Ge Yehowa boti la to ma’ɛ tomea gura en ti a tum yɛla sansɛka n makɛ bo en. Beni n sɔi ti a bɔta ti to ita bala? Bem n wan basɛ ti to tara pupeelum se’em ma’a ti to gura la?

BENI N SƆI TI YEHOWA BƆTA TI TO GURA?

Baabule la yeti: ‘Yehowa ma’ɛ la amea gura ti a soŋɛ ya, a wan isige zɔ ya nimbɔ̃’ɔ. Se’ere n sɔi la Yehowa dela tontɔɔ gãkerɛ Naayinɛ. Pupeelum boi mɛ la nɛresɛba n kɔ’ɔn gura en la.’ (Isa. 30:18) Isaiah yuun gulesɛ yele wa bo la Yudadoma sɛba tuba n yuun kpa la. (Isa. 30:1) Ge yele wa yuun dela giilekpeŋere bɔ’ɔra Yudadoma sɛba n yuun kelum tara yelemɛŋɛrɛ la. Yele ana wa kpemeseri Yehowa yamesi n tari sakerɛ zina beere wa me giila mɛ.

Bala la, la nari ti to ma’ɛ tomea gura se’ere n sɔi la Yehowa ma’ɛ amea gura mɛ. Yehowa mi sansɛka ti a wan sa’am tingɔŋɔ wa, a me guri la de daarɛ la saŋa la. (Mt. 24:36) Sankaŋa la, la wan niɛ peelumi pa’alɛ Yehowa yamesi za’a ti Sitaana n tɔɣɛ Yehowa yele se’em la dela pumpɔreŋɔ. A nyaa wan sa’am Sitaana la sɛba woo n pa a poore la ge ‘zɔ to nimbɔ̃’ɔ.’

Ge sankaŋa n nan ka paɛ la, Yehowa ta’an kan yese to yeledaaŋɔ la za’a. Ge a basɛ ti to tara puti’irɛ ti to wan ta’an tara pupeelum ton kelum gura la. Wuu Isaiah n yele se’em la, to san kelum gura to wan tara pupeelum. (Isa. 30:18) To wan eŋɛ la wani ta’an tara pupeelum wa? Yɛla anaasi wa wan ta’an soŋɛ tɔ.

TON WAN EŊƐ SE’EM GURA LA PUPEELUM

Ti’isɛ yelesoma se’a n tabelɛ eŋɛ ho vom poan. Naba David yuun nyɛ putotuuma mɛ a vom dabesa za’a. (Ym. 37:35) Ge a yuun gulesɛ yeti: ‘Ana bãalam Yehowa nɛŋa ge ma’ɛ homea gura en. Da basɛ ti be’emdoma tarega la daana hɔ.’ (Ym. 37:7) David mea yuun dekɛ kã’aŋɔ la tum tuuma mɛ eŋa n yuun ti’iseri Yehowa n pu’ulum biŋe ti a wan soŋɛ en la. A puurɛ me yuun pee mɛ la yelesoma se’a woo ti Yehowa yuun eŋɛ bo en la. (Ym. 40:5) Tomam me san ti’isa yelesoma  se’a ti Yehowa eŋɛ bo to la ge da ba’ɛ ti’isa to yeledaaŋɔ la yele, la wan ana naana bɔ’ɔra tɔ ti to gura Yehowa.

Dekɛ yɔ’ɔ woo ti ho tara pɛɣɛ Yehowa. David n gulesɛ Yooma 71 la. A yuun yele Yehowa yeti: ‘Mam wan kɔ’ɔn gura hɔ; Mam wan pɛɣɛ hɔ, malum pɛɣɛ hɔ.’ (Ym. 71:14) A yuun pɛɣɛ Yehowa la wani? A yuun tɔɣɛ la Yehowa yɛla bo nɛreba ge me yuum pɛɣɛ en. (Ym. 71:​16, 23) Wuu David la, tomam me ta’an tara pupeelum gura Yehowa. To san mɔɔla yelesoma la bɔ’ɔra nɛreba, naɛ taaba sɔsera ge me yuuna tansugere la yuuma, la wan pa’alɛ ti to pɛɣeri en mɛ. Ho san yuuna tansugere la yuuma, ma’ɛ homea kelese yelebɛ’a la ge bisɛ lan bo’ori ho pupeelum se’em.

Basɛ ti mabiisi kpemese ho giila. Yeledaaŋɔ n yuun paɛ David la, a yuun yele Yehowa yeti: ‘Mam wan ze’ele birikindoma tiŋasuka pɛɣɛ ho yu’urɛ la.’ (Ym. 52:9) To san bɔna la to mabiisi la, ba wan ta’an kpemese to giila. To me san bɔna tansugere zamesegɔ poan, na’am mɔɔlegɔ poan bii to san naɛ taaba sɔsera, ba wan ta’an kpemese to giila.—Arom 1:​11, 12.

Basɛ ti ho beere sa’am puti’irɛ la ana kankaŋi. Yooma 62:5 yeti: ‘Mam ani bãalam gura la Naayinɛ se’ere n sɔi la, mam puti’irɛ boi la eŋa poan.’ La yele pakɛ mɛ ti to basɛ ti to beere sa’am puti’irɛ la ana kankaŋi, yele yele wuu ba’asegɔ la san ka wa’an kalam wuu tomam n ti’iseri ni se’em la. La nari ti to tara puti’irɛ ti, la nɔŋɛ la ana se’em me, to san ma’ɛ tomea gura, Yehowa pu’ulumbiŋ’a la wan sirum tum. To beere sa’am puti’irɛ la wan ta’an ana kankaŋi to san zamesa Baabule la. Makerɛ, ti’isɛ bisɛ Baabule yetɔɣebiŋ’a yɛla n makɛ taaba se’em la Yehowa n basɛ ti to baŋɛ a yɛla soŋa se’em. (Ym. 1:​2, 3) To ta’an kelum ‘zusa ti zilam vo’osum la’ soŋɛ tɔ ti to tara bɔnsoŋa la Yehowa ge kelum gura ti a pu’ulumbiŋ’a la za’a tum tuuma.—Yude 20, 21.

Wuu Naba David la, tara suure lua ti Yehowa nini kɔ’ɔn bɔna la sɛba n guri En la zuo ge ti A me ni eŋɛ pa’alɛ ti a nɔŋɛ ba mɛ. (Ym. 33:​18, 22) Kɔ’ɔn ma’ɛ homea gura Yehowa ge ti’isa yelesoma se’a ti a eŋɛ bo ho la, pɛɣera a yu’urɛ la, basɛ ti mabiisi kpɛmesa ho giila ge basɛ ti ho beere sa’am puti’irɛ la ana kankaŋi.