼi vaʼekue Jehovápe: “Che siémpre romombaʼeguasúta. Umi iñeʼẽrendúva renondépe, ahechaukáta arekoha esperánsa nde rérare” (Sal. 52:9). Davídpe omokyreʼỹ vaʼekue umi ótro Jehová siervokuéra pórke ohasa tiémpo hendivekuéra. Ñande upéichata avei jahasáramo tiémpo ñane ermanokuérandi rreunionhápe, predikasiónpe ha oimeraẽ ótro moméntope (Rom. 1:​11, 12).

Jasegíkena jareko esperánsa. Salmo 62:5 heʼi: “Che areko esperánsa Ñandejárare. Trankílo porãnte ahaʼarõta haʼe chepytyvõ”. ¿Mbaʼérepa iñimportantete ñandéve g̃uarã jareko esperánsa? Pórke ikatu oime ñahaʼarõma kuri ensegída og̃uahẽ pe fin, péro ndoikói gueteri upéva. Upévare jajerovia vaʼerã Jehová katuete okumplitaha ipromesakuéra, tekotevẽramo jepe ñahaʼarõ upearã. ¿Ha mbaʼépa ikatu jajapo jasegi hag̃ua jareko esperánsa? Jastudia Ñandejára Ñeʼẽ, jahecha mbaʼéichapa oñekumplíma umi profesiakuéra, mbaʼéichapa noñokontradesíri umi oskrivi vaʼekue la Biblia, ha mbaʼépa ñanemboʼe Jehovágui entéro koʼã mbaʼe (Sal. 1:​2, 3). Avei jasegi vaʼerã ñañemboʼe Jehovápe ha jajerure chupe ‘ijespíritu sánto’ ikatu hag̃uáicha jasegi jareko chupe ñane amígoramo ñahaʼarõ aja jahupyty pe jeikove opaveʼỹva (Jud. 20, 21).

Rréi David oĩ haguéicha segúro, ñande avei ikatu jajerovia Jehová omañaha umi ohaʼarõvare chupe ha ohechaukataha ohayhuha chupekuéra (Sal. 33:​18, 22). Upéicharõ jasegi hag̃ua ñanepasiénsia ha ñahaʼarõ Jehovápe, ñapensa memékena umi mbaʼe porã oikóvare ñande jerére, ñamombaʼeguasu Jehovápe, jahasa tiémpo ñane ermanokuérandi ha jasegíkena jareko esperánsa.